Mulimuli ia Iesu: Avea ma Sē e Faatupuina Le Filemu
O e faatupuina le filemu e le faalolololo; latou te faatauanau i le ala a le Faaola.
O’u uso e ma tuafafine pele, a o tatou feagai ma aso matautia o le faanunununu, fefinauaiga, ma, mo le toatele, o mafatiaga loloto, e tutumu o tatou loto i le faafetai lofituina mo lo tatou Faaola ma faamanuiaga faavavau o le talalelei toefuataiina a Iesu Keriso. Tatou te alolofa ia te Ia ma tatou te faalagolago ia te Ia, tatou te tatalo foi ia tatou mulimuli ia te Ia e faavavau.
O Le Luitau o Ala o Faasalalauga Faaagafesootai
O le aafiaga mamana o le initoneti o se faamanuiaga ma o se luitau foi, e tulaga ese i o tatou taimi.
I se lalolagi o faasalalauga faaagafesootai ma faiga televavave ua maua ai faamatalaga, ua mafai ona oo atu le leo o se tagata e toatasi i se tauaofiaga toatele naua. O lena leo, pe moni pe le moni, pe le faaituau pe faasausili, pe agalelei pe agaleaga, o le taimi foi lea e oo atu ai i le salafa o le lalolagi.
O mafaufauga aoga ma lelei e tuu i luga o faasalalauga faaagafesootai, e tele ina faalēano i ai, a o upu o le inoino ma le ita e tele ina faasoesā i o tatou taliga, pe o ni filosofia faapolotiki, tagata i talafou, po o manatu i le faama’i oti. E leai se tasi pe leai foi se mataupu, e aofia ai le Faaola ma Lana talalelei toefuataiina, e sao mai lenei tulaga faaagafesootai o leo fevaevaeai.
Avea ma Sē e Faatupuina le Filemu
O le Lauga i luga o le Mauga, o se feau mo tagata uma ae sa patino ona tuuina atu i soo o le Faaola, o i latou sa filifili e mulimuli ia te Ia.
Na aoao atu e le Faaola le ala e ola ai i lena taimi ma le taimi nei i se lalolagi ua tumu i le lē migao. “Amuia e faatupuina le filemu,” na Ia fetalai ai, “aua e ta’ua i latou o atalii o le Atua.”1
E ala i le talita o lo tatou faatuatua ia Iesu Keriso, o le a mafai ai ona avea i tatou ma e faatupuina le filemu, ma faatoilalo ai—o lona uiga e faatoafilemuina, faato’ato’a, pe tineia ai—ufanafana mu uma a le fili.2
A o tatou faia la tatou vaega, o Lana folafolaga e faapea, o le a ta’ua i tatou “o fanau a le Atua.” O tagata uma i le lalolagi o “tupuaga”3 mai le Atua, ae o le faaigoaina o “fanau a le Atua” e matuai tele atu sona uiga. A o tatou o mai ia Iesu Keriso ma osia feagaiga ma Ia, e avea i tatou ma “ana fanau” ma “suli i lona malo,”4 “o fanau a Keriso, o ona atalii, ma ona afafine.”5
E faapefea e se e faatupuina le filemu ona faatoafilemu ma faato’ato’a u fanafana mu? O le mea moni e le faia i le solomuli mai ē taufaatauvaaina i tatou. Ae, ia tumau lo tatou talitonu mautinoa i lo tatou faatuatua, faasoa atu ma le maumaututu o tatou talitonuga ae aua lava ma le ita po o le lotoleaga.6
Talu ai nei, i le mavae ai o le vaaia o se faaupuga malosi o se manatu na faitioina ai le Ekalesia, sa tali atu ai Reverend Amos C. Brown, o se taitai faaleatunuu o aia tatau a tagata ma o se faifeau o le Ekalesia Papatiso Lona Tolu i San Francisco:
“Ou te faaaloalogia le silafia ma le finagalo o le tamaalii na tusia na upu. E moni, e le tutusa o ma manatu.”
“Ou te faitaulia o se tasi o olioliga aupito sili i lo’u olaga le iloa o nei taitai [o le Ekalesia], e aofia ai ma Peresitene Russell M. Nelson. O i latou, i la’u fuafaatatau, o le faaa’oa’o o le taitaiga aupito sili ua i ai i lo tatou atunuu.”
Ona ia faaopoopo mai lea, “E mafai ona tatou tetee i le tulaga na i ai. E mafai ona tatou mumusu e aloaia mea lelei uma o loo tutupu nei. … Ae o ia faiga o le a le faamaloloina ai o tatou fevaevaea’iga faaleatunuu. … E pei ona sa aoao mai Iesu, tatou te le faaumatiaina le leaga i nisi leaga. Tatou te alolofa ma le limafoai ma ola ma le alofa mutimutivale, e oo lava ia i latou tatou te manatu o ni o tatou fili.”7
O Reverend Brown o se e faatupuina le filemu. Sa ia faato’ato’aina ma le toafimale ma le faaaloalo ia u fanafana mu. O e faatupuina le filemu e le faalolololo; latou te faatauanau i le ala a le Faaola.8
O le a se mea e aumaia ia i tatou le malosiaga i totonu e faatoafilemu ai, faato’ato’a, ma faatoilalo ia u fanafana mu o loo ta’i faasaga i upumoni tatou te faamemelo i ai? O le malosiaga e sau mai lo tatou faatuatua ia Iesu Keriso ma lo tatou faatuatua i Ana afioga.
