Wan Rekod blong Ol Samting we Mi Bin Luk Tugeta Wetem Wanem we Mi Bin Harem
I neva gat wan taem we i moa gud bitim blong stap wan memba blong Jos Ia blong Jisas Kraes blong Ol Lata-dei Sent.
Afta we mi graduet long skul blong loa, mi mo waef blong mi Marcia, i bin jusum blong joenem wan kampani blong loa we oli lukluk moa long trael kes. Taem mi stat blong tekem trening long wok blong mi ia, mi spenem plante taem blong mi blong stap rere long ol witnes blong oli testifae long trael kot. Kwiktaem mi lanem se, ol trutok bae i kamaot insaed long kot rum, taem ol witnes, anda long promes we oli mekem, oli testifae abaot trutok blong ol samting we oli bin luk tugeta wetem wanem we oli bin harem. Taem ol witnes oli testifae, tugeta, oli rekodem mo sevem ol toktok blong olgeta. Oltaem fas samting blong mi mekem we i impoten, i blong mekem rere ol witnes we man i save bilivim.
I no bin tekem longtaem blong mi luksave se ol semmak toktok we mi stap yusum evri dei olsem wan loya, oli ol semmak toktok we mi yusum long ol storian blong mi abaot gospel. “Witnes” mo “testemoni” oli ol toktok we mifala i yusum taem mifala i serem save mo ol filing blong mifala abaot, trutok we i fulwan blong gospel blong Jisas Kraes.
Taem oli bin sastenem mi olsem wan niu Eria Seventi, mi openem ol skripja blong mi blong lanem ol diuti blong mi, mo ridim Doktrin mo Ol Kavenan 107:25, we i talem, “Lod i singaotem tu Olgeta Seventi … blong stap olsem ol spesel witnes long Ol Jentael mo long ful wol.” Olsem we yufala i save tingting long hem, ae blong mi i fas long toktok ia “spesel witnes.” I kam klia long mi se mi bin gat wan responsabiliti blong serem witnes blong mi—blong testifae abaot nem blong Jisas Kraes—nomata weaples mi travel long wol.
I gat plante eksampol insaed long ol skripja abaot olgeta we oli bin ae witnes mo oli testifae abaot wanem we oli bin luk tugeta wetem wanem we oli bin harem.
Taem we profet Momon blong bifo i statem rekod blong hem, hem i raetem, “Mo nao mi, Momon, i mekem wan histri blong ol samting we mi bin luk tugeta wetem wanem we mi bin harem, mo mi singaotem hem Buk blong Momon.”
Ol Aposol blong Sevya, Pita mo Jon, i hilim wan man tru long nem blong Jisas Kraes blong Nasaret. Taem oli komandem tufala blong no toktok long nem blong Jisas, tufala i ansa:
“?Olsem wanem? ?Yufala i ting se i stret long fes blong God blong mifala i obei long yufala, no mifala i obei long hem? Hemia i stap long yufala blong yufala i skelem.
“Be mifala, bambae mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.”
Wan narafala testemoni blong winim tingting, i kam long Ol Sent blong Buk blong Momon, we oli witnesem visit blong Sevya, Jisas Kraes. Lisin long olsem wanem oli tokbaot witnes blong olgeta: “Mo long fasin ia nao oli testifae se: “Ae i neva bin luk, o neva sora i bin harem, bifo, ol samting ia we oli bigfala mo gudfala olsem we mifala i bin luk mo i bin harem Jisas i talemaot long Papa.”
Ol brata mo sista, tedei mi talemaot witnes blong mi mo mekem wan rekod blong ol samting we mi bin luk tugeta wetem wanem we mi bin harem, long taem blong tabu seves blong mi olsem wan Seventi blong Lod, Jisas Kraes. Blong mekem olsem, mi testifae long yufala abaot wan Papa long Heven we i gat lav mo Pikinini blong Hem we i kaen, Jisas Kraes, we i safa, i ded mo i girap bakegen blong givim laef we i no save finis long ol pikinini blong God. Mi testifae abaot “wan gudfala wok mo wan sapraes” mo se Lod i bin putum han blong Hem wan moa taem blong putumbak gospel blong Hem long wol tru long ol profet mo ol aposol blong Hem we oli stap laef. Mi testifae se, folem wanem we mi bin luk tugeta wetem wanem we mi harem, i neva gat wan taem we i moa gud blong stap wan memba blong Jos Ia blong Jisas Kraes blong Ol Lata-dei Sent, bitim tedei. Mi save hemia long save blong miwan, mi no dipen long eni samting, from ol samting we mi bin luk tugeta wetem wanem we mi bin harem.
