O Tusitusiga Paia—o le Faavae o le Faatuatua
E le mafai ona tatou tuumaualaloina le maoae o tusitusiga paia i le liuaina ma i le faatumauina faamaoni i le talalelei.
Na ma vaai talu ai nei ma lo’u toalua o Mary, i se mitiafu o i ai se ata o se tusi ma se feau i le pito i luma e faapea: “Tusi: O Le Uluai Masini e Uu i le Lima.”
Sa ou mafaufau i lenei feau malie ma le maoae ua oo i ai ituaiga uma o masini e uu i le lima. I lo’u saga mafaufau atili pea i ai, sa ou iloa ai soo se masini pe o se tasi foi e faaauupegaina i le atamai faatekinolosi, o le a le tutusa lava le taua po o le maoae ma le taitaiga faaleagaga e maua mai faaaliga faalelagi.
Pe uu i le lima pe faatekinolosi, o le Tusi Paia ma le Tusi a Mamona: O Se Tasi Molimau ia Iesu Keriso o loo maua mai ai le taitaiga faaleagaga ma aoaoga mai ia Iesu Keriso, o le Faaola o le lalolagi. Tatou te faataua nei tusi mo la la’ua matafaioi maoae i le faamaumauina o taitaiga a le Atua i perofeta ma tagata anamua, ma le taitaiga o loo aumai ai mo o tatou lava olaga patino.
A tuufaatasi ma aoaoga a perofeta soifua, o nei tusitusiga paia o loo aumaia ai le taitaiga faaleaoaoga faavae mo i tatou i le lalolagi i ona po nei. O nei tusitusiga paia ua sili ona mamana pe tuuina mai faatonuga, faasa’oga, faamafanafanaga, ma le faaōleōle i tagata taitoatasi ma aiga o ē sailia le taitaiga mai le Alii.
O tusitusiga paia, pe a tuufaatasia ma musumusuga faaleagaga mai le Agaga Paia, e faaauau pea ona avea ma faapogai autu e faafoea le liua o i latou ua i ai “loto momomo ma loto ua salamo” ma le manao e mulimuli ia Iesu Keriso. E fesoasoani tusitusiga paia e fausia se faavae lea e mafai ona tatalia taumafaiga faifaipea a le fili e faatoilalo le faatuatua.
O tagata fou e liliu mai ua faamanuiaina ai ma ua avea ma totoola o le Ekalesia i le talafaasolopito atoa. O se faataitaiga e tasi e faapitoa lona taua ia te au. A o avea a’u ma se epikopo talavou, sa i ai ni faifeautalai tamaitai maoae se toalua sa aoaoina le aiga o Viliamau Eteuati Musumani. O le tamā, o se loia atamai, o se loia sili faufautua o se kamupani. O lona faletua tuuto, o Ianeta, sa fesoasoani i le aiga e taumafai malosi ia ola atili i se olaga “faapei o Keriso.”
O lo la atalii ma le afafine tulagaese, ua faatoa atoa lo la ta’i 20 ma ona tupu tausaga, sa aoaoina foi. Sa taufai maua uma lesona a le toafa lea, ma sa o mai foi i le lotu. Sa faamamafaina e faifeautalai tamaitai le faitauina o le Tusi a Mamona ma ia tatalo mo se molimau o lena tusi paia. O le mea ofoofogia, sa faitau ma le agaga tatalo e le aiga le Tusi Mamona atoa i se taimi puupuu.
O faifeautalai a le siteki, o i la’ua uma sa avea ma peresitene o le Aualofa i le uarota, sa latou o mai faatasi i sauniga faamanatuga.
A o tulata ina papatisoina le aiga, sa latou maua se aofaiga tele o tusitusiga faitio i le Ekalesia. O le taimi lea e le’i i ai se Initoneti, ae na faatumulia se atigipusa tele i nei tusi.
