O Le Manumalo o le Faamoemoe
O le faamoemoe o se meaalofa e ola, o se meaalofa e tupu a o faateleina lo tatou faatuatua ia Iesu Keriso.
Ou uso e ma tuafafine i le salafa o le lalolagi, a o tatou amatalia lenei taimi sili ona faapitoa o le konafesi aoao, o le a mautinoa lava le taulai mai o fofoga o le lagi i o tatou luga. O le a tatou faalogo ai i le siufofoga o le Alii e ala mai i Ana auauna; o le a tatou lagona ai le faatosinaga “taiala, taitaiga, [ma le] faamafanafanaga” a le Agaga Paia, ma o le a faamalolosia ai o tatou faatuatua.
I le tolu tausaga talu ai, na amatalia ai e Peresitene Russell M. Nelson le konafesi aoao i upu nei: “O faaaliga mamā mo fesili i lou loto o le a avea ai lenei konafesi ma konafesi tauia ma lēmafaagaloina. Afai e te le’i saili atu lava i le auaunaga a le Agaga Paia e fesoasoani ia te oe ia lagona mea ua finagalo le Alii ia e lagona i nei aso e lua, ou te valaaulia oe ia faia nei loa. Faamolemole ia faia lenei konafesi o se taimi o le taumamafa i sāvali mai le Alii e ala mai i Ana auauna.”
Ua faafesootai faatasi e tusitusiga paia ia upu mamana nei e tolu: faatuatua, faamoemoe, alofa mama. O le meaalofa o le faamoemoe o se faaeega anagata mai le Atua.
O le upu faamoemoe e faaaogaina mo le tele o mea tatou te mananao ia tutupu. Mo se faataitaiga, “Ou te faamoemoe ia le timu,” po o le “Ou te faamoemoe ia manumalo le matou ‘au.” O lo’u faamoemoe e talanoa atu e uiga i a tatou faamoemoega paia ma faavavau e faatotonugalemuina ia Iesu Keriso ma le talalelei toefuataiina, ma o tatou “faamoemoega mautinoa … i faamanuiaga folafolaina o le amiotonu.”
Faamoemoe mo le Ola Faavavau
O lo tatou faamoemoe mo le ola e faavavau ua faamautinoaina e ala mai i le alofa tunoa o Keriso ma a tatou lava filifiliga, e faatagaina ai i tatou i le faamanuiaga maoae o le toe foi atu i lo tatou aiga faalelagi ma nonofo e faavavau i le filemu ma le fiafia faatasi ma lo tatou Tama Faalelagi, Lona Alo Pele, o tatou aiga faamaoni ma uo pele, ma alii ma tamaitai amiotonu mai i konetineta uma ma seneturi uma.
I le lalolagi ua tatou oo ai i le olioli ma le faanoanoa, a o suesueina ma tofotofoina i tatou. O lo tatou manumalo e oo mai e ala i le faatuatua ia Iesu Keriso a o tatou manumalo i a tatou agasala, faafitauli, faaosoosoga, faaituauga, ma luitau o lenei olaga faaletino.
A o tatou faamalosia lo tatou faatuatua ia Iesu Keriso, tatou te vaai i tua atu o o tatou tauiviga i faamanuiaga ma folafolaga o le faavavau. E pei o se sulu o lona malamalama e tuputupu pea, o le faamoemoe e suluia ai le lalolagi pogisa, ma tatou vaaia ai lo tatou lumanai matagofie.
O Le Faamoemoe e Sau mai i le Atua
Talu mai le amataga, ua faamanuiaina ai ma le naunautai e lo tatou Tama Faalelagi ma Lona Alo Pele, ia tagata amiotonu i le meaalofa taua o le faamoemoe.
Ina ua tuua le faatoaga o Etena, na aoaoina Atamu ma Eva e se agelu e uiga i le folafolaga o Iesu Keriso. Na faamalamalamaina o laua olaga i le meaalofa o le faamoemoe. Na tautino mai e Atamu, “Ua pupula ai o’u mata, ma o le a ou maua i le olaga lenei le olioli.” Sa tautala Eva e uiga i “le olioli o le togiolaina o i [la’ua], ma le ola e faavavau ua tuu mai e le Atua ia i latou uma o e e usiusitai.”
E pei foi ona aumaia e le Agaga Paia le faamoemoe ia Atamu, o le mana o le Agaga o le Alii e faamalamalama ai ē faamaoni i aso nei, e faasusulu mai ai le moni o le ola e faavavau.
Ua auina mai e le Faaola ia i tatou se Faamafanafana, o le Agaga Paia, o se soa i lo tatou faatuatua, faamoemoe, ma le filemu [manuia] “e le faapei ona avatu e le lalolagi.”
Na fetalai le Faaola, “e maua foi outou e le puapuaga i le lalolagi, a ia outou loto tetele, ua ou manumalo i le lalolagi.”
