“Elda Steven D. Shumway,” Liahona, Mei 2024.
Elda Steven D. Shumway
Jeneral Atoriti Seventi
Taem hem i stap wok blong tu yia long Exxon Chemical Co. long Houston, Texas, USA, Elda Steven D. Shumway i lanem se oli bin singaotem papa mo mama blong hem blong prisaed ova long wan misin long Bolivia mo oli nidim help wetem famli bisnis blong olgeta long Arisona.
“Mi no wantem mekem yu hadwok tumas blong kam bak,” papa blong hem i talem long hem. “Be sapos yu kambak, bae mi wari abaot wanem bae i hapen long bisnis.”
Hem i bin wan had desisen blong mekem, Elda Shumway i talem.
Hem mo waef blong hem i travel faef aoa i go long Dalas Teksas Tempol mo spendem ful dei long we be tufala i no kasem wan ansa. Afta, tufala i visitim wan stoa blong buk mo tufala i bin luk laef stori blong Presiden Gordon B. Hinckley (1910–2008), Go Forward with Faith.
“Mitufala tugeta i filim Lod i talem, ‘Yu nidim blong go fored wetem fet long rod blong mi, be i no rod blong yu,’” Elda Shumway i talem. “Mo i mekem se mitufala i muv i go long Arisona, we afta bae ol jenis we oli impoten mo naes tumas, oli hapen long laef blong mifala.”
Wan long ol bes samting we tufala i bin lanem long mared blong tufala, Elda Shumway i talem, i we “taem yu akseptem invitesen [blong Lod, bae yu gro. Yu progres. Ol samting oli moa gud bitim sapos we yu traem blong mekem samting long wei blong yu.”
Steven D. Shumway i bon i kam long wol long 30 Jun, 1970, long Springerville, Arisona, USA, mo papa mo mama blong hem, Wilford Douglas mo Dixie Ann Shumway, mo hem i groap long Eager, Arisona. Hem i maredem Heidi O’Brien long Sol Lek Tempol long 29 Disemba, 1994. Oli papa mo mama blong fo pikinini mo oli stap long Pinetop, Arisona.
Elda Shumway i kasem wan digri long kemikol enjinia long Brigham Young University long 1996, mo i wok long Exxon Chemical Co. stat long yia 1996 kasem 1998, mo hem i bin presiden mo CEO blong Whiting Brothers Investment Co. stat long 1998.
Long taem we oli singaotem hem, hem i stap givim seves olsem wan Eria Atoriti Seventi. Hem i bin givim seves olsem presiden blong Illinoa Chicago Misin, stek presiden, bisop, presiden blong kworom blong ol elda, stek tija blong stap redi ol misinari, mo wan fultaem misinari long Pennsylvania Philadelphia Misin.