Sa valaaulia e faifeautalai tamaitai ia a’u, o se epikopo e 34-tausaga le matua faatoa valaauina, e fesoasoani e tali i fesili na tulai mai. Ina ua matou faapotopoto i lo latou potu malolo, sa i le ogatotonu o le potu le pusa telē e tumu i tama’itusi o faitioga i le Ekalesia. Sa ou taliaina ma le agaga tatalo lenei tofiga. I le taimi o le tatalo amata, sa musumusu mai le Agaga ia te au, “Ua uma ona ia iloa e moni.” Sa taua lenei mea! Sa talitonu tamaitai faifeautalai ua tofu uma le aiga ma se molimau. Sa la’ua lē mautinoa e uiga i le tamā.
Sa vave loa ona ou faailoa atu ia te ia e faapea, ua “uunaia a’u e le Agaga ua uma ona i ai sana molimau. “Pe sa’o lea?” Sa ia tilotilo mai ia te au ma le loto i ai ma faapea mai, ua uma ona faamautu atu e le Agaga ia te ia le moni o le Tusi a Mamona ma le Ekalesia.
Ona ou fesili lea pe tatau ona talanoaina tamaitusi, pe a faapea ua uma ona latou maua se faamautuuga faaleagaga?
Sa tali mai le tamā e le o se mea e tatau ai. Sa taufai malilie uma le aiga i lana tali.
Sa ia fai mai e i ai sana fesili taua: O se tasi mafuaaga ua latou maua ai se anoanoai o tusitusiga e tetee ai i le Ekalesia e faapea, o i latou sa avea ma ni isi o se tasi faatuatuaga. E le gata i lea, ae sa ia ofoina atu se tupe tele e fesoasoani e fau ai se falesa fou mo lena tapuaiga. Sa ia faailoa mai ia te au e faapea, sa aoaoina o ia e tamaitai faifeautalai e uiga i le taua o le sefuluai, lea sa ia taliaina ma le lotofaafetai, ae sa ia taumafaufau pe mata e sese lona faamamaluina o le tautinoga sa ia faia talu ai. Sa ou faamautinoa ia te ia o le totogiina o le tautinoga sa ia ofoina atu o se mea mamalu ma o se mea talafeagai foi.
O le au Masimani ma lo la atalii, toalua o le atalii, ma le afafine.
Sa papatisoina le aiga atoa. E tasi le tausaga mulimuli ane, ae faamauina i latou o se aiga i le Malumalu o Oakland Kalefonia. Sa faamanuiaina au e auai ai. Sa mae’a le aoga faaloia a le atalii, pasi le suega i le Pa a Kalefonia, ma auauna atu ai loa lava i se misiona faamaoni i Iapani. Sa ou mataituina i le tele o tausaga a o tumau faamaoni tupulaga na sosoo mai ai i le talalelei. Sa faamanuiaina a’u e taitai i le faamauga o se tasi o afafine o le la fanau
O liuga o loo tutupu mai i o tatou taimi e faapena foi le ofoofogia. O Iuni na te’a atu nei, sa avea ai i matou ma Coach Andy Reid, le faiaoga ulu o le ‘au a Kansas City Chiefs, faatasi ai ma isi ma sui o lo tatou tapuaiga ma isi faatuatuaga, sa lauga i se sauniga a faatuatuaga tuufaatasi i le Ekalesia Riverside i le Aai o Niu Ioka. Sa faamamafa e Coach Reid ia avanoa lona lua ma le tali atu i valaaulia ma avanoa, lea e faatatau uma i ai le talalelei a Iesu Keriso. O le taeao na sosoo ai, faatasi ai ma o ma taitoalua, o Tammy Reid ma Mary, na matou auai ai i le sauniga faamanatuga i le Uarota Lua a Manhattan. Sa o se sauniga faaleagaga. Sa toatele tagata fou liliu mai i le potopotoga. E toalima tagata faatoa papatiso, toafa alii ma se alii talavou e toatasi, sa i ai faatasi ma le Au Perisitua Arona i le tufatufaina o le faamanatuga. Ou te fiafia e lipoti atu o loo faapena foi se soloaiga o tagata fou o au paia o loo tutupu i le Ekalesia atoa.
Tatou te faafetai i le faateleina iloga o i latou o loo tali mai i valaaulia paia, suia o latou olaga, ma talia le avanoa e mulimuli ia Iesu Keriso. Latou te ulu atu i le ala o feagaiga e ala i le faatuatua, salamo, papatisoga, ma le faamauga e pei ona aoao mai e le Tusi Paia ma le Tusi a Mamona.
