“Elda D. Martin Goury,” Liahona, Mei 2024.
Elda D. Martin Goury
Jeneral Atoriti Seventi
Elda D. Martin Goury i groap long wan smol vilej long Côte d’Ivoire, mo hem i drim blong kam wan man blong wok long Jos mo stap givim seves long ol narawan.
Long Oktoba 1992, taem hem i stap long London, England, we hem i stap lanem Inglis mo skul, hem i mitim ol Lata-dei Sent misinari. Ol misinari ia, i gat wan we hemwan nomo long London i toktok Franis olsem mama lanwis blong hem, i givim wan kopi blong Buk blong Momon long Franis long Elda Goury.
Hem i stat blong ridim buk ia mo i no longtaem hem kasem wan witnes abaot hamas buk ia i tru. Taem tu niu misinari i kam long apatmen blong hem sam manis afta, hem i joenem Jos. “Mi tingbaot we mi bin hapi tumas,” hem i talem.
Glad blong hem i kam moa bigwan taem ol misinari oli tijim hem abaot prishud. “Tufala i eksplenem mining blong prishud mo olsem wanem mi save yusum paoa ia blong givim seves long ol nara pipol. Long mi, drim blong mi i stap kam tru ia nao,” Elda Goury i talem. “Mi glad tumas.”
Dalébé Martin Goury i bon i kam long wol long 30 Jenuware, 1964, mo papa mo mama blong hem Yoro Goury Maurice mo Bame Gaby Odette. Hem i groap long wan vilej we oli singaotem Lehipa mo ol siti blong Oume mo Gagnoa. Hem i maredem Ruth Simone Kennington long London Inglan Tempol long 8 Epril, 1995. Tufala i stap long Abidjan, Côte d’Ivoire, mo tufala i gat fo pikinini.
Elda Goury i winim wan bajela digri long tijing long CAFOP (Animation and Educational Training Centers) de Man long 1988 mo wan digri long makanik enjinia long London South Bank University long 1997. Hem i bin wok olsem wan praemeri skul tija, disaen enjinia, senia projek maneja mo depiuti projek daerekta blong Cameron, jeneral maneja blong ol operesen blong Nigeria blong OneSubsea Services, mo ol kantri operesen maneja blong Schlumberger. I no longtaem i pas, Elda Goury i bin wok blong Jos olsem wan lida mo memba sapot kodineta.
Hem i stap givim seves olsem wan Eria Seventi long Afrika Wes Eria taem oli singaotem olsem Seventi. Hem i bin givim seves olsem presiden blong Benin Cotonou Misin, bisop, kaonsela long bisoprik, branj presiden, mo presiden blong kworom blong ol elda.