Atalii ma Afafine o le Atua
Tatou te talitonu faamaoni o i tatou uma o fanau moni a le Atua, ma ona o lena mea, ua i ai ia i tatou le gafatia e avea ai faapei o Ia.
O le asō ou te fia talanoa atu ai i se tasi o upumoni o le talalelei e sili ona matagofie, fiafia, ma mamana ua faaalia mai e le Atua. I le taimi lava e tasi, e malie ona o le upumoni lava foi lea ua faitioina ai i tatou. O se aafiaga na oo ia te a’u i nai tausaga ua mavae ua matuai faalolotoina ai lo’u talisapaia mo lenei upumoni o le talalelei.
I le avea ai ma se sui o le Ekalesia, sa valaaulia ai a’u i se tasi o taimi i se konafesi faalelotu lea sa faasilasilaina ai e faapea, mai i lena lava taimi o le a latou talia ai e ta’uaogā ia papatisoga uma e faatinoina e le toeitiiti o isi lotu Kerisiano uma, pe a faapea o lea sa faia le sauniga i le vai ma i le suafa o le Tama ma le Alo ma le Agaga Paia. Ona, faamalamalama mai lea e faapea, o lenei aiaiga sa le’i faatatau i papatisoga na faatinoina e Le Ekalesia a Iesu Keriso o le Au Paia o Aso e Gata Ai.
Ina ua uma le konafesi, sa mafai ona ou suesuea atili ia faapogai mo lena tuusaunoaga faatasi ma le taitai taiulu o le faasilasilaga. Sa ma faia se talanoaga manaia ma malamalama.
I le faapuupuuga, sa ia faamatala mai ia te a’u, o le tuusaunoaga na faatūtū i o tatou talitonuga faapitoa e uiga i le Aigaatua, lea e masani ona faasino i ai isi tapuaiga Kerisiano o le Tasi Tolu Paia. Sa faaali atu i ai lo’u talisapaia mo le faaavanoaina o lona taimi e faamatala mai ai ia te a’u ona talitonuga ma le aiaiga a lana ekalesia. I le faaiuga o la ma’ua talanoaga, sa ma feopoai ona faatofā lea.
A o ou mafaufau mulimuli ane i le ma talanoaga, sa tamau i lo’u mafaufau le faamatalaga a lenei taitai e faapea, e le malamalama le Au Paia o Aso e Gata Ai i le mea na ia ta’ua o le “mealilo o le Tasi Tolu Paia”. O le a le mea sa ia faatatau i ai? Ia, sa faatatau i lo tatou malamalamaaga e uiga i le natura o le Atua. Tatou te talitonu o le Atua le Tama “o se tagata faaeaina” ua i ai se “tino [faamamaluina] o aano ma ivi e mafai ona paʼi i ai e pei o le tagata; [ma] ua faapea foi le Alo.” O lea la, o taimi uma tatou te talanoa ai e uiga i le natura o le Atua, i se isi itu, o loo tatou talanoa foi e uiga i lo tatou lava natura.
Ma e moni lenei mea e le gata ona na faia i tatou uma “i [Lona] faatusa, i [Ona] foliga,” ae ona, e pei foi ona tusia e le Faisalamo, na fetalai le Atua, “O atua outou, o fanau foi outou uma a lē Silisili ese.” Mo i tatou, o lenei mea o se aoaoga faavae taua na toemaua mai faatasi ma le amataga o le Toefuataiga. O le aotelega, e le o se mea telē pe itiiti nai lo o mea o loo aoao atu e a tatou faifeautalai o le lesona muamua, parakalafa muamua, laina muamua: “O le Atua o lo tatou Tama Faalelagi, ma o tatou o Ana fanau.”
Ia, atonu tou te faapea mai, “Ae e toatele tagata e talitonu o i tatou o fanau a le Atua.” Ioe, e moni, ae o o latou malamalamaaga e ono ese teisi mai le faa’ataātaga o lona uiga loloto atu lea tatou te faamautuina. Mo le Au Paia o Aso e Gata Ai, o le aoaoga lenei e le faafaatusa. Nai lo o lena, tatou te talitonu moni o tatou uma o fanau moni ia a le Atua. O Ia o “le Tama o o [tatou] agaga,” ma ona o lena mea, ua tatou maua ai le gafatia e avea ai e pei o Ia, lea e foliga mai e le talitonu i ai isi.
