Apefa’i o le Faatuatua
O le lē talitonu e punitia ai lo tatou tomai e vaai ai i vavega, a o se mafaufau ua mafuli i le faatuatua i le Faaola e tatala mai ai mana o le lagi.
O le a faapefea e luitau o le olaga ona aafia ai lo tatou faatuatua ia Iesu Keriso? A o le a foi le aafiaga o le a faia e lo tatou faatuatua i le olioli ma le filemu tatou te lagonaina i lenei olaga?
O le tausaga o le 1977. Na tatagi le telefoni, ma o le feau na nutimomomo ai o matou loto. O loo faagasolo le masii atu o Karoline ma Taki Tebbs i lo la fale fou ina ua maea lo la faauuga mai le iunivesite. Sa o ane le korama a toeaina e fafao le uta a le veni e o ai. Na toe tepa tasi lava Taki i tua, ia mautinoa o loo kilia a o le i solomuli. O le mea sa lei mafai ona ia vaaia o lona afafine laitiiti, o Sieni, na tamoe faafuasei ane i tua o le loli i se taimi matuai sese lava. I le emo o le mata, na maliu ai le la pele o Sieni.
O le a se mea o le a sosoo ai? Mata o le tiga ua matua la lagonaina le matuitui, ma le lagona e lei mafaufauina o le maliu, o le a fatuina ai se va faalelagona ia Karolina ma Taki, pe atonu o le a fusia faatasi ai o la’ua loto ma faamausali ai lo la faatuatua i le fuafuaga a le Tama Faalelagi?
Sa umi ma tiga le ala na ui atu i o la puapuaga, ae na i ai se mea na oo mai ai le faapolopolo faaleagaga ia ’aua ne’i uma lo la faamoemoe, ae ia “piimau i lo [la’ua] ala.”1 I se auala na oo ina avea atili lenei ulugalii maoae e faapei o Keriso. Na atili tuuto atu. Na atili mutimuti alofa. Sa talitonu i la’ua e faapea, i Lana taimi, o le a faapaia ai e le Atua o la puapuaga mo lo la’ua manuia.2
E ui ina sa le mafai ona tuua atoatoa le tiga ma le maliu, ae sa faamafanafanaina Karolina ma Taki i le faamautinoaga e faapea, o lo la tumau mausali i luga o le ala o feagaiga, o le a avea ai la la’ua pele o Sieni ma a la’ua tama e faavavau.3
O la la’ua faataitaiga ua faamalosia ai lo’u faatuatua i le fuafuaga a le Alii. Tatou le vaai i mea uma. E mafai e Ia. Sa ta’u atu e le Alii ia Iosefa Samita i le Falepuipui o Liperate e faapea “o nei mea uma e te maua ai le poto masani, ma o le a avea mo ou lelei. Na afio ifo le Atalii o le Tagata i lalo o i latou uma. Pe sili ea oe i lo ia?”4
A o tatou taliaina le finagalo o le Alii, Na Te aoao mai i tatou i le ala e savavali ai faatasi ma Ia.5 I le avea ai o se faifeautalai talavou na galue i Tahiti, sa talosagaina au ou te faia se faamanuiaga o se pepe na ma’i. Na faaee o ma’ua lima i luga o lona ulu, ma faamanuia ia te ia ia malosi. Sa amata ona toe malosi o ia, ona toe ma’i ai foi lea. I se taimi lona lua sa ma faamanuia ai o ia ae o le taunuuga lava e tasi. Na oo mai se talosaga lona tolu. Na ma ōle atu i le Alii ia faia Lona finagalo. E le’i leva, ae toe foi atu lenei agaga laitiiti i lona aiga faalelagi.
Peitai sa ma maua le toafilemu. Sa matou mananao ia ola le pepe, ae sa i ai isi fuafuaga a le Alii. O le taliaina o Lona finagalo nai lo o tatou loto, o le ki lea i le mauaina o le olioli tusa lava po o a o tatou tulaga.
O lo tatou faatuatua faatauvaa ia Iesu Keriso a o tatou muai amata ona aoao e uiga ia te Ia, e mafai ona tumau i o tatou loto a o tatou fetaiai ma luitau o le olaga. O lo tatou faatuatua ia te Ia e mafai ai, ma o le a taiala ai i tatou i gaogaosa o le olaga. E moni lava, o le a tatou iloa ai e i ai le faigofie i le isi itu o le gaogaosa o le olaga6 a o tatou “[tutumau] ia Keriso ma se susulu atoatoa o le faamoemoe.”7
O se vaega o le faamoemoega o le olaga o le faatagaina lea o na maatu’ia e avea ma maa e laa ai i luga a o tatou fe’a’ei i le mea ua ou ta’ua o le “apefa’i o le faatuatua”—o se apefa’i aua e ta’u mai ai o le faatuatua e lē tumau. E mafai ona alu i luga po o lalo e tusa ai ma filifiliga tatou te faia.
