Ina Mamā ia Oe
O le salamo i aso taitasi e mafai ai ona tatou iloatino le taitaiga a le Alii e ala mai i le Agaga Paia.
Ina a o pe a ma le lima o o’u tausaga, sa matou taaalo soka ai ma a’u uo i tua o le falesa o le matou tama’i nuu i Côte d’Ivoire. Ou te manatua lelei lava le valaau a le failotu i lana aulotu ia faamamā o latou lavalava e saunia ai mo le taunuu mai o le Faaola. O lo’u laitiiti, sa ou taliaina moni ai lenei valaau. Sa ou momo’e atu i le fale i le vave na o ai ou vae laiti, ma augani atu i lou tina e faamamā nai ou ofu ina ia mafai ona ou mamā atoatoa ma saunia mo le afio mai o le Faaola i le aso e sosoo ai. E ui lava ina sa masalosalo lo’u tina e uiga i le vave toe foi mai o le Faaola, sa ia tatāina lava o’u ofu sili ona lelei.
O le taeao na sosoo ai, sa ou faia ai o’u lavalava sa le’i mamago lelei lava ma faatalitali ma le naunautai mo le faasilasilaga o le taunuu mai o le Faaola. A o faasolo malie pea le aso ma leai se mea na tupu, sa ou filifili loa ou te alu i le falelotu. Sa matua’i ou lē fiafia lava i le maua atu e gaogao le falesa ma sa le’i taunuu mai le Faaola. E mafai ona outou vaai faalemafaufau i o’u lagona a o o’u savalivali lemu atu i le fale.
I tausaga mulimuli ane, a o fai a’u lesona a faifeautalai e sauni ai e auai i Le Ekalesia a Iesu Keriso o le Au Paia o Aso e Gata Ai, sa ou faitau ai i le mea lenei: “Ma e leai se mea le mama e mafai ona ulu atu i lona malo; o lea e leai se mea e ulu atu i lona malologa vagana ai i latou o e ua faamamaina o latou ofu i lou toto, ona o lo latou faatuatua, ma le salamo i a latou agasala uma, ma lo latou faamaoni e oo i le iuga.”
O le faamaninoga na ou mauaina i lena taimi na fesoasoani ou te malamalama ai i le taua o le upumoni lea na nenefu ai lo’u mafaufau itiiti i le tele o tausaga na muamua atu. O le savali a le faifeau sa faaogatotonu i le taua o le mamā faaleagaga. Sa ia uunaia le aulotu e saili le salamo, fai suiga i o latou olaga, ma liliu atu i le Faaola mo le togiolaina.
E malamalama lo tatou Tama Faalelagi i la tatou malaga faaletino ma le lē maalofia o le agasala i o tatou olaga. Ou te matuai faafetai i Lona saunia o se Faaola e togiola mo a tatou solitulafono. E ala i le taulaga togiola a le Faaola, ua mafai ai e i tatou taitoatasi ona salamo ma saili le faamagaloga ma mamā ai. O le salamo, o se mataupu faavae autu o le talalelei, e taua mo lo tatou atinaega ma le maufetuunai faaleagaga a o tatou faatautaia luitau o le olaga.
I le konafesi aoao ia Aperila 2022, sa valaaulia ai e Peresitene Russell M. Nelson tagata uma o le Ekalesia ia iloa le olioli o le salamo i aso taitasi. Sa Ia saunoa:
“Faamolemole, aua ne’i fefe pe faatuai ona salamō. E fiafia tele Satani i lou pagatia. Pe a faapuupuu. Lafoai ese ana faatosinaga mai lou olaga! Amata i le asō ona lagona le olioli o le tuueseina o le tagata natura. E alofa le Faaola ia i tatou e le aunoa ae maise lava pe a tatou salamo. …
“Afai e te lagona ua e se ese mamao tele pe ua umi tele foi mai le ala o feagaiga ma ua leai se ala e toefoi mai ai, e le moni lena mea.”
Afai e i ai se mea e te lei salamo atoatoa ai, ou te fautuaina oe ia faalogo ma usitai i le valaau a Peresitene Nelson, ia aua lē faatuai lou salamo. Atonu e manaomia ai se lototele e auai ai i lenei faagasologa; peitai, e mafai ona ou faamautinoa atu ia te outou, o le olioli lea e maena a’e mai le salamo faamaoni e sili mamao atu i le malamalama. E alai le salamo, e siitia ese ai a tatou avega ta’usalaina ae suia e se lagona o le filemu ma le toafimalie. A o tatou salamo faamaoni, e faapaiaina i tatou e ala i le toto o le Faaola, faateleina lo tatou nofouta i uunaiga ma faatosinaga a le Agaga Paia.
Sa fanau mai la’u soa e faavavau ma se faaletonu i lana faalogo, ma o le taunuuuga, e tatau lava ona ia faia ni mea faalogo. O le pefu ma le afu e mafai ona aafia ai le faatinoga a nei masini, ma o taeao taitasi uma ou te matauina ai lona faamamāina ma le maeaea o faagaau e sosoo ai a o le’i faia ia mea faalogo. O lenei faiga masani faigofie ae faifai pea e aveese ai soo se palapala, susū, po o le afugia, ma faapea ona faaleleia ai lona mafai ona faalogo ma fesootai lelei. A ona lē amanaia lenei faiga i aso taitasi, e afaina ai lana faalogo i le aso atoa; o upu e tautala ai e faifai malie lava ona mou ma i’u ai ina lē faalogoina. E pei lava o le faamamāina i aso taitasi o lana mea faalogo e mafai ai ona manino lana faalogo, o le salamo i aso taitasi e mafai ai ona tatou iloatino le taitaiga a le Alii e ala mai i le Agaga Paia.
