Faalagolago i lo Tatou Tama
Ua faalagolago mai le Atua ia i tatou e faia le tele o faaiuga taua ma i mea uma e taua, ua Ia fetalai mai ia i tatou e faalagolago atu ia te Ia.
I le aso 1 o Iuni, 1843, na tuua ai e Addison Pratt ia Navu, Ilinoi, e talai atu le talalelei i Motu o Hawaii, na tuua ai lana avā, o Louisa Barnes Pratt, e tausia lona aiga laiti.
A o faateteleina sauaga i Navu, na tutuli faamalosi ai le Au Paia e o ese, ma mulimuli ane i Winter Quaters a o latou sauni e siitia atu i le Vanu o Sate Leki, na feagai Louisa ma le faaiuga pe o i le malaga. Ai na faigofie atu le nofo ma faatali mo le foi mai o Addison, nai lo le malaga nao ia.
I ia tulaga uma, sa ia sailia ai le taitaiga mai le perofeta o Polika Iaga, o lē na faamalosiauina o ia e alu. E ui lava i le faigata tele ma lona ia lava musu, sa ia faia ai ma le manuia le malaga i na taimi taitasi.
O le taimi muamua, sa itiiti se olioli o Louisa i le malaga. Ae peitai, sa lei umi ae amata ona ia talia fiafia le vao lanumeamata o laufanua valevalenoa, fugalaau felanulanuai, ma eleele aliali i auvai o le vaitafe. Sa ia tusi faamaumauina, “Sa alu ese malie atu le pogisa i lou mafaufau, ma sa lei i ai se fafine na sili ona fiafia i le vaega atoa.”
O le tala a Louisa na matuai musuia ai lava a’u. Ou te faamemelo i lona naunautai e taatia ese ona manaoga patino, o lona mafai ona faalagolago i le Atua ma le ala na fesoasoani ai le faaalia o lona faatuatua e ese ai lana vaai i le tulaga.
Ua ia faamanatu mai ia te a’u, o loo i ai so tatou Tama oi le Lagi agaalofa, o lē e popole mo i tatou, po o fea lava o tatou i ai, ma e mafai ona tatou faalagolago ia te Ia e sili atu nai lo o se isi lava po o soo se isi lava mea.
O Le Faapogai o Upumoni Uma
Ua faalagolago mai le Atua ia i tatou e faia le tele o faaiuga taua ma i mea uma e taua, ua Ia fetalai mai ia i tatou e faalagolago atu ia te Ia. E faapitoa ona faigata lenei mea pe a ese la tatou faamasinoga, po o lo tatou manatu faaalia lautele, mai Lona finagalo mo Lana fanau.
Ua fautua mai nisi e tatau ona tatou toe tusia ia laina i le va o le mea sao ma le mea sese aua ua latou fai mai o le mea moni e faalagolago i isi tulaga, o le mea moni e faauiga e ia lava, po o le, e matuai agalelei lava le Atua o lea e le popole moni ai o Ia i mea tatou te faia.
A o tatou saili ia malamalama ma talia le finagalo o le Atua, o lea e aoga ai le manatua o tuaoi i le va o le sa’o ma le sese e le mo i tatou e faauigaina. Ua faatuina e le Atua lava Ia nei tuaoi, e faavae i upumoni e faavavau mo lo tatou manuia ma faamanuiaga.
O le manao e sui upumoni e faavavau a le Atua ua loa lona talafaasolopito. Na amataina a o lei i ai le lalolagi, ina ua tetee Satani e faasaga i le fuafuaga a le Atua, na saili ma le manatu faapito e faaumatia le faitalia o le tagata. O le mulimuli ai i lenei mamanu, o tagata e pei o Serema, Neoa, ma Korioa na finau mai o le faatuatua o se mea faavalevalea, o faaaliga e le talafeagai, ma o soo se mea lava tatou te mananao e fai ua sa’o lea. O le mea e faanoanoa ai, e masani lava, o nei o ese mai upumoni a le Atua ua taitai atu ai i le faanoanoa tele.
E ui o nisi o mea e faalagolago i talaaga, ae e le o mea uma. Ua aoao mai e le aunoa e Peresitene Russell M. Nelson e faapea, o upumoni faaola a le Atua e atoatoa, tutoatasi, ma faauigaina e le Atua lava Ia.
