“Elda Patrick Kearon: Lod i bin Rere Hem mo Singaotem Hem,” Liahona, Mei 2024.
Ol Niu Koling
Elda Patrick Kearon: Elda Patrick Kearon: Lod i bin Rere Hem mo Singaotem Hem
Lod i bin rere long Elda Kearon long wan spesel wei, mo blesem hem wetem ol naesfala presen long saed blong spirit, we i mekem hem i save blesem ol narafala man long tabu koling blong hem olsem wan spesel witnes “blong Kraes long ful wol.”
Samfala yia afta, long wan Satedei we hem i kasem koling blong hem olsem wan Jeneral Atoriti Seventi, Elda Patrick Kearon mo waef, Jennifer, tufala i stap go insaed long wan supamaket semtaem we Elda W. Rolfe Kerr mo waef blong hem Janeil, tufala i stap kamaot. Oli toktok smol, mo afta famli Kerrs oli wokbaot from trak blong olgeta.
I no longtaem, wan man i wokbaot from Elda Kearon mo askem wetem glad se, “Hemia wan Jeneral Atoriti ia we yu stap toktok long hem?” Elda Kearon i se, “Yes. Hemia hem i Elda W. Rolfe Kerr blong Olgeta Seventi.” Man ia i saksakem hem blong agri, i lukluk stret Elda Kearon afta we i no bin luksave hem, mo i girap i se, “Yu oltaem yu save luksave wan Jeneral Atoriti, ?yu luk save hem?” Afta man ia i wokbaot hariap i go.
“Mi laekem storian ia from i ripresentem olsem wanem mi filim,” Elda Kearon i talem wetem wan smael. “Mi save gat semmak eksperiens ia tedei, mo semmak man ia bae no save luksave mi aot long grup blong ol man se mi mi wan Jeneral Atoriti.”
Elda Kearon, i gat fasin blong mekem fani abaot hemwan, mo fasin blong gat tingting i stap daon, we i mekem hem i kolosap long olgeta we hem i lavem o we oli bin gat spesel janis blong givim seves wetem hem. Oli bin singaotem hem, mo odenem olsem wan memba blong Kworom blong Olgeta Twelef Aposol long 7 Disemba, 2023, Elda Kearon i save se niufala koling blong hem i no abaot hem be hem i abaot wok blong Lod we i stap gohed naoia.
“Yumi evriwan i gat pat long wok blong Hem,” hem i talem, “traem blong helpem ol pipol blong filim laet blong Hem mo lav blong Hem mo kea blong Hem. Wanem we Hem i wantem yumi blong mekem olsem ol memba blong Jos blong Hem i blong blesem laef blong ol narawan.”
Lod i bin rere long Elda Kearon long wan spesel wei, mo blesem hem wetem ol naesfala presen long saed blong spirit we i mekem hem i save blesem ol narafala man long tabu koling blong hem olsem wan spesel witnes “blong Kraes long ful wol” (Doktrin mo Ol Kavenan 107:23). Wan konvet blong Jos we i gat 26 yia, mo hem i wan memba ia nomo blong Jos aot long ol brata mo sista blong hem, Elda Kearon hem i wan man blong bigfala sore, we i save olsem wanem blong lisin, konek wetem, mo kamfotem ol pikinini blong God. Hem i gat fasin blong soem bigfala lav mo faenem glad long seves. Hem i bin eksperiensem sore mo harem nogud from ol ded blong olgeta we hem i lavem, hem i testifae se Sevya Jisas Kraes, tru long Atonmen blong Hem, we i givim hiling meresin mo bae wan dei i mekem evri samting i kam oraet.
Elda Kearon hem i wan tru disaepol blong Jisas Kraes we i trastem Lod. Hem i wan lida we i isi blong folem, from hem i fetful blong stap folem Sevya mo stap lidim pipol blong Hem.
