Elda I. Raymond Egbo

Jeneral Atoriti Seventi

Taem hem i stap go long boding skul blong relijin long Nigeria, bigfala sista blong Elda I. Raymond Egbo i gohed blong stap invaetem hem blong “kam mo luk” wanem we Jos Ia blong Jisas Kraes blong Ol Lata-dei Sent i gat blong givim. Taem hem i gat 14 yia, hem i stat blong go long seminari long ol naet.

Taem hem i stap ridim stadi buk blong seminari, Elda Egbo i kam blong rid long Doktrin mo Ol Kavenan 135 mo ded blong Josef Smit from bilif blong hem.

“Wan samting we i gat fulap paoa i tajem mo, mo mi bin save se Profet Josef Smit i wan profet blong God. Mi save se oli bin kilimded hem from trutok,” Elda Egbo i talem, mo i bin joenem Jos i no longtaem afta. “Mi stil filim yet wanem we mi bin filim long dei ia taem mi bin ridim D&C 135.”

Afta, taem hem i wan yunivesiti studen, sista blong hem i leftemap tingting blong hem blong hem i go long wan misin. Papa blong hem i bin kros long hem from hem i lego ol stadi blong hem, be Elda Egbo i stap raet oltaem mo i stap tokbaot evri samting we hem i stap mekem mo wanem hem i stap tijim.

Elda Egbo i bin sapraes taem hem i stap kam kolosap long en blong misin blong hem, mo misin presiden blong hem i ridim wan leta we i kam long papa blong hem we i talem se hem i bin kasem baptaes. “Talem long hem se bae mi stap wet from hem,” papa blong hem i raetem.

Elda Idyo Raymond Egbo i bon i kam long wol long Port Harcourt, Rivers State, Nigeria, long 25 Jun, 1974, mo papa mo mama blong hem Udo Idio Egbo mo Veronica Ukamaka Egbo. Hem i mitim Comfort Ikip Ese taem famli blong Comfort oli muv i kam long branj blong olgeta long 1994. Tufala i mared long 15 Mei, 2003, long Calabar, Nigeria. Tufala i gat tri pikinini.

Elda Egbo i gat digri long edukesen, rijonol planing, mo bisnis administresen long tri yunivesiti. Hem i bin wok long Relijin blong Seminari mo Institiut stat long 2002 long ol defdefren posisen, we i tekem tu kantri daerekta, mo eria daerekta.

Long taem we hem i bin kasem koling blong hem, Elda Egbo i bin stap givim seves olsem wan Eria Seventi long Afrika Wes Eria. Hem i bin givim seves tu olsem presiden blong Nigeria Calabar Misin, mo olsem wan kaonsela long stek presidensi mo wan hae kaonsela. Hem i bin givim seves long wan fultaem misin long Nigeria Lagos Misin.