“Amuia outou pe a latou upu leaga, … ma latou tua’ia pepelo outou i mea leaga uma ona o a’u.
“… Aua o i le lagi lo outou taui e tele; aua na faapea ona latou faasaua i perofeta e na muamua ia te outou.”9
O Le Taua o le Faitalia
E lua ni mataupu faavae taua e faatonufolau ai lo tatou manao ia avea o ni faatupu filemu.
Muamua, ua tuuina mai e lo tatou Tama Faalelagi i tagata taitoatasi lona faitalia tatau, faatasi ai ma le tomai e filifili ai lona lava ala.10 O lea faitalia o se tasi o meaalofa aupito sili a le Atua.
Lona lua, faatasi ai ma lenei faitalia, ua faataga ai e lo tatou Tama Faalelagi le “faafeagai o mea uma.”11 [Tatou] te “tofo i le oona, ina ia [tatou] iloa ai ona faataua le lelei.”12 E le tatau ona faateia ai i tatou i mea faafeagai. Tatou te aoao ia iloa le lelei mai le leaga.
Tatou te olioli i faamanuiaga o le faitalia, malamalama o le a tele i latou e le talitonu i mea tatou te talitonu i ai. O le mea moni, e toaitiiti i aso e gata ai o le a filifili e faatutotonu lo latou faatuatua ia Iesu Keriso i mea uma latou te mafaufau e fai.13
Ona o ‘anava a faasalalauga faaagafesootai, o se tasi o leo o le le talitonu e mafai ona alia’e mai o se anoano o leo lē lelei,14 ae tusa lava pe o se anoano o leo, tatou te filifilia lava le ala o ē faatupu filemu.
O Taitai a le Alii
O nisi ua manatu o le Au Peresitene Sili ma le Korama a Aposetolo e Toasefululua, e i ai faamoemoega faalelalolagi e pei foi o taitai faaupufai, pisinisi, ma faaleaganuu.
Peitai, e matuai ese lava le ala e tuuina mai ai o matou tiutetauave. E le palotaina pe filifilia i matou mai ni tusi talosaga. E aunoa lava ma ni tapenaga patino faapolofesa, e tofia ma faauuina i matou e tuu atu molimau i le suafa o Iesu Keriso i le lalolagi atoa seia i’u la matou manava. Matou te taumafai e faamanuia i e mama’i, o e tuulafoaiina, o e loto mafatia, ma e matitiva ma faamalosi le malo o le Atua. Matou te saili ia iloa le finagalo o le Alii ma folafola atu, aemaise ia i latou o e sailia le ola e faavavau.15
E ui o lo matou faanaunauga lotomaualalo ia faamamaluina ia aoaoga a le Faaola e tagata uma, o afioga a le Alii e ala mai i Ana perofeta e tele ina ese ma mafaufauga ma aga o le lalolagi. O le mea lava lea ua leva ona i ai.16
Na fetalai atu le Faaola i Ana Aposetolo:
“Afai e [inoino] mai le lalolagi ia te outou, ua outou iloa ua muamua ona inoino mai ia te au, i lona inoino ia te outou. …
“… Latou te faia nei mea uma … aua latou te le iloa o ia o lē na auina mai a’u.”17
Tausiga mo Tagata Uma
Tatou te alolofa ma tausia ma le faamaoni o tatou tuaoi uma, pe latou te talitonu pe leai e pei ona tatou talitonu i ai. Na aoao mai i tatou e Iesu i le faataoto o le Samaria Agalelei e faapea o i latou o talitonuga eseese e ao ona aapa atu ma le loto faamaoni e fesoasoani i soo se tasi e manaomia, avea ma e faatupuina le filemu, ma tulitulimatagau faamoemoega lelei ma le malualii.
Ia Fepuari, sa ta’ua i se faatalatomua o le Arizona Republic faapea, “O le tulafono ua autasia e ni vaega faaupufai e lua o loo lagolagoina e le Au Paia o Aso e Gata Ai o le a puipuia ai le au Arizona faafafine ma le fesiitai o itupa.”18
O i tatou, o Au Paia o Aso e Gata Ai, sa “fiafia e avea o se vaega o se soofaatasiga o faatuatuaga, pisinisi, tagata LGBTQ ma se aofaiga o taitai o e sa galulue faatasi i se agaga o le fetalitonua’i ma le faaaloalo moni.”19
Na fesili ma le faautauta Peresitene Russell M. Nelson i se tasi taimi, “Pe le mafai ona i ai laina tuaoi e aunoa ma le avea ma ni laina o taua?”20
Tatou te taumafai e avea ma “soo faatupu filemu o Iesu Keriso.”21
O Taimi e Le Tali Atu Ai
O nisi o osofaiga i le Faaola sa matuai taufaaleaga ma sa leai Sana tala. “O le au faitaulaga sili foi ma le au tusi upu … ua naunau e molitu o ia … ma tauemu ia te ia,” peitai “e le’i tali atu [Iesu] i se mea e tasi.”22 E i ai taimi pe a avea o se e faatupuina le filemu, o lona uiga tatou te teena le uunaiga e tali atu, ma nai lo le faia o lena, tatou te fifilemu ma le mamalu.23
O se mea faamomoiloto mo i tatou uma pe a soona fai ni lafoga matuia pe le migao e uiga i le Faaola, o Ona soo, ma Lana Ekalesia, pe faasalalauina foi e i latou o e sa tatou tutu faatasi, tatou taumamafa faatasi i le faamanatuga, ma tatou molimau faatasi atu i le misiona paia a Iesu Keriso.24
Na tupu foi lenei mea i le taimi o le misiona a le Faaola.
