“Elda Karl D. Hirst,” Liahona, Mei 2024.
Elda Karl D. Hirst
Jeneral Atoriti Seventi
Elda Karl D. Hirst i tekem hemwan olsem “wan nomol man long wan bigfala koling.”
Niu Jeneral Atoriti Seventi ia i luk testemoni blong hem mo ol konfemesen blong hem se oli nomol tu. “Mi nogat eni visit, nogat wan bigfala samting long saed blong spirit—mo mi bin stop blong wari abaot ol samting ia from se mi glad inaf finis long wei we God i bin toktok long mi, iven sapos Hem i jusum blong toktok long ol nara pipol long wan defren wei,” Elda Hirst i talem. “Hem i no wan bigfala naes samting, be hem i fulap tumas.”
Papa blong Elda Hirst, Jack, i gat wan smol stoa. Hem i bin lanem abaot Jos Ia blong Jisas Kraes blong Ol Lata-dei Sent tru long ol kastoma we oli joenem Jos, sam yia afta we Karl i bon i kam long wol long 28 Febwari, 1972, long Bury, Lancashire, England.
Testemoni blong Elda Hirst abaot Jisas Kraes i stat taem hem i bin lanem abaot ol stori blong Sevya mo singsing ol hym taem hem i stap go long Sandei Skul long wan nara jos, taem hem i pikinini wetem mama blong hem, Vivien Ruth Meakin Hirst, mo bubu woman blong hem.
Afta, yangfala Karl i stap go long ol miting blong Ol Lata-dei Sent mo hem i kasem wan invitesen we i kam long wan Praemeri tija, blong hem i kasem baptaes, mo hem i akseptem taem hem i gat 10 yia. Elda Hirst i bin holemtaet fet mo testemoni blong hem olsem wan pikinini moa long 50 yia blong laef blong hem.
“God i bin toktok long hat blong mi long semmak wei we Hem i bin mekem taem mi stap long Praemeri, taem mi bin stap long Sandei Skul,” Elda Hirst i talem.
Hem i maredem Claire Elizabeth Wright long 29 Mei, 1993, long Burnley, Lancashire. Afta, tufala i sil long semmak dei ia long London Inglan Tempol.
Elda Hirst i kasem wan bajela long loa long 1996 long Lancaster University mo wan masta blong bisnis administresen digri long Alliance Manchester Business School long 2016. Stat long 1997, hem i bin stap wok olsem wan loya.
Tufala Hirst i gat sikis pikinini mo oli stap long Bolsover, Chesterfield, England, mo hem i stap wok olsem ol sesen daerekta Blong Ol Yut Oli Kam Strong, taem oli singaotem hem long koling ia.