“Presiden Paul V. Johnson,” Liahona, Mei 2024.
Presiden Paul V. Johnson
Sandei Skul Jeneral Presiden
Aot long wok blong hem olsem wan seminari tija go kasem naen yia we hem i spendem olsem wan Jos komisena blong edukesen, mo kam kasem Sandei Skul Jeneral Presiden, Presiden Paul V. Johnson i bin gat plante eksperiens blong stap tijim gospel. Be kwaliti we i moa impoten we hem i karem i kam long niufala koling blong hem, hem i talem se hem i “lav blong mi long Papa blong mi long Heven mo Sevya, mo lav blong mi long ol yang pipol mo ol nara pipol tu.”
Presiden Johnson i bon long 24 Jun, 1954, long Gainesville, Florida, USA, mo papa mo mama blong hem Vere Johnson mo Winifred Amacher. Bifo hem i kasem wan yia blong hem, papa mo mama blong hem i muv i go long Logan, Utah, USA, long ples we oli lukaot long hem mo ol seven brata mo sista blong hem.
Hem i kam blong save fiuja waef blong hem, Jill Washburn, taem wan koj blong hem blong bifo, i muvaot long Logan i kam mo i karem hem blong go plei long hae skul futbol long Monticello. Paul mo Jill i bin mit bifo, be naoia oli kam ol fren taem tufala i stap go long semmak wod mo seminari klas. Sista Johnson i raet i go long hem taem hem i stap long misin olsem wan fultaem misinari long Nowei.
Tufala mared long 18 Ogis, 1976, long Logan Utah Tempol. Tufala i gat 9 pikinini mo 43 apupikinini.
Ol famli Johnson oli bin go tru ol hadtaem blong olgeta tugeta, taem oli lusum wan gel blong olgeta long kansa mo oli traehad long ol helt jalenj blong olgetawan. Be Presiden Johnson i talem se ol eksperiens ia oli bin help blong stretem lukluk blong hem abaot plan blong God. “Mi ting se hemia i mekem mi, olsem wan tija, blong wantem tumas blong helpem ol yang pipol blong hang strong long Sevya mo long Papa blong olgeta long Heven,” hem i talem.
Presiden Johnson i kasem wan bajela digri long suoloiji long 1977 mo wan masta digri long kaonseling mo gaed long 1978, long Brigham Young University. Hem i kasem wan dokta blong edukesen digri long Utah State University long 1989.
Oli sastenem Presiden Johnson olsem Jeneral Atoriti Seventi long Epril 2005 mo hem i bin stap givim seves olsem wan memba blong Presidensi blong Seventi stat long 1 Ogis, 2021. Hem i bin givim seves olsem wan kaonsela long Yurop Eria Presidensi, kaonsela long Chile Eria Presidensi, kaonsela long stek presidensi, mo bisop.
Bae oli givim emeritus status long hem stat long 1 Ogis, 2024, taem bae hem i stat niu koling blong hem.