Joenem Tufala Bigfala Komanmen
Paoa blong yumi blong folem Jisas Kraes i dipen long paoa blong yumi blong laef folem fas mo seken komanmen wetem balens mo ikwol komitmen.
Fas Toktok
Taem mi mo waef blong mi Lesa i travel from asaenmen truaot long wol, mitufala i glad long spesel janis ia blong stap mit wetem yufala long ol bigfala o smol miting. Komitmen blong yu long wok blong Lod i leftemap tingting blong mitufala mo i olsem wan testemoni long gospel blong Jisas Kraes. Evri taem we mitufala i kambak hom long wan trip blong mitufala, mitufala i tingting sapos mitufala i bin givim inaf olsem we mitufala i kasem.
Taem blong stap travel, mitufala i gat smol taem blong lukluk ol ples. Be, taem i posibol, mi spendem smol taem long wan spesel samting we mi laekem blong mekem. Mi gat wan intres long bilding mo disaen mo wan spesel intres abaot ol brij. Mi sapraes moa long ol saspensen brij. I save Renbo Brij long Tokyo, Tsing Ma Brij long Hong Kong, Taoa Brij blong London, o ol narawan we mi bin luk, be mi sapraes long waes fasin we ol enjinia oli yusum blong bildim wan had samting olsem. Ol brij oli tekem yumi go long ol ples we yumi no save go long hem. (Bifo mi gohed, mi tekem not se taem mi stap rere long mesej ia, wan bigfala aksiden i hapen long brij blong Baltimo. Yumi krae sore from olgeta we oli lusum laef mo talem sore long olgeta we i lusum wan memba blong famli.)
Wan Gudgudfala Saspensen Brij
I no longtaem, mi go long Kalifonia blong tekpat long wan konfrens, we i mekem se mi mas krosem bakegen Golden Get Brij ia, olsem wan wok blong wan enjinia we i naes tumas long wol. Brij ia i karem i kam tugeta, naesfala wei we oli bildim, stamba tingting blong hao i wok, mo wok we i tekem blong bildim. Hem i wan spesel saspensen brij wetem tu bigfala sapot pos long tugeta en mo ol bigfala pos oli sapotem long medel. Fas samting we oli bildim hem i tufala bigfala sapot pos ia from tufala i hevi mo stanap aot long solwota blong save sapotem brij. Tugeta tufala i holem ol mein saspensen rop we i hang tru mo sapotem ol nara rop we i hang i go daon folem rod blong brij. Spesel paoa—we tufala pos ia i karem—hem i majik ia nao biaen long wok blong enjinia blong mekem brij ia.
Gol Get Brij Distrik
Ol fas foto blong brij ia, i olsem testemoni blong prinsipol blong wok blong enjinia ia. Evri pat blong brij i kasem sapot long tufala bigfala pos ia, we tugeta tufala i stanap wanwan be i joen long wan i go long narawan.
Getty Images/Underwood Archives
Taem brij i finis wetem tufala pos ia we i stanap strong mo ful brij ia i fas gud long fandesen blong stamba blong hem, i wan pikja blong paoa mo i naes.
Tedei mi invaetem yu blong luk bigfala brij ia—wetem tufala pos ia we i hae mo oli bildim long wan strong fandesen—tru long wan glas blong gospel.
Long taem ia we i stap kam long las ministri blong Jisas Kraes, we naoia yumi singaotem Tabu Wik, wan Farisi we i bin wan loya i askem wan kwestin long Sevya we i bin save se bae i no isi blong ansarem: “Tija, wanem loa we i hae moa long ol narafala loa?” Loya ia i “temtem hem” mo lukaotem wan ansa blong traem mekem Hem i foldaon, be hem i kasem wan tabu ansa.
“ Nao Jisas i talem long hem se, Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa, mo i nambawan blong folem.” !Fas komanmen ia i olsem fas pos ia!
“Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” !Hemia i seken pos ia!
“Tufala loa ia i stamba blong Loa we God i givim long Moses, wetem ol tok blong ol profet tu.” !Hemia nao i ol nara pat blong brij!
Bae yumi lukluk long tufala bigfala komanmen, we Jisas Kraes i talemaot long ansa blong Hem. Taem yumi mekem olsem, letem pikja blong naesfala saspensen brij ia, i draon gud long maen blong yumi.
Lavem Lod
Faswan, i blong lavem Lod wetem ful hat, sol mo maen blong yu.
Long ansa ia, Jisas Kraes i mekem sot mining ia blong loa we i stap insaed long ol tabu tijing blong OlTesteman. Blong lavem Lod, i fas samting long hat blong yu—wetem ol stret fasin blong yu. Lod i askem se yu lavem wetem evri sol blong yu—wetem ful komitmenmo laswan, blong lavem wetem evri tingting blong yu—wetem save mo waes tingting. Lav blong God i no gat limit o i gat en. Hem i no gat en mo i no save finis.
