“Elda Aroldo B. Cavalcante,” Liahona, Mei 2024.
Elda Aroldo B. Cavalcante
Jeneral Atoriti Seventi
Taem Aroldo B. Cavalcante i bin gat 18 yia, kasen blong hem i invaetem hem i blong go long wan konfrens long eria blong olgeta we Presiden Gordon B. Hinckley (1910–2008) bae i toktok long hem, mo long taem ia hem i stap givim seves olsem Fas Kaonsela insaed long Fas Presidensi.
“Mi bin filim wan filing we i strong tumas,” hem i talem. “Mi save luk wan laet long Presiden Hinckley.”
Nomata we hem i bin stap go long jos blong ol nekis tri yia, hem i no baptaes yet. Wan dei ol misinari oli noknok long doa blong hem. Oli holem eria buk blong olgeta, mo oli ridim wanem ol misinari long pas oli bin raetem abaot hem. Wanem we i stikim hem, hem i las sentens: “Hem i no wantem komitim hemwan long Jisas Kraes.”
Elda Cavalcante i talem se, “Mi ting se mi bin komitim miwan fulap long Jisas Kraes, mo las sentens ia i strong tumas blong mi.”
Taem hem i stap tingting bak long hemwan sapos hemia i wanem nao we Sevya i tingting tu abaot hem, hem i askem, “?Wanem nao mi save mekem blong jenisim hemia ol Elda?’”
Ol misinari oli stat blong tijim hem, mo hem we i gat 21 yia nao, i baptaes 10 dei nomo afta long hemia. Elda Cavalcante i bin komitim hemwan long gospel blong Sevya stat long taem ia.
“Wok ia i no abaot yumi. Hem i abaot Sevya. Mo mi traem evri bes blong mi blong Hem, i no blong mi,” Elda Cavalcante i talem.
Aroldo Barreto Cavalcante Filho i bon i kam long wol long 22 Novemba, 1970, long Fortaleza, Ceará, Brazil. Hem i sil long Christiana Ramalho Bezerra Leite long Resife Brasil Tempol long 21 Jenuware, 2004. Tufala i papa mo mama blong fo pikinini.
Elda Cavalcante i bin kasem wan pos-graduet digri long administretiv loa long Federal University of Ceará long 1997. Hem i bin wok olsem wan loya blong Procuradoria Geral do Município stat long 1997 kasem 2005 mo i patna maneja blong Barreto Cavalcante Advogados stat long 1999.
Bifo long koling blong hem olsem wan Jeneral Atoriti Seventi, Elda Cavalcante i bin stap givim seves olsem wan misin presiden long Brasil. Hem i bin givim seves tu olsem wan Eria Seventi, stek presiden, bisop, mo kaonsela long bisoprik.