God I Bin Odenem Yu Bifo Laef long Wol Ia blong Givim Seves
Papa blong yumi long Heven i wantem blong soemaot long yuwan fasin ia we Hem i bin odenem yu bifo laef long wol ia , mo bae Hem i mekem hemia, taem yu lukaotem blong lanem mo folem tingting blong Hem.
Long naet ia, mi toktok long ol yut blong Jos ia, long jeneresen ia we i stap kam antap blong ol yang man mo ol yang woman we oli stap kipim ol standet blong ol nekis jeneresen.
Long Oktoba 2013, profet blong yumi we yumi lavem tumas, Presiden Russell M. Nelson i bin talemaot: “Papa blong Yufala long Heven i bin save yufala longtaem finis. Yu, olsem boe o gel blong Hem, Hem i bin jusum yufala blong kam long wol long stret taem ia, blong stap wan lida long bigfala wok blong Hem.”
Tu yia i pas, Presiden Nelson i gohed blong talem:
“Tedei mi talem strong bakegen se, Lod i askem evri yang man, we i klin inaf mo i save mekem, blong hem i rere from mo givim seves long wan misin. Long ol Lata-dei Sent yang man, misinari seves i wan prishud responsabiliti. Yufala, ol yang man, Lod i bin holemtaet yufala from taem ia tedei, taem promes blong kam tugeta blong Isrel i stap tekem ples. …
“Long yufala, ol yang sista we i save mekem, wan misin i givim paoa, be yu save jusum, from hem i wan janis. … Prea blong save sapos Lod i wantem yu blong mekem misinari wok o no, mo Tabu Spirit bae i ansarem yu insaed long hat mo maen blong yu.”
Profet blong yumi i gobak long toktok blong Lod blong holemtaet ol yut blong taem blong yumi tedei blong sevem olgeta long taem ia blong karem Isrel i kambak mo invitesen blong hem, blong prea blong save wanem Lod i wantem yufala blong mekem, long pat ia, i go bak long laef we yu bin laef long hem mo ol blesing we yu bin kasem long God bifo yu bon i kam long wol ia. Evriwan long yumi we i bon long wol ia i laef fastaem wetem Papa long Heven olsem ol spirit pikinini blong Hem. Lod i talem long Moses, “Mi, Lod God, mi bin krietem evri samting, … long saed blong spirit, bifo oli stap olsem we oli stap long fes blong wol.”
Taem Hem i krietem yu long saed blong spirit, Hem i bin lavem yu olsem ol spirit boe mo gel blong Hem mo blesem yufala wetem wan tabu fasin mo ples we bae yufala i kasem we i no save finis.
Long laef bifo laef long wol ia, “yu bin developem aedentiti blong yu mo kam antap long saed blong spirit wetem hamas yu save mekem.” Oli blesem yu wetem presen ia blong ejensi, fasin blong save mekem joes blong yuwan, mo yu bin mekem ol impoten desisen, olsem desisen blong folem plan blong Papa long Heven blong stap glad, we i blong “kasem wan bodi blong mit mo bun mo kasem ol eskperiens long wol blong gro … mo long en bae yu luksave tabu ples blong [yu] olsem wan long ol man blong laef we i no save finis.” Desisen ia i kontrolem laef blong yu afta, long laef bifo laef blong wol ia, mo i gohed blong lidim laef blong yu naoia. Olsem wan pikinini blong God long laef bifo, yu “bin gro wetem waes mo lanem blong lavem trutok.”
