“Ministri blong Fas Presidensi,” Liahona, Mei 2024.
Ol Nius blong Jos
Ministri blong Fas Presidensi
Long sosol media mesej we oli postem long 14 Febwari, 2024, Presiden Russell M. Nelson i invaetem evriwan blong yusum Dei blong Valentaen olsem wan rimaenda blong komitim yumiwan blong lavem neba blong yumi. Presiden Nelson i talem se dei ia i wan dei we pipol raon long ful wol i selebretem lav. Nomata samtaem lav hem i abaot ol flaoa, joklet, mo ol presen, “nambatu bigfala komanmen i tijim abaot wan defren kaen blong lav—we i blong mekem wan samting blong soem lav long long neba blong yumi.”
Long 15 Febwari, Presiden Nelson mo ol kaonsela blong hem oli welkamem presiden blong Navajo Nation Dokta Buu Nygren mo waef blong hem, First Lady Jasmine Blackwater-Nygren, long Tempol Skwea. Dokta Nygren i komitim hemwan fulap blong karem ol samting we man i nidim olsem wota, paoa, mo gudfala rod i go long evri hom long Navajo. Long ol yia we i pas, Jos Ia blong Jisas Kraes i bin help blong karem sam long ol samting ia i go long Navajo Nation.
Long taem blong Fren i go long Fren brodkas long 9 Maj, Presiden Dallin H. Oaks, Fas Kaonsela blong Fas Presidensi, mo waef blong hem, Kristen, tufala i toktok wetem seven long ol apu apu pikinini blong tufala we oli stap long Praemeri, abaot olsem wanem blong harem Tabu Spirit mo wanem nao Tabu Spirit i stap mekem—givim woning, givim kamfot, i testifae, i gaedem, i tijim, mo plante moa.
“Ol disaepol blong Jisas Kraes oli lisin long Jisas Kraes,” Presiden Oaks i talem. “Samtaem Hem i givim wan filing long yumi, samtaem, wan tingting. Samtaem yumi harem voes blong Hem. Presiden Nelson, profet blong yumi, i bin askem yumi blong lisin long Sevya blong yumi mo lisingud long Hem.”
Afta long 61 yia we tufala i mared, Presiden Henry B. Eyring, Seken Kaonsela blong Fas Presidensi, i talem tata long waef blong hem, Kathleen, we i ded long 15 Oktoba, 2023. Presiden Eyring i talem se, “Oltaem Kathleen i wan woman we i mekem mi mi wantem kam bes man we mi save kam olsem.”
Long 24 Maj, Presiden Eyring i dediketem Red Klifs Yuta Tempol long St. George, Utah, USA. “Bae yu faenem wan glad long seves blong yu long ples ia, we yu no save faenem long wan nara wei moa,” hem i talem long taem we oli stap mekem seves blong dediketem tempol.