Autalavou o le Tofi Ulumatua Tautupu
Ua faatuatuaina outou e le Atua, le fanau o le feagaiga, e fesoasoani i Lana galuega o le aumaia o Ana fanau uma i le saogalemu i le aiga ia te Ia.
Elder Stevenson, o se konafesi lenei e le mafai ona faagaloina.
E fiafia lava le matou aiga i se tama’i tusi e ta’ua O Tusi a Tamaiti i le Atua. O ni nai tusi nei:
“Le Atua Peleina, nai lo le faataga o tagata ia maliliu ma e toe faia ai nisi tagata fou, aisea e te le tuu ai pea i latou ia ua i ai i le taimi nei?”
“Aisea e na o le sefulu ai au tulafono, ae o le matou a’oga e faitau miliona?”
“Aisea na e tuu ai i totonu puipui o isu ma gutu pe afai e te nofo foi ma toe aveese i fafo?”
E le lava se taimi i le aso e tali uma ai nei fesili, ae o loo i ai se isi fesili e tele ina ou faalogo i ai mai le autalavou ou te fia talanoaina. Mai Ulaanbaatar, Mongolia, i Thomas, Idaho, o le fesili lava e tasi: “Aisea? Aisea e tatau ai i le Au Paia o Aso e Gata Ai ona ola ia matua ese lava mai i isi tagata?”
Ou te iloa e faigata ona ese mai isi—aemaise lava pe a o e talavou ma e matua manao lava i isi tagata ia fiafia ia te oe. E mananao tagata uma ia talia i ni vaega, ma o lena manao e faalauteleina i vaega lē saogalemu i le lalolagi faatekinolosi o onapo nei ua faatumulia i ala o faasalalauga faaagafesootai ma sauaga i luga o le initoneti.
O lea la, faatasi ma na uunaiga malolosi uma, aisea e matuā ese ai lava le olaga o le Au Paia o Aso e Gata Ai? E tele le mau tali lelei: Ona o oe o se atalii po o se afafine o le Atua. Ona na faapolopoloina outou mo aso amulī. Ona o oe o se so’o o Iesu Keriso.
Ae o na tali e le tavavaeesea ai oe i taimi uma. O tagata uma o se atalii/afafine o le Atua. O tagata uma ua i ai i le lalolagi i le taimi nei na auina mai iinei i nei aso e gata ai. Ae e le o tagata uma o loo tausisia le Upu o le Poto po o le tulafono o le ola mama i le ala o loo e tinou ai. E anoanoai ni soo totoa o Keriso e le o ni tagata o lenei Ekalesia. Ae latou te le o auauna atu i ni misiona ma faatino ia sauniga i totonu o maota o le Alii e fai ma sui o tuaa e pei o oe. Atonu e tele atu ni mea o i ai—ma o loo i ai.
O le asō ou te fia taulai atu i se isi mafuaaga ua i ai pea se uiga anoa i lo’u olaga. I le 1988, sa tuu mai ai e se Aposetolo talavou e suafa ia Russell M. Nelson se lauga i le Iunivesite o Polika Iaga na ta’ua “Faafetai mo le Feagaiga.” I lea lauga, sa faamalamalama mai ai e Elder Nelson i lena taimi e faapea, pe a tatou faaaogaina lo tatou faitalia e osia ma tausia ai feagaiga ma le Atua, e avea i tatou ma suli o le feagaiga e faavavau na faia e le Atua ma o tatou augatuaa i tisipenisione uma lava. I se isi faaupuga, e avea i tatou ma “fanau o le feagaiga.” O le mea lena e tavavaeeseina ai i tatou. O lena mea tatou te maua ai le avanoa i faamanuiaga lava e tasi na maua e o tatou augatamā ma augatinā, e aofia ai se tofi o le ulumatua.
Tofi o le Ulumatua! Atonu ua outou faafofoga i lena upu. Ua tatou pepese foi i viiga e faatatau i ai: “Le autalavou o le tofi tautupu, tutumau, tutumau, tutumau!” O se upu faamalosi. Ae o le a lona uiga?
