!Yu Girap! Hem I Stap Singaot Yu Blong Yu Go Long Hem
Gospel i no wan wei blong stopem yumi long ol jalenj mo ol problem be i wan ansa blong bildimap fet blong yumi mo lanem olsem wanem yumi save winim olgeta.
Samtaem i pas mi bin askem waef blong mi, “Sapos mi save tingbaot, ?yu save talem long mi from wanem, yumitu neva gat ol problem we i bigwan tumas long laef blong yumitu?”
Hem i luk mi mo i talem, “I stret wantaem. Bae mi talem long yu from wanem yumitu neva gat ol bigfala problem; !hem i from yu no save tingbaot samting longtaem!”
Kwik mo smat ansa blong hem i mekem mi luksave bakegen se taem yumi stap laef folem gospel blong Jisas Kraes, hemia bae i no save karemaot ol harem nogud mo hadtaem, we yumi nidim blong i save mekem yumi gro.
Gospel i no wan wei blong stopem ol jalenj mo ol problem be i wan ansa blong bildimap fet mo lanem olsem wanem yumi save winim olgeta.
Mi bin kam blong filim save trutok ia sam manis i pas, long wan dei taem mi stap wokbaot, mo kwiktaem ae blong mi i nomo save luk samting i klia, i tudak, mo i muvmuv. Mi bin fraet. Afta, ol dokta oli talem long mi, “Sapos yu no statem tritmen hariap, bae yu nomo save lukluk mo hemia i save hapen samtaem long ol wik ia.” Mi bin fraet moa.
Mo afta, oli talem: “Yu nidim blong tekem stik meresin long ae—ol stik meresin we bae oli stikim i go stret long ae blong yu taem i open i stap—blong evri fo wik, blong ful laef blong yu.”
Hemia i wan singaot blong woning we i mekem mi no filim i gud tumas.
Mo wan tingting i kam olsem wan kwestin. !Mi askem miwan: “!OKEI! ?Lukluk blong mi long saed blong bodi i nogud, be olsem wanem long lukluk blong mi long saed blong spirit? ?Mi nidim eni tritmen long saed ia? ?Mo wanem nao i minim blong gat wan klia lukluk long saed blong spirit?
Mi bin tingting hevi abaot stori blong blaen man, we nem blong hem i Batimeas, we oli tokbaot long gospel blong Mak. Ol skripja i talem, “Mo taem hem i harem nius se Jisas, man Nasaret ya i stap wokbaot long rod, hem i stat singaot long hem se, !Jisas!, Laen blong King Deved, Plis yu sore long mi.”
Long ae blong plante man, oli luk Jisas olsem pikinini boe blong Josef nomo, ?be from wanem Batimeas i singaotem Hem “Laen blong King Deved”? Hem i from nomo se hem i luksave se Jisas hem i stret Mesaea, we oli bin stap profesae we bae i bon olsem Laen Blong King Deved.
Hem i intresting blong luk se blaen man ia, we i no save lukluk long saed blong bodi, i luksave Jisas. Hem i luksave long saed blong spirit wanem we hem i no save lukluk long saed blong bodi, taem we plante narawan oli luk Jisas long saed blong bodi be oli blaen evriwan long saed blong spirit.
Long stori ia yumi lanem moa abaot klia lukluk long saed blong spirit.
Yumi ridim, “Plante man oli tok kros long hem, oli talem se, !Yu stap kwaet! Be hem i gohed, i singaot bigwan moa, i talem se, “!Laen blong King Deved! !Plis yu sore long mi.”
Ol man raon long hem oli talem long hem blong stap kwaet, be hem i singaot bigwan moa from hem i save huia i Jisas. Hem i no wantem harem ol voes ia mo i singaot moa strong.
Hem i mekem samting be i no gat man i mekem samting long ples blong hem. Nomata long hamas samting we hem i no save mekem, hem i yusum fet blong hem bitim wanem we hem i save mekem.