A o tatou tauivi e fausia le faatuatua i le Faaola, atonu tatou te le malamalama atoatoa i le alofa o le Atua mo i tatou, ma e mafai ona tatou usitai i Ana tulafono ona o se lagona o se matafaioi. E ono oo foi lava ina avea le ta’usalaina ma o tatou faaosofiaga autu nai lo le alofa. Atonu e le’i lagonaina foi lava se fesootaiga moni ia te Ia.
A tatou saili ia faateleina lo tatou faatuatua, atonu tatou te le mautonu i le mea na aoao mai e Iakopo: Sa ia faamanatu mai ia i tatou e faapea “ua mate lava le faatuatua pe a leai ni galuega.”8 Atonu tatou te tautevateva pe a tatou mafaufau ua faalagolago mea uma ia i tatou. O le soona faalagolago ia i tatou lava, e mafai ona faateletelegese ai lo tatou tomai e mafai ai ona maua mana o le lagi.
Ae a o tatou agai atu i le faatuatua moni ia Iesu Keriso, ona amata ai lea ona suia o tatou mafaufau. Ua tatou iloa o le usiusitai ma le faatuatua i le Faaola e agavaa ai i tatou ia faatasi pea Lona Agaga ma i tatou.9 E le toe avea le usiusitai o se faasoesa, ae avea o se tulimataiga.10 Ua tatou iloa o le usiusitai i poloaiga a le Atua e mafai ai ona Ia faatuatuaina i tatou. O Lona faatuatuaga e aumaia ai le malamalama faateleina. O lea malamalama e taiala ai la tatou malaga ma mafai ai ona manino atili la tatou vaai i le ala e tatau ona tatou ui ai.
Ae e i ai se mea e sili atu. A o faateleina lo tatou faatuatua i le Faaola, tatou te matauina ai se siitaga maaleale e aofia ai se malamalamaaga faalelagi e uiga i la tatou sootaga ma le Atua—o se taumafaiga mausali e see ese ai mai le “O le a le mea ou te manao ai” i le “O le a le mea e finagalo ai le Atua?” E faapei o le Faaola, tatou te mananao e faatinoina le “aua le faia lo’u loto, a o lou finagalo.”11 Tatou te mananao e faia le galuega a le Atua, ma avea o se meafaigaluega i Ona aao.12
O lo tatou alualu i luma o se tulaga e faavavau. Na aoao mai Peresitene Russell M. Nelson e faapea, e tele naua mea e finagalo le Tama Faalelagi ia tatou iloa.13 A o tatou agaigai i luma, tatou te malamalama atili i le mea na aoao atu e le Alii ia Iosefa Samita: “Aua afai tou te tausi i aʼu poloaiga, o le a outou maua lona atoatoaga, ma faamamaluina ia te aʼu; … Ou te fai atu ia te outou, o le a outou maua le alofa tunoa mo le alofa tunoa.”14
O le maualuga tatou te fe’a’ei ai i le apefa’i o le faatuatua o la tatou faaiuga lena. Na aoao mai Elder Neil L. Andersen faapea “o le faatuatua e le o se avanoa, ae o se filifiliga.”15 E mafai ona tatou filifili e faia filifiliga e manaomia e faateleina ai lo tatou faatuatua i le Faaola.
Mafaufau i le aafiaga na faia e filifiliga ina ua o ifo ia Lamana ma Lemuelu i lalo o le apefa’i o le faatuatua a o a’e maualuga pea Nifae. Pe o i ai ea se faatusa manino atu nai lo le eseesega i le va o le tali a Nifae “O le a ou alu ma fai”16 ma Lamana ma Lemuelu, faatoa uma lava ona vaai i se agelu, ae tali atu “E mafai faapefea e le Alii ona tuuina mai i o tatou lima?”17
O le lē talitonu e punitia ai lo tatou tomai e vaai ai i vavega, a o se mafaufau ua mafuli i le faatuatua i le Faaola e tatala mai ai mana o le lagi.
Tusa lava foi pe vaivai lo tatou faatuatua, o le a faaloaloa mai pea lava le aao o le Alii.18 I tausaga ua mavae sa ou maua ai se tofiga e toefaatulaga se siteki i Nigeria. I sina minute mulimuli, sa i ai se suiga o le aso. Sa i ai se alii i le siteki sa tonu e tuua le taulaga mo le aso muamua o le konafesi. Sa lei manao o ia ne’i valaauina o se peresitene o le siteki.
