“O Outou o A’u Uo”
O le tautinoga a le Faaola “o outou o a’u uo” o se valaau manino e fausia ni sootaga maualuluga atu ma sili atu ona paia i fanau uma a le Atua.
I se lalolagi ua tumu i finauga ma fevaevaeaiga, lea ua suitulaga ai faamasinoga ma le faa’amu’amu i le faiga o fuafuaga e lipoti ai mataupu mo atugaluga o tagata ia faaopoopo le malamalamaaga, ma o faigauo ua faamatalatala i ituaiga - le ‘au pai ma le ‘au lafai, ua ou iloa e i ai se faataitaiga manino, faigofie, ma faaleatua e mafai ona tatou vaavaai i ai mo le lotogatasi, alofa, ma le avea ma ni ō. O lena faataitaiga o Iesu Keriso. Ou te molimau atu o Ia o le tuufaatasia sili.
O i Tatou o Ana Uo
Ia Tesema o le 1832, a o “atili aligaliga” le “tulai mai o mala i atunuu” nai lo se isi lava taimi talu mai le faatulagaga o le Ekalesia, sa faapotopoto ai e taitai o le Au Paia o Aso e Gata Ai i Katelani, Ohaio, mo se konafesi. Sa latou tatalo “taitoatasi ma faatasi i le Alii e faaali mai lona finagalo ia i [latou]” I le faailoa aloaia ai o tatalo a nei tagata faamaoni o le ekalesia i taimi o mala tetele, sa faamafanafanaina ai i latou e le Alii, ma faatolu ona faalani le Au Paia i ni upu mamana se lua: “a’u uo.”
Ua leva ona faaigoa e Iesu Keriso Ona soo faamaoni o Ana uo. E faasefulu ma le fa i le Mataupu Faavae ma Feagaiga, ona faaaoga e le Faaola le faaupuga uo e faamatalatala ai se sootaga paia ma le pele. Ou te le o talanoa atu e uiga i le upu uo e pei ona faamatalaina ai e le lalolagi—e faalagolago i e taumulimuli i fesootaiga faaneionapo po o “likes.” E le mafai ona suitulaga ai se hashtag [faaapefa’i] po o se fuainumera i luga o le Instagram po o le Tweeter.
Ou te tautino atu, a o o’u talavou, ou te manatua lo’u le fiafia i talanoaga pe a ou faalogo i na upu e ese le tiga “Ei, e mafai ona tau lava ina ta uo?” po o le “Se tau lava ina tatou faauo.” E leai se vaipanoa i tusitusiga paia tatou te faalogo ai ia te Ia o faapea mai, “Ua na o outou lava o ni a’u uo.” Ae, na Ia aoao mai e faapea “e le sili lava le alofa o se tasi i lenei alofa, ia tuuina atu e se tasi lona ola e sui a’i ana uo.” Ma “o outou ia o i latou o e na tuu mai e loʼu Tamā ia te aʼu; o outou o a’u uo.”
E manino lava le gaualofa: e silafia lelei i tatou taitoatasi e le Faaola ma vaavaaia i tatou. O lea vaavaaiga tuuto e le o se mea itiiti pe faatauvaa. Ae, e faaeaina, e musuia, ma e faavavau. Ou te vaai i le tautinoga a le Faaola “o outou o a’u uo” o se valaau manino e fausia ni sootaga maualuluga atu ma sili atu ona paia i fanau uma a le Atua “ina ia tasi i tatou.” Tatou te faia lenei mea pe a tatou o mai faatasi e saili avanoa e soofaatasi ai ma se lagona o ni ō mo i tatou uma.
Ua Tasi i Tatou ia te Ia
Na matagofie le faapupula mai e le Faaola o lenei mea i Lana valaau e “sau, mulimuli mai ia te au.” Sa Ia faaaogaina meaalofa ma uiga faaleatua taitasi a se vaega eseese o soo ina ia tofia ai Ana Aposetolo. Sa Ia tofia le au faifaiva, selote, o le au uso na lauiloa i o latou uiga faafaititili, e oo lava i se ao lafoga. O lo latou talitonuga i le Faaola ma le mananao e faalatalata atu ia te Ia na soofaatasia ai i latou. Sa latou vaavaai atu ia te Ia, ma vaaia le Atua e ala atu ia te Ia, ma “sa latou tuua ai loa o latou upega, ae mulimuli atu ia te Ia.”
Ua ou vaai foi i le ala e aumaia faatasi ai i tatou ia tasi pe a fauina ni sootaga ia maualuluga ma paia atu. Sa faamanuiaina i ma’ua ma lo’u toalua o Jennifer, e tausi le ma fanau e toalima i le Aai o Niu Ioka. O iina i lena aai, na matou fauina ai ni sootaga taua ma le paia ma o matou tuaoi, uo i le a’oga, paaga faipisinisi, taitai o lotu eseese, ma le Au Paia.
