Stap Tij, Stap Lan, mo Stap Yusum Ol Mesej blong Jeneral Konfrens

Ol kworom blong ol elda mo ol Rilif Sosaeti oli plei wan impoten rol insaed long wok ia blong fasin blong sevem man mo mekem oli kam olsem wan god. Long taem blong Sandei miting blong olgeta, oli toktok raon long wei blong yusum ol tijing ia we i kamaot long ol las mesej blong jeneral konfrens, i go insaed long ol hadwok blong olgeta blong wok ia. Ol presidensi blong kworom mo Rilif Sosaeti oli jusum wan mesej blong konfrens blong lan aot long hem long evri Sandei miting, hemia folem ol nid blong ol memba mo folem Spirit we i stap lidim olgeta. Samtaem, bae bisop o stek presiden bae i save jusum wan mesej. Plante taem, ol lida oli mas jusum ol mesej we oli kam long ol memba blong Fas Presidensi mo Kworom blong Olgeta Twelef Aposol. Be, oli save toktok raon long eni mesej we i kamaot long jeneral konfrens we i jes pas.

Ol tija oli lukluk nomo long wei blong helpem ol memba blong hao blong yusum o praktisim ol tijing ia we oli stap long ol mesej blong jeneral konfrens, insaed long laef blong olgeta. Ol lida mo ol tija oli faenem ol wei blong leftemap tingting blong ol memba blong stadi ol mesej we oli jusum, bifo ol miting oli tekples.

Blong gat moa infomesen abaot ol miting blong kworom blong ol elda mo hemia blong Rilif Sosaeti, luk long Jeneral Hanbuk: Stap Givim Seves Insaed long Jos Ia blong Jisas Kraes blong Lata-dei Sent, 8.2.1.2, 9.2.1.2, ChurchofJesusChrist.org.

Mekem Plan blong Tij

Olgeta kwestin ia oli save helpem ol tija taem oli stap mekem plan blong yusum wan mesej blong jeneral konfrens blong tij wetem. Olsem we i nid, ol tija oli kaonsel wetem presidensi blong kworom blong ol elda o wetem presidensi blong Rilif Sosaeti taem oli stap tingting hevi long ol kwestin ia.

?From wanem presidensi blong kworom blong ol elda o hemia blong Rilif Sosaeti nao oli jusum mesej ia blong toktok raon long hem? ?Wanem nao oli hop se ol memba bae oli save mo mekem afta we oli toktok raon long mesej ia?
?Wanem nao spika ia i wantem ol memba blong andastanem? ?Wanem ol prinsipol blong gospel nao spika ia i stap tijim? ?Olsem wanem nao ol prinsipol ia oli blong kworom o Rilif Sosaeti blong mi?
?Wanem skripja nao spika ia i stap yusum blong sapotem mesej blong hem? ?I gat eni nara skripja we ol memba oli save ridim we i save mekem andastaning, o save blong olgeta i go dip o bigwan moa? (Bae yu save faenem sam not long en blong mesej, o insaed long Gaed long Ol Skripja [olskripja.ChurchofJesusChrist.org].)
?Wanem kwestin nao mi save askem we bae i save helpem ol memba blong tingting hevi moa mo praktisim ol tijing we oli stap insaed long mesej ia? ?Wanem kwestin nao bae i helpem olgeta blong luk olsem wanem ol tijing ia i stret blong yusum insaed long laef blong olgeta, insaed long famli blong olgeta, mo insaed long wok blong Lod?
?Wanem bae mi save mekem blong invaetem Spirit i kam insaed long miting blong yumi? ?Wanem nao mi save yusum blong mekem toktok insaed long klas i kam antap moa, olsem ol stori, ol analoji, ol miusik mo pikja? ?Wanem nao spika i bin mekem blong helpem ol memba oli andastanem mesej blong hem?
?Spika i givim eni invitesen blong yumi mekem? ?Olsem wanem nao bae mi helpem ol memba blong filim se oli wantem blong tekem aksen folem ol invitesen ia?

Sam Aktiviti Aedia

I gat fulap wei blong helpem ol memba blong oli lanem samting aot long ol mesej blong jeneral konfrens, mo praktisim. Hemia samfala eksampol; maet ol tija oli gat sam nara aedia we bae i wok gud moa long kworom blong ol elda, o long Rilif Sosaeti blong olgeta.

