Opomau le Meaalofa a le Alii o le Salamo
Aua tatou te faatalitali seia oo ina faigata mea ona faatoa liliu atu lea i le Atua. Aua tatou te faatalitali seia oo i le iuga o o tatou olaga e salamo faamaoni ai.
Ou te molimau atu i se Tama Faalelagi alofa. I le konafesi ia Aperila 2019, i nai taimi ina ua uma ona lagolagoina a’u i lo’u tiutetauave fou o se Fitugafulu o le Pulega Aoao, sa lagi ai e le aufaipese se fatuga o le “Ua Ou Tu ma Ofo” na tuia ai lo’u loto ma lo’u agaga.
Ina ua ou faalogo atu i na upu, sa ou matuai maofa lava. Sa ou lagonaina e ui i ni o’u le agavaa ma vaivaiga, ae sa faamanuiaina au e le Alii ia ou iloa “o Lona malosi e mafai ai ona ou faia o mea uma.”
O le lagona masani o le le gafatia, vaivaiga, po o le le agavaa foi o se mea e toatele i tatou e tauivi ai i nisi o taimi. O loo ou tauivi pea ma lenei mea; sa ou lagonaina i le aso na valaauina ai au. Ua faatele ona ou lagonaina, ma o loo lagonaina pea i le taimi nei a o tautala atu ia te outou. Peitai, ua ou aoaoina e faapea e le o tuua na o au ma nei lagona. O le mea moni, e tele tala i tusitusiga paia o i latou e foliga mai na oo foi i na lava lagona. Mo se faataitaiga, tatou te manatua Nifae o se auauna faamaoni ma le lototoa a le Alii. Na i ai taimi, e oo foi ia te ia na tauivi ma lagona o le le agavaa, vaivaiga, ma le le gafatia.
Na ia saunoa: “E ui i le agalelei tele o le Alii, i le faaali mai ia te aʼu o ana galuega tetele ma le ofoofogia, ua alaga aʼe pea loʼu loto: E, le tagata leaga e ua i ai aʼu! Ioe, ua faanoanoa loʼu loto ona o loʼu tino; ua faanoanoa loʼu agaga ona o aʼu amioletonu.”
E tele taimi na saunoa ai le Perofeta o Iosefa Samita ma le lagona o le “tausalaina,” i lona talavou, “aua o [ona] vaivaiga lea ma ona le atoatoa.” Peitai o lagona o Iosefa o le le gafatia ma le popole o se vaega o le mea na taitai ai o ia e manatunatu loloto, suesue, aoao, ma tatalo. Atonu tou te manatua, sa alu o ia e tatalo i le vao e lata ane i lona aiga e sue le mea moni, filemu, ma le faamagaloga. Sa ia faalogoina le Alii o fetalai mai, “Iosefa, lo’u atalii e, ua faamagaloina au agasala. Alu i ou ala, savali i a’u tulafono ma tausi i aʼu poloaiga. Faauta, o a’u o le Alii o le mamalu. Sa faasatauroina au mo le lalolagi ina ia mafai ona maua e i latou uma o e talitonu mai i lou igoa le ola e faavavau.”
O le manao faamaoni o Iosefa e salamo ma saili le faaolataga o lona agaga sa fesoasoani ia te ia e sau ai ia Iesu Keriso ma maua ai le faamagaloga o ana agasala. O lenei taumafaiga faifaipea na talaia ai faitotoa i le faaauauina o le Toefuataiga o le talalelei a Iesu Keriso i aso amulī.
O lea aafiaga ofoofogia o le Perofeta o Iosefa Samita ua faapupula mai ai le ala e mafai ai e lagona o vaivaiga ma le le gafatia ona fesoasoani ia i tatou e iloa ai lo tatou natura pa’ū. Afai tatou te lotomaualalo, o le a fesoasoani lena mea ia i tatou e iloa ai lo tatou faalagolago ia Iesu Keriso, ma gaepuina i totonu o o tatou loto se manao faamaoni e liliu atu i le Faaola ma salamo ai ia tatou agasala.
A’u uo e, o le salamo o le olioli lea! O le suamalie o le salamo o se vaega o le faagasologa i aso taitasi lea e aoao mai ai i tatou e le Alii, “o lea fuaiupu ma lea fuaiupu, mataupu ma lea mataupu,” e ola ai i se olaga e faatotonugalemu i Ana aoaoga. E faapei o Iosefa ma Nifae, e mafai ona tatou “tagi atu [i le Atua] mo le alofa mutimutivale, ona ua malosi o ia e faaola.” E mafai ona Ia faataunuuina soo se manaoga amiotonu po o se moomooga ma e mafai ona faamaloloina soo se manu’aga i o tatou olaga.