O La Tatou Filifiliga
O ai tatou te filifili e faalagolago i ai o se tasi lea o faaiuga aupito taua o le olaga. Na aoao e le Tupu o Peniamina lona nuu, “Ia talitonu i le Atua; ia talitonu o ia … ; talitonu o ia te ia le poto uma … ; ia talitonu e le mafai e le tagata ona malamalama i mea uma e mafai ona malamalama i ai le Alii.”
O le mea e lelei ai, ua ia i tatou tusitusiga paia ma le taitaiga mai perofeta soifua e fesoasoani tatou te malamalama ai i upumoni a le Atua. Afai e manaomia se faamalamalamaga i tua atu o mea ua tatou maua, e tuuina mai e le Atua e ala mai i Ana perofeta. Ma o le a Ia tali mai i a tatou tatalo faamaoni e ala i le Agaga Paia a o tatou saili ia malamalama i upumoni tatou te lei talisapaia atoatoa.
Na aoao mai Elder Neil L. Andersen i se tasi taimi e faapea, e le tatau ona faate’ia i tatou “pe a i ai se taimi e le muai ogatusa ai [o tatou] lava manatu patino ma aoaoga a le perofeta a le Alii. O taimi nei o le aoaoina,” na ia saunoa mai ai, “o le lotomaualalo, pe a tatou o i o tatou tulivae i le tatalo. Tatou te savavali i luma i le faatuatua, faalagolago i le Atua, iloaina o le a i ai le taimi o le a tatou maua ai le manino atili faaleagaga mai lo tatou Tama Faalelagi.”
I taimi uma, e aoga le manatua o aoaoga a Alema e tuu mai e le Atua Lana afioga e tusa ai ma le gauai atu ma le taumafaiga tatou te tuuto atu i ai. Afai tatou te faalogo ma usitai i le afioga a le Atua, o le a tatou maua atili; afai tatou te lēano i Ana fautuaga, o le a itiiti mea tatou te maua seia oo lava ina tatou le maua se mea. O le aveesea o le malamalama e le faapea ai sa sese le upumoni; ae, e faaalia ai ua aveese mai ia i tatou le gafatia e malamalama ai.
Vaai atu i le Faaola
I Kapenaumi, na aoao mai le Faaola e uiga i Lona faasinomaga ma le misiona. E toatele na faapea mai o Ana afioga sa faigata ona lagona, na oo ai ina liliu o latou tua ma “le toe [savavali] i latou ma ia.”
Aisea na latou savavali ese ai?
Ona latou te le’i fiafia i mea na Ia fetalai ai. O lea, o le faalagolago ai i la latou lava faamasinoga, sa latou savavali ese, ma teena ai mo i latou lava ia faamanuiaga na semanu e oo mai pe ana latou nonofo pea.
E faigofie lava e lo tatou faamaualuga ona oso mai i le va o i tatou ma upumoni e faavavau. A tatou le malamalama, e mafai ona tatou malōlō, faanofo lelei o tatou lagona, ona filifili lea o le ala e tali atu ai. Ua uunaia i tatou e le Faaola e “vaai ia te [Ia] i mafaufauga uma; aua le masalosalo, aua le fefefe.” A tatou taulai atu i le Faaola, e mafai ona amata e lo tatou faatuatua ona faatoilalo o tatou popolega.
E pei ona faamalosiauina i tatou e Elder Dieter F. Uchtdorf e fai: “Faamolemole, ia muamua masalosalo i ou masalosaloga ae e te lei masalosalo i lou faatuatua. Ia le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso.”
E O’o Mai Faamanuiaga ia i Latou o E Nonofo
A o savavali ese le au soo mai le Faaola i lena aso, ona Ia fesili lea i le Toasefululua, “Pe tou te fia o ese foi?”
Na tali Peteru:
“Le Alii e, a matou o ea ia te ai? O ia te oe upu o le ola e faavavau.
“Ua matou talitonu, ma ua matou iloa o oe o le Keriso, o le Alo o le Atua soifua.”
Sa ola le au Aposetolo i le lalolagi lava e tasi ma feagai ma uunaiga faaagafesootai lava e tasi e pei o soo o e na savavali ese. Ae peitai, i le taimi lenei, sa latou filifilia o latou faatuatua ma faalagolago i le Atua, ua faapea ona faapolopolo ai faamanuiaga e tuu atu e le Atua ia i latou o e nonofo.
