E Faigofie le Aoaoga Faavae a Iesu Keriso
Ou te tuuina atu la’u molimau i le galuega paia o le aoao atu o fanau a le Tama Faalelagi i le aoaoga faavae faigofie a Iesu Keriso.
E tofu i tatou uma ma tagata o aiga tatou te alolofa i ai ua faapea ona faaosooso ma tofotofoina e ‘au ua manino le faia pea lava pea a Satani, le faaoosala, o lē e manao ia pagatia fanau uma a le Atua. Mo le toatele o i tatou, sa i ai ni po e lē maua ai se moe. Sa tatou taumafai ma le malosi uma e fai ai mea lelei, e siomia tagata na i ai i tulaga lamatia. Sa tatou faatauanau i le tatalo mo i latou. Sa tatou alofaina i latou. Sa tatou faia le faataitaiga aupito lelei na mafai ona tatou faia.
Sa feagai foi Alema, se perofeta poto mai aso anamua, ma faigata faapena. O le nuu sa ia ta’ita’ia ma alofa i ai sa tele ina feagai ma osofaiga e se fili matamataita, ae sa latou taumafai pea e tausia ni fanau amiotonu i se lalolagi o le amioleaga. Sa lagona e Alema na pau lona faamoemoe o le manumalo o se malosiaga lea atonu e i ai taimi e manatu māmā i ai, ae tele foi ina matuai itiiti lona faaaogaina. Sa aioi atu o ia mo le fesoasoani a le Atua.
Sa iloa e Alema e faapea, ina ia fesoasoani mai le Atua, sa moomia ona salamo i latou sa ia taita’ia, faapea foi ona fili. O lea, na ia filifili ai se isi faiga e ese mai e tau ai.
O loo faamatala mai e le Tusi a Mamona faapea: “Ma o lenei, ona sa i ai i le talaiga o le upu se faamoemoega sili e ta’ita’i atu ai tagata ia latou faia le mea tonu—ioe, sa i ai sona aafiaga mamana sili atu i luga o mafaufau o tagata nai lo le pelu, po o se isi lava mea, ua oo ia te i latou—o lea na manatu ai Alema e tatau ona latou faata’ita’ia le mana o le upu a le Atua.”
O le afioga a le Atua o le aoaoga faavae lea na aoao mai e Iesu Keriso ma Ana perofeta. Na silafia e Alema e i ai se mana tele i upu o aoaoga faavae.
I le vaega 18 o le Mataupu Faavae ma Feagaiga, o loo faaalia mai ai e le Alii le faavae o Lana aoaoga faavae:
“Aua faauta, ua Ou poloaiina tagata uma o i soo se mea ia salamo. …
“Aua, faauta, na mafatia le Alii lo oulua Togiola i le oti i la le tino; o le mea lea na mafatia o ia i le tiga o tagata uma, ina ia mafai ona salamo tagata uma ma o mai ia te ia.
“Ma ua toetu mai o ia mai le oti, ina ia mafai ona ia aumai o tagata uma ia te ia, i luga o tuutuuga o le salamo.”
“Ma ia oulua faapa’u’ū i lalo ma ifo atu i le Tamā i loʼu igoa.
“… E ao ina outou salamo ma papatiso, i le suafa o Iesu Keriso”
“Ole atu i le Tama i lo’u igoa, i le faatuatua ma le talitonu o le a oulua maua, ma o le a oulua maua ai le Agaga Paia.”
“Ma o lenei, a uma … ona oulua maua o lenei faaaliga, e ao ina oulua tausi i aʼu poloaiga i mea uma.”
“Ave i o oulua luga le suafa o Keriso, ma tautala atu i le upumoni ma le faamaoni.
“Ma o le toatele e salamo ma papatiso i loʼu igoa, o Iesu Keriso lea, ma tumau e oo i le iuga, o i latou lava ia o le a faaolaina.”
I nai fuaitau na, ua tuu mai ai e le Faaola ia i tatou le faataitaiga atoatoa o le ala e tatau ona tatou aoao atu ai Lana aoaoga faavae. O lenei aoaoga faavae o le, faatuatua i le Alii o Iesu Keriso, salamo, papatisoga, mauaina o le meaalofa o le Agaga Paia, ma le tumau e oo i le iuga e faamanuiaina ai fanau uma a le Atua.
A o tatou aoao atu nei mataupu faavae ia i latou tatou te alolofa i ai, o le a fesoasoani le Agaga Paia ia i tatou e iloa le mea moni. Talu ai ona tatou te manaomia uunaiga a le Agaga Paia, e tatau ona tatou taumamao mai le matematega po o faaliliuga a le tagata lava ia, e sopo i tua atu o le aoao atu o le aoaoga faavae moni.