I Le Tusi a Mamona: O Se Tasi Molimau ia Iesu Keriso e mafai e oe ma a’u ona maua ni tala e le mafaitaulia o tagata taitoatasi o e sa aoaoina le ala e o mai ia Iesu Keriso e ala i le salamo faamaoni.
Ou te fia faasoa atu ia te outou se faataitaiga o le alofamutimutivale o le Alii e ala i se aafiaga na tulai mai i lo’u motu pele o Puerto Rico.
I lo’u taulaga o Ponce, sa tonu i se tuafafine o le Ekalesia, o Silia Cruz Ayala, o le a ia tuuina atu le Tusi a Mamona i se uo. Sa ia afifiina ma alu e tiliva lenei meaalofa, e sili ona taua ia te ia nai lo taimane po o penina, o lana tala lea. A o aga atu o ia i le ala, sa alu ane se gaoi ia te ia, se’i lana tama’i ato ma sola loa ma le meaalofa o loo i ai i totonu.
Ina ua ia faamatalaina lenei tala i le lotu, sa fai atu lana uo, “O ai e iloa? Atonu o lou avanoa lenei e faasoa atu ai le talalelei!”
Ia, i nai aso mulimuli ane, tou te silafia le mea na tupu? Sa maua e Silia se tusi. Ua ou uuina i lo’u lima i le asō, lena tusi lea na faasoa mai e Silia ia te a’u. Fai mai,
“Mrs. Cruz:
Faamagalo a’u, faamagalo a’u. O le a e le iloaina lava lo’u faanoanoa i lo’u osofa’ia o oe. Ae ona o lena mea, ua suia ai lo’u olaga ma o le a faaauau pea ona suia.
O lena tusi [o le Tusi a Mamona] ua fesoasoani ia te a’u i lo’u olaga. O le miti a lena tagata o le Atua na luluina ai a’u. … Ua ou toefaafoiina atu lau lima talā, ona e le mafai ona ou faaaluina. Ou te manao ia e iloa sa foliga mai na e susulu faataaliolio. O lena malamalama na foliga sa taofia ai a’u [mai le faamanu’alia o oe, o lea] na ou solaese ai loa.
“Ou te manao ia e iloa o le a e toe vaai ia te a’u, ae afai e te vaai mai, o le a e le iloaina a’u, aua o le a avea a’u ma ou tuagane. … O iinei, i le mea ou te nofo ai, ua tatau ona ou sailia le Alii ma alu i le lotu e te lotu ai.
“O le savali na e tusia i lena tusi, na maligi ai o’u loimata. Talu mai le po o le Aso Lulu, ua le mafai lava ona ou taofia le faitauina. Sa ou tatalo ma ole atu i le Atua e faamagalo a’u, [ma] ou te tatalo atu ia e faamagalo a’u. … Sa ou manatu o lau meaalofa na afifi, o se mea e mafai ona ou faatauina atu. [Ae,] na faia ai a’u ia ou manao e [suia] lo’u olaga. … Ua ou augani atu ia e faamagalo a’u, faamagalo a’u.
Uso e ma tuafafine, o le malamalama o le Faaola e mafai ona oo mai ia i tatou uma, tusa lava po o le a le tulaga o tatou i ai. “E le mafai ona e magoto ia maualalo ifo nai lo le malamalama le gata o le Togiola a Keriso,” na saunoa ai Peresitene Holland.
Ae mo le tagata e lei faamoemoeina e maua le meaalofa a Silia, sa alu lenei uso ma molimau atili atu i le alofamutimutivale o le Alii. E ui ina sa umi se taimi mo lenei uso e faamagalo ai ia lava, ae sa ia maua le olioli i le salamo. Oka se vavega! Tasi le tuafafine faamaoni, tasi le Tusi a Mamona, salamo ma le faamaoni, ma le mana o le Faaola na ta’ita’i atu ai i le faamalieina i le atoaga o faamanuiaga o le talalelei ma feagaiga paia i le maota o le Alii. O isi tagata o le aiga na sosoo atu ai ma sa taliaina tiutetauave paia i le tovine o le Alii, e aofia ai le galuega faifeautalai faamisiona.
A o tatou o mai ia Iesu Keriso o lo tatou ala o le salamo ma le faamaoni, o le a i’u ina taitai atu ai i tatou i le malumalu paia o le Faaola.