Atonu o oe, e pei o a’u, o nisi taimi e te oo ai i itu uma e lua o lenei faaiuga. Pe a faigata ia i tatou ona malamalama pe talia le finagalo o le Atua, e mafanafana le manatua e alofa o Ia i tagata ua tatou i ai, po o gafea lava o tatou i ai. Ma o loo ia te Ia se mea e sili atu mo i tatou. Afai tatou te aapa atu ia te Ia, o le a Ia fesoasoani ia i tatou.
E ui e mafai ona faigata le aapa atu ia te Ia, e pei lava o le tamā lea na sailia le faamalologa mo lona atalii, lea sa fetalai i ai le Faaola, “e mafaia mea uma lava i lē e faatuatua,” i o tatou taimi o tauiviga, e mafai foi ona tatou alaga atu, “Ia e fesoasoani i [lo matou] le faatuatua.” I o tatou taimi o tauiviga, e mafai foi ona tatou tagi atu, “Ia e fesoasoani i [lo’u] le faatuatua.”
Gauai Atu o o Tatou Loto i le Atua
Na aoao mai Elder Neal A. Maxwell i se taimi, “o le gauai atu o le finagalo o se tasi, e na o le pau lea o le mea moni patino ma tulaga ese e tatau ona tatou tuu i luga o le fata faitaulaga a le Atua.” E leitioa a naunau tele le Tupu o Peniamina ina ia avea lona nuu “e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tamā.”
E pei o taimi uma lava, e fai ai e le Faaola le faataitaiga atoatoa mo i tatou. Faatasi ai ma se loto mafatia, ma le iloa o le galuega tiga na tatau ona Ia faia, na gauai atu ai Lona loto i le finagalo o Lona Tama, ma faataunuuina Lana misiona faamesia ma tatalaina ai le folafolaga o le faavavau ia te oe ma a’u.
O le filifiliga e gauai atu o tatou loto i le Atua o se faatinoga o le faatuatua lea e taoto i le fatu o lo tatou avea ma soo. I le faia o lena filifiliga, tatou te iloa ai o lo tatou faitalia e le tuuitiitia; ae, e faalauteleina ma tauia e le faatasi mai o le Agaga Paia, o lē e aumaia le faamoemoe, olioli, filemu, ma le faanaunauga lea e le mafai ona tatou maua i se isi lava mea.
O ni nai masina ua mavae, sa ma asiasi atu ai ma se peresitene o le siteki i se tuafafine ma lana tama tama talavou matua i lana siteki. I le mavae ai o tausaga e tele o o ese ma le Ekalesia, ma feofeoai i auala faigata ma faalealofa, na toe foi mai ai o ia. I le taimi o le ma asiasiga, sa ma fesili atu ai pe aisea na ia toe foi mai ai.
“Sa ou faaleagaina lo’u olaga,” sa ia fai mai ai, “ma na ou iloa le mea e tatau ona ou i ai.”
Ona ou fesili lea ia te ia, po o le a se mea na ia aoaoina i lana malaga.
Faatasi ai ma le ootia, sa ia faasoa mai e faapea, sa ia aoaoina na tatau ona lava le umi e auai ai i le lotu ina ia motusia ai le mausa o le lē sau, ma sa tatau ona nofo ai seia oo i le tulaga na ia manao ai e i ai. Sa le’i faigofie lona toe foi mai, ae a o ia faaalia le faatuatua i le fuafuaga a le Tama, na ia lagonaina le Agaga e toe foi mai.
Ona ia faaopoopo mai lea, “Ua ou aoaoina mo au lava ia, e lelei le Atua ma o Ona ala e sili atu le lelei nai lo o’u [ala].”
Ou te molimau atu i le Atua, lo tatou Tama e Faavavau, o lē e alofa ia i tatou; i Lona Alo o Iesu Keriso, o lē na laveaiina i tatou. La’ua te silafia o tatou tiga ma luitau. O le a La’ua le tuulafoaia lava i tatou, ma silafia lelei le ala e fesoasoani mai ai ia i tatou. E mafai ona tatou lototetele a o tatou faalagolago atili ia i La’ua nai lo o se isi lava tagata po o se isi lava mea. I le suafa paia o Iesu Keriso, amene.