Elda Michael B. Strong

Jeneral Atoriti Seventi

Elda Michael B. Strong i stat blong lanem gospel long hom we papa mo mama blong hem oli tijim long hem.

“Testemoni blong mi i bin gro mo kam strong mo moa strong folem taem, mo long ol wei we mi no bin luksave,” Elda Strong i talem. Taem hem i stap lukluk bak hem i talem se, “mi bin luk han blong God plante taem long laef blong mi, be hemia i bin hapen folem sam bigfala dip eksperiens long saed blong spirit.”

Taem hem mo waef blong hem i stap lukaot long famli blong tufala, oltaem tufala i stap yusum gospel long laef blong olgeta. “Mifala i traem blong mekem olsem blong save wivim gospel i go insaed long laef blong mifala,” Elda Strong i talem. “Hem i huia yumi.”

Elda Strong i kasem wan bajela blong saens digri long maekrobaeoloji wetem wan maena long kemistri long Brigham Young University long 1989 mo wan medikol digri long Baylor College of Medicine long 1993.

Hem i bin wan dokta blong sik, mo long taem we oli singaotem hem, hem i stap wok olsem jif medikol infomesen ofisa blong University of Utah.

Elda Strong i faenem se taem hem i go tru ol problem, we i tekem tu ol problem long wok blong hem, oli stap gaedem hem i go long ol ansa taem hem i tekem ol jalenj ia i go long prea. “Mi save filim nomo we Lod i stap givim mi ol aedia mo i mekem ol ansa oli kam klia long mi we sapos no, bae mi no save luksave,” hem i talem. “Mi kam blong luksave se Hem i kea tru abaot yumi.”

Long taem we oli singaotem hem olsem wan Jeneral Atoriti Seventi, Elda Strong i stap givim seves olsem wan Eria Seventi long Yuta eria. Hem i bin givim seves tu olsem presiden blong Perú Lima Central Misin, stek presiden, bisop, fultaem misinari long Bolivia Cochabamba Misin.

Michael Brent Strong i bon i kam long wol long Sol Lek Siti long 6 Ogis, 1965. Hem i maredem Cristin Connelly long 22 Ogis, 1987 long Sol Lek Tempol. Tufala i papa mo mama blong sikis pikinini. Elda mo Sista Strong oli stap long Centerville, Utah, USA.