E Alofa le Atua i Ana Fanau Uma
E valaau mai pea Iesu Keriso ia i tatou, ma e Na te faaaogaina i tatou, o Ana auauna masani, e fesoasoani e aumai Ana fanau ia te Ia.
O le a le mea e finagalo i ai lo tatou Tama Faalelagi mai ia te oe? Pe ua e malamalama a o e i ai i lou muai olaga, sa saunia oe e le Tama Faalelagi mo lou olaga i le lalolagi? O le talanoa atu i le autalavou, na aoao atu ai Peresitene Russell M. Nelson e faapea “Sa faapolopolo e lo tatou Tama Faalelagi Ana agaga aupito sili ona tamalii—atonu … o Lana ‘au aupito lelei—mo le toe laasaga lenei.” Talu ai ua faapolopoloina i tatou mo nei aso e gata ai, e taua tele mo i tatou le aoao e avea ma soo o Iesu Keriso.
O le Alii o Iesu Keriso o le Leoleo Mamoe Lelei, ma e Na Te silafia Lana lafu, ma e iloa e le lafu lona Leoleo Mamoe aua “e valaauina e ia ana lava mamoe i o latou igoa.” E valaau mai pea o Ia ia i tatou, ma e Na te faaaogaina i tatou, o Ana auauna masani, e fesoasoani e aumai Ana fanau ia te Ia.
I se taimi ua mavae, sa ma asiasi atu ai ma se peresitene o le siteki i tagata o le Ekalesia i se pitonuu i le lotoifale. Ina ua maea le ma asiasiga faatulagaina, sa fesili mai le peresitene o le siteki ia te au pe mafai ona ma o e vaai se isi aiga se tasi. Sa ia lagona le uunaiga e tatau ona ma talanoa ma i latou.
Sa ma tuitui i le faitotoa ma sa tatala e se tuafafine. Sa ia tilotilo mai ia te au, ae sa na le iloa po o ai au, o lea sa le tele ai ni ana faamatalaga. Sa faasino atu lo’u lima i le peresitene o le siteki, o le na faafeiloaia o ia i lona igoa. O le taimi lava na faalogo ai o ia ma vaai ia te ia, sa olioli o ia. A o tutu ai iina i le faitotoa, sa fusi e le tasi le isi ma fetagisi faatasi. O lenei mea na seti ai le tulaga mo la ma asiasiga. Ma te lei iloaina na faia se togafiti o le kimo a le tuafafine i le aso na muamua atu. Sa ia lagonaina le vaivai tele e tausia ai lona atalii matua. O lea, sa ou fesoasoani ai i le peresitene o le siteki e fai ofu o lana tama, ma tuu o ia i lona nofoa faataavalevale. Sa ma fafagaina o ia i meaai na aumaia muamua e se isi tuafafine alofa mai le uarota, ma sa ma fesoasoani i isi galuega. Ae ma te lei tuua lo latou fale, sa mafai ona ma faamanuiaina i laua.
Pau lava le mea na oo i lo’u mafaufau i le taimi o lenei asiasiga o se faamaoniga lea e alofa tele Iesu Keriso ia i laua. E malamalama o Ia ia i laua ma e silafia patino le tiga o lo laua tulaga uiga ese. Na toetoe lava o le asiasiga atoa na faia gugu. I lenei taimi ma te lei tuuina atu ai se lauga tele pe faasoa atu se mau e sili ona ma fiafia i ai, ae sa matuai faamanuiaina i ma’ua e le Alii i Lona Agaga.
O se tasi o mafuaaga silisili na auina mai ai oe e lou Tama Faalelagi iinei i le taimi lenei, ina ia mafai ona e iloaina lou gafatia atoatoa. Ua aoaoina i tatou e leTala’i La’u Talalelei e faapea, i le avea ai ma soo o Keriso, e tatau ona tatou aloese mai le faatusatusaina o i tatou lava i le tasi ma le isi. O ou tomai faaleagaga e tulaga ese, patino, ma e masani ai, ma e finagalo lou Tama Faalelagi e fesoasoani ia te oe e atiina ae na tomai. O le a i ai pea lava se tasi e mafai ona e fesoasoani i ai ia lagonaina le alofa o lou Tama Faalelagi. O lou gafatia e paia. E ui e mautinoa lava le taua o le saunia o oe lava ia e faamanuiaina i lenei lalolagi faatautava, ae o se tasi o au misiona taua i lou olaga atoa o le avea lea ma se soo o Iesu Keriso ma mulimuli i uunaiga a le Agaga. A o e faia lenei mea, o le a faamanuiaina e le Atua lou olaga; o le a Ia faamanuiaina lou aiga i le taimi nei po o le lumanai; ma o le a Ia faamanuiaina olaga o Lana fanau o loo e fetaiai ai.
Ua tatou ola i se vaitaimi o avanoa maoae. E ui lava tatou te feagai ma le tele o faigata, ae ou te iloa o loo i ai iina i se vaega ina ia mafai ai ona tatou fesoasoani i isi ia lagonaina le alofa o lo tatou Tama Faalelagi. Na aoao mai Peresitene Nelson: “I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi.” Ua tatou maua le avanoa e leoleo ai tagata o loo mana’omia se lima fesoasoani, se opo, se lagona o le faamāfanafanaga, po o le na ona tatou faatasi ma i latou ma le filemu. Afai e mafai ona tatou fesoasoani e faamāmā a latou avega, e tusa lava pe na o sina taimi, ona mafai lea ona tatou vaaia faaaliga silisili o le mana o le Faaola i o latou olaga.
