Aua E Te Fefe: Tau Ina E Faatuatua!
Ia amata la outou sailiga mo le fiafia e ala i le talisapaia ma le agaga faafetai o mea lelei ma le fiafia ua tatou mauaina mai lē e foai maia meaalofa lelei uma.
E tuusa’o atu la’u lauga i le asō i tagata talavou o le Ekalesia, o lona uiga soo se tasi o le vaitausaga o Peresitene Russell M. Nelson pe talavou ifo. E seasea ou faaaogaina ni meafaitino, ae ua le mafai ona ou teena le faasoa atu o le mea lea.
O lenei kula de couer e sau mai la‘u uo e valu tausaga o Marin Arnold, na tusia ina ua fitu ona tausaga. O le a ou faaliliu atua mo outou lana faa-Aikupito liua anamua.
Epikopo Pele
konifisi aoao
sa Lēmanaia aisea
E tatau ai na tatou
Faia? fai mai pe aiseā
Faamaoni lava, Marin
Arnold.1
Marin, o le lauga lea o le a ou fai atua, o le a le masalomia lou le toe fiafia ai foi. Ae a e tusi i lou epikopo e faitio i ai, e taua lou ta’u atu ia te ia o lo’u igoa o “Kearon. Elder Patrick Kearon.”
Toeitiiti atoa le lua tausaga o ufitia lo tatou paneta i se faama’ioti ogaoga pei o mala i le tusi paia, ma e ui ina iloagofie le taofitutū e lena mala toetoe o mea uma faaagafesootai, ae e lei taofitutū ai lava le tufanua, fevesiaiga, ma osofaiga saua faaupufai—faaleatunuu pe faavaomalo. E peisea’i e le o lava, ae o loo tatou feagai pea foi ma lu’itau ua loa faaleagafesootai ma faaleaganuu, e amata mai le naumati o le tamaoaiga i le faatama’iaga faalesiosiomaga e oo atu i le faailogalanu ma isi.
O na matagi malolosi ma aso pogisa e mafai ona faalotovaivaia ai o tatou talavou, i latou tatou te vaavaai atu i ai mo le faamoemoe ma le naunautaiga mo lumanai o o tatou olaga. Ua faapea mai “o le malosiaga o le autalavou o le tamaoaiga masani lea mo le lalolagi atoa. O le … autalavou … o foliga ia o lo tatou … lumanai.”2 E le gata i lea, o a tatou fanau o tausimavaega ia o le a tuu i o latou lima le taunuuga o lenei Ekalesia.
Pe a mafaufau i o tatou taimi nei, e malamalama lelei pe a faapea ua tau mou atu teisi le soona moomoo o le autalavou. Sa fatuina talu ai nei e Dr. Laurie Santos, o se polofesa o le Iunivesite a Yale, se vasega sa faaigoaina o le Psychology and the Good Life. “O le tausaga muamua sa ofoina ai le vasega, toetoe o le [tasi le kuata] o le a’oga [atoa] na lesitala.”3 Na silia ma le 64 miliona tagata na asiasi i lana podcast. I le tusia ai e uiga i lea vavega, sa matauina e se tasi tusitala le tiga o le vaai atu i le tele naua o talavou aooga atamamai—ma tagata matutua—sa atuatuvale i le “sueina o sa latou mea na leiloa” pe, e sili foi ona leaga, o le faananau mo se mea sa le’i fai mo latou.4
O la’u talosaga i le asō i o tatou talavou, ma outou matua ma tagata matutua o loo faufautua ia i latou, ia amata la outou sailiga mo le fiafia e ala i le talisapaia ma le agaga faafetai o mea lelei ma le fiafia ua tatou mauaina mai lē e foai maia meaalofa lelei uma.5 I le taimi tonu o loo fesili ai le toatele i fesili loloto o le natura o mea faaleagaga, e ao ona tatou tali atu ma le “tala lelei”6 o le talalelei a Iesu Keriso. O Le Ekalesia a Iesu Keriso o le Au Paia o Aso e Gata Ai, lea e avea ma fu’ataualuga le misiona ma le savali a le Faaola i le lalolagi, o loo aumaia ai le ala maoae faavavau e maua ai ma faia ai mea lelei i se taimi ua matua moomia ai.
