Elda Sergio R. Vargas

Jeneral Atoriti Seventi

Taem Elda Sergio R. Vargas i kam blong lavem Andrea Sanchez, hem i ting se hem i gat wan simpol ansa long ol samting we tufala i defdefren long hem long saed blong relijin: bae tufala i mared long jos blong hem from ol famli blong hem, mo bae tufala i mared long jos blong Andrea from ol famli blong Andrea.

Be hem i lanem kwik taem se bae hem i no isi olsem. Andrea i wan memba blong Jos Ia blong Jisas Kraes blong Ol Lata-dei Sent, mo hem wantem mared long tempol. Mekem se hem i invaetem Elda Vargas blong lanem moa abaot bilif blong hem long ol misinari.

Elda Vargas i akseptem invitesen ia, we i bin jenisim laef blong hem.

Hem i tingbaot se hem i stap wok blong wan fis kampani long taem ia we hem i stap help blong transpotem laef fis long solwota. Long trip blong olgeta long solwota we i blong 25 aoa, hem i faenem wan praevet ples blong i ridim Buk blong Momon mo askem Papa long Heven abaot gospel. Hem i bin wan taem we i jenisim hem long saed blong spirit.

Elda Vargas i bon i kam long wol long 2 Novemba, 1976, long Puerto Varas, Chile, long ples we hem mo tufala brata mo sista blong hem oli groap long hem. Mama blong hem, Gladys Barria, i stap lukaot long hom mo papa blong hem, Renato Vargas, i wok olsem wan polis ofisa. Nomata we hem i stap mit wetem ol misinari olsem wan yang man, hem i intres moa blong stap plei basketbol bitim blong stap lanem gospel.

I go kasem taem we Elda Vargas i mitim Sista Vargas i mekem se hem i redi blong harem ol misinari wetem wan open maen mo hat, hem i talem. Tufala i mared long 26 Julae, 2003, mo afta tufala i sil long Santiago Jael Tempol. Tufala i gat tri pikinini.

Taem oli singaotem hem olsem wan Jeneral Atoriti Seventi, Elda Vargas i bin stap givim seves olsem wan Eria Seventi long Saot Amerika Saot Eria. Hem i bin wok tu olsem wan hae kaonsela, branj presiden, mo stek presiden.

Elda Vargas i finisim wan bajela digri long marin risos long Los Lagos University long 1999 mo i kasem wan bisnis administresen diploma long Austral University long 2002. I no long taem i pas, hem i bin wok olsem wan prodaksen mo operesen maneja blong Ventisqueros, wan memba blong German Schörghuber Corporate Grup.