Tatanuina o a Tatou Auupega o le Fouvale
Tau ina ia tatou tanumia—ia matuā loloto lava—soo se elemene o le fouvale e faasaga i le Atua i o tatou olaga ma suia i se loto naunautai ma se mafaufau naunautai.
Ua tusia i le Tusi a Mamona e faapea, pe tusa ma le, 90 tausaga a o le’i soifua mai Iesu Keriso, sa amata ai e atalii o le Tupu o Mosaea le mea o le a avea o se misiona e 14-tausaga ia Sa Lamana. E tele augatupulaga sa lei manuia ai taumafaiga e aumaia le nuu o sa Lamana i se talitonuga i le aoaoga faavae a Keriso. Peitai, o le taimi lenei, e ala i le aofia ai faavavega o le Agaga Paia, e faitauafe sa Lamana na liua ma avea ma soo o Iesu Keriso.
Ua tatou faitauina, “Ma e pei ona mautinoa o loo soifua le Alii, mautinoa tele lava e pei o le toatele o e na talitonu, pe e pei le toatele o e na aumai i le malamalama o le upumoni, e ala i le talaiga a Amona ma ona uso, e tusa ma le agaga o faaaliga ma valoaga, ma le faia e le mana o le Atua o vavega e ala atu ia te i latou—ioe, ou te fai atu ia te outou, e pei ona soifua le Alii, o le toatele o sa Lamanā o e na talitonu i la latou talaiga, ma faaliliuina i le Alii, sa lei pauu ese lava.”
O le ki i le liua tumau o lenei nuu o loo ta’ua i le isi fuaiupu: “Sa avea i latou ma tagata amiotonu; sa latou tuu i lalo auupega o lo latou fouvale, sa latou le toe tau faasaga i le Atua, pe faasaga i soo se tasi o o latou uso.”
O lenei maufaasino i “auupega o le fouvale” sa o ni auupega moni ma ni auupega faafaatusa foi. O lona uiga o a latou pelu ma isi auupega o le taua ae o lo latou le usiusitai foi i le Atua ma Ana poloaiga.
Sa faaupuina e le tupu o nei sa Lamana na liua faapea: “Ma o lenei faauta, ou uso e, … ona pau lea o le mea e mafai ona tatou faia … tatou te salamo ai mai ia tatou agasala uma ma fasiotiga tagata e tele sa tatou faia, ma faia i le Atua ia ona aveese i latou mai o tatou loto, aua ona pau lea o le mea sa mafai ona tatou faia ia lava ai lo tatou salamo i luma o le Atua e aveese ai e ia o tatou pisia.”
Matau upu a le tupu—o lo latou salamo faamaoni na taitai atu ai e le gata i le faamagaloina o a latou agasala, ae na aveesea ai foi pisipisia ona agasala e oo lava i le manao e agasala mai o latou loto. E pei ona outou silafia, nai lo le lamatia mai soo se toe foi i o latou tulaga na i ai muamua o le fouvale i le Atua, ae sa latou tatanu foi a latou pelu. Ma ina ua latou tatanuina a latou auupega faaletino, faatasi ai ma ni loto ua suia, sa latou tatanuina foi lo latou mananao e fai le agasala.
Atonu tatou te fesili ifo ia i tatou lava pe o le a se mea e mafai ona tatou faia e mulimuli ai i lenei mamanu, e “tuu i lalo auupega o [lo tatou] fouvale” po o a lava ma avea ai ua matuai “liua i le Alii” ina ia aveesea ai pisipisia o le agasala ma le manao e fai le agasala mai o tatou loto ma tatou le toe pa’u’ū ese ai lava.
O le fouvale e mafai ona malosi pe leai foi. O le faataitaiga masani o le fouvale ma le loto i ai o Lusifelo, o lē, i le muai olaga, na tetee i le fuafuaga a le Tama o le togiola ma sa ia taena’iina isi e tetee foi i ai, “ma, i lena aso, e toatele na mulimuli ia te ia.” E le faigata ona iloatino le aafiaga o lona fouvale faifaipea i o tatou foi taimi.
O le toatolu o aneti-Keriso i le Tusi a Mamona—Serema, Ne’oa, ma Kori’oa—o loo tuuina mai ai se aoaoga masani o le fouvale faamo’imo’i i le Atua. O le manatu laualuga o Ne’oa ma Kori’oa e faapea, e leai se agasala; o le mea lea, e leai se mea e moomia ai le salamo, ma e leai se Faaola. “E manuia tagata taitoatasi e tusa ma lona atamai, ma … e manumalo tagata taitoatasi e tusa ma lona malosi; ma o soo se mea lava e faia e se tagata e le o se solitulafono.” E teena e le aneti-Keriso le pule faalelotu, e aofia ai sauniga ma feagaiga o tu ia “na faataatitia e faitaulaga anamua, e latou te maua ai le mana ma le pule.”
