“Brata Chad H Webb,” Liahona, Mei 2024.
Brata Chad H Webb
Fas Kaonsela long Sandei Skul Jeneral Presidensi
Olsem wan yang man, Chad Webb i stap skul long College of Eastern Utah (naoia hem i Utah State University Eastern) taem hem i gat wan eksperiens long saed blong spirit, we i bildimap fandesen blong testemoni blong hem mo i mekem testemoni blong hem long gospel i kam moa bigwan. Eksperiens ia i stat taem hem i gat strong tingting long hat blong mekem fet blong hem i kam moa strong.
Long medel blong skulwok mo stap plei basketbol long tim blong kolej blong hem, Brata Webb i mekem fasin blong stap stadi long ol skripja, prea, mo tingting hevi, oli kam faswan, taem hem i stap redi blong go long wan fultaem misin long Veracruz, Meksiko.
Long wan kolkol naet, mi wokbaot longwe raon long Price, Utah, mo stap tingbaot evri samting we hem i lanem. Gaed i kam long heven taem hem i go long wan ples blong stap pakem ol trak.
“Mi filim evri ansa blong ol prea mo kwestin blong mi i kam, mo mi filim insaed long mi, hamas gospel mo Jos i tru,” hem i talem. “Ol trutok ia oli kam klia bigwan long maen blong mi, tugeta wetem filing ia se Papa long Heven i luksave mi. Mi filim lav mo daereksen blong Hem. Hemia i wan long ol eksperiens we i bin mekem testemoni blong mi i gro bigwan.”
Chad H Webb i bon i kam long wol long Rexburg, Idaho, USA, long namba 18 Disemba, 1964, mo Papa blong hem Larry George Webb mo mama blong hem Paige Webb. Hem i groap long saotis Idaho mo i maredem Kristi Ann Bronson long Logan Yuta Tempol long namba 4 Ogis, 1990. Tufala i stap long Layton, Utah, USA, mo tufala i gat sikis pikinini.
Brata Webb i graduet long Brigham Young University wetem wan bajela digri long Spanis Lanwis mo i gat wan masta digri long saed blong lidasip long edukesen mo ol fandesen klas. Hem i tijim ol seminari klas long Sol Lek Siti mo ol institiut klas long Virgina mo Utah. Hem i kodinetem ol institiut program long Washington, D.C., mo i supavaesem ol trening mo seleksen blong ol seminari tija. Stat long 2008, hem i givim seves olsem wan administreta blong Ol Seminari mo Institiut blong Relijin.
Oli rilisim Brata Webb olsem Stek Presiden blong Layton Utah Valley, i no longtaem bifo oli singaotem hem. Hem i bin wok tu bifo olsem bisop, hae kaonsela, mo presiden blong kworom blong ol elda.