Bifo yufala i bon, God i bin jusum wanwan long yufala blong komplitim ol misin long laef blong yufala long wol ia. Sapos yu stap klin inaf, ol blesing blong laef bifo, bae i mekem yu save gat plante defren kaen janis long laef ia, hemia wetem ol janis blong wok insaed long Jos mo blong tekpat long wok ia we i moa impoten we i stap hapen long wol tedei: kambak blong Isrel. Ol promes mo blesing blong laef bifo laef ia, oli singaotem fasin we God i bin odenem yu bifo laef long wol ia. “Doktrin blong fasin blong odenem man bifo laef long wol ia i blong evri memba blong Jos.” Fasin blong odenem man bifo laef long wol ia i no minim se bae yu kasem samfala koling o responsabiliti. Ol blesing mo ol janis ia i kam long laef ia olsem wan risal blong yusum gud ejensi blong yu folem stret mo gud fasin, semmak olsem fasin blong God i odenem yu bifo laef long wol ia hemia long taem bifo wol ia, i kam olsem risal blong stret mo gud fasin. Taem yu soem se yu klin inaf mo kam antap long kavenan rod, bae yu kasem ol janis ia blong givim seves long Ol Yang Woman klas o prishud kworom. Bae yu kasem blesing blong givim seves long tempol, blong kam wan givhan brata o sista, mo blong mekem misinari wok olsem wan disaepol blong Jisas Kraes.
?From wanem i impoten blong lukaotem mo andastanem fasin we God i odenem yu bifo laef long wol ia? Long wan dei we i gat plante kwestin, taem fulap oli wantem save tru aedentiti blong olgeta, i tru se God i save mo i bin blesem wanwan long yumi bifo yumi bon long wol ia wetem “ol impoten fasin blong … wan aedentiti mo stamba tingting blong laef bifo wol ia, laef long wol ia, mo laef we i no save finis” i givim swit pis mo stret save long maen mo hat blong yumi. Blong save huia yu i stat taem yu andastanem ol blesing we God i givim long yu bifo laef long wol ia bifo yu bon i kam long wol ia. Papa blong yumi long Heven i wantem blong soemaot long yu fasin blong odenem yu bifo laef long wol ia, mo bae Hem i mekem taem yu lukaotem blong lanem mo folem tingting blong Hem.
Mi laekem blong ridim ol post blong Presiden Nelson long Instagram. Wan we mi laekem i stap long 20 Julae, 2022. Hem i raetem:
“Mi bilif se sapos Lod i stap toktok stret long yu, fas samting we bae Hem i mekemsua se yu andastanem hemi tru aedentiti blong yu. Ol dia fren blong mi, i tru yufala i ol spirit pikinini blong God. …
“… No mekem mistek long hemia: Paoa blong yufala blong gro i tabu. Wetem traehad, yu lukaotem Hem oltaem, God bae i soem long yu smol pat blong huia bae yu save kam.”
?Mi save serem olsem wanem papa blong mi long wol ia i bin tijim mi blong faenemaot aedentiti blong mi mo plan blong God long laef blong mi?
Wan Satedei moning taem mi gat 13 yia, mi stap katem gras olsem pat blong wok blong mi blong evri wik. Taem mi finis, mi harem doa we i stap bihaen long haos blong mifala i klos mo mi luk papa blong mi i stap singaot blong mi go luk hem. Mi wokbaot i go bihaen long franda, mo hem i invaetem mi blong sidaon wetem hem long lata. I bin wan naesfala moning. Mi tingbaot yet taem ia hem i sidaon kolosap we ol solda blong hem i tajem solda blong mi. Hem i stat blong talem se hem i lavem mi. Hem i askem mi ol gol blong laef blong mi. Mi tingting se, “O, hemia i isi.” Mi bin save tu samting: Mi wantem gro longwan, mo mi wantem go long kamp plante taem. Mi mi wan simpol man. Hem i smael, i stop smol, mo talem: “Steve, mi wantem serem wan samting wetem yu we i impoten tumas long mi. Mi prea se Papa long Heven bae i mekem wanem we bae mi talem naoia bae i stap long maen mo sol blong yu blong yu no save fogetem.”
Taem ia, toktok blong papa i mekem mi intres blong wantem lisin. Hem i tanem hem mo i luk stret long ae mo i talem, “Boe, protektem ol praevet taem long laef blong yu.” Ples i bin kwaet longtaem taem hem i lego ol mining blong toktok ia i draon dip long hat blong mi.