O se faataitaiga i aso e gata ai o le fouvalega faamo’imo’i e i ai se taunuuga e fiafia atu, o le tala ia Viliamu W. Phelps. Sa auai Phelps i le Ekalesia i le 1831 ma sa tofia o ia e fai ma lomitusi a le Ekalesia. Sa ia faasa’osa’oina lomiga e tele o le popofou o le Ekalesia, sa tusia le tele o viiga, ma sa avea ma tusiupu ia Iosefa Samita. Ae paga lea, sa fulitua o ia i le Ekalesia ma le Perofeta, na oo ai lava ina ia tuuina atu se molimau sese e faasaga ia Iosefa Samita i se faamasinoga i Misuri, lea na saofagā ai i le faafalepuipuiina o le Perofeta iina.
Mulimuli ane, na tusi atu ai Phelps ia Iosefa e talosagaina ai se faamagaloga. “O loo o’u iloa lo’u tulaga, o loo e silafiaina, ma o loo silafia foi e le Atua, ma ou te manao ia faaolaina a’u pe afai o le a fesoasoani a’u uo ia te a’u.”
I lana tali atu na ta’ua ai e le Perofeta: “E moni ua matou mafatia tele ona o le taunuuga o au amioga.… Ae ui i lea, ua uma ona inuina le ipu, ua faia le finagalo o lo tatou Tama Faalelagi, ma o loo matou ola pea. Sau ia, le uso pele, talu ai ua uma le taua, aua o uo sa i ai muamua e toe uo foi i le faaiuga.”
Faatasi ai ma le salamo faamaoni, sa tanuina ai e William Phelps ana “auupega o le fouvale,” na toe taliaina i le faaaumeaina atoatoa, ma e le’i toe pa’ū ese lava.
Atonu o le ituaiga e sili atu ona faataumaoi faasaga i le Atua, ituaiga faatagāfai--e faatuatuanai ai i Lona finagalo i o tatou olaga. E toatele atonu e le mafaufau lava i le fouvale faamo’imo’i atonu o la lava e tetee i le finagalo ma le afioga a le Atua e ala i le tulitulimatagauina o lo latou lava ala e aunoa ma le mafaufau i le taitaiga faalelagi. Ou te manatua ia le pese na lauiloa i le tele o tausaga ua mavae a le tagata pese o Frank Sinatra ma se laina sa faalaualuga ai, “Sa ou faia i la’u lava ala.” Ioe, i le olaga e tele avanoa mo mea patino ma filifiliga mo le tagata lava ia, ae a oo i mataupu o le faaolataga ma le ola e faavavau, e ao ona avea ma a tatou pese autu le, “Sa ou faia i le ala a le Atua,” aua e leai lava se isi auala.
Mo se faataitaiga, le faaa’oa’oga a le Faaola o le papatisoga. Sa Ia faamatuu atu i le papatisoga e fai ma faataitaiga o le tuuto i le Tama ma se faataitaiga foi ia i tatou:
“Ua faaali mai e ia i le fanauga a tagata, ua ia faamaualaloina o ia lava e tusa ma la le tino i luma o le Tamā, ma molimau atu i le Tamā o le a ia usiusitai ia te ia i le tausia o ana poloaiga. …
“Ma ua fetalai mai o ia i le fanauga a tagata: Ia outou mulimuli mai ia te aʼu. O le mea lea, oʼu uso pele e, e mafai ea ona tatou mulimuli atu ia Iesu vagana ai ua tatou loto e tausi poloaiga a le Tamā?”
E leai se “la’u ala” pe afai e tatau ona tatou mulimuli i le faataitaiga a Keriso. O le taumafai e su’e se auala e ese ai, e pei o le faavalevalea o le galulue ai i luga o le Olo o Papelu nai lo le taulai atu ia Keriso ma Lana faaolataga.
O pelu ma isi auupega na tatanuina e le au Sa Lamana na liua, o auupega o le fouvale ona o le ala na latou faaaogaina ai na mea. O na foi ituaiga o auupega i lima o o latou atalii, na faaaoga e puipuia ai aiga ma le saolotoga, sa le o ni auupega o le fouvale i le Atua. E faapena foi i auupega faapena sa i lima o sa Nifae: “Sa latou le tau mo se pule toatasi po o le pule, ae sa … tau mo o latou aiga ma o latou saolotoga, a latou ava, ma a latou fanau, ma a latou mea uma, ioe, mo a latou sauniga o tapuaiga ma la latou ekalesia.”
I lea lava foi ala e tasi, e i ai mea i o tatou olaga atonu e le afaina pe tatou fananau mai e lelei, ae a faaaoga i le ala sese ona avea ai lea ma “auupega o le fouvale.” O a tatou tala, mo se faataitaiga, e mafai ona faagaeetia pe tuumaualaloina ai. E pei ona fai mai ai Iakopo:
“Peitai [e foliga mai] e le mafai e se tagata ona faalata le laulaufaiva; o le mea leaga e le mataofia, ua tumu i le mea oona e oti ai.
“O lea ua tatou vivii ai i le Atua, le Tama; o lea foi ua tatou fetuu a’i i tagata ua faia e foliga i le Atua.
“E luai mai i le gutu e tasi le vivii ma le fetuu. O’u uso e, e le tusa ona faia faapea o na mea.”
