I Tua Atu o Mea o Loo Tutupu: Faatulagaga o le Maota Autu mo Konafesi

Pe a tatou vaai faalemafaufau i le konafesi aoao, atonu tatou te vaai faalemafaufau i le pulelaa ma nofoa o taitai o le Ekalesia i luma o paipa o le okeni. Ae e le foliga faapena le tulaga o le Maota Autu mo Konafesi i le tausaga atoa.

E tele ni mea e faia i le Maota Autu mo Konafesi e manaomia ai se faatulagaga ese, ma e tele itula e alu ai e saunia le tulaga (ua ta’ua aloaia o le “rostrum”) mo le konafesi aoao. O se vaega e to’a 10 tagata, latou te faaaluina le tusa ma le tolu vaiaso e saunia ai le tulaga, faapaologa, ma isi ‘anofale o le Maota Autu mo Konafesi mo tagata asiasi mai i ai, ina ia fiafia ai i le konafesi aoao.

O nisi nei o mea moni mananaia:

• 18 ni iunite tetele e fatuina ai fola autu o le faatulagaga, ma o fola taitasi e 1.5–4 tone le mamafa.

• O na fausaga mamafa e uuna’ia e aluga o le ea e tulei i le eleele, ma faia ia faigofie ai ona fesiitai fausaga.

• Pe tusa ma le 500 fasi vaega laiti, e pei o pa ma lau, ua faaopoopoina foi.

• E tatala faitotoa e 80 futu le uumi (24 m) ina ia mafai ai ona faatulaga ia fale tetele.

• E saunia foi e le au faatulagaina ia fale ma fanua mo le puipuiga, faifeautalai, ma le taligamalo—ma le silia ma le 600 galuega atoa.

O Joel Wright, o le supavaisa o le faatulagaina, ua fesoasoani i konafesi aoao e 50. Na ia faasino i lana ‘au o ni “toa e le o faalauiloaina” o e o loo faia ni taumafaiga ofoofogia. Fai mai a ia, “E le tele se mamalu i le faatuina o se nofoa po o se laulau po o le tuufaatasia o le fale.” Ae a aunoa ma i latou, sa ia fai mai ai, o le a le tutusa le konafesi.

O Brandon Urry le ta’ita’i o le faatulagaina, na ia ta’ua ai e manaomia “le tele o tagata eseese mai tomai eseese ma talaaga eseese” e faataunuu ai la latou galuega—”e faasalalau atu ai le alofa o le Alii ma upu e tatau ona Ia faasoa atu i tagata uma.”

Fai mai Brandon latou te manaomia tagata uma e i ai na tomai eseese ina ia “o mai faatasi mo se faamoemoega se tasi.” Talu ai o lena faamoemoega e totonugalemu ia Iesu Keriso, o lea e lagonaina ai e lenei ‘au faatulaga Lona faatasi mai ma ua vaai i Ana vavega.

Fai mai Robert Simpson, o se tasi foi o taitai o le faatulagaina: “Ou te … lagona e pei ua ulufale mai le Agaga o le Alii i a tatou sauniga ma o loo i ai iina e fesoasoani ia i tatou … e faamaea [le galuega]. … O nisi taimi matou te mafaufau ai pe faapefea ona matou faia na mea uma. Ae matou te tatalo ma ole atu mo le fesoasoani a lo tatou Tama Faalelagi.”

Ma e pei ona faaopoopo mai Ioelu: “E ala i le onosai, o le faapalepale, o le galulue malosi pea, e tino mai ai [le faatulagaga], ua saunia mo le taeao o le konafesi aoao.” .