I Le Va o ni Tausaga e Lei Tele
Afai tatou te le faamaoni ma usiusitai, e mafai ona tatou faaliliuina faamanuiaga mai le Atua o le tamaoaiga i se fetu’u faamaualuga e faasalaveia ai ma faalavelaveina i tatou.
O’u uso e ma tuafafine pele, o le nofo ai i luga o le tulaga i le asō, ua ou matamata ai i lenei Maota Autu mo Konafesi ua faatolu lona faatumuina, mo le uluai taimi talu mai le KOVITI. O outou o ni soo tuuto o Iesu Keriso ua naunautai e aoao. Ou te faamalo atu mo lo outou faamaoni. Ma ou te alofa ia te outou.
Sa avea Ezra Taft Benson ma Peresitene o Le Ekalesia a Iesu Keriso o le Au Paia o Aso e Gata Ai, mai ia Novema 1985 seia oo ia Me 1994. Sa 33 o’u tausaga ina ua avea Peresitene Benson ma Peresitene o le Ekalesia ae 42 i le taimi na tuumalo ai o ia. O ana aoaoga ma lana molimau na matuai tosinaina ai a’u i ni ala maoae.
O se tasi o itu iloga o le galuega a Peresitene Benson o lona taulai atu lea i le faamoemoega ma le taua o le Tusi a Mamona. Sa ia faamamafaina mai pea lava pea faapea “o le Tusi a Mamona o le maaauau lea o la tatou tapuaiga—o le maaauau lea o la tatou molimau, o le maaauau o a tatou mataupu, ma le maaauau i le molimau o lo tatou Alii ma le Faaola.” Sa tele foi ina ia faamamafaina aoaoga ma lapataiga e uiga i le agasala o le faamaualuga o loo maua i lenei molimau o aso e gata ai ia Iesu Keriso.
O se aoaoga faapitoa a Peresitene Benson na matuai o’u aafia ai lava ma o loo faaauau pea ona tosina ai a’u suesuega o le Tusi a Mamona. Sa Ia saunoa:
“O le Tusi a Mamona … na tusia mo o tatou aso. Sa le’i maua e sa Nifae le tusi; e faapena foi ia sa Lamana o aso anamua. Sa fuafuaina mo i tatou. Sa tusitusi Mamona e lata i le taufaaiuiuga o le malo o sa Nifae. I lalo o musumusuga a le Atua, o Le ua silafia mea uma mai le amataga, na otootoina ai e Mamona le tele o tala faamaumau na tusia i le tele o seneturi, filifili mai tala, saunoaga, ma mea na tutupu o le a sili ona aoga ia i tatou.”
Na faaauau ona saunoa Peresitene Benson: “Ua molimau mai tusitala taitasi o le Tusi a Mamona na ia tusia lenei tusi mo tupulaga o le lumanai. … Afai na latou vaai i o tatou aso, ma latou filifili mea e sili ona taua mo i tatou, pe le o se pogai sili ea lena e tatau ai ona tatou suesue le Tusi a Mamona? E tatau ona tatou fesili pea lava pea ia i tatou lava ‘Aisea na musuia ai Mamona e le Alii … ia faaaofia [lenei tala] i lana tusi? O le a se lesona e mafai ona ou aoaoina mai [lenei apoapoaiga] e fesoasoani ia te au ou te ola ai i nei aso ma nei ona po?’”
Ua fesoasoani le saunoaga a Peresitene Benson tatou te malamalama ai o le Tusi a Mamona ua le na o se talafaamaumau faasolopito e fesootai i le tuanai. Ae, o lenei voluma o tusitusiga paia e fesootai ai i le lumanai ma o loo i ai mataupu faavae taua, lapataiga, ma lesona ua faamoemoe mo tulaga ma luitau o o tatou aso. O le mea lea, o le Tusi a Mamona o se tusi e uiga i lo tatou lumanai ma taimi o loo tatou ola ai nei ma o le a ola ai.
Ou te tatalo mo le fesoasoani a le Agaga Paia a o tatou mafaufauina lesona mo i tatou i le asō mai le tusi a Helamana i le Tusi a Mamona.
