Jos I Karembak Ketlan Tempol, Ol Nara Propeti

Long namba 5 Maj, oli mekem i ofisol blong muvum responsabiliti mo onasip blong Ketlan Tempol long Ohaeo, aot long Community of Christ i go long Jos Ia blong Jisas Kraes blong Ol Lata-dei Sent, long wan praes we oli agri long hem. Hemia, tugeta wetem sam bilding blong histri blong Jos long Navu, Ilinoa, mo sam orijinol raeting mo sam spesel aetem.

Oli dediketem Ketlan Tempol long 1836 (luk long Doktrin mo Ol Kavenan 109–110), be Ol Sent oli mas lego tempol ia i no longtaem nomo afta from fasin blong givim hadtaem. From oli jes muvum onasip i no longtaem i pas, tempol i klos yet blong wan sot taem, be afta oli openem bakegen long 25 Maj blong ol pablik i save go lukluk mo i no nidim blong pem. Bae hem i gohed blong stap wan bilding blong histri blong Jos.

Long semmak fasin, long Navu, Smith Family Homestead, Mansion House (hom blong Josef mo Ema stat long yia 1843 kasem taem Josef i ded long 1844), mo Red Brick Store (ples we oli stanemap Rilif Sosaeti long hem) oli openem bak tu blong ful yia blong ol pablik i save go luk mo no nidim blong pem ol tua ia.