Ol Bigfala Laet mo Ol Smol Laet
Yumi tu yumi save gat bigfala laet blong yumiwan—wan smol laet long wan taem afta nara taem.
Mesej blong mi i blong olgeta we oli wari abaot testemoni blong olgeta from oli no bin gat ol bigbigfala eksperiens long saed blong spirit. Mi prea se mi save givim sam pis mo stret save.
!Restoresen blong gospel blong Jisas Kraes i stat wetem wan laet mo trutok we i saen! Wan yangfala boe long Niu Yok, wetem wan nomol nem blong Josef Smit, i go long wan smol bus blong ol tri blong prea. Hem i wari abaot sol blong hem mo laef blong hem long fored blong God. Hem i lukaotem fogivnes from ol sin blong hem. Mo hem i konfius long wanem jos blong i joenem. Hem i nidim blong gat klia tingting mo pis—hem i nidim laet mo save.
Taem Josef i nildaon blong prea mo “talem ol tingting blong hat blong [hem] long God,” wan tudak we i tik i raonem hem. Wan ivel samting, we i nogud tumas, mo i ril i traem blong stopem hem—mo holemtaet tang blong hem blong hem i no save toktok. Ol paoa blong tudak ia oli bigwan tumas mekem Josef i tingting se bae hem i ded. Be hem i “yusum evri paoa [blong hem] blong askem God blong i mekem hem i fri long paoa blong enemi ia we i stap holemtaet gud [hem].” Mo stret “long stret taem ia we [hem] i bin stap rere blong lusum hop mo letem [hem i] ded,” long taem ia we hem i no save sapos hem i gat paoa blong gohed, wan laet we i saen long glori i fulumap bus ia, i ronemaot tudak ia mo enemi blong sol blong hem.
Wan “bigfala laet” we i saen bitim laet blong san i saen i kam daon long hem. Wan man i kam, mo afta narawan. Laet mo glori blong tufala, i no gat wan toktok i save tokbaot. Fas man, Papa blong yumi long Heven, i singaotem nem blong hem, “Wetem fingga blong Hem i poenem narawan—[Josef!] Hem, Hem i Pikinini blong Mi we Mi Lavem Tumas. !Lisingud long Hem!”
Mo wetem bigbigfala laet mo trutok ia we i saen, Restoresen i bin stat. Fulap tabu revelesen mo ol blesing oli bin kam afta long hemia: Niufala skripja, ol ki blong prishud i bin kambak, ol aposol mo profet, ol odinens mo kavenan, mo tru Jos we i laef mo we i blong Lod i stanap bakegen, we sam dei bae i fulumap wol ia wetem laet mo witnes blong Jisas Kraes mo restoresen blong gospel blong Hem.
Evri samting ia, mo plante moa, i stat wetem wan bigfala laet mo boe ia we i wantem tumas blong prea.
Yumi tu yumi gat ol nid blong yumiwan we yumi rili nidim. Yumi tu yumi nidim fridom blong aot long ol konfius long saed blong spirit mo tudak blong wol ia. Yumi tu yumi nid blong save blong yumiwan. Hemia i wan risen from wanem Presiden Russell M. Nelson i invaetem yumi blong “putum [yumi] fulwan insaed long laet blong Restoresen.”
Wan long ol bigfala trutok blong Restoresen i we ol heven oli open—i minim se yumi tu i save kasem laet mo save we i kam antap long heven. Mi testifae se hemia i tru.
Be yumi mas lukaot gud long wan trap long saed blong spirit. Samtaem ol fetful memba blong Jos oli lusum hop mo oli flot i go longwe from oli no bin gat ol bigbigfala eksperiens long saed blong spirit—from oli no eksperiensem bigfala laet ia blong olgetawan. Presiden Spencer W. Kimball i givim woning ia, “plante we oli tingting oltaem blong kasem ol bigfala merikel, bae oli mestem rod blong ol toktok blong revelesen we i stap kam oltaem.”
