O Mea e Sili ona Pele i le Atua
O le faatumulia i le alofa o le Atua e malupuipuia ai i tatou mai afa o le olaga, ae e faia ai foi ia sili atu ona fiafia ia taimi fiafia.
Ae ou te le’i amata, e ao ina ou ta’u atu ia te outou e toalua la’u fanau na matapogia a o lauga atu i pulelaa, ma talosia ia aua foi nei ou matapogia. E tele atu mea o loo i lo‘u mafaufau nai lō na o le faitotoa mailei.
O lo matou aiga e toaono le fanau, ma o nisi taimi e faalili ai e le tasi le isi faapea o ia e sili ona pele. E tofu le tagata ma mafuaaga eseese e manatu ai e pele. O lo ma alolofa i le taitasi o le ma fanau e mama a’ia’i ma faamalieloto ma atoatoa. E le mafai ona ma alolofa i se tasi o i latou e sili atu nai lo le isi—o le fanau mai o tamaiti taitasi, e oo mai ai le faateleina matagofie o lo ma alolofa. E sili ona ou malamalama i le alofa o le Tama Faalelagi mo a’u e ala i le alofa ou te lagonaina mo la’u fanau.
A o tofu fai mai i latou o le tamaitiiti e pele, atonu tou te manatu faapea e le’i i ai lava se potumoe gasu o lo matou aiga. O le manatu i faaletonu o mafutaga i le va o le matua ma le tamaitiiti, e tuuitiitia pe a taulai atu i le alofa.
E i ai nisi taimi, atonu ona ua mafai ona ou vaai ua matou agai atu i se misa faaleaiga o le a le mafai ona ‘alofia, ona ou fai atu lea faapea “LELEI, ua ou lēlavā, ae o le a ou le ta’u atua; ua outou iloa le tagata o outou e pele.” O la’u sini ia tofu lagona e le toaono lea le manumalo ma faaaoga ai soo se auala e manumalo ai—se’ia oo foi i se isi taimi!
I lana Evagelia, o loo faamatala ai e Ioane ia lava “o le soo ua alofaina e Iesu,” e faapei sa tulagaese lena faatulagaga. Ou te mafaufau faapea na mafua ona sa lagona e Ioane le matuai alofaina e Iesu. Na tuuina mai foi e Nifae se lagona faapena ina ua ia tusia, “Ou te olioli i lo’u Iesu.” Ioe, ua lē na o se Faaola o Nifae, e faapei foi ona lē na o se Faaola o Ioane, ae o le natura patino o le sootaga a Nifae ma “lona” Iesu na taitai atu ai o ia i lena faamatalaga faamomoiloto.
Pe le o se mea matagofie ea le i ai o taimi e mafai ai ona tatou matua’i lagonaina o le amana’ia ma le alofaina patino? E mafai e Nifae ona ta’u o Ia o “lona” Iesu, ma e tatou te mafaia foi. O le alofa o lo tatou Faaola o le ituaiga o alofa “silisili ona maualuga, malualii, ma malosi,” ma Na Te tuuina mai pea lava seia oo ina “faatumulia” ai i tatou. E le mafai lava ona matūtū le alofa faale-Atua, ma e pele ma alofaina i tatou taitoatasi. O le alofa o le Atua o le mea, e pei o li’o i se ata Venu, tatou te fesopoa’i uma ai. Tusa foi pe i ai ni vaega tatou te eseese ai, ae o Lona alofa tatou te laugatasia ai.
Pe o se mea ea e ofo ai ona o poloaiga sili o le alofa i le Atua ma le alofa ia i latou o vagaia i tatou? Pe a tatou vaaia tagata o faaalia le alofa faaKeriso o le tasi mo le isi, i lo’u lava lagona o lena alofa o loo i ai ma isi mea nai lo le na o lo latou lava alofa; o le alofa o loo i ai foi le faaleatua. Pe a tatou fealofani i lea ala, i le mae’ae’a ma le atoatoa tatou te mafaia, e aofia ai foi ma le lagi ia.
Afai la e foliga mai se tagata tatou te alolofa i ai e vavamamao mai se lagona o le alofa faaleatua, e mafai ona tatou mulimulita’ia le mamanu lea—o le faia o mea e aumaia faalatalata ai i tatou lava i le Atua ona faia ai lea o mea tatou te latalata atu ai ia te i latou—se geno lē lēoa e sau ia Keriso.