“Lod,” i talem se Presiden Jeffrey R. Holland, Akting Presiden Blong Kworom blong Olgeta Twelef Aposol, “i bin lidim Patrick i go blong stap long posisen we hem i stap long hem naoia.”
Papa mo Mama we Oli Fetful mo Gat Lav
Patrick Kearon i bin bon long Carlisle, Cumbria, long not Inglan long 18 Julae, 1961, long Paddy mo Patricia Kearon. Taem papa mo mama tufala i bin mit, tufala i bin stap givim seves long ami blong Briten long taem blong Wol Wo tu—mama blong hem i olsem wan nes blong ol ami long India mo Burma, mo papa blong hem i stap long Royal Air Force (RAF), we oli bin sendem i go long Franis, Not blong Afrika, Sicily, mo Itali.
Elda Kearon i tingbaot papa mo mama blong hem, Paddy mo Patricia, long eksampol blong laef blong tufala, long divosen, long seves, mo long sakrifaes blong tufala.
Nomata oli no stap go long jos, olgeta oli bin laef long wan famli we i gat divosen, seves, mo sakrifaes, oli ol fasin we i bin stap wetem Patrick, lasbon blong ol faef pikinini blong kapol ia. Hem i tingbaot Pat olsem wan mama we i gat lav, “we i defren long evri mama,” i givim daereksen wetem kaen fasin, plante taem, tru long eksampol blong hem, mo hem neva jajem eniwan. Hem i gat bigfala lav, we i no jenis, mo i gud tumas. Mo hem i tingbaot Paddy from “paoa blong hem, kaen fasin, mo spesel wom filing ia; lav blong hem from… ol drae ples blong Arabia [mo] ol smol smol hil blong Inglan mo Aelan; mo lav blong hem from ol skae, san saen, mo solwota. Mi save luksave i klia mak blong hem long lav blong miwan blong stap aotsaed, long open ples, long win mo long laet blong san.”
Folem RAF seves blong hem, papa blong Elda Kearon i bin wok olsem wan difens kontrakta long Saudi Arabia. Patrick, olsem wan seven yia boe, i bin lanem wan impoten lesen abaot fasin blong stap obei, we hem i bin tokbaot long fas jeneral konfrens toktok blong hem olsem wan Jeneral Atoriti. Hem i no wantem lisin long toktok blong papa mo mama blong werem sus long wan kamping trip long drae ples, hem i bin go wokabaot long ples ia wetem “slipa” we i mekem hem i safa from skopion i bin kakae hem long saed blong leg blong hem.
Patrick Kearon olsem wan boe long Saudi Arabia.
Tri yia afta, yang Patrick i go long wan boding skul long Inglan, we i mekem hem i harem nogud bigwan from papa mo mama blong hem, harem nogud ia i go daon tru long ol toktok blong tufala long leta blong leftemap tingting blong hem.
“Harry Potter i bin faenem i isi long Hogwarts boding skul taem yu komperem. Hem i bin had,” hem i talem abaot boding skul. “Mi bin save go bak hom long Krismes, Ista, mo en blong yia nomo. Mi mekem smol kalenda long ol pis pepa, evri dei mi krosem aot wan, kasem taem we mi save gobak long famli blong mi.
Sam yia i pas, taem Patrick i mekem seken yia blong hem long boding skul blong Inglan, wan bigfala hariken i kam long saed blong Irish Solwota. Risal blong hariken ia, i mekem 5,000 hom raon long eria ia oli fulap long wota. Oli bin askem Patrick mo ol klasmet blong hem blong oli help long bigfala klinap.
“Mi tingbaot yet hevi blong ol wetwet kapet mo strong smel blong olgeta,” hem i talem. “Be mi tingbaot se mi gohed blong wok mo finisim wok ia wetem ol fren blong mi long skul. Mo mi tingbaot pipol mo tangkyu blong olgeta.”