O sa Nifaē ma sa Lamanā
O talafaamaumau ia Helamana ma ona atalii o loo faamatala mai ai se nuu sa faatalitali i le soifua mai o Iesu Keriso. O le afa seneturi o loo lipotia mai i talafaamaumau faatusi paia o loo faamamafa mai ai le liuga ma le amiotonu o sa Lamana ma le amioleaga, liliuese, ma ta’usalaga o sa Nifae.
O soloa’iga o faatusatusaga ma mea e eseese ai i le va o sa Nifae ma sa Lamana mai talafaamaumau anamua ua sili ona aoga mo i tatou i aso nei.
“Na avea sa Lamanā, le toatele o i latou, ma tagata amiotonu, sa oo ina sili atu lo latou amiotonu nai lo sa Nifaē, ona o lo latou mausali ma lo latou maumaututu i le faatuatua.
“[Ma] sa i ai le toatele o sa Nifaē o e sa faamaaa ma lē salamo ma amioleaga tele, sa oo ina latou teena le afioga a le Atua ma talaiga ma perofetaga uma na oo mai i totonu ia te i latou.”
“Ma ua faapea ona tatou vaai ai sa amata ona faaitiitia sa Nifaē i e le talitonu, ma tutupu i le amioleaga ma mea inosia, ao sa Lamanā sa amata ona tutupu tele lava i le malamalama o lo latou Atua; ioe, sa amata ona latou tausia ana tulafono ma poloaiga, ma savavali i le upumoni ma le amiosao i ona luma.
“Ma ua faapea ona tatou vaai ai ua amata ona alu ese o le Agaga o le Alii mai sa Nifaē, ona o le amioleaga ma le maaa o o latou loto.
“Ma ua faapea ona tatou vaai ai ua amata ona liligi ifo e le Alii lona Agaga i luga o sa Lamanā, ona o lo latou augofie ma lo latou fia talitonu i ana fetalaiga.”
Atonu o le itu e sili ona ofoofogia ma taua o lenei lilifa ifo i le liliuese o sa Nifae, o le mea moni lea faapea “o nei amioletonu uma sa oo mai ia te i latou i le va o ni tausaga sa lei tele.”
Sa Fulitua Sa Nifae i le Atua
Na mafai faapefea e se nuu na i ai se taimi na amiotonu ai, ona loto maaa ma amioleaga i se taimi puupuu tele? Na mafai faapefea e tagata ona vave ona galo le Atua sa faamanuiaina tele i latou?
I se ala mamana ma le maoae, ua matuai aoga ai lava le faataitaiga lē lelei a sa Nifae mo i tatou i aso nei.
“Ua amata ona ulu mai le faamaualuga … i totonu o loto o tagata o e na fai mai ua latou auai i le ekalesia a le Atua … ona o a latou oa ua tele naua ma lo latou manuia i luga o le laueleele.”
“[Ua latou] tuu [o latou] loto i luga o oa ma mea e le aoga o lenei lalolagi” “ona o lena faamaualuga [ua latou] … tuu e ulu mai [i totonu i o latou] loto, lea … ua faafefeteina ai [i latou] i luga ia sili atu i lo le mea ua lelei ona o a [latou] ‘oa ua silisili ona tele!”
O leo o anamua mai le efuefu o loo aioi mai ia i tatou i aso nei ina ia aoaoina lenei lesona faavavau: o le manuia, ‘oa, ma le le popole tele e faaopoopo i se paluga malosi faatosina e mafai ona tata’i atu ai e oo lava i e amiotonu, e faamaualuluga ma i’u ai ina faatama’iaina pe fasiotia ai faaleagaga.
O le faatagaina o le faamaualuga e ulufale i o tatou loto e mafai ona matua’ia lo tatou faatauemu i mea paia; le talitonu i le agaga o valoaga ma faaaliga; solipala i lalo o o tatou vae ia poloaiga a le Atua; faafitia le afioga a le Atua; tutuli ese, faatauemu; ma faifai i perofeta; ma faagalo le Alii [lo tatou] Atua; ma “ua le mananao i le Alii [lo tatou] Atua, o le na faia [i tatou], ia pule ma nofotupu ia i [tatou].”
