“Kristin M. Yee,” Liahona, Me 2022.
Kristin M. Yee
Fesoasoani Lua i le Au Peresitene Aoao o le Aualofa
I se lalolagi ua faateleina fevaevaeaiga ma le faaesea, na vaai ai Sister Kristin M. Yee i vaifofo faamalolo i na faafitauli faaagafesootai e ala i le talalelei a Iesu Keriso ma le Aualofa.
“E tuufaatasia i tatou e le Aualofa i lalo o Lana taitaiga,” o lana tala lea. “Po o fea lava ou te malaga ai i le lalolagi, ou te vaavaai mo ou uso o le Aualofa, ma ou te lagonaina i le taimi lava lena le alofaina ma le iloaina. O loo i ai se tulaga laugatasia ia Keriso ma i a tatou molimau e uiga ia te Ia.”
O Sister Yee, o le sa auauna atu i le aufono faufautua aoao a le Peraimeri, na oo atu i lona valaauga fou o se Fesoasoani Lua i le Au Peresitene Aoao o le Aualofa ma le mautinoa e le galue na o ia.
“O le Alii e pule, ma ou te faalagolago ia te Ia,” o lana tala lea. “Ou te lagonaina foi le malosi tatou te manaomia ai tagata uma i Lana galuega. E tofu i tatou uma ma se matafaioi e faatino, ma e mafai ona avea i tatou ma se vaega o lenei galuega faatasi. Ou te matua faafetai lava mo se avanoa e auauna atu ai.”
Na soifua mai Kristin Mae Yee i le aso 5 Me, 1981, i Sacramento, Kalefonia, ISA, ia Ryan R. Yee ma Jaydean Fox McKay. Mulimuli ane sa ia siitia atu i Idaho, ISA, ona sosoo ai lea ma Iuta.
Sa ia iloaina i lona laitiiti se fiafiaga ma taleni mo faatufugaga, lea na taialaina ona ala faaleaoaoga ma faalegaluega. O loo ia umia faailoga i faatufugaga matagofie mai le Iunivesite o Polika Iaga–Idaho ma le Iunivesite o Polika Iaga. I le 2019 sa ia maua ai se faailoga o le matuaofaiva o le pulega lautele mai le BYU.
O tomai faatusiata o Sister Yee ma le taulaiga na taitai atu ai o ia i se tofiga o se tusiata ma se tagata atamai i le Disney Interactive Studios, lea sa ia faigaluega ai mo le 13 tausaga. O loo ia puleaina nei le vaega o faatufugaga faagaoioi a le Ekalesia. O ana atavali e faaautu i le talalelei e aofia ai atatosi o le galuega a le Faaola i le olaga nei.
Sa auauna atu Sister Yee i le tele o valaauga o le Ekalesia, e aofia ai le avea ma peresitene o le Aualofa a le siteki, fesoasoani i le au peresitene o le Aualofa a le uarota ma se faiaoga, peresitene o Tamaitai Talavou a le uarota, faiaoga o Aoaoga Faavae o le Talalelei, faifeautalai a le uarota, ma se tagata faigaluega i sauniga o le malumalu.