So, fas prinsipol we yumi lanem i we yumi kipim wan klia lukluk long saed blong spirit taem yumi lukluk nomo long Jisas Kraes mo stap tru long wanem we yumi save se i tru.
Ol brata mo sista, blong stap kipim lukluk blong yumi long saed blong spirit i stap strong, yumi nid blong disaed blong no lisin long ol voes blong wol raon long yumi. Long wol ia we i konfius, yumi mas stap fetful long wanem yumi save, fetful long ol kavenan blong yumi, fetful blong kipim ol komanmen mo stap strong long ol bilif, mo moa strong olsem blaen man ia i bin mekem. Yumi nid blong talemaot moa testemoni blong yumi, blong Lod long wol ia. Man ia i bin save Jisas, hem i bin stap fetful long wanem hem i biliv long hem, mo hem i no letem ol voes raon long hem i pulumaot tingting blong hem.
I gat plante voes tedei we oli stap traem blong mekem se bae ol voes blong yumi olsem ol disaepol blong Jisas Kraes bae i go daon. Ol voes blong wol ia oli stap traem blong mekem se yumi no save toktok, be hemia from wanem yumi mas talemaot testemoni blong yumi abaot Sevya moa laod mo strong. Aot long ol voes blong wol ia, Lod i trastem yu mo mi blong talemaot ol testemoni, mo leftemap ol voes blong yumi, blong i kam voes blong Hem. Sapos yumi no mekem, ?huia bae i testifae abaot Jisas Kraes? ?Huia bae i talemaot nem blong Hem mo talemaot tabu misin blong Hem?
Yumi gat wan wok long saed blong spirit we i kam tru long save ia we yumi gat abaot Jisas Kraes.
?Be wanem nao Batimeas i bin mekem afta long hemia?
Taem we Lod i talem blong girap, hem i bin mekem bakegen wetem fet.
Ol skripja oli talem, “Nao blaenman ya i sakemaot kot blong hem, i girap kwiktaem, i kam long Jisas.”
Man ia we i gat tingting we i stap daon mo i fetful i bin andastanem se taem Jisas i komandem hem blong girap, bae hem i girap long wan laef we i moa gud. Hem i save se hem i moa gud bitim ol situesen blong hem, mo fas samting we hem i bin mekem i blong sakemaot kot blong wol, olsem we Jisas i talem.
Bakegen hem i mekem samting be i no blong gat man i mekem samting long ples blong hem.
Maet hem i bin tingting, “Mi nomo nidim kot ia, naoia we Jisas i kam long laef blong mi. Hem ia i wan niufala dei. Mi finis long laef ia blong stap harem nogud. Wetem Jisas mi save statem wan niufala laef blong stap hapi mo glad from Hem, wetem Hem, mo tru long Hem. Mi no wari abaot olsem wanem wol i lukluk mi. Jisas i stap singaotem mi, mo Hem bae i helpem mi laef long wan niu laef.”
!Hem i wan naesfala jenis tumas!
Taem hem i sakemaot kot blong blong hem blong wol, hem i sakemaot tu evri eskius blong hem.
Mo hem ia i nambatu prinsipol: yumi kipim wan klia lukluk long saed blong spirit taem yumi lego fasin blong man we i folem wol, sakem sin, mo statem wan niu laef long Kraes.
Blong mekem olsem, i blong mekem mo kipim ol kavenan mo girap long wan gudfala laef we i moa gud tru long Jisas Kraes.
Yumi stap kipim kot blong wol long ol solda blong yumi taem yumi stap mekem ol eskius blong stap sore long yumiwan, sore long ol situesen mo problem blong yumi, mo sore from evri nogud samting we i stap hapen long laef blong yumi mo evri nogud man we yumi ting se oli stap mekem yumi no hapi. Hem i tru se samtaem pipol, oli minim o no minim, blong mekem yumi harem nogud. Be yumi nid blong disaed blong yusum fet long Kraes taem yumi karemaot ol tingting mo filing blong kot ia we maet, yumi stap werem yet blong haedem ol eskius o sin, mo sakemaot, wetem save ia se Hem i save mo bae Hem i hilim yumi.
