O Le A Toe Afio Mai le Alii o Iesu Keriso
O le taimi lava lenei mo oe ma a’u e saunia ai mo le Afio Mai Faalua o lo tatou Alii ma le Faaola, o Iesu le Keriso.
O’u uso e ma tuafafine pele, ou te faafetai i le faamanuiaina o a’u e le Alii e lauga atu ia te outou.
I lenei konafesi, ua fetalai mai ai le Alii ia i tatou e ala mai i Ana auauna. Ou te uunaia outou e suesue i a latou savali. Faaaoga savali e pei o se suesuega i potu suesue faasaienitisi e uiga i mea e moni ma mea e le moni i le isi ono masina e sosoo ai.
O le faasaoina ma le toefaafouina o le Malumalu o Sate Leki ma isi nofoaga o le Lotoa o le Malumalu ua toeitiiti lima tausaga o faagasolo. O fua faatatau i le taimi nei ua iloa ai o le a faamae’aina lenei galuega i le faai’uga o le 2026. Matou te faafetai i tagata uma o loo galulue i lenei galuega telē na’uā.
I le gasologa o le ono masina ua tuanai, na tatou faapaiaina ai pe toe faapaiaina ia malumalu e iva i atunuu e lima. I le va o le taimi lenei ma le faai’uga o le tausaga, o le a tatou faapaiaina ai nisi malumalu se lima.
O le asō matou te fiafia lava e faasilasila atu ni fuafuaga e fausia nisi malumalu e 17. Faamolemole ia faafofoga ma le migao a o ou faasilasila atua ia nofoaga.
-
Juchitán de Zaragoza, Mekisiko
-
Santa Ana, El Salvador
-
Medellín, Kolomupia
-
Santiago, Dominican Republic
-
Puerto Montt, Chile
-
Dublin, Aialani
-
Milan, Italia
-
Abuja, Nigeria
-
Kampala, Uganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alapama
-
Milwaukee, Wisconsin
-
Summit, New Jersey
-
Price, Utah
O’u uso e ma tuafafine pele, pe o tatou vaai ea i mea o loo tutupu tonu i o tatou luma? Ou te tatalo ina ia tatou lē misia le mamalu o lenei taimi! O loo faanatinati moni e le Alii Lana galuega.
Aisea ua tatou fauina ai malumalu i se saoasaoa e le’i tupu muamua lava? Aisea? Ona ua poloaiina ai i tatou e le Alii ia faia lena mea. O faamanuiaga o le malumalu ua fesoasoani e faapotopoto Isaraelu i itu uma e lua o le veli. O nei faamanuiaga ua fesoasoani foi e saunia se nuu o ē o le a fesoasoani i le sauniaina o le lalolagi mo le Afio Mai Faalua o le Alii!
E pei ona vavalo le perofeta o Isaia, ma toe ta’ua i le viiga o le Mesia a Handel, pe a toe afio mai Iesu Keriso, “Ona faaalia mai ai lea o le [mamalu] o le Alii, e vaaia lava e tagata uma faatasi.”
I lena aso, o le a “i lona ua le malo: e igoa foi o ia o le Silisili Ese, o le Faipule, O Le Atua malosi, O Le Tamā o le Faavavau, O Le Alii o le Filemu.”
O le a pulea e Iesu Keriso mai le Ierusalema tuai ma le Ierusalema Fou “o le a faatu i le konetineta o Amerika.” Mai nei nofoaga autu e lua, o le a Ia taitaia ai mataupu o Lana Ekalesia.
I lena aso, o le a lauiloa ai le Alii o le “Tupu o Tupu, ma le Alii o Alii.” O i latou e faatasi ma Ia o le a “valaauina, ma filifilia, ma faatuatua.”