I taimi o le Feagaiga Tuai, afai e maliu se tamā, e nafa le atalii ulumatua ma le tausiga o lona tina ma tuafafine. Sa maua e ona uso o latou tofi po o vaegaoa ma tuua le aiga ma o atu i le lalolagi, ae o le atalii ulumatua sa le alu lava i se mea. E faaipoipo o ia ma fai lona lava aiga, ae e nofo o ia se’ia oo i le i’uga o ona aso e pulea mataupu o esetete po o meatotino a lona tamā. Ona o lenei tiutetauave faaopoopo, sa tuu atu ai ia te ia se fuataga faaopoopo o le tofi. Pe ua mamafa tele ea le talosagaina ina ia taitaiina ma tausiaina isi? E leai pe a mafaufau atu i tofi po o oa faaopoopo ua tuu atu ia te ia.
O le asō, tatou te le o talanoa ai i le faasologa o lo outou fananau mai i aiga faalelalolagi po o matafaioi faaleitupa o le Feagaiga Tuai. O loo tatou talanoa e uiga i le tofi ua e mauaina o se suli faatasi ma Keriso ona o le sootaga faalefeagaiga ua e filifili e ulu atu i ai faatasi ma Ia ma lou Tama o i le Lagi. Pe ua mamafa tele ea mo le Atua le faamoemoeina o oe ia ola i se tulaga e ese ai nai lo isi o Ana fanau ina ia mafai ai ona e lelei atili i le taitaiina ma le auauna atu ia i latou? E leai pe a e mafaufau i faamanuiaga—uma faaletino ma faaleagaga—ia ua tuuina mai ia te oe.
Pe o le uiga ea o lou tofi ulumatua ua sili atu ai oe i lo isi? Leai, ae o lona uiga ua faamoemoeina ai oe e fesoasoani i isi ina ia lelei. Pe o le uiga o lou tofi ulumatua ua filifilia oe? Ioe, ae e le i filifilia e pule i isi; ua filifilia oe e auauna atu ia i latou. Pe o lou tofi ulumatua o se faamaoniga o le alofa o le Atua? Ioe, ae e sili atu ona taua, o se faamaoniga o Lona faatuatuaina [o oe].
O le tasi mea o le alofaina, ma o le isi mea atoa lava o le faatuatuaina. I le taiala Mo Le Malosi o le Autalavou tatou te faitau i ai: “E faatuatuaina oe e lou Tama i le Lagi. Ua Ia tuuina atu ia te oe faamanuiaga silisili, e aofia ai le atoaga o le talalelei ma sauniga ma feagaiga paia e fusia ai oe ia te Ia ma aumaia ai Lona mana i lou olaga. Faatasi ai ma na faamanuiaga e oo mai ai le tiutetauave faaopoopo. Na te silafia e mafai ona e faia se eseesega i le lalolagi, ma e manaomia ai, i le tele o tulaga, le ese mai le lalolagi.”
O lo tatou olaga faaletino e mafai ona faatusa i se vaa la’u pasese tele lea ua auina mai e le Atua i Ana fanau uma a o latou femalagaai mai le tasi vasa i le isi. O le faigamalaga ua faatumulia i avanoa e a’oa’o ai, tuputupu a’e ai, ia fiafia, ma alualu i luma, ae o loo tumu foi i tulaga mata’utia. E alofa le Atua i Ana fanau uma ma o loo popole mo lo latou tulaga manuia. E le finagalo o Ia ia maumau se tasi o i latou, o lea ua Ia valaaulia ai i latou o e loto ia avea ma tagata o Lana auvaa—o oe lena. Ona o lau filifiliga ia osia ma tausia feagaiga, ua Ia ofo mai ai ia te oe Lona faatuatuaga. Ua Ia faatuatuaina oe ina ia ese ai, iloga, ma tavavaeesea ona o le galuega taua ua Ia faatuatuaina oe e fai.
Mafaufau i ai! Ua faatuatuaina oe e le Atua—mai tagata uma i luga o le fogaeleele, o fanau o le feagaiga, o Lana auvaa—e fesoasoani i Lana galuega o le aumaia o Ana fanau uma i le saogalemu i le aiga ia te Ia. E leitioa saunoa Peresitene Polika Iaga i se tasi taimi, “O agelu uma i le lagi o loo vaavaai atu i nei tagata toalaiti lava.”