Long taem blong senia yia blong hae skul, blong graduet long seminari, mi mas talemaot nem blong evri 15 tempol blong Jos. Wan pikja blong wanwan tempol i bin stap long fored blong klasrum blong mifala, mo mi mas save ples we wanwan long olgeta i stap long hem. Naoia, sam yia i pas, bae i kam wan bigfala jalenj—wetem 335 tempol we oli stap wok o we oli bin anaonsem—blong talemaot nem blong wanwan tempol ia. Miwan, mi bin luk plante long ol haos ia blong Lod, mo testifae se Lod i stap givim ol blesing mo ol odinens blong Hem i go long plante mo plante moa long ol pikinini blong Hem raon long wol.
Ol fren blong mi long FamilySearch oli bin tijim mi se, oli stap ademap ova long wan milian niu nem i go long FamilySearch evri dei. Sapos yu no bin faenem ol bubu blong yu yestedei, mi invaetem yu blong lukaotem bakegen tumoro. Taem i kam long kam tugeta blong Isrel long narasaed blong vel, i neva gat wan taem we i moa gud blong stap wan memba blong Jos Ia blong Jisas Kraes blong Ol Lata-dei Sent, bitim tedei.
Taem we mi mo Marcia i resemap ol pikinini blong mitufala long Twin Falls, Idaho, save blong mi abaot Jos raon wol i bin smol nomo. Taem oli singaotem mi blong kam wan Jeneral Atoriti, oli asaenem mi mo Marcia blong givim seves long Pasifik Eria, wan ples we mitufala i neva go long hem. Mitufala i glad tumas blong faenem ol stek stat long top go kasem daon blong Niu Silan, wetem wan tempol we oli dediketem long 1958. Hem i wan long ol 15 we mi bin lanem baehat long seminari. Mitufala i faenem ol tempol long evri bigfala siti blong Ostrelia, wetem ol stek raon long kantri ia. Mitufala i gat ol asaenmen long Samoa, long ples ia, i gat 25 stek, mo Tonga, long ples ia, kolosap haf blong populesen oli ol memba blong Jos. Mitufala i gat wan asaenmen long aelan blong Kiribas, long ples ia mitufala i faenem tu stek. Mitufala i gat ol asaenmen blong visitim ol stek long Ebeye long Masel Aelan mo Daru long Papua Niu Gini.
Afta seves blong mitufala long ol Aelan blong Pasifik, oli asaenem mitufala blong givim seves long Filipin. Long sapraes blong mi, Jos Ia blong Jisas Kraes long ol Filipin i stap gro bitim we mi no save bilivim. Naoia i gat 125 stek, 23 misin, mo 13 tempol we i stap wok o oli bin anaonsem. Mi witnesem wan jos we i gat ova long 850,000 memba long kantri ia. ?Olsem wanem nao mi bin mestem Jos Ia blong Kraes we oli stanemap raon long wol?
Afta long tri yia long Filipin, oli bin askem mi blong givim seves long Misinari Dipatmen. Asaenmen blong mi i bin tekem mitufala i go long ol misin raon long wol. Lukluk blong mi abaot Jos ia blong Sevya raon wol i bin gro bigwan kwiktaem. Oli asaenem mi mo Marcia blong go visitim ol misin long Esia. Mitufala i faenem wan naesfala stek senta long Singapo, wetem ol naesfala fetful memba. Mitufala i visitim ol memba mo ol misinari insaed long wan japel long Kota Kinabalu, Malesia. Mitufala i mitim ol misinari long Hong Kong mo tekpat long wan naesfala stek konfrens wetem ol fetful Sent we oli komitim olgeta fulwan.
Eksperiens ia i gohed blong ripit taem mitufala i mitim ol misinari mo ol memba raon long Yurop, long Latin Amerika, mo long Karabian mo long Afrika. Jos Ia blong Jisas Kraes i stap gro moa bigwan long Afrika.
Mi mi wan ae witnes blong Restoresen we i stap gohed blong gospel blong Jisas Kraes mo profesi blong Josef Smit we i hapen se “trutok blong God bae i gohed strong, hae antap, mo Indipenden, kasem taem we bae i gotru long evri graon, i visitim evri kaen weta, i brum long evri kantri, mo i ring long evri sora.”