I le avea ai ma soo o Iesu Keriso, e mafai e le Au Paia o Aso e Gata Ai ona faia se eseesega lelei i le lalolagi. E mafai ona tatou tuuina atu se lagona o le olioli lea e atagia mai i o tatou foliga—o se olioli tatou te faasoa atu i upu o le alofa ma galuega agalelei. Ia avea i tatou ma tuaoi lelei, pule lelei o galuega, ma tagata faigaluega lelei. Se’i o tatou taumafai e avea ma Kerisiano lelei i taimi uma.
Ua toefuatai mai e le Alii Lana talalelei i sauniga e tatau ai ina ia mafai ai e fanau a le Tama Faalelagi ona maua folafolaga uma e fusia ai i tatou ia te Ia. E ala i le fesoasoani atu i o tatou uso ma tuafafine i o latou luitau i aso taitasi, ia tatou manatua foi e fesoasoani ia i latou e faia ma tausia nei folafolaga paia ma lo latou Tama Faalelagi ina ia mafai ai e Ia ona folafola atu ia i latou faamanuiaga silisili mo lenei olaga ma le faavavau. O nei folafolaga e na o le Toefuataiga o le talalelei a Iesu Keriso ma Ana ki o le perisitua e mafai ai.
I se isi faaupuga, e mafai ona tatou fesoasoani i isi ia tumau i le ala o feagaiga. O nisi o i tatou e o ese mai le ala mai lea taimi i lea taimi, ma o lea e tatau ai ona tatou manatua mo lo tatou Tama Faalelagi, e i ai lava i taimi uma lo tatou avanoa e toe foi mai ai. E tusa lava pe le sili ona atoatoa lo tatou ala, e faamanatu mai lava e le Faaola ia i tatou e faapea, “o le tele lava o taimi [tatou te salamo ai] ma [saili] le faamagaloga, ma le faamoemoe moni, [o le a] faamagaloina i tatou.”
O se tasi o galuega a le fili i aso nei o le faia lea ia tatou mafaufau ma talitonu e leai se auala tatou te suia ai pe ua le toe i ai foi so tatou faamoemoe. O lenei mafaufauga faataumaoi ua mafua ai ona taofia i tatou mai le taumafai. Ma o le taimi lenei e mafai ai e lo tatou alofa, a tatou upu faamalosiau ma le lagolago, o tatou taimi, ma la tatou fesoasoani ona tuuina atu i se tasi le faamoemoe e toe taumafai ai.
Atonu o loo e mafaufau, “Ua lelei, ae o ai e auauna mai ia te au?” O le o atu ma faamanuiaina olaga o o tatou uso ma tuafafine, o le a tatou aoina mai ai molimau o le a faatumulia ai o tatou olaga i le faatuatua i le Alii o Iesu Keriso. O nei molimau o le a toe faaolaola ai i tatou e toe taumafai ai i tatou lava. O le a toe faaolaolaina i tatou e le Agaga Paia ma fesoasoani ia i tatou i molimau faafouina e faaauau ai pea i o tatou lava faigata ma tofotofoga patino. Soo se taimi lava tatou te saili ai e faamanuia olaga o isi, e sili atu ona alofa mutimutivale le Alii ia i tatou; Na te faamalosia i tatou ma fesoasoani ia i tatou i o tatou olaga.
Faamolemole ia manatua o le Alii o Iesu Keriso o lou Faaola ma e malamalama patino ia te oe. Na te silafia le uiga o le faataunuuina o se valaauga ma tuua mea ina ia fesoasoani ai i fanau a le Atua. Ua ia te Ia le mana e faamanuia ai oe i mea uma, pe afai e te talitonu ia te Ia ma aua le masalosalo.
O’u uso e ma tuafafine pele, i lena aso ina ua lagona ai e se taitai perisitua le musuia mo i ma’ua e asiasi i se tina ma se atalii e le’i i ai i la ma’ua lisi, ou te folafola atu na silafia e le Atua la te manaomia i ma’ua. Ma i le iuga, o a’u lea sa auauna mai i ai. I lena aso, sa ou maua ai se tasi o lesona silisili o le alofa o le Faaola mo i tatou.
Ou te molimau atu o Iesu Keriso o le Faaola o le lalolagi, o loo soifua o Ia, sa soifua o Ia ma maliu mo oe ma au, ma sa toetu mai o Ia mo oe ma a’u ina ia mafai ona tatou saili atu i ni faatasiga faaselesitila e tumu i le olioli ma i latou o e ua i ai i le isi itu o le veli. Ou te iloa e Na te malamalama atoatoa ia te oe ma a’u. E malamalama o Ia i o tatou taimi faigata taitasi, ma ua Ia te Ia le mana e fesoasoani ai ia i tatou i na taimi tatou te lagona ai le sili ona vaivai. Ou te iloa na faaali mai le Alii o Iesu Keriso ma lo tatou Tama Faalelagi ia Iosefa Samita e toefuatai mai le talalelei i nei aso. Ou te iloa o lo tatou perofeta pele, o Peresitene Russell M. Nelson, o se perofeta a le Alii, ma ou te molimau atu i lenei mea i le suafa o Iesu Keriso, amene.