E le mafai ona tatou tuumaualaloina le maoae o tusitusiga paia i le liuaina ma i le faatumauga faamaoni i le talalelei. Sa silafia e perofeta anamua o loo faamatalaina i le Tusi a Mamona, le misiona a Iesu Keriso ma aoao atu Lana talalelei. E fesoasoani le Tusi a Mamona ia i tatou e faalatalata atili atu ai i le Atua a o tatou aoao, malamalama, ma faaaoga ona aoaoga. Na aoao mai e le Perofeta o Iosefa Samita e faapea “O se tane [po o se tamaitai] o le a latalata atili atu i le Atua e ala i le ola ai i mataupu [o le tusi], nai lo se isi lava tusi.”
Ina ia iloa o le Tusi a Mamona o le afioga a le Atua, e tatau ona tatou faitau i ai, mafaufau loloto i ai, ma tatalo e uiga i ai ona galue loa lea e tusa ai ma ona mataupu. Sa folafola mai e le perofeta o Moronae e faapea, o le a faaali mai e le Atua le moni o le tusi ia i tatou a o tatou tatalo ma se loto faamaoni, ma le manatu moni i ai, ma le faatuatua ia Keriso. O le suesueina o le Tusi a Mamona e taua mo le liuga tumau.
A o tatou mafaufau loloto i le sootaga i le va o le Tusi Paia ma le Tusi a Mamona o ni masini e uu i le lima, e ono fesili se tasi. O le a le aoga ma le talafeauga e te manatu o le a i ai ni tusi se lua pe afai na tautino mai e le Alii faapea o le a “tuufaatasia” ma “avea ai ma tusi e tasi i lou lima”? O le mea lea na tautino mai e le Alii e faatatau i le “laau a Iuta,” o le Tusi Paia, ma le “laau a Iosefa,” o le Tusi a Mamona.
I le tele o itu taua, o le Tusi a Mamona o loo aumaia ai aoaoga faavae autu ia e faalautele ai ma fausia i luga o le Tusi Paia. O le aoaoga faavae o le Togiola a Iesu Keriso, o se faataitaiga maoae lea.
O loo aumaia e le Tus Paia se tala sa’olele o le misiona i le tino nei a Iesu Keriso, e aofia ai ma Lona maliu ma le Toetu. O le Tusi a Mamona e sili atu ona maioio e uiga i le Togiola a Iesu Keriso, o se mea sa faamatalaina auiliili e perofeta a o lumanai Lona maliu.
O le faaulutala i le Alema mataupu 42 o loo atagia mai ai le taua faaleaoaoga faavae o le Togiola a Iesu Keriso.
E faitauina faapea: “O le olaga faaletino o se taimi vaavaaia e mafai ai e le tagata ona salamo ma auauna atu ai i le Atua—O le Pau na oo mai ai le oti faaletino ma le oti faaleagaga i tagata uma—E oo mai le togiola e ala i le salamo—O le Atua lava ia e togiola mo agasala a le lalolagi—O le alofa mutimutivale e mo i latou o e e salamo—O isi tagata uma o le a i lalo o le faamasinotonu o le Atua—E oo mai le alofa mutimutivale ona o le Togiola—Ua na o e ua salamo faamaoni e faaolaina.
Na saunoa Peresitene Russell M. Nelson, “Ou te folafola atu a o outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma.” Na ia folafola mai foi e faapea afai “e te faatofuina oe lava i le Tusi a Mamona i aso taitasi, e mafai ona puipuia oe mai mea leaga o le aso.”