Ol naesfala misinari we oli kavremap wol, naoia oli 74,000 mo oli strong. Blong stap wok tugeta wetem ol memba, oli baptaesem ova 20,000 pipol evri manis. I no longtaem i pas, i bin gat 18-, 19-, mo 20-yia, we oli ol yang man mo yang woman we, wetem help blong Lod, oli bin mekem bigfala merikel blong stap kam tugeta ia i hapen. Yumi faenem ol yang woman mo ol yang man ia long ol smol vilej blong Vanuatu mo long ol bigfala siti blong Niu Yok, Paris mo London. Mi bin wajem oli tij abaot Sevya long ol smol Fiji kongregesen longwe long taon mo ol bigfala kam tugeta long ol ples olsem Texas, California mo Florida insaed long United States.
Bae yufala i faenem ol misinari long evri kona blong wol we oli stap toktok long 60 defren lanwis mo stap mekem i kam tru, bigfala wok blong Sevya long Matiu 28: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit.” Mi givim ona long ol misinari blong bifo mo blong naoia blong Jos mo rimaenem ol jeneresen we i stap kam antap abaot invitesen blong Presiden Russell M. Nelson blong kam mo karem Isrel i kambak.
Mi testifae tedei se mi bin luksave bigfala Restoresen blong gospel blong Sevya wetem ae blong miwan, mo harem wetem sora blong miwan. Mi wan witnes blong wok blong God raon long wol. Bae i neva gat wan taem we i moa gud blong stap wan memba blong Jos Ia blong Jisas Kraes blong Ol Lata-dei Sent, bitim tedei.
Ating, merikel blong Restoresen wetem moa insperesen we mi bin witnesem hem i yufala, ol fetful memba blong Jos long evri ples. Yufala Ol Lata-dei Sent, we Nifae i tokbaot insaed blong Buk blong Momon, olsem we hem i luk dei blong yumi mo testifae, “Mo i bin hapen se mi, Nifae, mi bin luk paoa blong Smol Sipsip blong God, we i bin kamdaon long ol sent blong Jos blong Smol Sipsip, mo long ol kavenan pipol blong Lod, we i bin seraot olbaot long ful fes blong wol; mo oli blokem olgeta wetem stret fasin mo paoa blong God long bigfala glori.”
Mi testifae se mi bin luk wetem ae blong miwan, wanem we Nifae i bin luk—yufala, ol kavenan Sent long evri ples, oli blokem [yufala] wetem stret fasin mo paoa blong God. Taem mi stap long pulpit blong wan long ol bigfala nesen ia blong wol, Lod i mekem maen blong mi i andastanem wan samting we King Benjamin i bin tijim insaed long Mosaea 2 long Buk blong Momon. Brent, “Mi wantem se yufala i tingbaot gudfala mo hapi ples blong olgeta we oli obei ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit.”
Mi testifae long yufala se mi bin luk hemia wetem ae mo harem wetem sora blong miwan, taem mi bin mitim yufala, ol fetful Sent blong God raon long wol we oli stap obei ol komanmen. Yufala i ol kavenan pikinini blong Papa. Yufala i ol disaepol blong Jisas Kraes. Yufala i save tu wanem we mi save from se yufala i bin witnesem blong yufalawan, trutok we i fulwan blong gospel blong Jisas Kraes we i bin kambak. Sevya i bin tijim, “Be yufala ya, yufala i save harem gud, from we yufala i save luk ol samting ya, mo yufala i save harem ol tok ya.”
Anda long daereksen blong Lod, mo lidasip blong ol profet mo ol aposol blong Hem, bae yumi gohed blong mekem rere ol misinari, mekem mo kipim ol tabu kavenan, stanemap Jos ia blong Kraes raon long wol mo kasem ol blesing we oli kam taem yumi kipim ol komanmen blong God. Yumi, yumi wan. Yumi ol pikinini blong God. Yumi save Hem mo yumi lavem Hem.
Mi joenem yufala evriwan, ol fren blong mi, olsem we yumi kam wan blong testifae se, ol samting ia oli tru. Yumi mekem wan rekod blong wanem we yumi bin luk tugeta wetem wanem we yumi bin harem. Yu mo mi, yumi ol witnes we yumi testifae. Hem i wetem paoa blong tugeta witnes ia, se yumi gohed blong muv i go fored wetem fet long Lod, Jisas Kraes mo gospel blong Hem. Mi talemaot witnes blong mi se, Jisas Kraes i stap laef. Hem i Sevya mo Ridima blong yumi. Long nem blong Jisas Kraes, amen.