Faafailele A’a, ona Ola ai lea o Lala
O le a utu mai e lala o lau molimau le malosiaga mai lou faatuatua ua faalolotoina i le Tama Faalelagi ma Lona Alo Pele.
O Se Falesa Tuai i Zwickau
O le tausaga 2024 o se mea pei o se tausaga faasolopito mo a’u. Ua faailoga ai le 75 tausaga talu ona papatisoina ma faamauina a’u o se tagata o Le Ekalesia a Iesu Keriso o le Au Paia o Aso e Gata Ai i Zwickau, Siamani.
O lo’u avea ma tagata o Le Ekalesia a Iesu Keriso o le Au Paia o Aso e Gata Ai e pele ia te a’u. O le faitauina faatasi ma le nuu o le feagaiga a le Atua, faatasi ma outou, o’u uso ma tuafafine, o se tasi o faamamaluga aupito silisili o lo’u olaga.
Pe a ou mafaufau i la’u faigamalaga patino o le avea ma soo, e tele ina faafoi lo’u mafaufau i tua i se tama’i fale tuai i Zwickau, lea ou te faamemelo ai i manatuaga o le auai i sauniga faamanatuga a le Ekalesia a Iesu Keriso o se tamaitiiti. O iina le mea sa uluai faafailele ai le fatu o la’u molimau.
O le falelotu lea sa i ai se okeni pamu tuai lava. O Aso Sa uma lava e tofi ai se alii talavou na te tuleiina i luga ma lalo le vae e pamu ai le ea e ola ai le okeni. O nisi taimi sa ou maua ai lea avanoa silisili e lagolago ai i lena galuega taua.
A o usuina e le aofia a matou viiga faapelepele, ou te pamuina ma lo’u malosi atoa ina ia ‘aua lava ne’i leai se ea i le okeni. Mai le nofoa sa faagaoioia ai pamu nei, sa maua ai sa’u vaaiga manaia o nisi o faamalama tioata felanulanua’i mata’ina, o le tasi sa faaalia ai le Faaola o Iesu Keriso, ae o le isi o le ata o Iosefa Samita i le Vao Paia.
Ou te manatua pea lagona paia sa ou maua a o ou vaavaai atu i na faamalama o suluia i le la a o ou faalogologo atu i molimau a le Au Paia ma vivii i viiga o Siona.
I lena nofoaga paia, na molimau mai ai le Agaga o le Atua i lo’u mafaufau ma le loto e moni lava: o Iesu Keriso o le Faaola o le lalolagi. O Lana Ekalesia lenei. Sa vaaitino le Perofeta o Iosefa Samita i le Atua le Tama ma Iesu Keriso ma na faalogo atu i o La’ua si’ufofoga.
I le amataga o lenei tausaga, a o ou i ai i se tofiga i Europa, sa ou maua ai le avanoa e toefoi atu ai i Zwickau. O le mea e faanoanoa ai, o lena falesa tuai ua le toe i ai iina. Sa talepeina i lalo i le tele o tausaga talu ai ina ia faaavanoa e fau ai se fale mautotogi tele.
O Le A le Mea e Faavavau, ae O Le A le Mea e Le Faavavau?
Ou te tautino atu ou te faanoanoa lava i le iloaina o lenei fale faapelepele mai lo’u tamaitiiti ua na o se manatuaga nei. Sa avea o se fale paia ia te a’u. Ae sa na’o se fale.
I se faatusatusaga, o le molimau faaleagaga na ou maua mai le Agaga Paia i na mau tausaga e le i mavae ese atu lava. O le mea moni, ua tupu a’e ma le malosi atili. O mea na ou aoaoina i lo’u talavou e uiga i mataupu faavae autu o le talalelei a Iesu Keriso ua avea pea ma o’u faavae mautu i lo’u olaga atoa. O le sootaga faalefeagaiga na ou faia ma lo’u Tama Faalelagi ma Lona Alo Pele ua tumau pea ia te a’u—tusa lava pe ua malepe i lalo le falesa o Zwickau ma ua le o toe i ai foi faamalama tioata felanulanua’i.
“E mavae atu le lagi ma le lalolagi,” na fetalai ai Iesu, “ae le mavae atu lava la’u upu.”
“Ona o le a o ese mauga, ma sii ese maupueue, ae o le a le alu ese lava lo’u agalelei mai ia te oe, pe o le a aveesea foi le feagaiga o loʼu filemu, ua fetalai mai ai le Alii.”
O se tasi o mea sili ona taua e mafai ona tatou aoaoina i lenei olaga, o le eseesega lea i le va o le mea e faavavau ma le mea e le faavavau. A tatou malamalama loa i le mea lena, e suia mea uma—a tatou mafutaga, o filifiliga tatou te faia, o le auala tatou te taulima ai tagata.
O le iloaina o le mea e faavavau ma le mea e le faavavau o le ki lea i le tuputupu a’e o se molimau ia Iesu Keriso ma Lana Ekalesia.
