O Auaunaga a Peresitene Nelson

I le faaaogaina o faasalalauga o faigalotu ma faasalalauga faaagafesootai, ua faaauau pea ona valaaulia e Peresitene Russell M. Nelson tagata uma e omai ia Keriso ma aoao mai ia te Ia.

I le taimi o se faasalalauga o le faigalotu, sa uunaia ai e Peresitene Nelson tagata o le Ekalesia i Okalahoma ma Kansas, ISA, e taulai atu i “se tasi o meaalofa silisili ua tuuina mai e lo tatou Tama Faalelagi ia i tatou e faatotonugalemu ai o tatou olaga ia te Ia ma Lona Alo Pele,” na ia saunoa ai. “O loo ou faasino atu i le Tusi a Mamona. O se meaalofa mai le Atua ia i tatou. O le maa‘au’au lea o la tatou tapuaiga aua o loo i ai le fatu tonu lava, le totonugalemu o Lana aoaoga faavae autu.”

A o saunoa atu i tagata o le ekalesia i Kalefonia, ISA, i le taimi o se isi faasalalauga, sa tuuina atu ai e Peresitene Nelson ni valaaulia se tolu: (1) saili le upumoni e ala i le tatalo, suesue i tusitusiga paia, ma le suesueina o upu a perofeta, tagatavaai, ma talifaaaliga; (2) faateleina le mana faaleagaga ma le iloatino e ala i le osia o feagaiga ma le Atua ma tausia; ma (3) faia se vaega malosi e fesoasoani ai e faapotopoto Isaraelu.

Ma i se faasalalauga i atunuu e 48, sa faamanatu atu ai e Peresitene Nelson i le Au Paia i Europa: “E toatele a outou uo o loo saili ia malamalama pe aisea ua latou i ai iinei i le lalolagi. Latou te fia iloa pe i ai se uiga ma se faamoemoega o le olaga. Latou te mananao e faia se eseesega i le lalolagi. Latou te taumanatunatu po o ai e mafai ona latou faatuatuaina. O e iloaina o loo ia te oe tali o loo sailia e na uo?”

I luga o ala o faasalalauga faaagafesootai, sa valaaulia ai i tatou e Peresitene Nelson ia le gata ina lagonaina le lotofaafetai ae ia faaali atu. Sa Ia valaaulia i tatou ia faia se avanoa i o tatou loto mo i latou “o e atonu o loo tauivi e vaai i le malamalama o le Faaola ma lagonaina Lona alofa.” Sa ia fautuaina i tatou e “galulue faatasi e taulamua i le lafoaia o uiga faaalia ma amioga o le faailoga tagata.” Ma sa ia molimau mai “o loo i ai se punavai e tasi e mafai ona tatou liliu uma i ai a le o le faalauteleina o le alofa tatou te lagonaina mo isi po o le suia o o tatou loto pe a latou lagona le nutimomoia—o le Faaola o Iesu Keriso.”