Paoa blong Ol Woman blong Lidim Tingting

I Kam long Presiden Russell M. Nelson

Presiden blong Jos blong Jisas Kraes blong Ol Lata-dei Sent

Neva tingdaon long naesfala paoa we i stap wetem yu blong jenisim ol narawan blong oltaem.

Ol dia sista blong Rilif Sosaeti, mi talem tangkyu tumas from janis ia blong toktok wetem yufala tedei. Yufala i stap oltaem long maen blong mi. Mi talem tangkyu tumas long yufala mo filim se mi gat kaon long yufala. Plante long ol gud samting i stap hapen long Jos ia—mo plante long ol gud samting we i stap hapen long wol—!oli hapen from yufala! Tangkyu blong stap fetful long Lod, semmak long ol hadwok blong yufala blong leftemap ol narawan. Mi save hamas Lod i lavem mo stap dipen long yufala.

Mi sapraes long fet blong yufala mo luksave ol samting we i kam tru long Spirit. Mi filim insperesen tru fasin blong yufala blong wok strong wetem strong tingting, i gat paoa we i laef insaed long lidasip blong yufala, mo paoa we yufala i gat blong luk wan nid mo givhan long hem. Nomata sapos hem i blong rid o raet, sapos i no gat kaekae, ol wari blong helt long saed blong sik long tingting, o wan evri dei nid blong ol narawan, yufala i atakem ol problem we oli stap hapen tedei wetem ol spesel skil, bigfala sore, ol niu tingting mo lav. Ful misin blong Jos blong Lod i kam strong moa, from yufala.Ol Bigfala Waes Man blong Jos blong Lod.

!Ol sista, yufala i gat wan tabu endaomen we i letem yufala blong save jenisim stret ol laef! Hemia i tru speseli taem yumi stap wok wetem strong tingting long tabu instraksen ia blong karem Isrel i kam tugeta. Enitaem we yumi helpem eniwan blong faenem rod blong kavenan mo stap long hem, yumi stap help blong karem Isrel i kam tugeta. I no gat wan we i mekem hemia i moa gud bitim yufala—olsem ol mama, ol lida, ol tija, ol sista mo ol fren. !Yufala i stap mekem rere ol fiuja jeneresen blong Jos Ia blong Lod mo wol!

I no longtaem i pas, mifala i bin lanem samting aot long wan smol gel we i gat tri yia we i wekap long wan slip. Blong mekem hem i bisi, brata blong hem i karem wan tedi bea i kam long hem, afta wan narawan. ?Be wanem nao i givim kamfot mo glad long hem? !Kopi blong Buk blong Momon we i blong hemwan! Smol gel ia i stap wajem mama blong hem we i stap ridim Buk blong Momon evri dei. !Hem i wantem blong kam olsem mama blong hem!

Hem i simpol se, i no posibol blong skelem paoa blong jenis we i moa gud long laef blong ol kavenan woman blong God. Mi lavem ol Brata blong mi, mo mi holemtaet gud spesel janis ia blong wok wetem olgeta. Be, tu pipol long wol ia we oli bin jenisim mi bigwan, oli waef blong mi Dantzel, mama blong 10 pikinini blong mitufala, we i bin pasawe kwiktaem taem hem i gat 78 yia, mo blong 18 yia we i pas, naesfala waef blong mi Wendy.

Long taem we mi stap kam oraet from foldaon ia, Wendy i bin kea oltaem, tugeta long saed blong bodi mo spirit. Hem i mekem long ol wei we wan narawan bae i no save mekem olsem. Bigfala paoa we Dantzel mo Wendy i bin gat long mi, i no gat samting we i moa impoten long hemia. !Tufala i bin jenisim laef blong mi! Tufala i mekem laef blong mi i komplit fulwan.

Ol woman oli stap long medel blong plan ia blong Papa blong yumi long Heven, stat long stat. Plan ia blong God blong sevem man i dipen long aksen blong tu woman hiro—Iv, “mama blong evri samting we i gat laef,” mo Meri, mama blong Lod blong yumi, Jisas Kraes.

Ol sista, plis neva tingdaon long naesfala paoa we i stap wetem yu blong jenisim ol narawan blong oltaem. Hem i wan presen we Papa long Heven i givim long evri kavenan woman. Olsem wan kavenan pikinini gel blong God, yu save kasem Spirit mo wan klin kampas we i mekem i kam klia paoa blong yu blong kasem revelesen blong yuwan mo blong luksave trutok aot long samting we i rong. Blong stap talem hemia, mi no lego ol man se oli no save luksave raet aot long samting we i rong o blong mekem ol wok long saed blong spirit blong kasem revelesen. Be, sapos wol i eva lusum klin fasin blong ol woman, wol bae i neva kam oraet.

Ol sista, yumi nidim voes blong yufala blong stap tijim doktrin blong Kraes. Yumi nid blong luksave fasin blong giaman mo trutok we i klia. Yumi nidim waes tingting blong yufala we i kam tru long insperesen insaed long famli blong yu, wod mo ol stek kaonsel, mo tu, long ol nara ples we yufala save mekem jenis long hem truaot long wol. !Famli blong yu, Jos Ia mo wol i nidim yufala! Ol sista, i no gat wan we i save mekem evri samting, iven blong yufala i traem. Be, mi save hamas pat blong yufala i impoten tumas, we i blong bildimap kingdom blong God.

So tedei, mi invaetem yufala blong mekem ol skripja oli kam ol Liahona blong yufalawan, tempol, sef ples blong yufala mo ples blong mekem jenis bakegen, mo ol prea blong yufalawan wei we yu lanem weaples Lod i wantem yu blong stap long dei ia . Taem bae i pas, bae yu sapraes long hao Hem bae i lidim yu blong stap long stret ples we, long ples ia, bae yu lidim, givim daereksen mo wokbaot long saed blong wan we i nidim yu.

From risen ia, Mi blesem yufala wetem spirit blong luksave raet aot long rong, se bae i kam antap, mo janis blong luksave glad taem yufala i stap givim rilif long ol narawan. Mi blesem yufala wetem waes tingting blong luksave wanem i gat nid mo blong no ron spid bitim paoa we yu gat. Mi blesem yufala wetem strong paoa long tingting luksave ol tabu paoa we yu gat olsem wan kavenan pikinini gel blong God. Mi blesem yufala blong filim dip long hat blong yufala se, Papa long Heven mo Jisas Kraes, Tufala i save yu mo lavem yu. Tufala i sendem yu kam long wol naoia from se yufala i impoten tumas long kingdom blong God !naoia! Mi blesem yufala blong luksave se ol tabu presen blong yufala olsem wan pikinini gel blong God, i givim paoa long yufala, !i no blong jenisim ol laef nomo be, blong jenisim wol!

Mi lavem yufala, ol dia sista blong mi. Ol samting oli tru. Yumi evriwan i mas wok wetem strong tingting blong mekem wok blong Lod. Mi testifae se !Jisas Kraes i stap laef! Hem i hed blong Jos ia. Long nem blong Jisas Kraes, amen.