Na saunoa Peresitene Russell M. Nelson o lenei augatupulaga o tagata talavou, o loo i ai le gafatia e “tele atu le aafiaga [mo le lelei] i le lalolagi nai lo se isi lava tupulaga ua mavae.”7 O i tatou, mai tagata uma, e tatau ona “pepese i le pese o le alofa togiola,”8 ae e moomia i lena mea le amio faalesoo—“avea ma soo,” pe a e manao ai—le ituaiga lea e puipuia ai mai uiga le lelei ma mausa faatauma’oi, lea o le a faapa’ulua ai a o tatou taumafai e usuina lena pese o le faaolataga e faavavau.
Tusa lava pe tatou te tutu “i le itu lagilelei o le auala,”9 e mafai lava ona tatou fetaia’i ma se tasi o loo taumafai e faapuaoa ma ta’umasei ai mea uma. Tou te silafia lana anavatau: “E muamua ona matuai pogisa a o le’i uliuli pato’i.” Se vaaiga ina a matautia, ma se olaga pagatia! Ioe, o nisi taimi atonu tatou te mananao e sosola ese mai le mea o tatou i ai, ae e le tatau lava ona tatou sosola ese mai o tatou faasinomaga—o fanau a le Atua soifua e alofa ia i tatou, e saunia i taimi uma e faamagalo i tatou, ma o le a le tuulafoaiina lava i tatou. O outou o Ana ‘oa aupito i taua. O Lona atalii/afafine, ua Ia tuuina mai ai perofeta ma folafolaga, meaalofa faaleagaga ma faaaliga, vavega ma savali, ma agelu i itu uma e lua o le veli.10
Ua Ia tuuina atu foi ia te outou se ekalesia, e faamalolosia ai aiga mo le olaga nei ma fusia faatasi ai i latou e faavavau. Ua saunia le silia ma le 31,000 uarota ma paranesi e faapotopoto ai tagata, pepese, anapopogi, ma tatalo mo le tasi ma le isi ma avatu a latou mea e maua mo e matitiva. O iina e faaigoa ai tagata uma, faitaulia, ma auauna i ai, ma ofofua atu ai le auaunaga a uo ma tuaoi mo le tasi ma le isi i valaauga e amata mai i galuega faafailautusi e oo atu i tiute faatausifale. E faamisiona talavou matutua—ma ulugalii matutua foi—i le ta’ifiaafe i a latou lava tupe e aunoa ma se tala pe o fea o le a latou galulue ai, e malaga foi le au paia talavou ma matutua i malumalu e faatino sauniga paia e tatau ai ina ia fusia ai faatasi aiga e faavavau—o se gaoioiga toa i se lalolagi fevaevaea’i ae o se gaoioiga e tautino atu ai o lea fevaevaea’iga ua na o sina taimi. Ua na o ni nai mafuaaga laiti ia tatou te tuuina atu mo “le faamoemoe o loo ia i [tatou].”11
Ioe, i lo tatou taimi nei, e anoanoai faafitauli faigata e feagai ma soo se soo o Iesu Keriso. Ua tuu atu e taitai o lenei Ekalesia, o latou soifua e saili ai le taitaiga a le Alii i le foiaina o na luitau. Afai e i ai ni mea e lē taunuu lelei mo le faamalieina o tagata uma, atonu o se vaega lea o le satauro na fetalai ai Iesu tatou te amoina ina ia mulimuli atu ai ia te Ia.12 O le mea moni lava ia ona o le a i ai aso pogisa ma faafitauli faigata lea na folafola mai le Atua o le a Ia taiala perofeta i le ao faaniutu i le ao, a o le afi faaniutu i le po, tuu atu se āi u’amea, tatala se faitotoa vaiti e tau atu i se ala vaapiapi, ma e sili atu i na mea uma e tuuina mai ia i tatou le mana e faai’u ai le tausinioga.13
O le mea lea faamolemole, nofo mai mo le taumafataga atoa tusa lava pe e te le o mautinoa po o le a le broccoli. Faamane’ene’e i Lona malamalama ma tuu atu foi lau lava moliga’o mo le faamoemoe.14 La e sa’o le Peraimeri: E moni “[e manao Iesu ia e] fai ma sulu.”15
Ina ua aioi atu Iairo le taitai Iutaia ia Iesu e faamalolo lona afafine e 12 tausaga le matua, sa maliu i le fale, sa faalavelaveina e le motu o tagata sa i ai le Faaola mo se taimi umi ma sa oo mai ai se auauna ma fai atu i lea tamā atuatuvale, “Ua oti lou afafine; soia e te faalavelaveina le A’oa’o.”
