TE MAU ’API NŌ PĀTIFITA
’Imira’a i te hau i roto i mau taime ri’ari’a
I te ’āva’e ’Ēperēra 2021, ’ua tā’iri te vāve’a piti o te ma’i pe’e Tovi i te fenua Fiti. ’Ua ti’a i tō’u ’utuāfare, mai te tahi ’ē atu e rave rahi, ’ia ha’apa’o ’oi’oi i te mau fa’anahora’a rū ato’a tei ha’amauhia, nō te ’ōpani i te tirotiro ’ia parare. Nō te mea te ma’i pe’e mātāmua, tei te maha hora noa ’ua tae mai i tō’u fare, ’aita vau i mana’o ē e ha’afifi rahi te reira i tō’u ’utuāfare, ’ua ti’aturi ho’i au e mau ’oi’oi te pararera’a.
Hou te vāve’a piti o te Tovi ’a tā’iri ai i te fenua Fiti, nō fāri’i noa mai nei au i te parau ’āpī nō te fa’aru’era’a mai tō’u pāpā ru’au i te pae o tō’u pāpā. ’Aita roa i ti’a i tō’u pāpā e ora ra i te pae tō’o’a o te rā nō Viti Levu e haere i te ’ōro’a hunara’a o tōna pāpā i Suva, nō te mea ’ua tā’ōti’ahia te mau terera’a nā roto ia Fiti, ’a tāmata ai te mau rave ’ohipa nō te ea i te tāpe’a i te tirotiro. ’Ua fa’a’ite te reira iā’u ē, ’ua fātata roa mai te tirotiro i tō’u fare, nō te mea tē ’ōpani nei te reira i te rāve’a nō tō’u ’utuāfare ’ia ’āmui tino atu i roto i te tāmāhanahanara’a nō te ’ōro’a hunara’a o tō’u pāpā rū’au.
’Ua tāmau noa te tirotiro i te parare nā roto ia Fiti. I te reira taime, tē fa’atere ra vau i te hō’ē ’ohipa ’imira’a faufa’a ’e e ti’a iā’u e haere e ho’o mai ’e e ’āfa’i i te mau tauiha’a, nō te ha’amaita’i atu ā te pae faufa’a o tō’u ’utuāfare. ’Ua tāmau noa mātou i te rave i te ’ohipa ’e ’ia fa’anaho i te mau rāve’a nō te pāruru i tō mātou ’utuāfare. ’Ua riro ’ei taime fifi i te tāmatara’a e fa’atano i te mau tauira’a, nō te mea e’ita mātou e nehenehe e fārerei ’e e ’āmui ’e te tahi atu mau ’utuāfare tō mātou, mai tā mātou e rave nei i te mau hepetoma ato’a. ’Ua riro te reira ’ei fifi i te pae ferurira’a ’e i te pae ’āehuehu i te ’orera’a e ti’a ’ia’āmui ’e e hi’o tino i tō mātou mau ’utuāfare.
’Ua ha’afifi rahi atu ā te tirotiro mau iā’u, ’a ro’ohia ai tō’u ’utuāfare iti i te mau tāpa’o o te ma’i hota. ’Ua feruri au : « Penei a’e te ma’i hota te reira nō te tau e tupu noa nei », i te pae hope’a rā, ’ua haere atu mātou e hi’opo’a nō te ha’apāpū. ’Ua tae mai te te hi’opo’ara’a ē ma’ihia mātou : ’ua ro’ohia tā’u tāne, tā māua tamahine 18 matahiti ’e o vau i te ma’i Tovi-19.
’Ua horuhoru roa tō mātou ferurira’ no te parau ’āpī o te hi’opo’ara’a pāpū, nō tā’u tāne iho ā rā ’e ’o vau. E au rā ē ’ua fifi roa atu ā te mau tāpa’o ma’i ’e ’ua taere atu ā tō mātou fa’aorara’a,’ vai noa ai tō mātou mana’o ē, ’ua ro’ohia mātou i te ma’i Tovi. Te fa’atumura’a i ni’a i tō mātou ma’i, ’ua fa’atupu rahi mai te reira i te ri’ari’a, nā te reira i tāpe’a ia mātou i te pae ferurira’a, i te pae ’āehuehu ’e i te pae vārua – ’aita e vāhi tō te fa’aro’o. I muri a’e e piti hopetoma te orara’a ’e te tirotiro, ’ite a’e ra mātou ē ’aita mātou i fa’a’ite i te fa’aro’a ia Iesu Mesia, nō te mea ’ua tu’u mātou i te ri’ari’a i ni’a i tō mātou ’ē’a, ma te tūtonura’a i ni’a i te parau ē, ’ua ma’ihia mātou. Nō reira, nō te fa’a’ore i te reira, ’ua ha’amata mātou i te rōtahi i ni’a i te Fa’aora ’e i ni’a i te mana e tae mai nā roto i tō mātou fa’aro’o iāna.
’A mā’iti ai mātou ’ia roa’a te fa’aro’o ia Iesu Mesia ’e ’ia rave mai te reira, ’ua ha’amata tō mātou ferurira’a ’e tō mātou huru i te taui, ’e ’ua ha’amata tā mātou ’ohipa i te ana’i i ni’a i tō mātou fa’aro’o. ’Ua pure mātou ma te hina’aro mau ’e ’ua tāmau i te parau i roto i tā mātou pure ē, e fa’aro’o tō mātou ia Iesu Mesia ’e i tōna ’aravihi nō te fa’aora ia mātou i te pae tino. ’Ua ha’amata mātou i te tai’o hau atu i te mau pāpa’ira’a mo’a ’e i te fa’ahitira’a i te pāpa’ira’a mo’a nā te fare ’e i te tahi ’e te tahi.
’Ua ha’amata mātou ’ia vai rahi atu te mana’o ’ana’anatae ’e ’ia tāmau noa i te patu i ni’a i te tīa’ira’a. ’Aita mātou i fāri’i fa’ahou i te ri’ari’a ’aore rā te ha’ape’ape’ara’a. ’Ua ’oa’oa rahi a’e mātou i te fare ’e ’ua au i te ’āpitira’a o te tahi ’e te tahi. I tō mātou ha’amatara’a mau i te fa’a’ite i tō mātou fa’aro’o ia Iesu Mesia ma te ravera’a i teie mau ’ohipa, ’ite a’e ra mātou ē tē ha’amata ra tō mātou fa’aorara’a i te vitiviti ’e ’ua ti’a ia mātou ’ia ora roa mai, tau taime ri’i i muri mai.
Tē ti’aturi pāpū nei au ē, e hōpoi mai te fa’aro’o ia Iesu Mesia i te fa’aorara’a ’a fa’a’ohipa ai tātou i te fa’aro’o iāna. E nehenehe tātou e fa’aoroma’i i tō tātou mau ri’ari’a ’e tō tātou mau ha’ape’ape’ara’a, ’ia tu’u ana’e tātou i tō tātou ti’aturira’a ’e ’ia t ūtonu ana’e tātou i ni’a i te Fa’aora ia Iesu Mesia. Tē māuruuru rahi nei au ē, ’ua manuia tō’u ’utuāfare i te fa’aoroma’ira’a i te ma’i Tovi ma te tauturu a te mana fa’aorara’a o te Fa’aora.