O le mea lea, afai tatou te le faamaoni ma usiusitai, e mafai ona tatou faaliliuina faamanuiaga mai le Atua o le tamaoaiga i se fetu’u faamaualuga e faasalaveia ai ma faalavelaveina i tatou mai upumoni e faavavau ma faamuamua taua faaleagaga. E tatau lava ona tatou mataala i lagona faatauanau ma le soonafai o le faatauaina o oe lava, o le iloiloga lē tonu o lo tatou lava tutoatasi, ma le faatauaina o oe lava ma ou manaoga nai lo isi.
A o tatou taulai ma le faamaualuga ia i tatou lava, e pagatia foi i tatou lava i le faatauasoina faaleagaga ma tatou misia ai le anoanoai, le tele pe atonu foi o mea uma o loo tutupu i totonu, ma i lo tatou siosiomaga. E le mafai ona tatou vaavaai atu ma taulai ia Iesu Keriso o le “sini autu” pe afai e na o i tatou lava tatou te vaai i ai.
O lena tauaso faaleagaga e mafai foi ona matua’ia ai lo tatou liliu ese i le auala o le amiotonu, pauu ese i ala faasaina, ma leiloloa atu ai. A o tatou “liliu atu [tauaso] i [o tatou] lava ala” ma mulimuli i ala taamilo faataumaoi, ua tatou lolo atu e faalagolago i lo tatou lava atamai, ua tatou mitamitavale i lo tatou lava malosi, ma faalagolago i lo tatou lava poto.
Sa aoteleina faapuupuu e Samuelu le sa Lamana le fulitua o sa Nifae mai le Atua: “Sa outou saili i aso uma o o outou olaga mo le mea e le mafai ona outou maua; ma sa outou saili mo le fiafia i le fai o le amioletonu, o se mea lea ua le tusa ai ma le natura o lena amiotonu lea o loo i lo tatou Ao silisili ma le Faavavau.”
Na matauina e le perofeta o Mamona, “O le vaega toatele o tagata [sa tutumau] pea i lo latou faamaualuluga ma le amioleaga, ma o le vaega toaitiiti [sa savavali] ma le migao i luma o le Atua.”
Ua Liliu Atu Sa Lamana i le Atua
I le Tusi o Helamana, o le faateleina o le amiotonu o sa Lamana ua tuuina mai ai se eseesega tele i le tele’a’i o le fāi ifo faaleagaga o sa Nifae.
Na liliu atu sa Lamana i le Atua ma sa aumaia ai i latou i le malamalama i le upumoni e ala i le talitonu i aoaoga o i tusitusiga paia ma perofeta, ma faatino ai le faatuatua i le Alii o Iesu Keriso, ua salamo ia latou agasala, ma o’o ai i se suiga tele o le loto. .
“O lea, o le toatele o i latou ua o mai i lenei malamalama o le upumoni, ua outou iloa mo outou lava ua tutumau ma mausali i latou i le faatuatua, ma i mea ia ua faasaolotoina ai i latou.”
“Ia outou vaai o le vaega tele o i latou o loo i ai i le ala o lo latou tiute ma ua latou savavali ma le migao i luma o le Atua, ma ua latou tausisi e tausi ana poloaiga ma ana tulafono ma ana faamasinoga. …
“… Ua latou taumafai ma le filiga e le faavaivai ina ia mafai ona latou aumai o e o totoe o o latou uso i le malamalama o le upumoni.”
Na avea o se taunuuga, o le “amiotonu [o sa Lamana] sa oo ina sili atu lo latou amiotonu nai lo sa Nifaē, ona o lo latou mausali ma lo latou maumaututu i le faatuatua.”
O Se Lapataiga ma se Folafolaga
Na tautino mai e Moronae: “Faauta, ua faaali mai e le Alii ia te au mea tetele ma ofoofogia e faatatau i mea ua lata ona oo mai, i lena aso o le a oo mai ai nei mea ia te outou.
“Faauta, ou te tautala atu ia te outou e peiseai o outou faatasi mai i le taimi nei, peitai ua outou le o i ai. Ae faauta, ua faaali mai outou ia te au e Iesu Keriso, ma ua ou iloa a outou mea o fai.”