O lena mea e mafai ona faigata ona fai pe a e alofa i le tagata o loo e taumafai e tosina mai. Atonu sa lē āno o ia i le aoaoga faavae na aoao atu. O se faaosoosoga le taumafai e fai se mea fou pe maoae. Peitai o le Agaga Paia o le a faaalia mai le agaga o le upumoni i le na ona tatou faaeteete ma mataala ia aua nei o tatou sopo i tua atu o le aoao atu o le aoaoga faavae moni. O le tasi o auala aupito mautinoa e aloese ai mai le latalata atu i aoaoga faavae sese, o le filifili lea ia faafaigofie a tatou aoaoga. E maua le saogalemu mai lena faafaigofie, ma e itiiti lava se mea e aveese ai.
O le faafaigofie ona aoao atu e mafai ai ona tatou vave faasoa atu le aoaoga faavae laveai, a o tumau pea le lē tagofia o tamaiti e faaosoosoga a le tiapolo lea o le a faafetaia’ia i latou mulimuli ane, a o le’i taitai ona galoma atu upumoni e moomia ona latou aoaoina, i faasalavei a faasalalauga faaagafesootai, tā’āga, ma a latou lava tauiviga patino. E tatau ona tatou pu’emau mai avanoa uma e faasoa atu ai aoaoga a Iesu Keriso i tamaiti. E taua nei taimi faafaiaoga ma e matua’i itiiti lava pe a faatusatusa i taumafaiga faifaipea a ‘au a le fili. Mo itula taitasi e alu i le taufaaofiofi atu o le aoaoga faavae i le olaga o se tamaitiiti, e le mafaitaulia itula o le itu tete’e e tumu i feau ma ata e luitauina ai pe lē amanaiaina ai nei upumoni lavea’i.
Atonu e taumanatunatu nisi o outou pe sili le na ona faalatalata atu ia te oe lau fanau e ala i le faia o mea e fiafia ai, pe e te ono fesili foi pe mata e amata e se tamaitiiti ona lagona le lofituina i au aoaoga. Nai lo lena, e ao ona tatou mafaufau, “Ona o le laitiiti o le taimi ma le utiuti o avanoa, o a upu o aoaoga faavae e mafai ona ou faasoa atu o le a faamalolosia ai i latou mai luitau e lē maalofia o lo latou faatuatua?” O upu e te faasoa atu i le asō e ono mafai ona avea ma upu latou te tauaveina, ma e le o toe mamao foi ona mou atu lea o le asō.
Sa ou faamemelo i taimi uma i le tina o lo’u tinamatua o Mary Bommeli, i lona tuuto e faasoa atu le aoaoga faavae a Iesu Keriso. Sa aoaoina lona aiga e faifeautalai i Suitiselani ina ua 24 ona tausaga.
Ina ua uma ona papatiso, sa manao Mary e auai faatasi ma le Au Paia i Amerika, o lea sa agai atu ai o ia mai Suitiselani i Perelini ma maua ai sana galuega i se fafine na faafaigaluegaina o ia e lalaga ie mo lavalava o le aiga. Sa nofo Mary i se potu mo tavini, ma sa faatu lana masini lalaga i le vaega mo nofonofoga o le fale.
I le taimi lea, o le aoao atu o le aoaoga faavae a Le Ekalesia a Iesu Keriso o le Au Paia o Aso e Gata Ai sa le’i faatagaina i Perelini. Ae sa iloa e Mary sa le mafai ona taofia o ia mai le faasoa atu o mea sa ia aoaoina. Sa faapotopoto le tamaitai o le maota ma ana uo e siosio le masini lalaga e faalogologo ai i le aoao atu a Mary. Sa talanoa atu o ia e uiga i le faaali mai o le Tama Faalelagi ma Iesu Keriso ia Iosefa Samita, o le asiasiga a agelu, ma le Tusi a Mamona. I lona manatuaina o tala a Alema, sa ia aoao atu ai le mataupu o le Toetu. Sa ia molimau atu e mafai ona toefaatasia aiga i le malo selesitila.
O le naunau o Mary e faasoa atu le aoaoga faavae o le talalelei toefuataiina sa le’i pine ae tupu mai ai se faaletonu. Sa le’i umi ae ave e leoleo ia Mary i le falepuipui. A o latou malaga atu sa fesili Mary i le leoleo mo le igoa o le faamasino o le a tulai ai o ia i luma i le taeao e sosoo ai. Sa fesili foi e uiga i lona aiga ma pe o ia o se tamā ma se tane lelei. Sa faamatala atu e le leoleo o le faamasino o se tagata o le lalolagi.
I le falepuipui, sa talosaga atu Mary mo se penitala ma ni pepa. Sa faaalu e ia le po e tusia ai se tusi i le faamasino, ma tuu atu ai le molimau i le Toetu o Iesu Keriso e pei ona faamatala mai i le Tusi a Mamona, ma talanoaina ai le lalolagi o agaga, ma faamalamalama i ai le salamo. Sa ia fautuaina faapea o le a moomia e le faamasino se taimi e tomanatu ai i lona olaga a o le’i tu atu i le faamasinoga mulimuli. Sa tusi atu o ia e faapea, sa ia iloa e tele ni mea e tatau ona salamo mai ai, o le tele o mea o le a matuai faanoanoa loloto ai lona aiga, ma aumaia ai ia te ia se faanoanoaga tele. I le taeao, ina ua uma lana tusi, sa ia tuuina atu i le leoleo ma talosagaina e tiliva lana tusi i le faamasino, ma sa ia ioeina.