Uso e ma tuafafine, o le taimi lava lenei mo oe, ma a’u, e saunia ai mo le Afio Mai Faalua o lo tatou Alii ma le Faaola, o Iesu le Keriso. O le taimi lava lenei mo i tatou ina ia avea ma a tatou faamuamua aupito silisili lo tatou avea ma soo. I se lalolagi ua faatumulia i mea faalavefau faaninivaulu, e mafai faapefea ona tatou faia lenei mea?
O le tapuai soo i totonu o le malumalu o le a fesoasoani ia i tatou. I totonu o le maota o le Alii, tatou te taulai atu ai ia Iesu Keriso. Tatou te aoao ai e uiga ia te Ia. Tatou te osifeagaiga ai e mulimuli ia te Ia. Tatou te iloa ai o Ia. A tatou tausia a tatou feagaiga o le malumalu, tatou te maua se avanoa tele atu e faaaoga ai le mana faamalosiau o le Alii. I totonu o le malumalu, tatou te maua ai le puipuiga mai tu’iga a le lalolagi. Tatou te lagona ai le alofa lē pona o Iesu Keriso ma lo tatou Tama Faalelagi i se fuataga tele! Tatou te lagona ai le filemu ma le faamautinoaga faaleagaga, pe a faatusa atu i fesoua’iga o le lalolagi.
O la’u folafolaga lenei ia te outou: O tagata uma e saili atu ia Iesu Keriso o le a mauaina o Ia i totonu o le malumalu. O le a e lagonaina Lona alofa mutimutivale. O le a e mauaina tali i au fesili e sili ona lavelave. O le a e malamalama lelei ai i le olioli ona o Lana talalelei.
Ua ou iloa o le fesili aupito sili ona taua lea e tatau ia i tatou uma ona taliina o lenei: O ai pe o le a foi le mea o le a ou foai atu i ai lo’u ola?
O la’u faai’uga e mulimuli ia Iesu Keriso o le faai’uga aupito silisili lea ona taua ua ou faia. I le taimi o le a’oga faafomai sa ou maua ai se molimau e uiga i le paia o le Atua le Tama ma Lona Alo, o Iesu Keriso. Talu mai lena taimi, ua avea pea lo tatou Faaola ma papa ua ou atia’e ai i luga lo’u olaga. O lena filifiliga ua faia ai le eseesega atoa! O lena faai’uga ua faigofie ai ona faia isi faai’uga e tele. O lena faai’uga na aumaia ia te a’u le faamoemoega ma le taitaiga. Na fesoasoani foi ia te a’u ia lavātia ona talitali afā o le olaga. Se’i o’u faasoa atua ni faataitaiga se lua.
Muamua, ina ua faafuasei ona maliu lo’u toalua o Dantzel, sa le mafai ona ou valaau atu i se isi o la’u fanau. Sa tuua ai na’o a’u iina, ma le mafatia ma tagi atu mo se fesoasoani. Ma le lotofaafetai, na auala mai i Lona Agaga, sa aoao ai a’u e le Alii i le mafuaaga na ala ai ona avatu la’u pele o Dantzel i le aiga. Faatasi ma lena malamalamaaga, sa faamafanafanaina ai a’u. I le aluga o taimi, sa mafai ona ou taulima leleiina lo’u loto faavauvau. Mulimuli ane, sa ou faaipoipo atu i lo’u toalua pele o Wendy. O ia o le vaega tutotonu o la’u faataitaiga lona lua.
Ina ua ma i ai ma Wendy i se tofiga i se atunuu mamao, sa tuu ai e tagata gaoi se laau malosi i lo’u ulu ma oomi le amoti. Ae sa le’i pa le fana. I lena aafiaga, sa faamata’uina ai uma o ma’ua ola. Ae sa ma lagonaina ma Wendy se filemu lemateenaina. O le filemu lea “e sili atu i manatu uma.”
Uso e ma tuafafine, o le a faamafanafanaina foi outou e le Alii! O le a Ia faamalosia oe. O le a Ia faamanuiaina oe i le filemu, e oo lava i le lotolotoi o vevesiga.