Faamolemole ia manatua o le Tusi a Mamona o loo fesootai atu i le lumanai ma o loo i ai mataupu faavae taua, lapataiga, ma lesona ua faamoemoe mo a’u ma oe i tulaga ma luitau o o tatou aso.
E mafai ona tulai mai le liliuese i tulaga faigofie e lua—faalefaalapotopotoga ma tagata taitoatasi. I le tulaga faalefaalapotopotoga, O Le Ekalesia a Iesu Keriso o le Au Paia o Aso e Gata Ai o le a lē mou atu lava e ala i le liliuese pe aveesea foi mai le fogaeleele.
Sa tautino mai e le Perofeta o Iosefa Samita: “E leai se lima eleelea e mafai ona taofia le galuega mai le agaigai i luma … ; “o le upu moni a le Atua o le a agai atu i luma ma le malosi, mamalu, ma tutoatasi, seia ulufia konetineta uma, asia nuu uma, ufitia ai atunuu uma, ma lagonaina i taliga uma, seia faataunuuina uma fuafuaga a le Atua, ma o le a fetalai mai Ieova Silisili ua maea le galuega.”
I le tulaga o tagata taitoatasi, e tatau ia i tatou taitoatasi ona “faaeteete i le faamaualuga, neʼi avea outou e pei o sa Nifaē anamua.”
Se’i ou fautuaina atu e faapea, e te talitonu ma ou talitonu ua lava lo tatou malolosi ma le totoa e aloese ai mai le faasausili o le faamaualuga, o lona uiga atonu o lea lava ua tatou pagatia mai lenei faama’ioti faaleagaga. I se faaupuga faigofie, afai e te le talitonu pe ou te le talitonu foi e mafai ona tatou mafatia i le faamaualuga, o lona uiga ua satia gofie i tatou ma ua lamatia faaleagaga. I se va e le’i tele ni aso, vaiaso, masina, po o ni tausaga, atonu ua tatou faamelea lo tatou tofi faaleagaga mo se mea e itiiti ifo nai lo se fasi meaai.
Ae, afai e te talitonu pe ou te talitonu foi e mafai ona tatou mafatia i le faamaualuga, ona tatou faia pea lava pea lea o mea iti ma le faatauvaa ia o le a puipuia ai ma fesoasoani ia i tatou e avea e “pei o se tamaitiiti, e usiusitai, agamalu, lotomaualalo, onosai, ma tumu i le alofa, e loto ina usitai i mea uma ua silafia e le Alii e tatau ona faatiga ai i [tatou].” “Amuia i latou o e faalotomaualaloina i latou lava e aunoa ma le faamalosia ia lotomaualalo.”
A tatou mulimuli i le fautuaga a Peresitene Benson ma fesili ifo ia i tatou lava pe aisea na musuia ai e le Alii ia Mamona e faaaofia ai i lana tuufaatasiga o le Tusi a Helamana ia tala, apoapoaiga, ma lapataiga sa ia faia, ou te folafola atu o le a tatou iloatino le tatau ai o nei aoaoga i tulaga patino o o tatou olaga taitoatasi ma aiga i aso nei. A o tatou suesue ma manatunatu loloto i lenei talafaamaumau musuia, o le a faamanuiaina i tatou i ni mata e vaai, taliga e faalogo, mafaufau e malamalama, ma loto ia iloaina lesona e ao ona tatou aoaoina ia “faaeteete i le faamaualuga, ne’i [o tatou] ulu atu i faaosoosoga.”
Ou te molimau atu ma le fiafia o le Atua le Tama e Faavavau o lo tatou Tama. O Iesu Keriso o Lona Atalii e Toatasi na Fanaua ma o le Alo Pele. O Ia o lo tatou Faaola. Ma ou te molimau atu a tatou savavali i le agamalu o le Agaga o le Alii, o le a tatou aloese mai ma faatoilaloina le faamaualuga ma maua le filemu ia te Ia. Ou te molimau atu ai i le suafa paia o le Alii o Iesu Keriso, amene.