Eksperiens ia i bin faswan blong Patrick blong luk ol blesing blong tugeta saed, olgeta we oli givim seves mo olgeta we oli kasem seves. Afta mi tingtingbak long ol filing blong fraet we mi gat taem mi yangfala, ol tingting ia mi lego taem mi traem bes blong mi blong helpem ol neba blong mi.”
Afta long sekendri skul, Patrick i gobak long Sadis Arabia, ples we hem i statem manejmen trening wetem wan kampani blong salem kaekae mo dring raon long wol. Eksperiens ia i mekem hem i stat blong kasem wok long plante indastri, kasem hem i endem olsem wan komunikesen konsalten long Inglan wetem Sista Kearon.
“Wol Blong Mi i Tanem i Go Daon”
Taem Patrick i gat 19 yia, hem i lusum papa blong hem mo man blong sista blong hem long wan nogud trak aksiden long Saudi Arabia. “Wol blong mi i tanem i go daon taem mi lusum olgeta,” hem i talem. Papa blong hem, sapot blong hem, toktok blong hem blong leftemap tingting wetem lav, mo glad blong hem long ol naesfala samting blong wol ia i lus. Bigfala harem nogud mo emti spes i stap yet, Patrick i go hom long Inglan wetem mama blong hem be afta, hem i kambak long Saudi Arabia.
“Mi bin gat plante spesel janis blong lan mo gro mo luk olsem wanem ol bisnis oli wok,” hem i talem. Hem i talem tangkyu from “wan gudfala bos we i trenem hem, mo gaedem hem, mo kam wan dia fren. Hem i wan long ol man we i olsem papa blong mi, from hem i kam wan blesing afta we papa blong mi i ded.”
Taem i pas, hem i gobak wok long London, Patrick i bin mitim sam memba blong Jos.
“Olgeta oli ol nambawan eksampol blong fet blong yumi,” hem i talem. “Wan long olgeta i blong Kalifonia, mo mi bin go stap wetem famli ia taem mi bin stap wok long ples ia.”
Eksperiens ia i givim Patrick wan naesfala fandesen blong andastanem gud Jos ia. Glad we famli ia i faenem long seves i bin tajem hem, be hem i gat plante kwestin abaot doktrin mo ol bilif blong Jos. Long Inglan tu yia afta, hem i bin mitim sam “gudfala misinari” long ol taon long London. Afta we oli tokbaot gospel ia wetem olgeta blong sam manis, mo oli talem long hem se hem i no stap mekem efot blong hem i kasem baptaes, olgeta oli askem hem sapos hem wantem wan blesing.
“Mi agri blong kasem wan blesing long wan senia misinari we mi bin save,” hem i talem. “Filing we mi kasem long taem blong blesing, i bin wan ki long taem we mi bin jenisim laef blong mi. I bin wan samting we bae mi neva talem no from, we mi bin filim laet mo glad mo pis we i no gat toktok we yumi save yusum blong tokbaot. Ol toktok blong blesing ia i pruvum insperesen mo lukluk we i tru.”
Eksperiens ia, tugeta wetem “plante narafala samting long rod blong kasem baptaes,” i lidim Patrick blong gat wan testemoni blong Sevya mo Jos blong Hem we i bin kambak. Sam manis i pas, long dei bifo Krismes long 1987, hem i bin baptaes olsem wan memba blong Jos Ia blong Jisas Kraes blong Ol Lata-dei Sent.
Long olgeta we oli stap lukaotem wan testemoni, Elda Kearon i talem se: “Jusum fet, mo mekem folem ol invitesen long Alma 32. Folem ol filing blong yu long saed blong spirit. Bae oli lidim yu, mo bae yu save.”
“Wan Ples blong Kasem Paoa”
Tu yia afta long baptaes blong hem, Patrick i stap go long adalt wod long London taem hem i mitim Jennifer Hulme, wan studen blong Brigham Young Yunivesiti blong Saratoga, Kalifonia. Jennifer i bin kam long London blong sikis manis blong stadi art histri mo Inglis litresi. Hem i las bon aot long eit pikinini, hem i bon long Jos.