Pe a e tilotilo solo i luga o lenei vaa tele ua ta’ua o le lalolagi, atonu e te vaai ai i isi tagata o loo nofonofo i luga o nofoa ma inupia ai, taaalo faitupe i kasino, oofu i laei toe a telenonoa, o loo punonou faasoloatoa i telefoni feaveai, ma faamaumau le tele o le taimi e taaalo ai i taaloga vitio, Ae nai lo lou tau mafaufau, “Aisea ou te le mafai ai ona faia le la mea?” e mafai ona e manatua e le o oe o se pasese masani. O oe o se tasi o le auvaa. O loo ia te oe ni tiutetauave e le o i ai i tagata o le pasese. E pei ona ta’ua i se tasi taimi e Sister Ardeth Kapp, “E le mafai ona avea oe ma se leoleo faaola i le matafaga pe afai e te foliga pei o isi tagata taeele uma i luga o le matafaga.”
Ma ae e te le’i lotovaivai ona o matafaioi faaopoopo uma, faamolemole ia manatua ua maua e le auvaa se mea e le maua i isi pasese o le vaa: taui. Sa saunoa Elder Neil L. Andersen, “O loo i ai se taui o le mana faaleagaga mo ē amiotonu,” e aofia ai se “faamautinoaga sili atu, faamaoniga sili atu, ma se talitonuga maumaututu sili atu.” E pei o Aperaamo anamua, e te maua le fiafia ma le filemu sili atu, amiotonu sili atu, ma le iloa sili atu. O lou taui e le na’o se maota i le lagi ma ni auala ua pae i auro. O le a faigofie lava i le Tama Faalelagi ona foai atu ia te oe mea uma ua ia te Ia. O Lona finagalo o le fesoasoani lea ia te oe ia avea ma mea uma ua avea ai o Ia. O le mea lea, ua manaomia atili ai oe e au tautinoga, ona o le auala lena o loo faaaoga atili ai oe e le Atua.
O se “mea tele ua talosagaina mai soo se tasi, ae e le o oe ua na’o soo se tasi”! O outou o le autalavou o le tofi ulumatua tautupu. O lou faiā faalefeagaiga ma le Atua ma Iesu Keriso o se faiā o le faatuatuaina lea e te maua ai le avanoa i se fuataga tele atu o lo Laua alofatunoa—le Laua fesoasoaniga faalelagi, faaeega mai o le malosi, ma le mana gafatia. O lena mana e le na o se mea e moomoo i ai, se laki, po o se valoaga e faataunuu e le tagata lava ia. E monilava.
A o e faataunuuina ou tiutetauave o le tofi ulumatua, e le tuua lava na o oe. E te lua galulue faatasi ma le Alii o le tovine. O loo lua galue limalima faatasi ma Iesu Keriso. I feagaiga fou taitasi—ma a o faalolotoina lou sootaga ma Ia—e te lua uumau atili le tasi ma le isi seia oo ina mausali faatasi le uu. I lena faatusa paia o Lona alofa tunoa, o le a e maua ai uma le manao ma le malosi e ola tonu ai i le auala na soifua ai le Faaola—na ese mai le lalolagi. Ua e mafaia lenei mea ona o loo i ai Iesu Keriso e lagolago oe!
I le 2 Nifae 2:6 tatou te faitau ai, “O le mea lea, o le togiola e oo mai ma ala mai i le Mesia Paia; ona ua tumu o ia i le alofa tunoa ma le upumoni.” Ona e tumu o ia i le upumoni, Na te silasila mai ia te oe i lou tagata moni o i ai—measese, vaivaiga, faaletonu, ma mea uma. Ona e tumu o Ia i le alofa tunoa, Na te silasila mai ia te oe i le tagata moni e mafai ona avea ai oe. Na te faafetaui ia te oe i le mea o loo e i ai ma fesoasoani ia e salamo ma alualu i luma, manumalo ma avea ai.
“Le autalavou o le tofi ulumatua tautupu, tutumau, tutumau, tutumau!” Ou te molimau atu e alofagia outou—ma e faatuatuaina outou—i le asō, i le 20 tausaga, ma le faavavau. ‘Aua ne’i e faatau atua lou tofi ulumatua mo mea le aoga o le lalolagi. ‘Aua ne’i faafesuia’ia mea uma mo le leai o se mea. ‘Aua ne’i suia oe e le lalolagi ona o oe na fanau mai e sui le lalolagi. I le suafa o Iesu Keriso, amene.