Oka se faamoemoega amiotonu o le tauivi ia mamā—ia agavaa mo le atoaga o faamanuiaga ua mafai ona o lo tatou Tama Faalelagi ma Lona Alo e ala i feagaiga paia i le malumalu! O le auauna atu e le aunoa i le maota o le Alii ma tauivi e tausi feagaiga paia tatou te osia iina, o le a faateleina ai lo tatou manao ma lo tatou gafatia e maua ai suiga o le loto, manatu, mafaufau, ma le agaga e tatau ai mo i tatou ona avea atili e faapei o lo tatou Faaola. Na molimau mai Peresitene Russell M. Nelson” “E leai se mea o le a matala atili ai le lagi [nai lo le tapuai i le malumalu]. E leai se mea!”
A’u uo pele, pe e te lagonaina le le gafatia? Pe e te lagonaina le le agavaa? Pe o e taumatemateina oe lava? Atonu o loo e popole ma tuufesili: Pe fetaui a’u? Pe ua tuai tele ea mo a’u? Aisea ou te saga toilalo ai pea ae o lea ou te taumafaia le mea aupito sili ou te mafaia?
Uso e ma tuafafine, e moni lava o le a tatou faia ni measese i o tatou olaga. Ae faamolemole manatua, e pei ona sa aoao mai Elder Gerrit W. Gong: “O le Togiola a le Faaola e le gata ma e faavavau. E tofu i tatou uma ma masalosaloga ma mea e toilalo ai. E i ai taimi tatou te ono sē ese ai ma le ala. Ua faamautinoa mai ma le agaalofa e le Atua ia i tatou [e faapea], po o fea lava o tatou i ai, po o a foi mea sa tatou faia, e leai se mea e ta’u o le lē toe foi. E faatalitali mai o Ia ma sauni e opomau i tatou.”
Ona sa aoao mai a’u e si o’u toalua pele, o Cari Lu, tatou te manaomia uma ona salamo, toefaafoi i tua, ma toe seti le taimi i le “selo i le uati” i aso taitasi uma.
O le a oo mai mea faalavefau. Aua tatou te faatalitali seia oo ina faigata mea ona faatoa liliu atu lea i le Atua. Aua tatou te faatalitali seia oo i le iuga o o tatou olaga e salamo faamaoni ai. Nai lo lena, ia tatou taulai atu nei loa, tusa lava po o le fea vaega o le ala o feagaiga o tatou i ai, taulai i le mana togiola o Iesu Keriso ma i le finagalo o le Tama Faalelagi mo i tatou e toefoi atu ia te Ia.
O le maota o le Alii, o Ana tusitusiga paia, o Ana perofeta paia ma aposetolo e musuia i tatou e tauivi agai i le paia o le tagata lava ia e ala i le aoaoga faavae a Keriso.
Ma na fai mai Nifae: “Ma o lenei, faauta, oʼu uso pele e, o le ala lenei; ma ua leai se isi lava ala po o se isi suafa ua tuuina mai i lalo ifo o le lagi e mafai ona faaolaina ai o le alii [ma le tamaitai] i le malo o le Atua. Ma o lenei, faauta, o le aoaoga faavae lenei a Keriso, ma o le aoaoga faavae moni lenei e tasi a le Tamā, ma le Alo, ma le Agaga Paia, o ni Atua ua tasi, ua leai se gataaga.”
O la tatou faagasologa o le “to-gi-ola” ma le Atua atonu e faigata. Peitai, o oe ma a’u e mafai ona tutu, ia le gaoiā, tilotilo i le Faaola, ma saili ia maua ma galue i le mea e finagalo o Ia tatou te suia. Afai tatou te faia ma le loto atoa, o le a tatou molimauina lena faamalologa. Ma mafaufau i le ala o le a faamanuiaina ai a tatou fanau a o tatou opomauina le meaalofa a le Alii o le salamo!
O le a moloina ma faaatoatoa i tatou e le Tufuga Faiomea, na aoao mai ai lo’u tama, lea e mafai ona faigata. Ae, o le a faamamaina foi i tatou e le Fomai o Fomai. Ua ou oo i ai, ma o loo faaauau pea ona ou iloa lena mana faamalolo. Ou te molimau atu e oo mai e ala i le faatuatua ia Iesu Keriso ma i le salamo i aso taitasi.
Ou te molimau atu i le alofa o le Atua ma le mana e le gata o le Togiola a Lona Alo. E mafai ona tatou lagonaina lona maoae, pe a tatou salamo faamaoni ma le loto atoa.
A’u uo e, o a’u o se molimau o le Toefuataiga mamalu o le talalelei e ala i le Perofe o Iosefa Samita ma le taitaiga faalelagi i le taimi nei a le Faaola e ala mai i Lana perofeta ma Lana fofoga lafolafo, o Peresitene Russell M. Nelson Ou te iloa o loo soifua Iesu Keriso ma o Ia o le Fomai o Fomai o o tatou agaga. Ua ou iloa ma molimau atu ua moni nei mea i le suafa o Iesu Keriso, amene.