Aua Ne’i Aveseseina Lala mo A’a
O le talalelei toefuataiina a Iesu Keriso, e pei ona aoao mai le Perofeta o Iosefa Samita, “e opomauina mea uma, atoa ai ma mea uma o le upumoni.” E le faapea la o upumoni uma e tutusa lo latou taua. O nisi upumoni e autu, taua, e i le a’a o lo tatou faatuatuaga. O isi o faaopoopoga po o ni lala—taua, ae faato’a taua pe a fesootai i latou i mea faavae.
Na saunoa foi le Perofeta o Iosefa, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, e faapea na maliu o Ia, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”
I se isi faaupuga, o Iesu Keriso ma Lana taulaga togiola o le a’a lea o la tatou molimau. O isi mea uma o ni lala.
E le o faapea atu la e le taua ia lala. E manaomia e se laau ia lala. Ae e pei ona ta’u atu e le Faaola i Ona soo, “Faapei o le lala e le mafai ona fua pe a na o ia, pe afai e le mau i le vine.” A aunoa ma se fesootaiga i le Faaola, i le faafailelega lea e maua i a’a, e mago le lala ma mate.
Pe a oo mai i le faafaileleina o a tatou molimau ia Iesu Keriso, ou te tomanatu pe o tatou aveseseina i nisi taimi ia lala mo a’a. O le mea sese lea sa matauina e Iesu i le Au Faresaio o Ona aso. Sa gauai tele atu i latou i faamatalaga iti o le tulafono ae ua latou lafoa’ia ai le mea na ta’ua e le Faaola “o mea silisili”—o mataupu faavae autu e pei o le “faamasinotonu ma le alofa mutimutivale ma le faatuatua.”
Afai e te manao e faafailele se laau, e te le fuiina lala i le vai. E te fuiina ia a’a. E faapena foi, afai e te manao i lala o lau molimau ia ola ma fua mai ni fua, ia faafailele ona a’a. Afai e te le o mautonu e uiga i se aoaoga faavae patino po o se faatinoga po o se elemene o le talafaasolopito o le Ekalesia, saili le faamaninoga ma le faatuatua ia Iesu Keriso. Saili ia malamalama i Lana taulaga mo oe, o Lona alofa mo oe, ma Lona finagalo mo oe. Mulimuli ia te Ia i le lotomaualalo. O le a utu mai e lala o lau molimau le malosiaga mai lou faatuatua ua faalolotoina i le Tama Faalelagi ma Lona Alo Pele.
Mo se faataitaiga, afai e te manao i se molimau malosi atu o le Tusi a Mamona, ia taulai atu i lana molimau ia Iesu Keriso. Ia matau le auala o loo molimau mai ai le Tusi a Mamona ia te Ia, o mea na te aoao mai e uiga ia te Ia, ma le auala na te valaaulia ai ma musuia oe ia e sau ia te Ia.
Afai o loo e sailia se aafiaga sili atu ona anoa i sauniga a le Ekalesia po o totonu o le malumalu, taumafai e saili le Faaola i totonu o sauniga paia tatou te maua iina. Ia maua le Alii i totonu o Lona maota paia.
Afai o loo e lagonaina le matua gapelu pe lofituina i ou valaauga o le Ekalesia, taumafai e toe taulai atu lau auaunaga ia Iesu Keriso. Ia faia o se faailoaga o lou alofa mo Ia.
Faafailele a’a, ona ola ai lea o lala. Ma e oo mai le taimi latou te fua mai ai.
Ia Mauaa ma Atiina A’e ia te Ia
O le malosi o le faatuatua ia Iesu Keriso e le tupu i se po. Leai, i lenei lalolagi faaletino, o laau talatala ma laau tuitui o le masalosalo ua matua ola lauusiusi. O le laau maloloina ma taufuifui o le faatuatua e manaomia ai se taumafaiga ma le loto i ai. Ma o se vaega taua o lena taumafaiga o le faamautinoa lea ua maua’a ma le mausali i tatou ia Keriso.
Mo se faataitaiga: I le taimi muamua, atonu tatou te ta’aina atu i le talalelei ma le Ekalesia a le Faaola ona ua faagaeetiaina i tatou i ni tagata faauo o le au paia pe ona o le epikopo agalelei po o vaaiga mama o le falesa. O nei tulaga e mautinoa le taua i le tuputupu a’e o le Ekalesia.
Ae ui i lea, afai e le taitai loloto atu le ola o a’a o a tatou molimau nai lo lena, o le a se mea e tupu pe a tatou masii atu i se uarota e lolotu i se fale e le manaia tele, faatasi ma ni tagata o le au paia e le fia faauo, ma ua fai mai e le epikopo se tala tatou te tiga ai?
O se isi faataitaiga: Pe le foliga ea tatou te faamoemoe lava afai tatou te tausia poloaiga ma ua faamauina i le malumalu, o le a faamanuiaina i tatou i se aiga toatele ma fiafia, ma ni fanau atamamai ma usiusitai, ua toaaga ma tumau uma i le Lotu, auauna i misiona, pepese i le aufaipese a le uarota, ma ofofua atu e fesoasoani i le faamamaina o le falelotu i taeao uma o Aso Toonai?
