“Elda Sandino Roman,” Liahona, Mei 2024.
Elda Sandino Roman
Jeneral Atoriti Seventi
Oli bin introdiusum gospel blong Jisas Kraes long Elda Sandino Roman taem hem i wan pikinini. Evri Sandei, wan fren blong mama blong hem i stap karem hem mo sista blong hem blong mit wetem 15 nara memba blong Jos Ia blong Jisas Kraes blong Ol Lata-dei Sent, long wan smol miting haos long Meksiko.
Elda Roman olsem wan boe blong 5 yia i prea evri dei se famli blong hem bae i konvet i kam long gospel. Tu yia afta, mama mo papa blong hem oli kasem baptaes. Wan yia afta long taem ia, papa blong hem i baptaesem hem. “From risen ia, mi save se Lod i stap harem ol prea blong ol pikinini,” Elda Roman i talem.
Blong stap givim hemwan fulwan mo givim seves long Jos, i bin gat wan paoa we i gat mining long famli blong hem. “Mi bin luk ol risal we gospel i stap karem i kam long ol laef,” Elda Roman i talem. “Mi save se hem i karem hapines mo hop i kam.”
Sandino Roman i bon i kam long wol long 7 Ogis, 1973, mo mama mo papa blong hem Lidia Corral mo Prometeo Roman long Iguala, Guerrero, Mexico. Taem hem i stap plei long volibol tim blong wan hae skul blong Jos, Benemérito de las Américas, Roman i mitim Guadalupe Villanueva Rojas. Tufala i bin sil long Meksiko Siti Meksiko Tempol long 19 Disemba, 1998. Tufala i gat fo pikinini.
Elda Roman i kasem wan bajela blong saens digri long kompiuta sistem long ITESM (Monterrey Institute of Technology and Higher Education) long yia 2000 mo wan masta blong bisnis administresen long Brigham Young University long 2006. Hem i bin wok olsem wan maketing maneja blong Johnson & Johnson mo blong Jos olsem maneja blong Meksiko Eria Sapot Seves Ofis.
Long taem we oli bin singaotem hem, hem mo waef blong hem i stap givim seves olsem ol lida blong Ecuador Quito North Misin. Elda Roman i bin wok olsem wan Eria Seventi, kaonsela long wan stek presidensi, hae kaonsela, bisop, mo presiden blong kworom blong ol elda.
Elda Roman i talem se mein gol blong hem long laef, long weaples hem i stap givim seves long hem, i blong winim tras blong Lod. “Mi wantem Hem blong save se Hem i save trastem mi blong mekem wok ia,” hem i talem.