I taimi o puapuaga, tatou te filifili e faalagolago i le Alii i le faatuatua. Tatou te tatalo filemu, “Ae aua le faia lo’u loto, a o lou finagalo.” Tatou te lagona le faamaoniga a le Alii mo lo tatou naunautaiga agamalu, ma tatou te faatalitali ai i le filemu [manuia] ua folafolaina mai, o le a auina mai e le Alii i Lana taimi atofaina.
Na aoao mai le Aposetolo o Paulo, “O le Atua foi e tupu mai ai le faamoemoe [o le a] faatutumuina outou … i le olioli uma atoa ma le filemu … , ina ia tele lava lo outou faamoemoe,” “ia olioli i le faamoemoe; ia onosai i le puapuaga;” “ona o le mana o le Agaga Paia.”
O Se Lesona o le Faamoemoe
Na silafia lelei e le perofeta o Moronae le uiga o le i ai o le faamoemoe ia Keriso i le taimi o puapuaga. Sa ia faamatalaina lona tulaga matautia:
“Ua na o a’u lava. … Ua leai … se mea ou te alu i ai.”
“Ou te le faailoa atu a’u lava … ne’i o latou faaumatia a’u.”
O le mea e mataina ai, i lenei itula pogisa ma le tuuatoatasi, na tusifaamaumau ai e Moronae upu o le faamoemoe o lona tamā.
“Afai ua i ai i se tagata le faatuatua e tatau ona i ai ia te ia le faamoemoe; ona a aunoa ma le faatuatua e le mafai ona i ai se faamoemoe.”
“O le a le mea tou te faamoemoe i ai? … Tou te faamoemoe e ala i le togiola a Keriso ma le mana o lona toetu, ia faatutu mai outou i le ola faavavau.”
O’u uso e ma tuafafine, o le faamoemoe o se meaalofa e ola, o se meaalofa e tupu a o faateleina lo tatou faatuatua ia Iesu Keriso. “O le faatuatua o le mautinoa lea o mea ua faamoemoe i ai.” Tatou te fausia poloka—mautinoa o lo tatou faatuatua—e ala i le tatalo, feagaiga o le malumalu, tausia o poloaiga, faaauau ona taumamafa i tusitusiga paia ma upu a perofeta o aso nei, aai ma feinu i le faamanatuga, auauna atu i isi, ma le tapuai i vaiaso taitasi faatasi ma o tatou usoga Au Paia.
O Se Maota o le Faamoemoe
Ina ia faamalolosia lo tatou faamoemoe i se taimi ua faateteleina ai le amioleaga, ua faatonuina ai e le Alii Ana perofeta e faasoo le lalolagi i Ona malumalu.
A o tatou ulufale atu i le maota o le Alii, tatou te lagona le Agaga o le Atua, o faamaonia lo tatou faamoemoe.
O le malumalu e molimau mai i le tuugamau avanoa ma o le olaga i tua atu o le veli e faaauau pea mo tagata uma.
Mo i latou o ē e le o i ai se soa e faavavau, ua faamautu malosi mai e sauniga, o tagata amiotonu uma o le a maua faamanuiaga folafolaina uma.
E i ai se faamoemoe matagofie tele a o tootutuli se ulugalii talavou faafesagai i le fatafaitaulaga ina ia faamauina, e le mo na o le taimi nei ae mo le faavavau.
O loo i ai se faamoemoe tele mo i tatou i folafolaga na faia i a tatou fanau, po o le a lava o latou tulaga o i ai nei.
E leai se tiga, leai se ma’i, leai se le tonu, leai se mafatiaga, leai se mea e mafai ona faapouliuligia ai lo tatou faamoemoe a o tatou talitonu ma uumau i a tatou feagaiga ma le Atua i le maota o le Alii. O se maota o le malamalama, o se maota o le faamoemoe.
Pe A Leai se Faamoemoe
E maligi o tatou loimata o le faavauvau a o tatou vaai i le faanoanoa ma le pagatia ia i latou o e ua leai se faamoemoe ia Keriso.
Sa ou matauina mamao mai se ulugalii o lē sa i ai se taimi na i ai le faatuatua ia Keriso ae na filifili e lafoai lo laua talitonuga. Sa manuia i laua i le lalolagi, ma sa la maua le fiafia i lo la’ua atamamai ma le teenaina o lo la’ua faatuatua.
Sa foliga manuia mea uma seia oo ina faafuasei ona ma’i ma maliu le tane, ae sa talavou lava ma aumalosi. E pei o se gasetoto o le la, sa la’ua punitiaina le malamalama o le Alo, ma o le taunuuga sa o se gasetoto o le faamoemoe. O le avā, i lona le talitonu, na lagonaina nei le le mautonu, tiga o le le saunia, ma lē mafai ona faamafanafana lana fanau. Na ta’u atu e lona atamai sa atoatoa lona olaga, seia oo ina faafuasei ona ia vaaia ua leai se taeao. O lona faanoanoa na aumaia ai le pogisa ma le le mautonu.
Faamoemoe i Faalavelave e Lotonutimomoia
Sei ou faatusa lona faanoanoa tiga i le faamoemoe o se tasi o aiga ia Keriso i le aluga o se taimi lotonutimomoia.