Afta hem i gohed: “?Yu save, ol taem we yu stap yuwan mo i nogat man raon long yu mo i nogat wan i save wanem yu stap mekem? Ol taem we yu ting se ‘?wanem mi stap mekem naoia bae i no spolem wan man, be mi nomo’?”
Afta hem i talem, “Moa long eni narafala taem long laef blong yu, wanem yu stap mekem long ol praevet taem blong laef blong yu, bae i helpem yu bigwan long olsem wanem yu stap go tru ol jalenj mo hat i soa; mo wanem yu stap mekem long ol praevet taem blong yu bae i save helpem yu bigwan long olsem wanem yu stap fesem ol sakses mo glad we bae yu eksperiensem bitim ol narafala taem long laef blong yu.”
Papa blong mi i bin kasem hop blong hat blong hem. Saon mo fasin blong toktok long voes blong hem, mo lav we mi filim long ol toktok blong hem, oli stap insaed long maen mo sol blong mi long dei ia.
Mi bin lanem long ol yia we i pas se bigfala merikel long dei ia long ol lata blong haos we mi bin groap long hem se, long ol praevet taem blong laef blong mi, mi save go long God long prea blong kasem revelesen. Papa blong mi i stap tijim mi olsem wanem mi save lanem ol blesing we God i givim long mi bifo laef long wol ia. Long ol praevet taem ia, mi bin lanem se Buk blong Momon i toktok blong God. Mi bin lanem se God i bin odenem mi bifo laef long wol ia blong go long wan misin. Mi bin lanem se God i save mi mo i harem mo i ansa long ol prea blong mi. Mi bin lanem se Jisas i Kraes, i Sevya mo Ridima blong yumi.
Nomata long ol plante mistek afta wan memori dei we mi bin gat wetem papa blong mi, mi traehad blong protektem ol praevet taem long laef blong mi olsem wan angka we i helpem mi blong stap strong long ol hadtaem blong laef blong save faenem sef ples mo hiling, mekem ol blesing blong lav blong Sevya mo Atonmen mo Sakrifaes blong Hem i kam strong moa.
Ol yang brata mo sista blong mi, taem yu protektem ol praevet taem long laef blong yu wetem gudfala aktiviti, lisin long ol miusik we i leftemap tingting, ridim ol skripja, prea wetem tru tingting evritaem, mo traehad blong kasem mo tingting hevi long petriakel blesing blong yu, bae yu kasem revelesen. Long ol toktok blong Presiden Nelson, ol ae blong yufala “bae i open long trutok ia we i laef hem i taem blong yu jusum wanem kaen laef yu wantem blong laef long hem blong oltaem.”
Papa blong yumi long Heven bae i ansarem ol prea blong yu, speseli ol prea we yu stap talem long ol praevet taem long laef blong yu. Bae Hem i soemaot long yu ol presen mo talen we Hem i givim long yu bifo laef long wol ia, mo bae yu filim lav blong Hem i kavremap yu, sapos yu askem wetem tru fasin mo wantem save wetem tru tingting. Taem yu stap protektem ol praevet taem long laef blong yu, ol odinens mo ol kavenan we yu stap tekpat long hem bae oli gat moa mining long yu. Bae yu kam blong fasem yuwan wetem God long ol kavenan we yu mekem wetem Hem, mo bae yu kam antap long fasin blong gat bigfala hop, fet, mo stret save long ol promes we Hem i bin mekem wetem yu. ?Yu yu wantem save plan blong God long laef blong yu? Mi talem witnes se Hem i wantem yu blong save, mo Hem i givim insperesen long ol profet blong Hem long wol blong invaetem wanwan long yumi blong prea mo gat ol ae we i open blong kasem ol eksperiens ia blong yumiwan. Mi talemaot witnes long tru paoa blong atonmen mo sakrifaes blong Sevya we i mekem i posipol blong yumi kam moa gud mo stap glad long evri blesing we God i givim bifo laef long wol ia, long nem blong Jisas Kraes, amen.