E pei ona ou ta’ua, sa faagaeetia a’u i le manatu faavae o le uluai masini e uu i le lima—o se tusi. Ae peitai, ua ou iloaina le taua maoae o le initoneti i le lalolagi i ona po nei. O le masini e tasi faaonaponei e uu i le lima, e mafai ona maua mai ai faamatalaga ua iloga ona faatumulia ai faletusi tetele. Tatou te faafetai ona ua tatou ola i se taimi faapenei. E faapitoa lo’u faafetai ona ua mafai ai ona maua tusi paia ma anomea a le Ekalesia i le faaeletonika. O le Initoneti o se meafaigaluega mamana mo le suesueina o le talalelei. O le taimi nei, e toatele tagata ua latou faasoaina mau ma uo e faaaoga ai le tekinolosi. O le polokalama o le Tusi a Mamona, mo se faataitaiga o se ala matagofie e faafeiloaia ai uo i le Tusi a Mamona ma e mafai ona faigofie ona faasoa i ni auala masani i soo se mea e te i ai.
E ui ina maua mai i le Initoneti le tele o faamanuiaga, ae paga lea, e faapei o tamaitusi tusitusia sa faitioina le Ekalesia lea sa ou faamatala atu muamua, ae ua faaaogaina foi e fatufatu ai le masalosalo ma tu’umaualaloina ai le faatuatua i mataupu faavae taua o le talalelei. E mafai ona avea o se vaega o “mealeaga o nei aso” lea sa ta’ua e Peresitene Nelson.
O le fili ma i latou e lagolagoina o ia, ma le iloa lelei pe faatagā le iloa foi, ua fatuina i luga o le Initoneti mea e tutusa lelei ma le pusa e tumu i ‘anomea tusitusia e faitio ai i le Ekalesia sa ou faamatalaina muamua, ma le faamoemoe e tata’iese mai ai oe mai le upumoni a le Atua.
O faafitauli na tulai mai e faatupu ai le le talitonu i le tele o tausaga, e tutusa lelei lava. E faapitoa le sa’o o lenei mea pe a e faatusatusaina o tatou taimi ma le vaitau o le 1960, a o 20 ma ona tupu o’u tausaga.
Ua aoao mai e tusitusiga paia i tatou e faaaoga le faautauta ma ia atamamai i mea uma. E mafai ona faaaoa le Initoneti i se ala lelei po o se ala e faataumaoia ai.
O tagata ua loa ona auai i le ekalesia ma i latou e fou le suesueina o le talalelei, e moomia ona faia ma se faamoemoega mea latou te aoaoina. Aua le mafaufau i anomea lē mama, lē faamaoni, pe amioletonu. A e faia, o le tulitulitataoina e le upegatafa’ilagi e mafai ona tosotoso atu ai oe i se ala e faatama’ia ai le faatuatua ma faavaivaia ai lou alualu i luma e faavavau. E mafai ona fai faamo’imo’i lelei e se tasi se mea ia te oe, pe faatagāfai foi. Saili le amiotonu ma aloese mai lua lapiti pogisa o le Initoneti ma le nopia’i umi ai. Faatumu lou olaga i aitia lelei, amiotonu, ia olioli, ma ia fiafia ae aloese mai le faavalevalea. E i ai se eseesega. O le o le mataupu faavae o le faatuatua lona sefulutolu o se taiala ofoofogia lea. Mai lo mea uma, ia faatofu oe lava e le aunoa i le Tusi a Mamona, lea o le a aumaia ai le Agaga i lou olaga, ma fesoasoani ai ia e iloatino le mea moni mai le measese.
O la’u fautuaga mo i latou ua o ese mai le ala o feagaiga, e toe foi mai i tusitusiga paia, taitaiga faaperofeta, ola i mataupu faalelotu i le aiga, ma musika o le faatuatua. E matuā taua agaga uma i le Atua. Matou te manaomia outou! E manaomia oe e le Alii, ma e te manaomia o Ia! O le a talileleia oe e le aunoa. I le tele o tausaga o o’u auauna ai i le Ekalesia, ua ou talisapaia ai tagata ofoofogia o e na toefoi mai i le ala o feagaiga ona latou galulue lea ma faamanuiaina ai tagata uma latou te alofaina, po o i latou foi na latou feiloai.
O tusitusiga paia ma perofeta soifua o se ala autu lea ua faia ai e se Tama Faalelagi alofa Lana fuafuaga o le fiafia ia avanoa mo Ana fanau uma.
Ou te tuu atu la’u molimau mautinoa i le paia o Iesu Keriso ma le moni o Lana Togiola, i le suafa o Iesu Keriso, amene.