“Elda David L. Buckner,” Liahona, Mei 2024.
Elda David L. Buckner
Jeneral Atoriti Seventi
Elda David L. Buckner i bon i kam long wol long 27 Septemba, 1963, long Ogden, Utah, USA, be hem i “groap” taem oli stap long Sacramento, California, USA blong tri yia.
Hem i las bon aot long faef pikinini blong Melba mo E. LaMar Buckner, mo taem hem i gat 11 yia, hem mo famli blong hem oli muv taem oli singaotem papa blong hem blong prisaed long misin blong Jos long Sacramento. Hem i bin stap longwe long ol fren blong hem blong long taem long Utah, be hem i lanem blong mekem ol niu fren mo hem i faenem “300 brata mo sista we oli moa bigwan long hem” we oli ol fultaem misinari.
Be moa impoten, testemoni blong hem long gospel blong Jisas Kraes i mekem rus blong hem long eksperiens ia. “Misin eksperiens ia i bin jenisim evri samting blong mi,” hem i talem.
Afta hem i bin givim seves long Ecuador Guayaquil Misin. Tri manis nomo long misin blong hem, taem hem i stap givim seves olsem wan branj presiden long taon blong Jipijapa, hem i krae wetem ol memba blong branj mo ol narawan from wan boe we i gat 11 yia, i draon taem oli stap long wan Jos aktiviti.
Hem i krae long Papa long Heven long ol wik mo manis we i kam afta, mo hem i kasem wan testemoni we i no save seksek, abaot plan blong sevem man. Hem i bin witnesem tu lav mo sore blong Lod taem ol narawan long komuniti oli putum olgeta long gospel. Tugeta, oli kam blong andastanem tabu fasin blong laef mo paoa blong sore blong Lod.
Afta long misin blong hem, Elda Buckner i go long Brigham Young University, mo long ples ia hem i mitim Jennifer Romney Jackson. Tufala i mared long 30 Ogis, 1990, long Sol Lek Tempol. Sista Buckner i groap long New York, USA, mo tufala i muv i go long ples ia afta we tufala i mared. Tufala i lukaotem ol faef pikinini blong tufala we oli groap long Manhattan, we long ples ia Elda Buckner i bin ripresentem Jos long Komisen blong Ol Lida blong Relijin.
Elda Buckner i kasem wan bajela blong saens digri long faenens long BYU mo wan masta blong bisnis administresen digri long Durham University long 1991. Hem i bin kasem wan masta tu long intanasonol rilesensip long BYU long 1995 mo wan juris doktret long BYU long 1996. Hem i bin wan kolej profesa mo stat long 1999, hem i bin presiden blong Bottom Line Training mo Consulting Inc. Elda Buckner i bin givim seves olsem wan Eria Seventi, stek presiden, hae kaonsela, mo bisop.