Lanwis Intepretesen blong Jeneral Konfrens

Wan aoa bifo wanwan sesen blong jeneral konfrens, handred blong ol lanwis speselis oli kam tugeta long wan bigfala rum blong mekem ol laslas jenis long ol toktok blong konfrens we oli bin transletem mo bae oli intepretem i go long 103 lanwis.

Taem konfrens i stat, oli gat wan janis ia nomo. Hem i mas gud, mo oli mas mekem gud long fas taem blong hem. Gud intepretesen i nidim blong folem taem blong toktok, tiun blong voes, toktok klia, mo gud save blong lanwis, be long semmak taem i nidim blong soem filing mo tingting blong spika we i stap long pulpit, mo soem hemia long semmak spirit we oli bin mekem mesej ia from.

Moa long 800 spika blong ol defren lanwis mo ol riten misinari, oli intepretem ol toktok blong jeneral konfrens ia. Samples haf long olgeta oli mekem ol toktok ia long Sol Lek Siti, Yuta, YSA, mo nara haf oli mekem ol intepretesen blong olgeta long ol hom kantri blong olgeta. Sam oli tekpat long translesen blong ol toktok blong konfrens we i hapen sam wik bifo jeneral konfrens.

Long taem blong brodkas, ol intepreta, we plante taem oli fo kasem sikis man o woman long wan tim, oli ridim wanwan mesej long wan smol rum we oli blokem aot ol noes blong aotsaed, long wan Jos Ofis Bilding o long ol defren ples raon long wol. Ol intepreta oli werem ol hed fon blong harem ol toktok long Inglis, mo oli wajem wan skrin blong makem taem blong intepretesen blong olgeta wetem spika. Ol intepreta oli mas holemtaet tu storian—we i stap long tu defren lanwis—we i stap gohed long semmak taem long hed blong olgeta.

Intepreta Jonas Prasad i talem se ol Jos memba we oli toktok lanwis Hindi long Fiji, oli no save wet blong harem ol profet long lanwis blong olgeta. Hem i tokbaot wan sista we i talem se, “Blong plante yia, ol Jos miting we hem i save go long hem, evriwan oli stap long Inglis. Nomata we hem i no save talem wan toktok, hem i stap kam sidaon kwaet blong filim Spirit nomo. Naoia hem i hapi tumas blong harem gospel long lanwis blong hem.”