Ma’imau pe ana mafai ona ta saofafa’i ma ou fesili atu pe o a tulaga ua afua ai ona e lagona le alofa o le Atua. O a fuaiupu o tusitusiga paia, e faapitoa ona e lagona ai le alofa o le Atua? Mata o fea e te ono i ai? O le a le musika? Faatasi ma ai? O le konafesi aoao o se nofoaga mauoa e aoao ai e uiga i le fesootaiga ma le alofa o le lagi.
Pe atonu ua e lagona se mamao ese mai le alofa o le Atua. Pe atonu o i ai ni mau leo o le faalotovaivai ma le pogisa o mamafa i ou mafaufauga, ni feau o loo fai atu ia te oe ua tele naua ou manu’aga ma le fememea’i, ua e vaivai tele ma e lē o amana’iaina, e ese a oe ia pe ua e matua faaluafesasi e te maua ai le alofa faalelagi i soo se ala moni. Afai e te faalogo i na manatu, ona faamolemole lea faalogo mai i le mea lenei: ua matua’i sese lava na leo. E mafai ona tatou lafoa’ia ma le mautinoa le nutimomoia i soo se itu ua faaleagavaaina ai i tatou mai le alofa faaleatua—o taimi uma tatou te usuina ai le viiga lea e faamanatu mai ai ia i tatou faapea o lo tatou Faaola pele ma le lē ponā na filifili ia “faalava’au ma puapuagatia mo i tatou,” o taimi uma tatou te aai ai i le areto e tofitofi. E aveesea moni lava e Iesu le maasiasi uma mai le lotonutimomoia. E ala i Lona tu’imomomoina, na Ia atoatoa ai, ma mafai ai ona Ia faaatoatoaina i tatou e ui i lo tatou nutimomoia. Na momomo o Ia, tuulafoaiina, saeia, ma puapuagatia—tatou te ono manatu foi ua faapena i tatou—ae ua vavaeese mai le alofa o le Atua, e leai. “Le nuu ua nutimomoia; le alofa moni,” e pei o upu o le pese.
Atonu e te iloaina se mea lilo ia te oe lava, e afua ai ona e manatu e lē alofaina oe. Peitai, atonu e te sa’o i le mea ua e iloa ia te oe lava, ae e te sesē i lou mafaufau faapea ua e tuu oe lava i se tulaga faapea ua le oo atu i ai le alofa o le Atua. O nisi taimi tatou te agaleaga ai ma lē onosai ia i tatou lava i ni ala tatou te le mafai ona manatu i ai mo se isi lava tagata. E anoanoai mea e tatau ona tatou fai i lenei olaga, ae e lē o i ai le inoino ia te oe lava ma le ta’usalaina o oe lava ma faamasiasia, e lē o i ai i le lisi. Po o a lava faaletonu tatou te ono lagonaina o tatou i ai, e lē faapuupuuina lava Ona aao. Leai. E lava lava le uumi o Ona aao e “[āu] mai ai ia i tatou” ma opomau i tatou taitoatasi.
Pe a tatou le lagonaina le mafanafana o le alofa faaleatua, e lei alu ese lava. O afioga a le Atua lava ia e faapea “e mavae atu o atumauga, e luluina foi mauga; ae o [Lona] alofa e le mavae atu mai ia te i [tatou].” O lea la, tau ina ia faamanino atu, o le manatu faapea ua taofia le alofa mai o le Atua, e tatau ona matua’i maualalō lava i le lisi o faamalamalamaga e mafai ona i ai i le olaga ma tatou te le oo lava i ai, seia vagana ua leai ni atumauga ma ua mou atu foi mauga!
E ese lo’u fiafia i le faatusa lenei o atumauga o se mau i le mautinoa o le alofa o le Atua. O le faatusa mamana o loo maua i tala o i latou e o i le mauga e maua mai ai faaaliga ma o le faamatalaga a Isaia o “le mauga o le fale o Ieova” na “faatuina i tumutumu o mauga.” O le fale o Ieova o le maota lea o a tatou feagaiga aupito sili ona taua ma o se nofoaga mo i tatou e mapu i ai ma faamagoto loloto ifo ai i le faamaoniga o le alofa o lo tatou Tama. Ua ou olioli foi i le mafanafana e oo mai i lo’u agaga pe a ou ‘aui a’u lava i a’u feagaiga o le papatisoga, ma maua se tasi o faanoanoa i se maliu pe o tiga i se mea na le fiafia ai, ma ou taumafai e fesoasoani i ai ia taofimau ma faasolosolo o latou lagona. Pe o auala ea nei e mafai ai ona tatou saga totofu ifo i le alofa taua faalefeagaiga, o le heseti?