Yusum o praktisim ol trutok ia insaed long laef blong yumi. Invaetem ol memba blong luklukbak long mesej blong konfrens, mo oli lukaotem ol trutok we i save helpem olgeta blong mekem wok ia we God i bin givim long olgeta olsem wanwan man o woman, o olsem wan kworom blong ol elda, o olsem wan Rilif Sosaeti. Eksampol.?Wanem nao yumi lanem we i save helpem yumi olsem ol givhan brata o givhan sista? ?Olsem wan papa mo mama? ?olsem wan memba misinari? ?Olsem wanem nao mesej ia i lidim ol tingting, ol filing, mo ol aksen blong yumi?
Mekem ol grup mo toktok raon. Serem ol memba oli go long ol grup, mo givim wanwan defren pat blong mesej blong konfrens blong oli ridim mo toktok raon long hem. Afta, askem wanwan grup blong serem wan trutok we oli bin lanem, mo olsem wanem i blong olgeta. O yu save mekem ol grup we, insaed long olgeta, i gat ol memba we oli bin stadi long ol defren seksen blong mesej, mo letem olgeta oli serem wetem wanwan long olgeta wanem we oli bin faenem.
Lukaotem ol ansa long ol kwestin. Invaetem ol memba blong ansarem ol kwestin olsem olgeta kwestin ia abaot mesej blong konfrens: ?Wanem trutok blong gospel nao yumi faenem insaed long mesej ia? ?Olsem wanem nao yumi save praktisim ol trutok ia? ?Wanem invitesen nao, mo wanem blesing nao oli promesem? ?Wanem nao mesej ia i stap tijim yumi abaot wok we God i wantem yumi blong mekem? O mekem samfala kwestin blong yuwan we i leftemap ol memba blong tingting i go dip moa abaot mesej ia, o abaot ol trutok we hem i stap tijim. Letem ol memba blong oli jusum wan long ol kwestin ia mo faenem ol ansa insaed long mesej.
Ridim tugeta samfala toktok we i kamaot long mesej ia. Invaetem ol memba blong oli serem ol toktok we oli kamaot long mesej blong konfrens ia we i bin givim insperesen long olgeta blong mekem ol responsabiliti blong olgeta insaed long wok ia blong fasin blong sevem man mo mekem oli kam olsem wan god. Leftemap tingting blong olgeta blong tingting long hao nao oli save serem ol toktok ia blong blesem wan, we i tekem tu olgeta we oli lavem olgeta, mo ol pipol we oli stap givhan long olgeta.
Serem wan lesen we oli yusum samting long hem. Longtaem bifo klas, invaetem samfala memba blong oli tekem sam samting long hom we oli save yusum blong tij abaot mesej blong konfrens. Long taem blong miting ia, askem ol memba blong eksplenem hao nao ol samting ia oli go wetem mesej ia, mo olsem wanem mesej ia, i blong yusum long laef blong olgeta.
Stap rere wan lesen blong tij long hom. Askem ol memba blong wok tutu blong mekem plan blong wan famli haos naet folem wan mesej blong konfrens. Oli save ansarem ol kwestin olsem ia: ?Olsem wanem nao yumi mekem mesej ia i kamaot klia long famli blong yumi? ?Olsem wanem yumi serem mesej ia wetem ol pipol we yumi stap givhan long olgeta?
Serem sam eksperiens. Ridim tugeta samfala toktok we i kamaot long mesej blong konfrens. Askem ol memba blong serem ol eksampol we oli kamaot long ol skripja, mo long laef blong olgeta, we i soem gud, o i sapotem strong doktrin ia we oli tijim insaed long ol toktok ia.
Faenem wan sentens. Invaetem ol memba blong luklukgud insaed long mesej blong konfrens blong lukaotem ol sentens o toktok we oli gat mining long olgeta. Askem olgeta blong serem ol sentens ia, mo wanem oli lanem aot long olgeta. Askem olgeta olsem wanem nao ol tijing ia oli helpem olgeta blong mekem wok blong Lod.

Blong gat moa aedia long wei blong stadi mo tij aot long ol mesej blong jeneral konfrens, luk long “Ol Aedia blong Stap Lan mo Stap Tij Aot long Jeneral Konfrens.” Klik long “Ol Aedia blong Stadi” anda long “Jeneral Konfrens” insaed long Gospel Laebri.)