“Peitai ina ua faalogo atu i ai Iesu, sa ia tali atu ma faapea atu, Aua e te fefe, tau ina e faatuatua, e ola ai o ia.”16
Ma sa ola o ia. Ma e faapena foi outou. “Aua e te fefe: tau ina e faatuatua.”
Talu ai o outou taitoatasi o i lenei aofia e taua i le Atua ma i lenei Ekalesia, ou te faaiu atu ai i lenei tautinoga faapitoa faaaposetolo. Ae e te lei mauaina le meaalofa o le Agaga Paia, sa totoina i lou agaga le Malamalama o Keriso,17 o le “malamalama lea ua i totonu o mea uma, … ua tuuina atu le ola i mea uma,”18 ma o le uunaiga mo le lelei i loto o tagata uma o e sa soifua pe o le a soifua mai. Na tuuina mai lena malamalama e puipuia ai oe ma aoao ai oe. O se tasi o ana savali tutotonu e faapea, o le ola o le meaalofa aupito taua o meaalofa uma, o se meaalofa ua na o le Togiola a le Alii o Iesu Keriso e maua ai e faavavau. I le avea ai ma Malamalama ma le Ola o le Lalolagi,19 na afio mai le Alo e Toatasi na Fanaua o le Atua e aumai ia i tatou le ola e ala i le faatoilaloina o le oti.
E tatau ona tatou tuuto atu i tatou lava atoatoa i lena meaalofa o le ola ma taufetuli e fesoasoani atu ia i latou o i se tulaga lamatia e lafoai lenei meaalofa paia. Taitai, faufautua, uo, aiga—mata’itu faailoga o le atuatuvale, faasiasia, po o soo se mea e taufaa’ite’ite mai ai le faamanu’alia e se tasi o ia lava. Ofo atu lau fesoasoani. Faalogo. Fai se ituaiga o faasalaveiga pe a talafeagai.
I soo se tasi o o tatou talavou iina o tauivi, po o a lava ou popolega po o faigata, o le oti e ala i le pule i le ola ua manino lava e le o le tali lea. O le a le faamatuuese atu le tiga o loo e lagona atonu o loo e faapogaiina. I se lalolagi ua matua manaomia le malamalama uma e mafai ona ia maua, faamolemole aua ne’i tuuitiitia le malamalama faavavau na tuuina e le Atua i lou agaga a o le’i i ai lenei lalolagi. Talanoa i se tasi. Fesili atu mo se fesoasoani. Ia aua ne’i faatama’iaina se ola lea na tuuina mai e Keriso Lona soifua ina ia faasaoina ai. E mafai ona e onosaia faigata o lenei olaga faitino aua o le a matou fesoasoani ia te oe e onosaia. E te malosi atu nai lo le mea o e manatu ai. O loo maua le fesoasoani, mai i isi aemaise lava mai le Atua. E alofaina ma taua ma manaomia outou. Matou te manaomia outou! “Aua e te fefe: tau ina e faatuatua.”
Sa i ai se tasi sa feagai ma tulaga e sili atu ona matautia nai lo oe ma a’u sa alaga: “O atu i luma [a’u uo talavou pele]. Lototetele, … o atu pea, o atu pea i le manumalo! Ia olioli o outou loto, ma ia fiafia tele.”20 E anoanoai mea e tatau ona tatou fiafia ai. O loo ia i tatou le tasi ma le isi, ma ua ia i tatou foi o Ia. Aua e te aveesea le avanoa mai ia i matou e mafuta ai ma oe, ou te aioi atu ai, i le suafa mamalu ma paia o le Alii o Iesu Keriso, lo tatou Matai, amene.