Te mau ha’amaita’ira’a ’ōhie nō te fa’aro’o ’āueue ’ore

Nā Lillian Arp

Tau taime ri’i i muri a’e i te hō’ē fa’ata’ara’a māuiui, ’ua fa’aru’e atu te tuahine Fineone Fisi’ihoi Mork ’e tāna mau tamari’i taure’a i te fenua Taratoni nō te fenua Niu Tirani, ma te ti’aturi i te hō’ē ha’amatara’a ’āpī.

Te fa’aterera’a i tōna ’utuāfare ’ei vahine ’ōtahi ’ua riro ’ei tītaura’a ’āpī nō te tuahine Mork, ’ua turu’i rahi ’oia i ni’a i te Metua i te ao ra nō te fāri’i i te paturura’a i roto i te reira tau fifi, ma te ’ite ē e ha’amaita’ihia tōna ’utuāfare mai te au i tōna fa’aro’o ’e tōna ha’apa’o maita’i.

’Ua ha’amamahia tāna hōpoi’a i te pae faufa’a i te fa’aotira’a tāna tamaiti matahiapo ’o Michael i tāna ha’api’ira’a ’e i te ha’amatara’a i te rave i te ’ohipa. ’Ua rave Michael i te hōpoi’a nō te aufaura’a i tō rātou fare ; ’ua fa’ati’a te reira i te tuahine Mork ’ia tauturu hau atu i te tahi o tāna mau tamari’i. ’Ua ha’amata ato’a ’oia i te tu’u i te hiti te tahi moni nō te hō’ē fare. I te pae hope’a, ’ua ti’a iāna ’e i tāna tamaiti i te fa’anu’u mai i tō rātou ’utuāfare, i roto i tō rātou iho fare i Mangere hiti’a o te rā, i te pae apato’a nō Auckland.

Tau matahiti i muri mai, e taime ïa nō Michael e haere i te misiōni, ’ua fa’ataiā ri’i ’oia i te haere nō te mea tē pe’ape’a nei ’oia i te vaiiho mai i tōna metua vahine. Nāhea ’oia ’ia aufau i te tā’āto’ara’a o te tārahu nō te fare ’āpī i tāna moni ’ohipa ha’iha’i ? ’Ua riro ato’a te reira ’ei ha’ape’ape’ara’a mau nō te tuahine Mork, ’ua ’ite rā ’oia e mea maita’i a’e ’ia ha’apa’o i te hina’aro o te Metua i te ao ra.

’Ua parau ’oia i tāna tamaiti « mai te mea ’ua ineine ’oe nō te haere i te misiōni ; ’a haere. Nā te Fatu mātou e ha’apa’o ».

Tau ’āva’e i muri iho, ’ua tāvevo teie mana’o i roto i te mau parau nō te ha’amaita’ira’a tei hōro’ahia e te peresideni titi nō Papatoetoe Auckland, Niu Tirani, tei fa’ata’a ia Michael ’ei misiōnare nō Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua pi’ihia Michael ’ia tāvini i Côte d’Ivoire te misiōni nō Abidjan, Afirita hitia’a o te rā.

« Tē ha’amana’o maita’i nei au », ’ua parau te tuahine Mork, « ’ua ha’amaita’i te peresideni Moroni Westerlund i tā’u tamaiti ’ia vai ha’apa’o noa ’e te itoito, ’e ’ua parau ’oia iāna ‘’Eiaha e ha’ape’ape’a nō tō ’oe māmā. E ha’apa’o te Fatu iāna ’e e ha’amaita’i iāna nō tōna mau hina’aro ato’a’ ».

’Ua vai noa te mau parau o taua ha’amaita’ira’a ra i roto i te tuahine Mork ’e pinepine i te hōro’a mai i te tāmāhanahana, i terā taime ’aita Michael i te fare. E ’ere te reira taime i te mea ’ōhie. E piti ā tamari’i tāna i te fare ha’api’ira’a ’e te moni rave ’ohipa ha’iha’i e rava’i noa nō te aufau i te tā’āto’ara’a o te ha’amau’ara’a i te hepetoma, ’ua fa’aoti rā te tuahine Mork e fa’atura i te mau tauto’ora’a misiōnare a tāna tamaiti, ma te vai māuruuru noa ’e te ha’apa’o maita’i. ’Ua rave maita’i ’oia i tōna mau pi’ira’a o te ’Ēkālesia, ’ua tāvini pinepine i roto i te hiero mai tāna e nehenehe ’e ’ua aufau i te tuha’a ’ahuru ti’a.

‘Ma te huru rāve’a ato’a, ’ua nehenehe ia mātou e oraora mai, te hepetoma i muri mai te hepotoma ». ’Ua ’ite ato’a ’oia ē, noa atu tō rātou fifi i te pae faufa’a, mea ’oa’ao a’e tōna ’utuāfare iti.