Kwiktaem nomo, Patrick i kasem ae blong hem.
“Taem mi wajem hem i stap toktok wetem pipol long wod ia, mi luk wei we hem i tritim olgeta,” Jennifer i talem abaot Patrick. “Nomata hem i wan niu memba, wan memba we i stap kambak, wan man we i gat sam hadtaem, o wan man we i wan gudfala fren, hem i tritim evriwan wetem semmak kaen blong bigfala lav mo intres. Kwaliti ia i fasfala samting we i pulum mi i go kolosap long hem. Hem i wan kwaliti we mi bin luk hem i developem, mo we God i bin putum long hem mo i bin yusum gud, ova long 33 yia we mitufala i bin mared.”
Elda mo Sista Kearon, lav mo respek we tufala i gat long wanwan long tufala i mekem tufala i wok wan long fet.
Afta long frensip we tufala i gat, tufala kapol i mared long Oklan Kalifonia Tempol long Jenuware 1991. Tufala i lukaot famli blong tufala long Inglan blong 19 yia kasem we Elda Kearon oli singaotem hem long 2010, olsem wan Jeneral Atoriti Seventi afta we hem i stap givim seves long plante lidasip koling, tugeta olsem wan stek presiden mo Eria Seventi. Hem i givim seves olsem wan Senia Presiden blong Olgeta Seventi taem oli singaotem hem olsem Kworom blong Olgeta Twelef.
Elda Kearon i talem se waef blong hem i wan fetful disaepol we i save tru aedentiti blong hem. “Hem i laef long wan hapi laef, hem luk gud saed blong evri samting, hem i yusum gud taem blong hem blong mekem samting, hem i givim help, hem i glad oltaem long laef, wetem Sevya i stap long medel blong evri samting. Hem i bin wan stamba blong paoa mo plante blesing long mi stat long taem we mitufala i bin mit.”
Susannah, namba tu pikinini gel blong tufala i aot long olgeta tri, hem i talem se mama blong hem i glad blong givim hemwan: “Hem i fulap long laet mo hem i gat strong filing from gospel.” Mo olsem papa blong hem, mama blong hem i wan “gudfala man blong lisin.”
Susannah mo ol sista blong hem oli talem se lav mo respek blong papa mo mama long wanwan long olgeta, i mekem olgeta oli wok wan long fet from ol semmak gol. Ol lisin long wanwan long olgeta mo gat respek, mo luksave tingting blong olgeta wanwan.
Emma, las bon pikinini blong tufala i se, papa mo mama blong hem tufala i gat wan hapi rilesensip mo soem lav blong tufala long olgeta pikinini blong tufala we “i mekem wan wan ples blong stap hapi mo sef.”
Lizzie Kearon Staheli, fasbon gel, i talem se: “Papa i luk ol pipol olsem we Kraes i luk olgeta long ol ae blong Hem. Hem i oltaem wantem tumas blong leftemap mo mekem ol pipol oli kam strong. Hem i luksave se wanwan man i gat paoa blong mekem samting, nomata long situesen we oli stap long hem.”
Emma i ademap se: “Hem i fulap long fet mo laekem glad we i kam tru long gospel blong Hem. Afta we hem i kasem gospel ia we i bin kambak olsem wan adalt, hem i luksave wok we gospel ia i mekem long laef blong wan man, olsem wan stamba long laet mo glad.”
Elda Kearon i singaotem ol gel blong hem —Lizzie (pikja blong hem wetem man blong hem, Jonathan), Susannah, mo Emma—“laet ia we i naes tumas long laef blong mifala, ol nambawan presen blong mifala .”