Ua silia nei ma le 200 tausaga talu ona tatalaina e le Uluai Faaaliga ia faitotoa i le Toefuataiga. I lea taimi, sa saili ai e Iosefa Samita talavou le taitaiga mai le lagi ia iloa po o le fea ekalesia e auai. Na ala mai i le faaaliga na ia maua i lena aso, ma i faaaliga na tuuina mulimuli ane ia te ia, na maua ai e le Perofeta o Iosefa le poto e uiga i le natura o le Atua ma lo tatou sootaga ma Ia o ni Ana fanau.
Ona o lena mea, ua tatou iloa manino atili ai, na aoao mai e lo tatou Tama Faalelagi lenei aoaoga faavae taua mai lava i le amataga. Faataga aʼu sei oʼu taʼu atu ia le itiiti ma le lua ni tala mai tusitusiga paia e faapupula ai lenei mea.
Atonu tou te manatua faatonuga a le Atua ia Mose e pei ona tusia i le Penina Tau Tele.
Tatou te faitau ai e faapea, “Sa fetalai mai le Atua ia Mose, ua fai mai: Faauta, o Aʼu o le Alii le Atua Malosi Aoao, ma o Lē Gata o loʼu igoa.” I nisi upu, Mose, Ou te manao ia e iloa o ai a’u. Ona Ia faaopoopo mai lea, “Ma, faauta, o oe lava o loʼu atalii.” Sa ia fetalai mulimuli ane, “Ua ia te a’u se galuega mo oe, Mose e, loʼu atalii; ma ua tusa oe ma la’u Toatasi na Fanaua.” Ma le mulimuli, sa Ia faaiuina i le, “Ma o lenei, faauta, o le mea lenei e tasi Ou te faaali atu ia te oe, Mose e, loʼu atalii.”
E foliga mai sa filimaoti le Atua e aoao Mose ia le itiiti ifo ma le tasi se lesona: “O oe o lo’u atalii,” lea e tusa ma le faatolu ona Ia fetalaia. Sa le mafai lava ona Ia taʼua le igoa o Mose e aunoa ma le faaopoopoina i ai i le taimi lava lea, o ia o Lona atalii.
Ae peitai, ina ua tuua naʼo Mose, sa ia lagonaina le vaivai ona sa leʼi toe i ai o ia i le afioaga o le Atua. O le taimi lena na sau ai Satani e faaosooso o ia. O e vaai i se mamanu ii? O le mea muamua na ia fai atu ai ia Mose o le, “Mose e, le atalii o le tagata, ifo mai ia te a’u.”
I le matalalaga lenei, o le talosaga a Satani e ifo atu ia te ia atonu sa na o se faalavefau. O se faaosoosoga iloga mo Mose i lena taimi o le vaivai, o le ia le mautonu ma talitonu o ia sa na o se “atalii o le tagata,” ae lē o se atalii o le Atua.
“Ma sa oo ina vaai atu Mose ia Satani ma fai atu: O ai oe? Aua faauta, o aʼu o se atalii o le Atua, i le faatusa o lana Toatasi na Fanaua.” O le mea na lelei ai, sa le’i le mautonu Mose ma sa le’i faatagaina o ia lava e faalavelaveina. Sa ia aoaoina le lesona o le o ai moni lava o ia.
O le tala e sosoo ai o loo maua i le Mataio 4. Ua faaautuina e le au atamamai “o faaosoosoga e tolu a Iesu” e pei ua na’o le faatolu ona faaosoosoina le Alii, ae e le o le tulaga lena.
Ua faitau selau kalone vaitusi ua faaaogaina e faamalamalama ai le uiga ma le anotusi o nei faaosoosoga. E pei ona tatou iloa, e amata le mataupu i le faamatalaina mai e faapea, na alu Iesu i le toafa “ma ina ua anapogi o ia i po e fagafulu ma ao e fagafulu, mulimuli ane ona fia taumafa ai lea o ia.”
O le faaosoosoga muamua a Satani sa mautinoa lava le faia ina ia na ona faamalie ai manaoga faaletino o le Alii. “Ina fetalai atu ia ia liu areto nei maa,” na ia luiina ai le Faaola.
O le faaosoosoga lona lua atonu na faatatau i le faaosoosoina o le Atua: “Oso ia oe i lalō; aua ua tusia, E poloai o ia i ana agelu ia te oe.”