Long mi, blong yusum fas mo bigfala komanmen ia, samtaem i olsem se i wan tingting nomo, i mekem yu wari. Wetem tangkyu, taem mi tingting moa long toktok blong Jisas, mi kam blong andastanem moa komanmen ia: “[Spos yu lavem mi, kipim ol komanmen blong mi].” Hemia mi save mekem. Mi save lavem Papa long Heven mo Jisas Kraes, we i save lid i go long prea, skripja stadi, mo tempol wosip. Yumi lavem Papa mo Pikinini tru pem taeting, kipim Sabat dei i tabu, laef long wan klin laef, mo stap obei.
Blong stap lavem Lod, plante taem yumi soem tru ol smosmol wok, mo step folem rod blong kavenan: blong ol yangfala pipol, blong yusum sosol media long gud wei i bildimap ol pipol be i no blong putum daon; aot long wan pati, muvi, o aktiviti taem i no folem ol standet; stap revren from ol tabu samting.
Tingting long gud eksampol ia. I bin fast Sandei taem mi mo Vance i bin noknok long doa blong wan smol pua hom. Mitufala mo ol nara dikon long kworom i bin wet blong harem ol toktok ia, “Plis kam insaed,” taem oli singaot long wan bigfala voes blong Jemani we mifala i save harem tru long doa. Sista Muellar i bin wan long ol wido long wod we i kam blong stap long kantri. I no bin isi long hem blong kam openem doa, from hem i blaen. Taem mifala i go insaed long naes hom ia, hem i welkamem mifala wetem ol kaen kwestin: ?Nem blong yufala? ?Yufala i oraet? ?Yufala i lavem Lod? Mifala i ansarem hem mo serem se mifala i kam blong pikimap fas ofring blong hem. Nomata we mifala i yang, mifala i luksave se hem i no gat tumas, mo ansa blong hem i bin kam wetem fet mo i tajem mifala bigwan: “mi bin putum wan selen long tebol eli long moning ia. Mi glad tumas blong givim fast ofring blong mi. ?I oraet blong yufala i putum selen ia long envlop mo fulumap fas ofring risit blong mi? Lav blong hem long Lod i bin leftemap fet blong mifala, evri taem we mifala i lego hem long hom.
King Benjamin i promes blong givim impoten paoa long olgeta we oli folem fas bigfala komanmen. “Mi wantem se yufala i tingbaot gudfala mo hapi ples blong olgeta we oli obei ol komanmen. … Lod i blesem olgeta long evri samting, … mo sapos oli fetful kasem en, bae oli go insaed long heven… long wan ples blong hapi we i neva gat en.”
!Blong lavem Lod i lid i go long hapines ia we i no save finis!
Lavem Neba blong Yu
Afta Jisas i talem, “Mo narawan we i klosap i sem mak long hem, Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” Hemia i seken pos blong brij.
Long ples ia, Jisas i joenem brij ia blong yumi i go long heven, blong lavem Lod wetem neba blong yumi long wol. Wan i nidim narawan blong stanap. Lav blong Lod bae i no fulwan sapos yumi no lavem neba blong yumi. Lavem neba, i minim tu evri pikinini blong God nomata i wan man o woman, rij o pua, blak o waet, seks, salari, hamas yia, o bilif blong wan. Yumi lukaotem olgeta we oli harem nogud, filim daon, mo filim se oli no impoten, from “evriwan i semmak long God.” Yumi “givhan long olgeta we oli no strong, leftemap ol han we oli hang i kamdaon, mo mekem ol ni ia we oli no strong oli kam strong moa.”
Tingting long eksampol ia: Brata Evans i sapraes taem wan filing i kam long hem blong stopem trak mo go noknok long wan doa blong wan famli we hem i no save. Taem wan wido mama blong moa long 10 pikinini i ansarem doa, hem i bin luksave ol had situesen mo ol nid blong olgeta. Fas nid blong olgeta i simpol, blong peintem hom blong olgeta we wok blong givhan i bin folemap blong plante yia tugeta long spirit mo laef blong famli ia.
Mama ia wetem fulap tangkyu i raet i go long fren ia we heven i sendem: “Yu spendem laef blong yu blong tajem mifala we i daon moa. Hao mi laekem blong harem ol samting we Lod i gat blong talem taem Hem i soem gladhat blong Hem from gud samting we yu mekem long saed blong mane mo spirit from pipol we yu mo Hem nomo bae i save long hem. Tangkyu blong blesem mifala long plante wei, … from ol misinari we yu bin givim. … Plante taem mi askem miwan sapos Lod i jusum yu aot o sapos yu yu wan we yu bin lisin.”