Jean B. Bingham, foma Jeneral Presiden blong Rilif Sosaeti, i tokbaot Elda Kearon olsem wan man we i stap kwaet taem i gat tumas wari. Hem i tingbaot wan taem we hem, Elda David A. Bednar blong Kworom blong Olgeta Twelef Aposol, Elda Kearon, mo ol narafala wan oli faenem se oli fas long wan kantri aotsaed we oli no save aot from raorao blong politik. Anda long daereksen blong Elda Bednar, Elda Kearon i tekem plante aoa blong toktok long wan satelaet fon wetem ol lokol ofisa mo Jos ripresentativ blong krietem wan rod blong karemaot olgeta.
“Kwaet fasin blong hem, ol spesel efot, mo ol niu tingting we i kam tru long insperesen oli mekem wan wei blong mifala i gat sef flaet aot long ples ia,” Sista Bingham i talem.
Long Disemba 2021, famli oli bin sek blong lanem se Sista Kearon i bin kasem kansa long titi.
“Mi neva tingting se kansa bae i kasem mi o mifala,” Sista Kearon i talem. Hem i singaotem tritmen we hem i kasem blong mekem se sik ia i kam moa olsem wan prapa had tritmen, be Sevya i bin stamba long paoa blong hem blong tru long evri samting. “Mi stap gohed yet wetem ol tablet, be mi glad blong talem se mi mi fri long kansa olsem we ol dokta oli talem.”
Elda Kearon i talem se: “Jen i bin stanap strong, mo no lusum fet blong hem tru long evri samting. Mifala i talem tangkyu evri dei from we hem i stap helti, mo talem tangkyu from kea we hem i bin stap givim long mifala.”
Olsem ol narafala hadtaem we hem mo hasban blong hem i bin pasem, Sista Kearon i se, “Laef i givim long mifala ol samting we mifala no wantem blong mekem. Mifala i no laekem olgeta. Mifala i no askem blong oli kam. Be mifala i mas fesem olgeta nomo. Bes wei blong winim ol samting ia we oli had, i blong tanem mifala i go long Lod mo askem paoa blong Hem, putum fet blong mifala long Jisas Kraes mo long bigfala lav mo sore, mo paoa blong Hem. Long taem i pas bifo, mi bin lanem plante abaot olsem wanem Sevya i helpem yumi long ol dip mo ol taem we i tudak i bigwan tumas.”
Elda mo Sista Kearon, tufala i kasem ol tabu save ia afta we fas bon pikinini blong tufala, Sean i bin bon.
“Ston ia blong Atonmen blong Jisas Kraes”
Long fastaem we Sista Kearon i gat bel, tufala i bin lanem long ol skan blong hem se bebi boe ia “i gat problem long hat, wan kondisen we i save lid i go long ded blong hem,” Elda Kearon i talem. “Mifala i spendem fultaem ia we hem i gat bel i stap blong faenem aot ol bes dokta, dokta blong hat, mo dokta blong operetem hat we oli gat evri samting blong fiksim problem blong hem ia. Mifala i faenem wan nambawan tim long wol long London, mo olgeta oli gat strong tingting se olgeta oli save fiksim problem ia.”
Ol dokta blong operesen oli operetem Sean taem hem i gat 19 dei afta we hem i bon. Operesen ia i tekem longtaem mo oli mekem wetem plante kea mo efot. Afta long taem ia, Elda Kearon i se, “Smol hat blong Sean i no save karembak laef bakegen. Mekem mifala i lusum hem. Ded blong hem i wan bigfala harem nogud. Hemia i no risal we mifala i bin lego kaekae from, prea from, mo krae from, be mifala i save se ol han blong heven oli bin stap long eksperiens ia.”
Sista Kearon i talem se, “God i lidim mitufala tru long ol manis ia long taem we mi gat bel, mo smol naesfala taem ia wetem pikinini boe blong mitufala long wan wei se, long en blong hem, mitufala i save se mitufala i bin mekem evri samting we mitufala i save mekem blong hem. Hemia i wan bigfala kamfot.”