Ma le mulimuli, o le faaosoosoga lona tolu a Satani na faasino atu i faananauga ma mamalu o le lalolagi. Ina ua uma ona faaali atu ia Iesu “malo uma o le lalolagi, … Ona fai mai lea o [Satani] ia te ia, Ou te avatua nei mea uma ia te oe, pe afai e te faapaū ma ifo mai ia te au.”
O le mea moni, o le faaosoosoga mulimuli a Satani, atonu sa itiiti se mea na faia i na faaosoosoga patino ae tele atu i le faaosoosoina o Iesu Kerso ia fesiligia Lona natura paia. E le itiiti i le faalua, sa taimua ai le faatosinaga i le tuuaiga luitauina mai ia Satani, “Afai o oe le Alo o le Atua”—afai e te talitonu moni lava i ai, ona fai lea o lenei mea po o le lena.
Faamolemole e matau le mea na tupu i le taimi tonu a o lei afio atu Iesu i le toafa e anapogi ma tatalo: tatou te maua le tala o le papatisoga o Keriso. Ma ina ua maliu ae o ia nai le vai, na oo mai se “siufofoga mai le lagi, ua faapea mai, O loʼu Atalii pele lenei, o lē ua ou fiafia lava i ai.”
O tatou vaai i le sootaga? O mafai ona tatou iloa se mamanu ii?
E leitioa o soo se taimi lava e aoaoina ai i tatou e uiga i lo tatou natura ma le faasinomaga paia, e faaosooso i tatou e le fili o le amiotonu uma ina ia fesiligia na mea.
O le a matuai ese a tatou faaiuga pe afai tatou te iloa lelei o ai moni i tatou.
Ua tatou ola i se lalolagi luitauina, o se lalolagi ua faateteleina le vavaō, lea ua taumafai malosi ai tagata lelei e faamamafa lo tatou mamalu faaletagata, a o tatou auai i se ekalesia ma opogi se talalelei lea e siitia ai la tatou vaaiga ma valaaulia i tatou i le faaleatua.
O le poloaiga a Iesu ia “atoatoa, e pei o lo [tatou] Tama o i le lagi e atoatoa” o se ata manino o Ona faamoemoega maualuluga ma o tatou avanoa e faavavau. Ia, e leai se mea o nei mea o le a tupu faafuasei. I upu a Peresitene Jeffrey R. Holland, o le a “iu lava” ina tupu. Peitai o le folafolaga o le, afai tatou te “o mai ia Keriso” o le a tatou “faaatoatoaina ia te ia.” E manaomia e lena mea le tele o galuega—e le na’o soo se galuega, ae o se galuega faalelagi. O Lana galuega!
Ia, o le tala fou fiafia la, o le tatou Tama o i le Lagi tonu lava o lē sa fetalai mai, “Aua faauta, o laʼu galuega ma loʼu mamalu lenei—ia aumaia le tino ola pea ma le ola faavavau o le tagata.”
O le valaaulia a Peresitene Nelson ia “mafaufau faaselesitila” o loo faaalia ai se faamanatu matagofie e uiga i lo tatou natura paia, afuaga, ma le taunuuga faamoemoeina. Na pau le ala tatou te maua ai le selesitila e ala lea i le taulaga togiola a Iesu Keriso.
Atonu o le pogai lena na faatosina ai e Satani ia Iesu i le faaosoosoga lava lea e tasi mai le amataga seia oo lava i le iuga o Lana auaunaga i le tino. Na tusifaamaumauina e Mataio e faapea, a o tautau Iesu i le satauro, “ua upu leaga ia te ia [i latou] na ui ane, … ua faapea mai, … Afai o oe le Alo o le Atua, ina alu ifo ia i le satauro.” Ia viia le Atua ona sa lei faalogo o Ia, nai lo o lena, na saunia le ala mo i tatou e maua ai faamanuiaga uma o selesitila.
Tau ina tatou manatua e le aunoa, e i ai se tau maoae na totogiina mo lo tatou fiafia.
Ou te molimau atu faatasi ma le Aposetolo o Paulo e faapea, “o loo molimau lea lava Agaga i o tatou agaga, o fanau i tatou a le Atua: afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanūina foi i tatou faatasi ma ia.” I le suafa o Iesu Keriso, amene.