I le luasefulu tasi tausaga ua mavae, na ave atu ai i se vaalele a le falemai le pepe fou a lou te’i tama, o Ben Andersen, ma lona toalua, o Robbie, mai lo latou nuu faifaatoaga i Idaho agai i le Aai o Sate Leki. Sa ou taunuu atu i le falemai, ma sa faamatala mai e Ben faaletonu ogaoga ma lamatia ola o le fatu o si la pepe. Sa ma tuu o ma lima i luga o le tamai ulu o Trey. Sa faamanuiaina o ia e le Alii i le faaauauina o le ola.
Na faia le taotoga o le fatu o Trey i le vaiaso muamua o lona olaga, ma e tele isi taotoga na sosoo ane ai. A o mavae tausaga, sa manino mai o le a manaomia e Trey se taotoga e sui ai lona fatu. E ui lava ina sa faatapulaaina ana gaoioiga faaletino, ae sa faalauteleina lona faatuatua. Sa ia tusia, “Ou te lei faanoanoa lava mo au lava, aua na ou iloaina e le aunoa le taua o le i ai o le faatuatua ia Iesu Keriso ma se molimau i le ata o le faaolataga.”
Na tuu e Trey i lana telefoni le upusii lenei mai ia Peresitene Nelson: “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.”
Sa tusia e Trey: “Sa ou tulimatai atu e le aunoa i le auauna atu i se misiona talai, peitai … o le a le tuu a’u e a’u fomai e auauna atu i se misiona seiiloga e le itiiti ifo ma se tausaga talu ona uma le taotoga e sui ai lou fatu. … Ua ou tuu lo’u faatuatua ia Iesu Keriso.”
Sa fiafia Trey i le taliaina i le mataupu tausitusi i le BYU e amata i le semesa lenei, ae na sili atu foi le fiafia i le faaiuga o Iulai ina ua ia maua le valaau mai le telefoni lea sa matuai faamoemoeina e sau i le falema’i mo le taotoga e sui ai lona fatu.
Fai mai Trey, “I le tasi le tausaga, o le a ou alu i la’u misiona.”
Sa tele faamoemoega, a o ia ulufale atu i le potu o le taotoga. Ae peitai, i le taimi o le taotoga sa i ai ni faaletonu ogaoga, ma sa lei toe malamalama Trey.
Fai mai lona tina o Robbie: “O le Aso Faraile sa o se aso sili ona nutimomoia … na o le taumafai e su’e se auala e talia ai. … Sa ou ala i le leva o le po e na ona taumafai e malamalama i mea uma. … Ae i le Aso Toonai, sa ou ala a’e ma se lagona o le matuai olioli lava. Sa le na o le toafilemu; sa le o le lē taliaina. Sa ou lagona le olioli mo lo’u atalii, ma sa ou lagona le olioli i le avea ma ona tina. … Na vave ala a’e Ben nai lo a’u, ma ina ua i’u ina maua se avanoa e talanoa ai, na ala a’e Ben ma nā lava lagona e tutusa lelei.”
Sa faamatala mai e Ben: “Sa oo mai le manino i lou loto a o aoaoina a’u e le Atua e ala i Lona Agaga Paia. Sa ou ala i le 4:00 i le taeao, ma sa faatumulia i le filemu ma le olioli e lē mafaamatalaina. E faapefea ona mafai lenei mea? … O le maliu o Trey e ese le tiga, ma ua ou misia tele o ia. Peitai e le tuulafoaia i tatou e le Alii. … Ou te tulimatai atu i se toefaatasiga fiafia.”
O Le Folafolaga o le Faamoemoe
Sa tusia e Trey i lana apitalaaga upu nei mai le saunoaga a Peresitene Nelson i le konafesi aoao: “E foliga mai e lē mafai ona e lagona le olioli pe a mafatia lau tama i se ma’i e leai se togafiti, po o ua leai sau galuega po o ua faalata oe e lou toalua. Ae o le olioli tonu lava lena o loo ofo mai e le Faaola. O Lona olioli e faifai pea, ma faamautinoa mai o o tatou ‘puapuaga o le a na o sina taimi laitiiti’ [Mataupu Faavae ma Feagaiga 121:7] ma faapaiaina mo lo tatou manuia.”
Uso e ma tuafafine, atonu e le vave oo mai le filemu o e sailia e pei ona e manao i ai, ae ou te folafola atu a o e faalagolago i le Alii, o le a oo mai Lona filemu.
Tau ina ia tatou tausia o tatou faatuatua faapelepele, fetaomi atu i luma ma se susulu atoatoa o le faamoemoe. Ou te molimau atu o lo tatou faamoemoe o lo tatou Faaola, o Iesu Keriso. E ala atu ia te Ia, o le a taunuu ai a tatou miti amiotonu. O Ia o le Atua o le faamoemoe—o le manumalo o le faamoemoe. O loo soifua o Ia ma e alofa o Ia ia i tatou. I le suafa o Iesu Keriso, amene.