O lea la afai e le tuua i tatou e le alofa o le Atua, aisea tatou te le lagonaina ai i taimi uma? Tau ina faafoefoe o outou manatu: Ou te le iloa. Ae o le alofaina e matua’i ese lava mai le lagonaina e alofaina, ma e i ai ni nai o’u mantu e ono fesoasoani ia te outou a o tulitulimatagauina a tou tali i lena fesili.
Atonu o loo e tauivi ma le tigaalofa, popolevale, faalataina, tuuatoatasi, le fiafia, po o isi lagona malolosi i lou gafatia ona lagonaina le alofa o le Atua mo oe. Afai o lea, o mea nei e mafai ona punitia ai pe aveesea ai lou gafatia ona lagonaina e pei ona sa tatau ai. Mo se vaitau pe a, atonu o le a le mafai ona e lagonaina Lona alofa, ma ua lava le na ona iloa. Ae ou te iloa pe mafai ona e faata’itai’a—ma le onosai—i ni auala eseese le faaali atu ma le mauaina o le alofa faaleatua. Pe mafai lava ona e la’a tasi i tua mai se mea o loo tu i ou luma, pe toe la’a tasi, ma se isi laa i tua, seia oo ina lautele atu le faataatiaga o lau vaai, saga faalautele pea seia i’u ina ua e “mafaufau faaselesitila” moni aua o lena ua e vaavaai atu nei i fetu ma manatua ai lalolagi e le mafaitaulia ma iloa atu ai lo latou Foafoa?
O le tausagi o manulele, ma lagonaina le la po o le agi malu o le savili po o le timu i luga o lo’u pa’u, ma taimi e faatulaga ai e le natura o’u sane e maofa ai i le Atua—ua tofu aumaia e nei mea uma ia te a’u se sootaga faalelagi. Atonu o le faamafanafana mai o uo faamaoni o le a fesoasoani. Pe o musika? Po o le auauna atu? Pe o e tausia se faamaumauga po o se apitalaaga o taimi na manino atili ai la oulua sootaga ma le Atua? Atonu e mafai ona e valaaulia i latou e te talitonuina e faasoa mai ia te oe a latou faapogai o sootaga faalelagi, a o e sailia se toomaga ma le malamalama.
Ou te mafaufau, pe ana fai e filifili e Iesu se nofoaga e mafai ona oulua fetaui ai, se nofoaga tuma’oti o le a mafai ai ona e taulai patino atu ia te Ia, mata Na Te filifilia lou nofoaga tulagaese o sou mafatiaga patino, le nofoaga o lou manaoga aupito loloto, lea e leai se isi e mafai ona alu i ai? Se mea e te matuai lagona ai le tuuatoatasi lea e tatau moni ona i ai na o oe, ae e lē o patino tonu, se nofoaga atonu sa na o Ia na savalia, ae o le mea moni ua leva ona saunia e fetaiai ai ma oe iina ina ua e taunuu? Afai o e faatalitali mo Ia e sau, pe mata e le’i i ai o Ia iina ma o loo i le li’o e āu atu i ai?
Afai ua e lagona le faatumulia i le alofa i lenei vaitau o lou olaga, faamolemole aua le taofimauina mo oe lava ae faasoa atu i isi. Faasoasoa atu i mea uma e te alu i ai. O se tasi o vavega o le tamaoaiga faalelagi e faapea, a tatou taumafai e faasoa atu le alofa o Iesu, tatou te mauaina i tatou lava ua faatumulia e faapei o le mataupu faavae faapea “o ai e faamaimauina lona ola ona o a’u na te mauaina.”
O le faatumulia i le alofa o le Atua e malupuipuia ai i tatou mai afa o le olaga, ae e faia ai foi ia sili atu ona fiafia ia taimi fiafia—o o tatou aso fiafia, pe a i ai le lasusulu i le lagi, e atili ona susulu e ala i le susulu o le la i o tatou agaga.
Ia tatou “maua’a ma faavae” i lo tatou Iesu ma Lona alofa. Ia tatou saili mo ma teuina aafiaga o le lagonaina o Lona alofa ma le mana i o tatou olaga. O le olioli i le talalelei o loo avanoa mo tagata uma: e le na o e fiafia, e le mo na o e pagatia. O le olioli o lo tatou faamoemoega lea, e le o le meaalofa o o tatou tulaga. Ua ia i tatou mafuaaga lelei uma e “olioli ai ma ia faatumulia i le alofa i lo tatou Atua ma tagata uma.” Ia faatutumuina i tatou. I le suafa o Iesu Keriso, amene.