I le latalata i le iuga o le auaunaga a le Alii i le olaga nei, ma a o le’i oo i Lona aluese atu i le Faatoaga o Ketesemane, sa Ia saunia ai Ona soo e fetaia’i ma tofotofoga o loo loma. Sa Ia faamautinoa atu ia i latou, e faapea: “A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.”
O se tasi o matafaioi taua o le Agaga Paia, o le lapatai, taitai, ma taiala tagata taitoatasi uma o e faalogo i le leo mālū i totonu. E pei lava ona mafai e le poloka o faagaau o fesootaiga o se mea faalogo ona faalavelave i le faagaoioia lelei, e mafai foi ona faaletonu lo tatou fesootaiga faaleagaga ma le Tama Faalelagi, ma taitai atu ai i manatu sese lamatia po o le lē mafai ona faalogo ma usitai i Ana fautuaga. O le oo mai o le initoneti ua atili maua ai faamatalaga nai lo se isi lava taimi muamua. O lenei mea e mafai ona taitai atu ai i tatou e liliu atu i le lalolagi mo le taitaiga nai lo o le Atua. Na aoao mai Peresitene Russell M. Nelson, “I aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”
Ou te faafetai ona e mafai e i tatou taitasi ona maua le meaalofa o le Agaga Paia i le taimi o o tatou faamauga. Ae peitai, na lapatai mai Peresitene Dallin H. Oaks, e faapea, “o faamanuiaga e maua e ala mai i le meaalofa o le Agaga Paia e faamoemoe lea i le agavaa [ma] ‘e le afio le Agaga o le Alii i malumalu e lē paia’ [Helamana 4:24].”
A tatou filifili ma le iloa lelei e mulimuli i le taitaiga a perofeta ma aposetolo, e tuputupu a’e lo tatou gafatia e maua le Agaga Paia e fai ma o tatou soa tumau. O le Agaga Paia e tuuina mai le manino i le faiga o faaiuga, uunaia mafaufauga ma lagona e ogatusa ma le finagalo o le Tama Faalelagi. O le i ai o le Agaga Paia o se soa tumau e taua tele mo lo tatou tuputupu a’e faaleagaga.
Sa tofia talu ai nei a’u e pulefaamalumalu i se konafesi faalesiteki i le Siteki a Sate Leki Granger Sisifo i Iuta. I le taimi o lenei faamoemoe, sa ou feiloai ai i se peresitene o le siteki o lē ua atinaeina ma le filiga lona atamai e iloatino ai uunaiga a le Agaga Paia e ala i le ola amiotonu ma le salamo i aso taitasi. O se vaega o a matou taumafaiga faaleauaunaga, sa matou faamaopoopina ai ni asiasiga i ni aiga se tolu. Ina ua mae’a la matou asiasiga mulimuli, na matou iloa ai e tusa ma le 30 minute o loo totoe ona faatoa oo lea i le isi a matou fuafuaga. A o matou toe foi atu i le nofoaga autu o le siteki, na maua e Peresitene Chesnut se uunaiga e asiasi atu i se aiga faaopoopo se tasi. Sa ma malilie uma e mulimuli i lenei uunaiga.
Sa faaauau ona ma asiasi atu i le aiga o Jones, lea na ma tau atu ai ia Tuafafine Jones o loo faataotolia i le moega ona o gasegase. Sa mautinoa lava sa ia manaomia se faamanuiaga faaleperisitua. Faatasi ai ma lana faatagaga, na ma tuuina atu ai ia te ia. A o ma sauni e tuumuli, sa fesili mai Tuafafine Jones pe na faapefea ona ma iloa e uiga i lona manaomia vave o se faamanuiaga. O le mea moni, ma te le’i iloa. E ui i lea, sa silafia e lo tatou Tama Faalelagi, o lē sa nofouta i ona manaoga ma musuiaina Peresitene Chesnut e asiasi atu i lona fale. A tatou mataala i le taitaiga a le leo mālū ma itiiti, e sili atu ona faaauupegaina i tatou e auauna atu ma le mataalia ia i latou e manaomia le fesoasoani.
Ou te molimau atu i se Tama Faalelagi agalelei ma alofa. O Iesu Keriso o le Faaola ma le Togiola o tagata. Ou te molimau atu o le Togiola a Iesu Keriso e moni, ma a o tatou aoao e mulimuli i le taitaiga a le Agaga Paia, o le a Ia taitai i tatou ia salamo ma faaaoga le mana o le Togiola a le Faaola i o tatou olaga. O Peresitene Russell M. Nelson o le perofeta moni ma soifua a le Alii, faatasi ai ma ki uma o le perisitua i le lalolagi i aso nei. I le suafa o Iesu Keriso, amene.