E Tuuina Atu e le Ekalesia le Fesoasoani, ma le Toomaga
I le lalolagi atoa, o loo auai le Au Paia o Aso e Gata Ai i taumafaiga faaolatotoga mo tagata sulufai. I Europa, o loo latou fesoasoani e saunia meaai, lavalava, aitema mo pepe, malutaga, ma isi mea e fesoasoani ai i e ua faaaunuua. Sa foai talu ai nei e le Ekalesia le $2 miliona Amerika i le Komesina Maualuga o Malo Aufaatasi mo Tagata Sulufai ma se isi $2 miliona Amerika i le Polokalama o Meaai a le Lalolagi. O foai o le a fesoasoani ai i le WFP e saunia meaai mo ni tagata e 11,000 mo le fa masina.
“Ua i ai tagata o le ekalesia i atunuu uma ua aafia ai,” na saunoa ai Sister Sharon Eubank, Fesoasoani Muamua i le Au Peresitene Aoao o le Aualofa ma le peresitene o le Auaunaga Alofa a le Au Paia o Aso e Gata Ai. Talu ai e teuina e le Ekalesia se tupe faaleoleo, o lea sa mafai ai ona muai faatulagaina meaai ma vai a o lei oo i le faalavelave i Iukureini, sa ia fai mai ai, ma ta’ua ai ua tuuto atu le Ekalesia i manaoga mo se taimi umi o atunuu na aafia ai.
I Parakuei ma Peru, sa fesoasoani tupe a le Ekalesia e tuuina atu ni masini faafomai mo falemai, ma i Peru na tuuina atu ai e le Ekalesia ni ili, moli, meaafale, nofoa uumi, totoga faa’anofale, ma komepiuta feaveai e fitu i faalapotopotoga e tautuaina tamaiti ma tagata matutua, o se aufono faalelotu e galulue soofaatasi, ma se fale toomaga mo teineiti. I Kolomupia, sa faaaoga tupe o taulaga anapogi e tuuina atu ai pusa e 1,200 o meaai ma sapalai ia i latou e manaomia le fesoasoani. I Panama, sa foai atu ai e le Ekalesia ni masini e fesoasoani ai e faasaoina tui puipui o le KOVITI-19.
Sa asiasi atu tagata i aai e 10 i le Iunaite Setete i se Light the World Giving Machine i le vaitau o le Kerisimasi 2021, ma foai faatasi atu ai se $5.8 miliona Amerika. O masini e mafai ai e se tagata ona faatau mai aitema (e pei o lavalava, meaai, vai mama, ma lafu manu) lea o le a tufatufaina atu mulimuli ane e ala i auaunaga alofa e 44 i le Iunaite Setete faapea foi ma ofisa sui e lima i le lalolagi atoa.
Sa fesoasoani foi le Ekalesia ia i latou na aafia i asiosio i le midwest.ern Iunaite Setete, o se afa fulifaō i Filipaina, ma se maugamu na pa ma se galulolo i Toga.