O nisi o soo o Iesu sa i ai faatasi ma Ia i le taimi o Ana vavega aupito malualii ae na filima’oti “e le toe [feoa’i] ma ia.”25 O le mea e faanoanoa ai, e le o tagata uma o le a tumau mausali i lo latou alolofa i le Faaola ma lo latou naunautaiga e tausi Ana poloaiga.26
Na aoao mai Iesu ia tatou o ese mai le li’o o le ita ma le fefinauai. I se tasi faataitaiga, ina ua uma ona fetaiai le au Faresaio ma Iesu ma fetautalatalaa’i pe mafai faapefea ona latou faaumatia o Ia, sa maliu ese Iesu lava Ia mai ia i latou,27 ma sa tutupu vavega a o “mulimuli mai ia te ia le motu o tagata e toatele, ma sa ia faamalolo ia i latou uma.”28
Faamanuiaina o Olaga o Isi
E mafai foi ona tatou o ese mai finauga ma faamanuia olaga o isi,29 ae tatou te le faanofoesea i tatou lava i o tatou pa’usisi.
I Mbuji-Mayi, Ripapelika Temokarasi o Congo, sa i ai nisi na muai faitio i le Ekalesia, e lei malamalama i o tatou talitonuga pe iloa o tatou tagata auai.
I se taimi ua mavae, sa ma lolotu ai ma Kathy i se sauniga Lotu faapitoa i Mbuji-Mayi. Sa matuai mananaia ofu o tamaiti, ma o latou mata susulu ma mata ataata. Sa ou faamoemoe ou te tautala atu ia i latou e uiga i lo latou a’otauina ae sa faalogo e toatele e le o i ni aoga. Na maua e o tatou taitai se ala e fesoasoani ai, i nai tupe iti o fesoasoaniga alofa.30 O le taimi nei, ua silia ma le 400 tamaiti aoga—o teine ma tama, o tagata o le ekalesia faapea foi i latou e le auai—e talia ma ua aoaoina e faiaoga e 16 o tagata o le Ekalesia a Iesu Keriso.
Fai mai Kalanga Muya e sefulu-fa tausaga, “[O le utiuti o tupe] ou te le’i aoga ai mo le fa tausaga. Ou te matuai faafetai lava i le mea ua faia e le Ekalesia. … Ua mafai nei ona ou faitau, tusitusi, ma tautala faaFarani.”31 I le ta’ua ai o nei taumafaiga, sa saunoa ai le pulenuu o Mbuji-Mayi, “Ua musuia lava au e Le Ekalesia a Iesu Keriso o le Au Paia o Aso e Gata Ai aua e ui [o isi] ekalesia ua fevaevaea’i ua tofu ma lona lava pa’usisi … ae [o loo outou galulue] faatasi [ma isi] e fesoasoani i nuu o loo manaomia.”32
Ia Fealofani
O taimi taitasi ou te faitauina ai le Ioane mataupu 13, e faamanatu mai ai lava ia te au le faataitaiga atoatoa a le Faaola o se faatupu filemu. Na mulumuluina ma le alofa e Iesu vae o le au Aposetolo. Ona tatou faitau ai lea “ua ātu lona finagalo”33 a o Ia mafaufau e uiga i lē ua alofagia e Ia ua sauniuni e faalata ia te Ia. Sa ou taumafai e vaai faalemafaufau i mafaufauga ma lagona o le Faaola ina ua alu ese Iuta. O le mea e mata‘ina ai, i lena taimi faigata, sa le toe fetalai ai Iesu e uiga i Ona lagona “atuatuvale” pe e uiga i le faalataina. Ae, sa Ia talanoa atu i Ana Aposetolo e uiga i le alofa, ua augā seneturi le aafiaga o Ana afioga:
“O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou.
O le mea lea e iloa ai e tagata uma lava o o’u soo outou, pe afai ua outou fealofani.”8
Ina tatou alolofa ia ia te Ia ma ia tatou fealofani. Tau ina ia avea i tatou ma e faatupuina le filemu, ina ia ta‘ua i tatou o “fanau a le Atua,” ou te tatalo atu ai i le suafa o Iesu Keriso, amene.