Ou te faamoemoe o le a tatou vaai uma i lenei mea i o tatou olaga. Ae faapefea pe afai e le tupu? Pe o le a tatou piimau pea i le Faaola e tusa lava po o a tulaga e tutupu—ma faalagolago ia te Ia ma Lana taimi?
E tatau ona tatou fesili ifo ia i tatou lava: Pe o faavae ea la’u molimau i mea ou te faamoemoe e tutupu i lo’u olaga? O faalagolago ea i amioga po o uiga o isi? Pe o faavae ma le mausali i luga o Iesu Keriso, “maua’a ma atiina a’e ia te ia,” e tusa lava po o a tulaga fesuisuia’i o le olaga?
Uputuu, Mausa, ma le Faatuatua
O loo ta’u mai i le Tusi a Mamona e uiga i se nuu na “anaana i le tausiga o sauniga a le Atua.” Ona sau ai lea o se tagata masalosalo e igoa ia Korioa, ua faataemu i le talalelei a le Faaola, ma ta’ua o le “mea valea” ma “uputuu faavalea a o latou tama.” Na “taitai ese atu [e Korioa] loto o le toatele, ma faaoso ai i latou ia faamaualuluga i lo latou amioleaga.” Ae sa le mafai ona ia faaseseina isi, ona ia i latou, o le talalelei a Iesu Keriso sa sili atu nai lo na’o se uputuu.
E malosi le faatuatua pe a maua’a i le loloto o aafiaga faaletagata lava ia, tautinoga faaletagata lava ia ia Iesu Keriso, tutoatasi e tusa ma a tatou uputuu po o tu masani po o mea e ono ta’u mai pe fai e isi.
O le a su’eina ma tofotofoina a tatou molimau. E le o se faatuatua le faatuatua pe afai e le’i tofotofoina lava. E le malosi le faatuatua pe afai e le’i osofa’ia lava. O lea la, aua le faanoanoa pe afai e i ai ni tofotofoga o lou faatuatua po o ni fesili e le’i taliina lava.
E le tatau ona tatou faamoemoe ia malamalama i mea uma ae tatou te le’i faatinoa. E lē o se faatuatua lena mea. E pei ona aoao mai Alema, o le “Faatuatua e le o le maua lea o se malamalama atoatoa i mea.” Afai tatou te faatalitali seiloga e tali uma a tatou fesili ona faato’a faatino lea, ua tatou faatapulaaina ma le lamatia le lelei e mafai ona tatou faia, ma tatou faatapulaaina le mana o lo tatou faatuatua.
E matagofie le faatuatua aua e tumau pea e tusa lava pe le oo mai faamanuiaga e pei ona faamoemoe i ai. E le mafai ona tatou vaai atu i le lumanai, tatou te le iloa uma ia tali, ae e mafai ona tatou faalagolago ia Iesu Keriso a o tatou agai pea i luma ma agai i luga aua o Ia o lo tatou Faaola ma le Togiola.
E onosaia e le faatuatua ia tofotofoga ma mea lē mautonu o le olaga, ona ua maua’a ma le mausali ia Keriso ma Lana mataupu faavae. O Iesu Keriso ma lo tatou Tama oi le Lagi o le na auina mai o Ia, o le faavae e tasi e le mafaaagaeetia, ma faatuatuaina atoatoa o lo tatou.
O se molimau e le o se mea e faa-tasi lava ona e fauina ona tu ai lea e faavavau. E pei lava o se laau lea e te tausia i taimi uma. O le totoina o le afioga a le Atua i lou loto ua na o le laasaga muamua lea. O le taimi lava e amata ola ai lau molimau, ona amata loa lea o le galuega moni! O le taimi la lena e te “tausia [ai] ma le faaeteete tele, ina ia mafai ona mauaa, ina ia mafai ona tupu ae, ma fua mai ni fua.” E manaomia ai le “filiga tele” ma le “onosai i ana afioga.” Ae ua mautinoa folafolaga a le Alii: “O le a outou selesele ai taui o lo outou faatuatua, ma lo outou filiga, ma le onosai, ma le tali-tiga, ma faatalitali mo le laau e fua mai fua mo outou.”
Uso e ma tuafafine pele, a’u uo pele, o loo i ai se vaega o a’u o loo misia le falesa tuai o Zwickau ma ona faamalama tioata felanulanua’i. Ae i le silia ma le 75 tausaga, o loo taitai lava a’u e Iesu Keriso i se malaga i le olaga lea e sili atu ona faagaeetiaina ou te le’i mafaufauina. Ua Ia faamafanafanaina a’u i o’u mafatiaga, fesoasoani ia te a’u ia iloa o’u vaivaiga, faamalolo o’u manu’aga faaleagaga, ma faafailele a’u i lo’u faatuatua o loo tuputupu a’e pea.
O la’u tatalo faamaoni ma faamanuiaga o le a tatou faafaileleina pea lava pea ia a’a o lo tatou faatuatua i le Faaola, i Lana aoaoga faavae, ma i Lana Ekalesia. Ou te molimau atu ai i nei mea, i le suafa paia o lo tatou Faaola, lo tatou Togiola, lo tatou Matai—i le suafa o Iesu Keriso, amene.