Presiden Joseph F. Smith i tingbaot se “Lod i holemtaet ol bigfala wok long mi [taem mi yang], mo soem trutok long mi, tijing folem tijing rul folem rul, smol long ples ia mo smol longwe.”
Lod i yusum fasin ia oltaem, ol brata mo sista. Lod i no sendem wan bigfala laet long yumi, be Hem i stap sendem wan smol laet, mo afta wan narawan, mo wan narawan.
Ol smol laet ia oli gohed blong stap kamdaon long yumi oltaem nomo. Ol skripja oli tijim se Jisas Kraes i “laet mo … laef blong wol,” we “Spirit blong Hem i givim laet long evri man [mo woman] we i kam long wol,” mo laet blong Hem “i fulumap bigfala spes,” i givim “laef long evri samting.” Laet blong Kraes i stap raon long yumi nomo.
Sapos yumi kasem presen ia we i Tabu Spirit mo traehad blong praktisim fet, sakem sin, mo ona long ol kavenan blong yumi, bae yumi klin inaf blong kasem ol tabu laet ia oltaem. Olsem toktok blong Elda David A. Bednar we i se, “yumi stap laef long revelesen.’”
Mo yet yumi evriwan i defren. I nogat tu(2) pipol we i eksperiensem laet mo trutok blong God long wan wei we i semmak evriwan. Tekem sam taem blong tingbaot olsem wanem yu eksperiensem laet mo Spirit blong Lod.
Maet yu bin eksperiensem ol laet ia we i saen mo testemoni olsem “pis long maen blong yu long saed blong [wan] poen” we i stap mekem yu wari.
O olsem wan filing mo tingting—wan smol voes—we i faenem ples “insaed long maen blong yu mo insaed long hat blong yu” mo i pusum yu blong mekem samting we i gud, olsem blong helpem wan man.
Maet yu stap long wan klas long jos—o long wan yut kamp—mo filim wan strong tingting blong folem Jisas Kraes mo stap fetful oltaem. Maet yu stanap mo serem testemoni blong yu mo hop se i tru mo afta yu filim se i tru.
O maet yu bin stap prea mo filim wan glad we i talem long yu se God i lavem yu.
Maet yu bin harem wan i serem testemoni blong Jisas Kraes mo i bin tajem hat blong yu mo i fulumap yu wetem hop.
Maet yu stap rid insaed long Buk blong Momon mo wan ves i toktok long sol blong yu, olsem se God i bin putum ves ia long ples ia i blong yu nomo—mo afta yu luksave se Hem nao i bin mekem.
Maet bae yu filim lav blong God long ol narawan taem yu stap givim seves long olgeta.
O ating yu stap traehad blong filim Spirit long wan spesel taem ia from fasin blong no stap glad o stap fraet, be, yu gat spesel presen ia mo fet blong luklukbak mo luksave “fulap sore blong Lod,” bifo.
Poen blong mi hem i we i gat plante wei blong kasem ol laet blong testemoni we i kam long heven. Hemia smol nomo long olgeta. Maet oli no ol bigbigfala saen, be evriwan long olgeta i bildimap pat blong ol testemoni blong yumi.
Ol brata mo sista, mi no bin luk wan bigfala laet ia, be olsem yu, mi bin eksperiensem plante smol tabu laet. Long plante yia, mi bin traem blong holemtaet ol eksperiens ia. Taem mi mekem olsem, mi luksave mo tingbaot plante moa long olgeta. Hemia i sam long ol eksampol blong laef blong miwan. Maet bae sam oli no faenem se oli naes tumas, be oli impoten long mi.
Mi tingbaot taem mi bin wan yangfala we i olbaot nomo long taem blong wan baptaes. Taem miting i rere blong stat, mi filim spirit i talem strong long mi blong sidaon mo stap kwaet. Mi sidaon mo stap kwaet long ful miting.