A o toesea o ia, sa feagai ma se faalavelave matautia, ae sa le’i afaina ai. O iina na afua ai ona ia mafaufau i le mafuaaga na faasao ai lona ola. Sa ia toe manatunatu i le faaiuga sa ia faia. Sa salamo o ia ma auai ma le lotomaualalo i le aso fou o le konafesi. Ma ioe, na tofia o ia e avea ma peresitene fou o le siteki.
Na aoao mai Elder Neal A. Maxwell: “E na o le faaogatusa o o tatou loto ma le finagalo o le Atua, e mafai ona maua ai le atoatoa o le fiafia. Soo se mea e i lalo ifo, e i’u i se vaega laitiiti ifo ”19
Pe a uma ona faia “o mea uma ua i ai i lo tatou mana,” ona oo mai lea o le taimi e “tutu ai ma le mautinoa … e vaai i le faaolataga a le Atua.”20 Sa ou vaaia lenei mea a o ou auauna atu o se uso a auaunaga i le aiga o le au McCormick. Ua 21 tausaga o faaipoipo, sa galue ma le faamaoni ia Mele Kay i ona valaauga. O Ken e le o se tagata o le Ekalesia ma sa le i i ai sona manao e avea o se tasi o le ekalesia, ae o le alofa i lona toalua, na ia filifili ai la te o faatasi ma ia i le lotu.
I se tasi Aso Sa, sa uunaia ai a’u e faasoa atu ia Ken la’u molimau. Sa ou fesili atu ia te ia pe mafai ona ou faia. Sa faigofie ma manino lana tali: “Leai faafetai.”
Sa ou le mautonu. Na ou lagonaina se uunaiga ma taumafai e mulimuli ai. Sa tofotofoina a’u e fai se faaiuga faapea ua uma ona fai la’u vaega. Ae i le mavae ai o le tatalo ma se manatunatuga, sa mafai ona ou vaaia e ui ina sa sa’o o’u faamoemoega, ae sa ou faalagolago tele ia te a’u lava ae laitiiti i le Alii.
Mulimuli ane sa ou toe foi i ai ae ua ese se mafaufau. O le a tau na ona ou alu o se meafaigaluega i aao o le Alii, e aunoa ma se isi manao nai lo le mulimuli i le Agaga. Faatasi ai ma la’u soa faatuatua, o Gerald Cardon, sa ma ulufale atu ai i le fale o McCormick.
E le i leva, ae uunaia au e valaaulia ia Gerald e usu le “Ua Ou Iloa Lo’u Faaola.”21 Na ia tilotilo mai ma se pupula lemautonu, ae o lona faatuatua i lo’u faatuatua, na ia faia ai. Sa faatumulia le potu i se agaga matagofie. Na oo mai le uunaiga e valaaulia Mele Kay ma Kirisitina, lo la afafine, e faasoa mai a la molimau. A o la faia, sa atili malosi le Agaga. O le mea moni, ina ua mavae le molimau a Kirisitina, sa tafe ifo loimata i alafau o Ken.22
Sa faatautai le Atua. Sa le na ona tuia ai loto, ae sa suia ai e faavavau. O le luasefulu-tasi tausaga o le le talitonu, sa tafiesea e le mana o le Agaga Paia. I se vaiaso mulimuli ane, sa papatisoina ai Ken. I se tausaga mulimuli ane, sa faamauina ai Ken ma Mele Kay i le maota o le Alii mo le olaga nei ma le faavavau atoa.
Sa o matou taufai lagonaina faatasi le uiga o le suia o o matou loto i le finagalo o le Alii, ma sa faateleina ai lo matou faatuatua ia te Ia.
Faamolemole mafaufau i ni nai fesili na tuuina mai e perofeta a le Atua a o e tauivi e a’ea lau apefa’i o le faatuatua:
Pe ua tafi ese ea le faamaualuga mai ia te a’u?23
Pe ua ou faia ea se avanoa i lo’u loto mo le afioga a le Atua?24
Pe o o’u faatagaina ea o’u puapuaga ia faapaiaina mo lo’u manuia?25
Pe ua ou loto ea e tofatumoanaina lo’u loto i le finagalo o le Tama?26
Afai ua ou lagona le fia pese i le pese o le alofa togiola, pe mafai ea ona ou lagonaina nei?”27
Pe ua ou faamuamua ea le Atua i lo’u olaga?28
Afai ua e iloa feteena’iga i lou ala i le taimi nei ma lou faatuatua i le Faaola, ona faamolemole lea sue lou ala e toefoi ai ia te Ia. O lou faaeaga ma le faaeaga o au fanau o loo faalagolago i ai.
Tau ina ia tatou totoina ia fatu o le faatuatua ia maua’a i o tatou loto. Tau ina ia tatou faafaileleina nei fatu a o tatou noatia i tatou lava i le Faaola e ala i le faamamaluina o feagaiga ua tatou osia ma Ia. I le suafa o Iesu Keriso, amene.