Hem i neva bin wan gud eskius blong talem, “Mi mi olsem from mi no laki mo from sam situesen we i nogud. Mo mi no save jenis, mo i oraet long mi.”
Taem yumi tingting olsem, yumi disaed blong lego man i mekem samting long ples blong yumi.
Yumi kipim kot blong wol i stap.
Blong mekem samting long fet i minim blong dipen long Sevya, stap bilivim se tru long Atonmen blong Hem yumi save girap bitim evri samting taem Hem i komandem yumi.
Nambatri prinsipol i stap long ol fo las toktok ia: “yu go long [Jisas].”
?Olsem wanem nao hem i go long Jisas nomata we hem i blaen? Wan wei ia nomo i blong wokbaot i go long Jisas taem hem i harem voes blong Hem.
Mo hemia i nambatri prinsipol: yumi kipim wan klia lukluk long saed blong spirit taem yumi harem voes blong Lod mo letem Hem i gaedem yumi.
Semmak olsem man ia we i leftemap voes blong hem wetem ol nara voes raon long hem, hem i bin harem save voes blong Lod long medel blong evri narafala voes.
Hemia i semmak fet we i mekem Pita i wokbaot antap long wota sapos nomo, lukluk blong hem long saed blong spirit i stap nomo long Lod mo i no lukluk long ol win raon long hem.
Mo stori blong blaen man i en wetem ol toktok ia “ae blong hem i open, mo hem i lukluk, nao hem i biaen long Jisas long rod.”
Wan impoten lesen long stori ia i we man ia i yusum tru fet long Jisas Kraes mo kasem wan merikel from hem i askem wetem tru tingting, tru tingting blong folem Hem.
Mo hemia i bigfala risen ia blong ol blesing we yumi kasem long laef blong yumi, we i blong folem Jisas Kraes. Hem i blong stap luksave Hem, blong stap mekem mo kipim ol kavenan wetem God from Hem, i jenisim yumi tru long Hem, mo stap strong kasem en taem yumi folem Hem.
Long mi, blong stap kipim wan klia lukluk long saed blong spirit i blong lukluk nomo long Jisas Kraes.
So, ?lukluk blong mi long saed blong spirit bae i klia taem we mi tekem ol stik meresin blong ae? ?Oke, be mi mi huia blong talem? Be mi talem tangkyu long wanem mi luk.
Mi luk i klia han blong Lod long tabu wok ia mo long laef blong mi.
Mi luk fet blong plante long evri ples we mi go we i mekem fet blong miwan i kam strong moa.
Mi luk ol enjel raon long mi.
Mi luk fet blong plante we oli no save luk Lod wetem lukluk blong olgeta long saed blong bodi be oli luksave Hem long saed blong spirit, from oli save gud Hem.
Mi testifae se gospel ia i ansa blong evri samting, from Jisas Kraes i ansa blong evriwan. Mi talem tangkyu long wanem mi save luk taem mi folem Sevya.
Mi promes se taem yumi stap lisin long voes blong Lod mo letem Hem i gaedem yumi long kavenan rod blong Sevya, bae yumi bles wetem wan klia lukluk, andastaning long saed blong spirit, mo pis long hat mo maen truaot ol laef blong yumi.
Bae yumi talemaot testemoni blong yumi abaot Hem, moa laod bitim ol voes raon long yumi long wan wol we i nid blong harem moa be i no smol abaot Jisas Kraes. Bae yumi karemaot kot blong wol we maet yumi stap werem yet, mo girap mo kamaot long wol i go long wan laef we i moa gud tru long Kraes. Bae yumi karemaot evri eskius blong no folem Jisas Kraes mo faenem evri gud risen blong folem Hem taem yumi harem voes blong Hem. Hemia i prea blong mi long nem blong Jisas Kraes, amen.