TE MAU ’API NŌ PĀTIFITA
Here nō Tona
I te ho’ira’a mai Viliami Nofomuli Nyssen Tonga nā te misiōni mai i te matahiti 2014, ’ua fāri’i ’oia i te hō’ē mana’o rahi nō te fa’aotira’a. Nō tāvini iho nei ’oia e piti matahiti i te fenua Marite i roto i te misiōni nō Carolina apato’a, Colombia, e vai ra i te tahi atu pae o te ao nei o tōna fenua ’āi’a nō te mau motu nō Pātifita, o Tona.
Te tāvinira’a i te hō’ē misiōni rave tāmau nā te ’Ēkālesia a Iesu Mesia i te Feiā Mo’a i te mau Mahana Hope’a nei, tē ha’amana’o ra ’oia ma te ’oa’oa, « ’ua riro ’ei tupura’a ’ohipa tei taui i tō’u orara’a ». ’Aita rā Viliami i ’ite ē, e ha’amatara’a noa te reira o te ‘tauira’a rahi’ ’o tā te Metua i te ao ra i fa’aherehere nōna.
Ma’a taime ri’i i muri mai i tōna ho’ira’a mai, ’ua ha’amata Viliami i te rave i te ’ohipa i roto i te hō’ē fare hāmanira’a pizza o te fenua. ’Ua hāmani na ’oia i te pizza ’ei ’ohipa nā mua a’e, ’e e ’ohipa au-roa-hia e āna.
Mai te feiā ’āpī pa’ari e rave rahi i roto i te mau motu, ’ua mana’o Viliami ē te tuha’a i muri mai nōna ’o te fa’anu’ura’a atu ïa i roto i te hō’ē fenua rahi a’e – penei a’e e ho’i fa’ahou i Marite – nō te ’imira’a i te hō’ē orara’a maita’i a’e. Te ravera’a i te ’ohipa i roto i te hō’ē fare hāmanira’a pizza e tauturu te reira iāna ’ia ha’aputu i te moni nō te fa’anu’ura’a rahi.
I muri iho, ma te pe’ape’a, i muri a’e i te ho’ira’a mai i te fare e maha noa ’āva’e, ’ua fa’aru’e mai te metua vahine here o Viliami. ’Ua aro tōna metua vahine i mua i te mau tāfifira’a o te ma’i ōmaha tihota ’e ’ua vaiiho mai e hitu tamari’i, e maha tē haere noa ra i te ha’api’ira’a.
’Ua mamae roa Viliami. ’A aro noa ai ’oia i tōna ’oto rahi, ’ua feruri ato’a ’oia i tōna mau taea’e ’e mau tuahine ’āpī a’e, ’e ’ua ’ite ē e ti’a e taui i tōna moemoeā nō te fa’anu’u i te fenu’a ’ē’ē.
’Ua ha’amau Viliami i te mau ’ōpura’a ’āpī. E fa’aea ’oia i Tona ’e e rave i te mau hōpoi’a ato’a a tōna metua vahine i te fare. E ’imi ato’a ’oia i te tahi atu ’ohipa i te pae faufa’a nō te aupuru i tōna ’utuāfare ’e te patura’a i tāna iho fa’arava’ira’a iāna iho.
’Ua fa’aoti ato’a Viliami, e ’īriti i tāna iho vāhi hāmanira’a pizza i roto hō’ē noa matahiti.
’E ’ua nā reira ’oia.
I te ’āva’e Mē 2015, ’ua ’īriti ’oia ‘Ofa ki Tonga’, tāna vāhi hāmanira’a pizza i roto i te ’oire pū nō Tona i Nuku’alofa. Ofa o te ta’o Tona nō te here. ’O te i’oa ato’a o te metua vahine o Viliami.
Ma te ferurira’a i tōna orara’a e tae mai i teienei, ’ua fa’ahiahia roa Viliami i tōna tere. « ’Ahiri ’outou i ’ite iā’u nā mua a’e i tā’u misiōni, e hiti mahuta ’outou ’ia ’ite i hea vau i teienei.
« I terā tau, ’aita vau i ’ite maita’i i huru nō te arata’ira’a mau. ’Aita roa vau i feruri nō ni’a i te ananahi. ’Aita vau i fa’aoti roa i tā’u ha’api’ira’a tuarua, ’e ’ua mana’o te tahi mau ta’ata e’ita vau e fa’aoti i tā’u tau misiōni. ’Aita ato’a vau i pāpū », ’ua ’ata ’oia.
« ’Ua fa’a’ite mai rā tē tāvinira’a i te misiōni iā’u i te hō’ē ao ta’a ’ē, hō’ē huru orara’a ta’a ’ē. ’Ua tauturu te reira ’iā’u ’ia hina’aro rahi nō tō’u orara’a. ’Ua ha’api’i te reira iā’u i te mea tā te ta’ata e nehenehe e fa’atupu, mai te mea e ’ohipa itoito rātou nō te reira.
« ’Ua ha’apūai ato’a te reira i tō’u ’itera’a pāpū nō Iesu Mesia ».
Hō’ē pāpa’ira’a mo’a tei ha’apūai ia Viliami i roto i te mau mahana fifi i muri a’e i te pohera’a tōna māmā, e ’itehia i roto i Te Ha’api’ira’a Tumu ’e te mau Fafaura’a 82:10. « ’Ua ru’uru’uhia vau, ’o te Fatu, ’ia rave ’outou i te mea tā’u i parau ra ; ’ia ’ore rā ’outou ’ia rave i tā’u i parau ra, e ’ore ïa tā ’outou e fafaura’a i reira ».
’O te ha’apāpūra’a tāmau ē, e nehenehe ’oia e fa’aoti i tāna mau ’ōpuara’a ti’a ato’a mai te mea e fa’aea ha’apa’o noa ’oia i te mau fa’auera’a a te Metua i te ao ra […] ’e ’oia mau, ’ua ha’amaita’i rahi te Fatu iāna nō te reira.
Maoti te faufa’a moni nō roto mai i tāna taiete ’āpī, ’ua nehenehe ia Viliami e turu i tōna mau taea’e ’e mau tuahine ’ia fa’aoti i tā rātou ha’api’ira’a ’e ’oia ato’a te ho’ora’a mai i te hō’ē fenua nō te patu i te hō’ē fare ’āpī nō tōna ’utuāfare. I muri iho, ’ua tū’ati fa’ahou ’oia ’e te hō’ē hoa tāna i mātau mai te matahiti 2015 mai, ’e ’ua ’ite i roto iāna te here o tōna ora. ’Ua tā’atihia ’oia ’e ’o Lupe nō te tau ’e a muri noa atu i roto i te hiero nō Nuku’alofa Tona i te hope’a nō te matahiti 2019.
« ’Ia ’ite mai ’outou, ’āhiri e nehenehe au e ho’i mai i muri ’e e parau iā’u iho i te ’āpīra’a, e parau vau, ‘e tāpe’a noa i te upo’o i ni’a. ’A moemoeā rahi. ’Eiaha e mata’u’ ».
’Ua riro Viliami ’ei ’ite ora ē, mai te mea e rave tātou ma te maita’i roa mai tā tātou e nehenehe, e rave te Metua i te ao ra i te toe’a.