Ua matuai tele naua mea i lauga po o talanoaga faalauaitele ma faapatino i nei ona po, e ‘ano’anoa ma faatuaupua. E tele talanoaga e leaga ma masoā, e oo lava i le autalavou. O ia ituaiga o saunoaga, o se “auupega ia o le fouvale” faasaga i le Atua, “e tumu i le mea oona e oti ai.”
Manatu i se isi faataitaiga o se mea e lelei moni ae e mafai ona liua i le fouvale faasaga i le taitaiga faalelagi—o se matata faalegaluega a se tagata. E mafai e se tasi ona maua le lotomalie moni i se pisinisi, galuega, po o se tautua, ma ua faamanuiaina i tatou uma i mea ua ausia ma fatuina e tagata tuuto ma talenia i le tele o vaega o taumafaiga.
Ae, e mafai foi ona avea le tuuto i le matata faalegaluega ma taulaiga laualuga o le olaga o se tagata. Ona faatulagalua ai lea o isi mea uma, e aofia ai le taimi ma taleni e ono moomia e le Faaola mai se na tagata. Mo alii, ma mo tamaitai, o le faapasi o avanoa e tatau ai mo se faaipoipoga, o le toilalo e pipiimau ma siitia se toalua, toilalo e faafailele se fanau, pe aloese ma le loto i ai mai faamanuiaga ma le tiutetauave o le fanauina o fanau ina ia faalautele ai le matata faalegaluega, e mafai ona faaliliuina ai mea matagofie viia e ausia, i se ituaiga o fouvalega.
O se isi faataitaiga e faatatau i o tatou tino faaletino. Ua faamanatu mai e Paulo ia i tatou e faapea e ao ona tatou faamanū atu i le Atua i le tino ma le agaga, ma o le tino lenei o le malumalu o le Agaga Paia, “o loo ia te outou mai le Alii, e le aia foi outou ia te outou.” O lea, ua ia te i tatou se naunautaiga aloa’ia e faaalu ai le taimi e tausia ai o tatou tino i le mea sili tatou te mafaia. E toaitiiti i tatou o le a taunuu i le tumutumu o le faatinoga na tatou vaai i ai talu ai nei i ma na ausia e le au afeleti o le Olimipeka ma le Paralimipeka, ma o nisi o i tatou ua iloa aafiaga o le matua, le mea lea na ta’ua e Peresitene M. Russell Ballard “o nati ua amata ona ‘o’ō”
Ae ui o lea, ou te talitonu e faamalieina lo tatou Foafoa pe a tatou faia le mea silisili e tausia ai Lana meaalofa matagofie o se tino faitino. O le a avea o se faailoga o le fouvale le faamatagā e le tagata o lona tino, pe faatautala ona fai, pe le faia foi le mea e tatau ona fai e tulimatai ai se ituaiga olaga maloloina. I le taimi foi lava lea, o le faalialiavale ma le taunapa i lou fika, foliga, po o ofu e mafai ona avea o se ituaiga o fouvale i se isi itu, e taunuu ai i le tapuai i le meaalofa a le Atua nai lo le Atua.
I le iuga, o le tatanuina o a tatou auupega o le fouvale faasaga i le Atua o lona uiga o le faamatuu atu i faatosinaga a le Agaga Paia, tuu ese le tagata natura ma avea “o se tagata paia e ala i le togiola a Keriso le Alii.” O lona uiga o le tuu faamuamua o le poloaiga muamua i o tatou olaga. O lona uiga o le faamuamua lea o le Atua. Afai o lo tatou alofa i le Atua ma lo tatou naunautaiga e auauna atu ia te Ia ma o tatou loto atoa, mafaufau, ma le malosi atoa ua avea ma uiga faaauro tatou te faamasinoina ai mea uma ma faia ai a tatou faaiuga uma, ua tatou tatanuina a tatou auupega o le fouvale. E ala i le alofatunoa o Keriso, o le a faamagalo ai a tatou agasala ma fouvalega o le tuanai e le Atua, ma o le a aveesea ai pisipisia o na agasala ma fouvalega i o tatou loto. E oo mai le taimi, o le a Ia aveeseina ai foi soo se manao mo mea leaga, e faapei ona sa Ia faia i na sa Lamana na liua o le tuanai. Ma oo ai foi, o i tatou foi “[o le a] le pauu ese ai lava.”
O le tatanuina o a tatou auupega o le fouvale, e taitai atu ai i se olioli tulagaese. Faatasi ai ma i latou uma ua liua i le Alii, ua “aumaia i tatou e usu [le pese] o le alofa togiola.” Ua faamautu mai e lo tatou Tama Faalelagi ma Lona Alo, lo tatou Togiola, la Laua tautinoga e lē gata i lo tatou fiafia tupito e ala i le alofa ma le ositaulaga sili ona loloto. Tatou te lagonaina lo Laua alolofa i aso uma. E mautinoa lava e mafai ona tatou tali atu i lo tatou lava alofa ma le faamaoni. Tau ina ia tatou tanumia—ia matuā loloto lava—soo se elemene o le fouvale e faasaga i le Atua i o tatou olaga ma suia i se loto naunautai ma se mafaufau naunautai. I le suafa o Iesu Keriso, amene.