I muri mai i te hō’ē ’āva’e, ’ua mara’a tano ’ore te moni aufau o te pape a te tuahine Mork. ’Aita ’oia i ta’a maita’i nō te aha, ’ua aufau rā ’oia i teie ha’amau’ara’a. I te ’āva’e nō muri iho, ’ua mara’a atu ā te tārahu pape. ’Ua tāmau noa te tārahu pape i te mara’a ’e tae roa i te taime ’ua taerehia te aufaura’a nō te tahi atu mau hōpoi’a, nō te mea ’ua tūtonu noa ’oia i ni’a i te aufaura’a i te pape.

I te hō’ē mahana, tē ha’amana’o maita’i ra te tuahine Mork, ’ua fa’ata’a ’oia i te hiti tāna tuha’a ’ahuru ’e ’ua aufau i te ha’amauara’a o te hepetoma. ’Ua ’ite a’e ra ’oia i muri iho e 15 tara peretāne tāna e toe ra. Hepohepo roa tōna ’ā’au. Nāhea ’oia i te fa’atāmā’a i tōna ’utuāfare nō te toe’a o te ’āva’e i te 15 tara peretāne ?

’Ua tāpe’a ’oia i te pere’o’o i rāpae i te pū nō te mā’a o te fenua ’e ’ua pūpū atu i te hō’ē pure pe’ape’a i te Metua i te ao ra, hou ’a tomo atu ai i roto. ’Ua ho’o mai ’oia i te tahi mau pota, aua’e ’ua fa’a’aimamauhia. E toe ra 10 tara peretāne nō te fare toa o te ’īna’i i te tahi a’e pae. ’Ua ’imi ’oia i te mau ho’o-mama-ra’a ’e ’ua ’itehia mai iāna e piti pū’ohu ’īna’i e 5 tara peretāne. I roto i te rēni tīa’ira’a nō te aufau, ’ua feruri ’oia i te mā’a e nāhea ’oia i te fa’atano e teie mau mā’a iti.

’Ua fa’atere te ta’ata ha’apa’o ’āfata moni i tāna mau mā’a, ’e ’a ’īriti ai ’oia i tāna pūte moni, ’ua taimāmū te tuahine Mork. Ma te ara maita’i i mua i tāna 10 tara peretāne… tē vai ra hō’ē moni parau 20 tara peretāne.

Nō tōna ta’a ’ore, ’aita ’oia i fa’aoti roa te aufaura’a. ’Ua tātarahapa atu ’oia i mua te ta’ata ha’apa’o ’āfata moni, ’ua haere i rāpae i te fare toa, ’e ’ua tāmata i te hāro’aro’a i teie 20 tara peretāne hau. ’Ua hi’o haere i te mau parau pe’era’a nō te ha’apāpū ’aita i mo’ehia iāna i te aufau i te hō’ē parau ho’o. ’Ua hi’o fa’ahou i tāna tuha’a ’ahuru ti’a, ’e ’ua vaiiho maita’i i te reira. ’Ua ha’apāpū i te vāhi ho’ora’a pota ’aita ānei i hōro’a hau mai i te moni fa’aho’i. I te hopera’a te hi’opo’ara’a i te tahi atu mau fa’ata’ara’a ato’a e tano, ’ua ta’i te tuahine Mork. I roto i tōna ’ā’au, ’ua ’ite ’oia e temeio teie.

I te fare, ’ua fa’ati’a ’oia i te mau tamari’i i te ’ohipa i tupu. Ma te ’ī i te ’oa’oa, ’ua fa’a’ite pāpū atu ’oia ia rātou i te mana nō te fa’aro’o i te Atua, nō tōna here ia tātou tāta’itahi ’e nō te mau ha’amaita’ira’a e tae mai nā roto mai i te ha’apa’ora’a i tāna mau fa’auera’a ’e ’ōna.

’Ua tūturi te ’utuāfare nō te ha’amāuruuru i te Metua i te ao ra nō te ha’apa’ora’a ia rātou – mai tā tō rātou peresideni titi i fafau.

I te reira hepetoma, ’ua ’ite mai te hō’ē hoa nō te ’Ēkālesia i te tumu nō te mara’ara’a o tāna moni pape : tē vai ra i raro a’e i tō rātou fare hō’ē tuiō e mā’i ra. Teie hoa – e ’ohipa tāta’i fare tāna – ’ua tāta’i ’oia i te mā’ira’a, i muri iho ’ua pāto’i au mai ’ia aufauhia nō teie ’ohipa.

’Ua ho’i fa’ahou mai te aufaura’a mai te mātāmua, ’ua ti’a i te tuahine Mork ’ia aufau hau atu i tāna mau tītaura’a, ’e ’ua tere maita’i ma te hau te toe’a o te mau ’āva’e ’e tae roa i te ho’ira’a mai o Michael nā te misiōni mai.