Bifo misin blong mi, mi bin fraet se testemoni blong mi i no strong inaf. I nogat wan long famli blong mi i bin givim seves long wan misin, mo mi no bin save sapos mi save mekem o no. Mi tingbaot se mi stap stadi mo prea had blong kasem wan witnes we i moa sua abaot Jisas Kraes. Mo afta wan dei, taem mi stap prea long Papa long Heven, mi filim wan strong filing blong laet mo wom. Mo mi bin save. Mi jes save nomo.
Mi bin tingbaot mi wekap long wan naet sam yia afta, wetem wan filing blong “klin save blong Spirit” we i talem long mi se bae oli singaotem mi blong wok insaed long kworom blong ol elda. Tu wik afta oli singaotem mi.
Mi tingbaot wan jeneral konfrens, taem wan memba blong Kworom blong Olgeta Twelef we yumi lavem, i talem ol stret toktok blong testemoni blong mi we mi bin talem long wan fren, mo ol toktok ia oli ol samting we mi bin stap hop blong harem.
Mi tingbaot mi stap nildaon wetem handred blong ol brata blong prea from wan dia fren we maen blong hem i silip mo i stap ledaon wetem masin blong pulum win long wan smol hospital longwe, afta we hat blong hem i bin stop. Taem mifala i prea from laef blong hem tugeta, hem i wekap mo pulumaot masin ia long trot blong hemwan. Hem i stap givim seves tedei olsem wan stek presiden.
Mo mi tingbaot mi bin wekap wetem ol strong filing blong spirit afta long wan klia drim abaot wan gud fren mo tija we i pasawe eli tumas, we i lego wan bigfala spes long laef blong mi. Hem i stap smael mo glad. Mi save se hem i oraet.
Hemia sam long ol smol laet blong mi. Yu bin gat ol eksperiens we oli blong yuwan—ol testemoni blong yuwan we oli fulap long laet. Taem yumi luksave, yumi tingbaot, mo karem ol smol laet ia i kam “tugeta long wan,” wan naesfala samting wetem paoa i stat blong hapen. “Laet i folem laet”—“trutok i tekem trutok.” Ril paoa blong wan smol laet blong testemoni i mekem ol laet ia oli kam moa strong mo oli joen wan wetem wan narawan, afta wan narawan, mo wan narawan. Tijing folem tijing, rul folem rul, smol laet long ples ia mo smol laet longwe—wan smol gudfala taem long saed blong spirit long wan taem—hemia i mekem laet i gro insaed long yumi, i fulap long ol eksperiens blong spirit. Maet wan laet i no strong inaf o i saen inaf blong mekem wan ful testemoni, be tugeta oli save kam wan laet we tudak blong tu(2) tingting i no save winim.
“O afta, ?samting ia i no tru?” Alma i askem. “Mi talem long yufala, yes, from we hemia i laet.”
“Wanem we i kam long God, i laet,” Lod i tijim yumi, “mo hem we i kasem laet, mo i gohed blong stap strong long God, i kasem moa laet; mo laet ia i gro i saen gud mo i saen moa gud bakegen kasem dei we i stret gud evriwan i kam.”
Hemia i minim se, ol brata mo sista, long taem mo tru long “strong tingting ,” yumi tu yumi save gat bigfala laet ia blong yumiwan—wan smol laet long wan taem afta wan narawan. Mo long medel blong bigfala laet ia, yumi tu bae yumi save fanem wan Papa long Heven we i gat lav, i singaotem yumi long nem, poenem yumi i go long Sevya Jisas Kraes, mo invaetem yumi blong “!Lisingud long Hem!”
Mi talemaot witnes blong mi long Jisas Kraes, se Hem i laet mo laef blong ful wol ia—mo long wol blong yuwan mo mi.
Mi testifae se Hem i tru Pikinini we i stap laef blong wan tru God we i stap laef, mo we i stanap long hed blong Jos ia we i tru mo i laef, mo ol tru profet mo aposol blong Hem we oli stap laef, oli stap gaedem mo daerektem Jos ia.
Bae yumi luksave mo kasem laet blong Hem we i gat glori mo afta jusum Hem ova long tudak blong wol ia—oltaem mo blong taem we i no save finis. Long nem blong Jisas Kraes, amen.