Aapa Atu i le Lalolagi Uma

O loo faaauau e uso o le Au Peresitene Sili ma le Korama a Aposetolo e Toasefululua la latou auaunaga o ni perofeta, tagatavaai, ma talifaaaliga, ma molimauina i le lalolagi atoa e uiga i le Toefuataiga o le talalelei ma faamanuiaga o le mulimuli i le Faaola. O nisi nei o mea ua latou ausia talu mai le konafesi aoao talu ai.

O Uso o le Au Peresitene Sili

Mo se aotelega o le auaunaga a Peresitene Russell M. Nelson talu mai le konafesi aoao talu ai, tagai i le itulau e 135.

I sana saunoaga i se iunivesite i Roma, Italia, sa saunoa ai Peresitene Dallin H. Oaks, Fesoasoani Muamua i le Au Peresitene Sili, o le saolotoga o tapuaiga e aumaia ai le tele o faamanuiaga i malo, ma sa ia uunaia tagata o le faatuatua e “saili ni auala e aoao ai mai le tasi ma le isi ma faamalosia ai malamalamaaga masani e taofia faatasi ai i tatou.”

Uso o le Korama a Aposetolo e Toasefululua

Sa auauna atu Peresitene M. Russell Ballard Peresitene M. Russell Ballard, Sui Peresitene, ma Jeffrey R. Holland ma Quentin L. Cook i Peretania Tele atoa, feiloai ma faifeautalai ma tagata o le Ekalesia. Sa auauna atu uma le toatolu i ni misiona i le Malo Aufaatasi a o talavou i latou, ma o Elder Holland ma Elder Cook o se soa.

Sa saunoa Elder David A. Bednar i se faigalotu i Ioritana. I le United Arab Emirates, sa ia feiloai ai ma taitai o le Siteki a Abu Dhabi ma asiasi atu i le eria o faaaliga lea o le a i ai se aso e tu ai se malumalu. I Bahrain, sa ia feiloai ai ma tagata o le Uarota a Manama ma faia se faigalotu mo le autalavou.

Na avea Elder D. Todd Christofferson ma uluai Aposetolo na asiasi i le Ripapelika o Gambia. Sa feiloai o ia ma le peresitene, lona faletua, ma le sui peresitene o le malo ma talanoaina se taumafaiga tuufaatasi i le va o le Ekalesia ma le faalapotopotoga fesoasoani a le faletua e fesoasoani ia i latou e le tagolima. Sa asiasi atu foi Elder Christofferson i Ivory Coast, Nigeria, ma Kana.

I le taimi o fonotaga ma aoaoga faamasani i Kolomupia ma Ekuatoa, sa manatua ai e Elder Neil L. Andersen le toatele o tagata o le Ekalesia ua maliliu ona o le KOVITI. Sa feiloai o ia ma faifeautalai, le 36 peresitene o misiona ma o latou faletua, ma taitai o le siteki, e tele ina tautatala faaSipaniolo. I se faigalotu i Kolomupia, sa ia saunoa ai e uiga i le faamalosia o faaipoipoga ma aiga.

I Panama, sa avea Elder Gary E. Stevenson ma uluai Aposetolo e asiasi i le motu o Carti Tupile i le San Blas Archipelago, i le itu o Guna Yala pe tusa ma le lua ma le afa itula mai le Aai o Panama.

Sa talanoa Elder Gerrit W. Gong ma le autalavou i Filipaina e uiga i le faia o faaiuga poto ma e uiga i le tauaveina i o latou luga o le suafa o Iesu Keriso. Sa feiloai o ia ma faifeautalai ma, i se faasalalauga o mea na tutupu i le atu Filipaina atoa, na lauga atu ai i talavou nofofua matutua.

I lona atunuu moni o Pasila, sa fautuaina ai e Elder Ulisses Soares talavou matutua e faatotonugalemu o latou olaga i le Faaola. Sa ia ta‘u atu i faifeautalai e faatino le faatuatua ia Iesu Keriso ma ia tumau mausali i le upumoni. I ni masina mulimuli ane, sa toe foi atu ai Elder Soares i Pasila e lauga i se mafutaga e uiga i le saolotoga o tapuaiga. Sa feiloai foi o ia ma le sui peresitene o le Ripapelika Tominiko ma le amepasa Kiupa i lena atunuu. E tasi le itu ma paranesi e fa a le Ekalesia i Kiupa.

I fonotaga faatekinolosi, sa saunoa atu ai Elder Dieter F. Uchtdorf i talavou, faifeautalai, ma taitai o le Ekalesia i Asia; o Elder Quentin L. Cook i talavou matutua i Eria o Europa, Europa Sasae, Aferika, ma Sasae Tutotonu; o Elder D. Todd Christofferson i talavou matutua e tautatala i le gagana Potukale; o Elder Neil L. Andersen i talavou matutua sa nonofo i Amerika Latina ma Sepania; o Elder Ronald A. Rasband i talavou matutua e tautatala faaPeretania; ma Elder Dale G. Renlund i talavou matutua e tautatala i le gagana Farani.