Hiling i bin kam from wan bigfala andastaning blong Atonmen blong Sevya, mo Laef Bakegen long Ded blong Hem, we Sista Kearon i kasem tru long plante stadi blong hem long 1 Nifae mo 2 Nifae. “Long taem blong harem nogud blong mitufala long ded ia, mi bin filim olsem se mi stap tantanem mi go raon long long wan blak hol,” hem i talem. “Be nomata long hemia, sloslo taem i pas, fri foldaon ia oli holemtaet tru long Atonmen blong Jisas Kraes—from hem i tru. Bigfala lav mo sore blong Hem, se Hem i laef i stap, i mekem iven save mekem yumi winim ol bigfala harem nogud we yumi gat mo gat hop.”
Hiling i bin kamtru taem tufala i gat tri gel. “Olgeta oli karem hiling i kam wetem olgeta,” Elda Kearon i talem. “Olgeta oli ol naesfala laet long laef blong mitufala, ol nambawan presen ia blong mitufala.”
Hiling i kam long ol insperesen toktok blong ol Jos lida, wetem wan jeneral konfrens toktok we i kam long Elda Lance B. Wickman we hem i bin talem, Elda Wickman i serem harem nogud taem hem i stap wokbaot i go kam long ol emti vranda blong hospital taem smol boe blong hem i sik bigwan long wan sik blong ol pikinini. “Elda Wickman i tijim se ‘yumi biliv taem yumi luk’ mo fet i blong trastem Lod,” Elda Kearon i talem. “Toktok blong Hem i gat bigfala valiu long mi, from klia andastaning blong hem long wan kaen eksperiens olsem. Mi bin mekem i kam moa bigwan andastaning blong mi tru long ol namba blong taem we mi ridim, mo lisin long hem”
Mo hiling i kam tru taem yumi mekem wok blong givhan long olgeta we oli lusum ol famli—olsem ol rifuji blong Yurop, olgeta we oli fesem fasin blong abius o bigfala wari, o ol lida blong Jos olsem Elda Paul V. Johnson long Presidensi blong Olgeta Seventi, we i bin lusum pikinini gel blong hem from kansa tu manis bifo hem i joenem Elda Kearon long Yurop Eria Presidensi, long 2015.
“Hem mo Sista Kearon, tufala i bin helpem mifala long harem nogud ia mo long taem blong hiling,” Elda Johnson i talem. “Tufala i andastanem gud mo rere oltaem blong help long situesen blong mifala. Oltaem mi stap laekem olgeta blong from hemia.”
Hemia nao wei ia blong stap olsem wan disaepol. Yumi karem ol hevi samting blong ol narafala. Yumi krae wetem olgeta we oli krae. Yumi givim kamfot long olgeta we oli nidim kamfot. Mo yumi stanap olsem ol witnes blong God—mo promes we i no save finis se bae yumi mitim bakegen olgeta we oli oli ded, we i posibol tru long Atonmen blong Jisas Kraes. (Luk long Mosaea 18:8–9.)
Elda Kearon i talem halo long ol memba blong Is Yurop Eria.
Afta, taem ol taem blong tes blong laef oli kam long yumi, hiling lav ia, mo help long saed blong wok blong givhan, yumi givim long olgeta we oli bin givim long yumi. Olsem wan Aposol blong Lod Jisas Kraes, Elda Kearon hem i rere blong serem wetem evriwan long wol gospel mesej blong hop, hiling, mo pis.
“?From wanem ol had jalenj oli hapen long yumi?” Elda Kearon i askem. “From yumi kam long wol ia blong lan, blong gro, blong kam tabu, mo blong lavem mo trastem Papa blong yumi we i stap long Heven mo Sevya blong yumi. Naoia, yumi no save luk Olgeta, mo Olgeta oli no save holem yumi. Be blesing blong Atonmen blong Sevya oli no gat en—!i no gat en!”