Mulimuli ane na aami atu ai e le faamasino le leoleo i lona ofisa. O le tusi na tusia e Mary, o se faamaoniga maumaututu sa ia aoao atu le aoaoga faavae o le talalelei toefuataiina ma, o le faia o lena mea, na solia ai le tulafono. Ae ui lava i lea, e lei umi ae toe foi mai le leoleo i le sela na tuu ai Mary. Sa ia ta’u atu ia Mary ua faaleaogaina uma moliaga ma ua saoloto o ia e alu. O lona aoao atu o le aoaoga faavae o le talalelei toefuataiina a Iesu Keriso na afua ai ona tuuina o ia i le falepuipui. Ma o lona folafolaina atu o le aoaoga faavae o le salamo i le faamasino na aveeseina ai o ia mai le falepuipui.
O aoaoga a Mary Bommeli sa le’i muta ina ua faasaoloto o ia. O faamaumauga o ana upu na faasolo atu ai aoaoga faavae moni i augatupulaga e le’i fananau mai. O lona talitonuga faapea, e oo lava i se tagata fou faatoa liliu mai e mafai ona aoao atu le aoaoga faavae a Iesu Keriso, na faamautinoa ai o le a faamalolosia e e tupuga mai ia te ia, i a latou lava taua.
A o tatou faia le mea sili tatou te mafaia e aoao atu ai i latou tatou te alolofa i ai, e uiga i le aoaoga faavae a Iesu Keriso, atonu e le tali mai lava nisi. E ono fetolofi ane masalosaloga i lou mafaufau. E te ono fesili pe ua lava lou iloa o le aoaoga faavae a le Faaola e te aoaoina atu ma le mataalia. Ma afai ua uma ona e taumafai e aoao atu, atonu e te tau mafaufau, pe aisea e te le o vaaia ai ni aafiaga lelei se tele. Aua e te fiu i na masalosaloga. Liliu atu i le Atua mo se fesoasoani.
“Ioe, tagi atu i le Atua mo lou tausiga atoa; … ia tuu atu alofaaga o lou loto i le Alii e faavavau.”
“Ma o lenei ou te manao ina ia outou lotomaualalalo, ma augofie ma agamalu; e faigofie ona faaoleoleina; tumu i le onosai ma le tali-tiga; ma faautauta i mea uma; ma filigā i le tausiga o poloaiga a le Atua i taimi uma; ma ole atu mo soo se mea tou te manaomia, faaleagaga ma faaletino; ma faafoi atu i taimi uma le faafetai i le Atua mo soo se mea o mea uma tou te maua.”
Pe afai e te tatalo ai, pe afai e te talanoa i le Atua, ma afai e te aioi atu mo le fesoasoani e te manaomia, ma pe afai e te faafetai ia te ia e le gata mo le fesoasoani ae faapea foi mo le onosai ma le agamalu e oo mai i le lē mauaina o mea uma e te manao ai i le taimi lava lena pe atonu foi i se isi lava taimi, ona ou folafola atu lea ia te oe e faapea o le a e latalata atili atu ai ia te Ia. O le a e filiga ma tali-tiga. Ona mafai lea ona e iloa ua e faia mea uma e te mafaia e fesoasoani ai ia i latou e te alofa i ai, ma i latou o loo e tatalo ia latou taulimaina taumafaiga a Satani ina ia faaumatia.
“A o ē faatalitali ia Ieova, e toe faafouina lo latou malosi, latou te sii ae apaau e pei o aeto, latou te femo’ei, a e le vaivai, latou te savavali, a e le tigaina.”
E mafai ona outou maua le faamoemoe i faamaumauga a tusitusiga paia e uiga i aiga. Ua tatou faitau e uiga ia i latou o e na fulitia i mea na aoao ai i latou, o ē na tauivi ma le Atua mo se faamagaloga, e pei o Alema le Itiiti, o atalii o Mosaea, ma Enosa. I taimi o o latou puapuaga, sa latou manatuaina upu a o latou matua, upu o aoaoga faavae a Iesu Keriso. O le manatuaina na laveaiina ai i latou. O lou aoaoina atu o lena aoaoga faavae paia o le a manatuaina lava.
Ou te molimau atu i le galuega paia o le aoao atu o fanau a le Tama Faalelagi i le aoaoga faavae faigofie a Iesu Keriso, lea e mafai ai ona faamamāina faaleagaga i tatou ma taualuga ai i le ulufale atu i le afioaga o le Atua, e ola ai faatasi ma Ia ma Lona Alo i le mamalu e faavavau i aiga. I le suafa o Iesu Keriso, amene.