Faamolemole faafofoga i lenei folafolaga a Iesu Keriso ia te outou: “O le a Ou i ai i lo outou lima taumatau ma lo outou agavale, ma o le a i ai loʼu Agaga i o outou loto, ma siʼo faataamilo outou e aʼu agelu, e sapasapai outou i luga.”
E leai se tapulaa i le gafatia o le Faaola e fesoasoani ia te oe. O Ona mafatiaga le mafaamatalaina i Ketesemane ma luga i Kalevario sa faia mo oe! O Lana Taulaga le i’u e mo oe!
Ou te uunaia outou ia tuuto atu se taimi i vaiaso taitasi—mo lou olaga atoa o totoe—e faateleina ai lou malamalama e uiga i le Togiola a Iesu Keriso. E tiga lo’u loto mo i latou o ē ua saisaitia i le agasala ma ua le iloa pe faapefea ona o ese mai ai. Ou te tagi mo i latou o ē tauivi faaleagaga po o ē o loo tauaveina ni avega mamafa na o i latou ona latou te lē malamalama i le mea na faia e Iesu mo i latou.
Sa ave e Iesu i Ona lava luga au agasala, ou tiga, ou lototiga, ma ou vaivaiga. E te lē tau tauaveina na mea na o oe! O le a Ia faamagalo oe pe a e salamo. O le a Ia faamanuia oe i mea e te manaomia. O le a Ia faamalolo i lou agaga ua manu’alia. A e amo atu oe lava ia ia te Ia, o le a e lagonaina le māmā atili o au avega. Afai o le a e osia ma tausia feagaiga e mulimuli ia Iesu Keriso, o le a e iloaina ai e le tumau ia taimi tiga o lou olaga. O ou puapuaga o le a “faatumuina i le olioli o Keriso.”
E le o vave tele pe tuai tele foi mo oe le avea ma se soo tuuto o Iesu Keriso. Ma o le a e lagonaina atoatoa faamanuiaga o Lana Togiola. O le a e mataalia atili foi i le fesoasoani atu e faapotopoto Isaraelu.
O’u uso e ma tuafafine pele, i se aso a sau, o le a toe afio mai ai Iesu Keriso i le lalolagi o le Mesia o le meleniuma. O lea la, o le asō ou te valaau atu ai ia te outou e toe tuuto atu o outou olaga ia Iesu Keriso. Ou te valaau atu ia te outou ia fesoasoani i le faapotopotoina o Isaraelu o loo taape solo ma ia saunia le lalolagi mo le Afio Mai Faalua o le Alii. Ou te valaau atu ia te outou ia talanoa e uiga ia Keriso, molimau atu ia Keriso, ia faatuatua ia Keriso, ma ia olioli ia Keriso!
O mai ia Keriso ma “ofo atu o outou agaga atoa” ia te Ia. O le mealilo lenei i se olaga o le olioli!
O le mea silisili o le a oo mai, o’u uso e ma tuafafine pele, ona o le a toe afio mai le Faaola! O le mea silisili o le a oo mai, ona o loo faanatinatiina e le Alii Lana galuega. O le mea silisili o le a oo mai, pe a tatou liliu atu o tatou loto ma o tatou olaga ia Iesu Keriso.
Ou te tuu atu la’u molimau faamaoni o Iesu Keriso o le Alo o le Atua. O a’u o Lona soo. Ua faamamaluina lava a’u i le avea ai ma Ana auauna. I Lona Afio Mai Faalua, o le a “faaalia mai ai … le [mamalu] o le Alii, e vaaia lava e tagata uma faatasi.” O lena aso o le a faatumulia i le olioli mo ē amiotonu!
E ala i le mana o ki paia o le perisitua o loo ou umia, ou te tautino atu ai lenei upumoni ia te outou ma i le lalolagi atoa! I le suafa o Iesu Keriso, amene.