Blong lavem neba blong yu i tekem tu ol wok olsem hemia blong Kraes blong stap kaen mo givim seves. ?Yu save lego ol harem nogud, fogivim ol enemi, welkam mo givhan long ol neba blong yu, mo helpem ol olfala? Bae wanwan i kasem insperesen taem yu bildim pos blong yu blong lavem neba blong yu.
Presiden Russell M. Nelson i tijim: “Stap givim help long ol narawan—blong hadwok moa wetem tingting blong kea long ol narawan semmak, o moa bitim we yumi stap kea long yumiwan—hemia nao i glad blong yumi. Speseli … taem we i no stret long laef blong yumi, mo taem i tekem yumi aot long gudfala ples blong yumi. Blong laef folem seken komanmen ia i ki blong kam wan tru disaepol blong Jisas Kraes.”
Fasin blong Dipen long Wanwan long Tufala
Jisas i gohed mo tijim “Tufala loa ia i stamba blong Loa we God i givim long Moses, wetem ol tok blong ol profet tu.” Hemia wan gudfala tijing. I gat wan impoten fasin blong dipen long wanwan bitwin blong stap lavem Lod mo stap lavem wanwan long yumi. From Golden Get Brij blong mekem gud wok blong hem, tugeta pos i strong semmak mo wetem semmak paoa tugeta i karem ol hevi saspensen rop, rod blong brij, mo trafik we i krosem brij. Sapos i no gat wok blong enjinia, brij ia bae i foldaon, mo i save brokdaon. Blong eni saspensen brij i mekem wanem we oli bildim hem blong mekem, ol pos blong hem i mas wok tugeta long ful oda blong pis. Semmak, blong yumi save folem Jisas Kraes i dipen long paoa blong yumi blong laef folem fas mo seken komanmen wetem balens mo ikwol komitmen long tufala tugeta.
Be wetem fasin blong raorao we i stap long wol, i mekem se samtaem yumi mestem blong luk o tingbaot hemia. Plante oli lukluk nomo blong kipim ol komanmen mekem se oli nomo soem intres long olgeta we laef blong olgeta i no stret mo gud inaf. Sam oli faenem i had blong lavem olgeta we oli jusum blong laef aotsaed long kavenan o iven blong no tekpat long eni aktiviti blong jos.
Long narasaed, i gat olgeta we oli soem hamas i impoten blong lavem ol narafala man mo no letem oli save se evri man i mas ansa long fored blong God. Sam oli no akseptem fulwan se i gat wan trutok, o raet mo rong, mo wan samting nomo we i nidim long yumi, i blong akseptem fulwan ol joes blong ol narawan. Sapos wan long ol samting ia i no balens, i save mekem brij blong yu long saed blong spirit i foldaon.
Presiden Dallin H. Oaks i tokbaot samting ia: “Yumi gat komanmen blong lavem evriwan, from se parabol blong Jisas abaot Gudfala Man Sameria, i tijim se evriwan i neba blong yumi. Be, i no se yumi glad tumas blong mekem seken komanmen nao yumi fogetem blong mekem nambawan, blong lavem God wetem olgeta hat, laef mo tingting blong yumi.”
Las Toktok
So kwestin blong wanwan long yumi hem i, ?hao nao yumi bildim brij blong fet mo komitmen blong yumiwan—blong bildim ol hae pos brij blong lavem God mo lavem neba blong yumi? Yes, yumi nid blong stat. Traehad blong yumi long stat bae i luk olsem wan plan biaen long wan napkin o wan smol plan blong wan brij we yumi hop blong bildim. I maet gat sam tru gol blong wantem andastanem moa gospel blong Lod o blong mekem wan promes blong katemdaon fasin blong stap jaj. I no gat wan we i yang tumas o i olfala tumas blong stat.
Afta sam taem, wetem prea mo gudfala plan, bae ol tingting i stap kam. Ol niufala aksen bae i kam fasin blong yumi. Ol raf stat bae i kam ol gudfala plan. Yumi bildim brij blong yumiwan long saed blong spirit wetem ol hat mo maen we yumi komitim i go long Papa long Heven mo Wan Pikinini Ia Nomo blong Hem, mo tu long ol brata mo sista we yumi wok, pleiplei, mo laef wetem.
Long ol dei we i stap kam, taem yu pasem wan saspensen brij o taem yu luk wan pikja, wetem ol hae pos blong hem, mi invaetem yu blong tingbaot tufala bigfala Komanmen, we Jisas Kraes i tokbaot long Niu Testeman. Bae ol tijing blong Lod i givim insperesen long yumi. Bae ol hat mo maen blong yumi i lukluk i go antap, blong lavem Lod, mo i go aot, blong lavem ol neba.
Bae hemia i mekem fet blong yumi long Jisas Kraes i kam strong moa mo Atonmen blong Hem we mi testifae long hem, long nem blong Jisas Kraes, amen.