Mea na Faamamafa mai i le Konafesi Aoao Faaletausaga Lona 192

Oka se faamanuiaga i nei taimi faigata le mauaina o le taitaiga ma fautuaga mai le Alii o Iesu Keriso, o le o loo taitaia Lana Ekalesia toefuataiina e ala i perofeta ma aposetolo soifua.

I le taimi o le konafesi aoao, sa tuuina mai ai e le Alii ni valaaulia e ala mai i Lana perofeta, o Peresitene Russell M. Nelson. Ua na o nisi nei:

1. Faasoa atu le Mana ma le Filemu o Iesu Keriso

Na faamanatu mai e Peresitene Nelson i tagata o le ekalesia lo tatou “tiutetauave paia e faasoa atu le mana ma le filemu o Iesu Keriso i tagata uma o le a faalogo.” I nei taimi faigata, “ua tatau i tagata uma ona iloa po o fea e mafai ona latou maua ai le filemu lea e ‘silisili lava i mea uma e manatu i ai’ [Filipi 4:7].”

Ina ia faitau i le valaau a Peresitene Nelson mo alii talavou agavaa uma, gafatia e saunia mo ma auauna atu i se misiona, tagai i le “Talaiina Atu o le Talalelei o le Filemu” i le itulau e 6.

2. Fausia ni Malosiaga Faaleagaga Lelei

Na aoao mai Peresitene Nelson, “E leai se isi taimi ua matua sili ai ona tatou manaomiaina le malosiaga lelei faaleagaga e sili atu i lo lenei taimi, e faafetaiai ai le saoasaoa ua faateteleina o mea leaga ma faailoga pouliuli o taimi.”

Saili ni valaaulia patino se lima mai ia Peresitene Nelson mo le faateleina o lo tatou malosi faaleagaga i le “O Le Mana o le Malosiaga Faaleagaga” i le itulau e 97.

3. Filifili Pe Faapefea Ona E Faaaluina Lou Taimi

Sa faamalamalama mai e Peresitene Nelson e i ai nisi o mea e le mafai ona tatou puleaina. “Ae o loo i ai nisi o mea e mafai ona tatou pulea,” na ia saunoa ai, “e aofia ai le auala tatou te faaalu ai o tatou taimi.”

Faitau le valaaulia a Peresitene Nelson e faaalu se taimi e taulai atu ai i faamanuiaga o le malumalu i le “O Le Taimi Lenei” i le itulau e 126.

A o e suesue ma faatino nei valaaulia, matou te valaaulia oe e mafaufau e faasoa atu ou aafiaga i isi e ala i le Liahona.