Ia Me o le 2020, ina ua faatoa amata ona tauivi le lalolagi ma le salalau o le faama’i oti i le lalolagi atoa, sa fono sui auai o le Komisi o Taitai Faalelotu o le Aai o Niu Ioka i ala faaeletonika i se fono na taloina faanatinati. Sa leai se lisi o ni mataupu talanoaina. Leai ni malo faapitoa. Sa na o se talosaga e o mai faatasi ma talanoaina luitau sa matou feagai o ni taitai lotu. Sa faatoa lipotia mai e le Ofisa Tutotonu mo le Faafoefoeina o le Faama’i e faapea o lo matou aai o le totonugalemu lea o le taulaiga o le faama’i oti o le KOVITI-19 i le Iunaite Setete. O lona uiga e le toe i ai ni tauaofiaga. Le toe i ai se toe o mai faatasi.
Mo nei taitai faalelotu, o le aveesea o le galuega faafaifeau patino, le tauaofiaga faatasi, ma tapuaiga faalevaiaso o se matuai ta faataumaoi. O si a matou vaega toaitiiti—lea na aofia ai se katinale, faafeagaiga, rapi, taitai mosalemi, faifeau, a’oa’o, ma se toeaina—sa faalogologo i ai, faaōleōle, ma lagolago le tasi ma le isi. Nai lo le taulai i o matou eseesega, sa matou vaai i mea sa tutusa ai i matou. Sa matou talanoa i mea e mafai ona fai ona talanoa ai lea i avanoa. Sa matou tutufaatasi ma tali atu i fesili e uiga i le faatuatua ma le lumanai. Ona matou tatalo ai lea. Oka se faanaunautaiga na matou tatalo ai.
I se aai e maoae le eseese ma faatumulia i aganuu lavelave ma le vavamamao, sa matou vaaia le molo’aua o o matou eseesega ina ua matou tutufaatasi o ni uo e tasi le leo, tasi le faamoemoe, ma tasi le tatalo.
Sa matou le toe vaai aga’i atu i le isi itu o le laulau i le tasi ma le isi, ae ua vaai i luga faatasi ma le tasi ma le isi. Sa matou tuua isi fonotaga na sosoo ai ua sili atu ona lotogatasi ma ua saunia e sii a matou “suo” ma ō e galulue. O le faapaaga na tulai mai ma le auaunaga na tuuina atu i le fiaafe o tagata Niu Ioka na aoaoina ai a’u e faapea, i se lalolagi e tausisi ai tagata mo fevaevaeaiga, tūtūmamao, ma le lē fia auai, e i ai lava le tele na’ua o mea e soofaatasi ai i tatou nai lo le fevaevaea’i ai. Na aioi mai le Faaola, “Ia tasi outou; ma afai tou te lē tasi e lē a a’u outou.”
Uso e ma tuafafine, ua tatau ona tuu lo tatou autilotilo mo mafuaaga e fevaevaea’i ai ae saili avanoa ia “tasi ai.” Ua Ia faamanuiaina i tatou i ni meaalofa tulagaese ma uiga faaleatua e valaaulia ai le aoao mai le tasi ma le isi ma tuputupu a’e ai le tagata lava ia. E tele taimi ou te ta’u atu ai i a’u tamaiti aoga i le iunivesite e faapea, afai ou te faia le mea tou te fai ae outou faia le mea ou te fai, e le manaomia la e le tasi le isi. Ae ona tou te le faia le mea ou te fai ma ou te le faia foi le mea tou te fai, o lea e manaomia ai e le tasi le isi. Ma o lena manaoga e soofaatasia ai i tatou. Ina ia fevaevaea’i ma faatoilalo o le fuafuaga lea a le fili e faatama’ia ai faigauo, aiga, ma le faatuatua. O le Faaola o Ia lea e tuufaatasia.
O Ni Ō Tatou o Ia
O se tasi o faamanuiaga folafolaina o le “ia avea ma tasi” o se lagona mamana lea o le avea ma ni ō. Na aoao mai e Elder Quentin L. Cook e faapea “o le ute o le avea moni ma ni ō o le tasi lea ma Keriso.”
I se asiasiga talu ai nei ma lo’u aiga i le atunuu o Kana, i Aferika Sisifo, sa ou maofa ai i se agaifanua a le atunuu. Pe a taunuu i se lotu po o se aiga, sa faafeiloaia i matou i upu “e talileleia outou.” Pe a laulau mai meaai, e faasilasila mai e lo matou talimalo, “Ua valaaulia outou.” O nei faafeiloai faigofie, sa tuuina mai ma le faamoemoe ma le loto atoa. E talileleia outou. Ua valaaulia outou.
Tatou te tuuina ni tautinoga paia faapena i luga o faitotoa o o tatou maotatapua’i. Ae o le faailo “E Talia Tagata Asiasi Mai” e lē lava lena. Pe o tatou talileleia ea ma le agalelei i latou uma e ulu mai i faitotoa? Uso e ma tuafafine, e le taitai ona lava le na o le nofo i atunofoa. E tatau ona tatou ua’i atu i le valaau a le Faaola e fau ni sootaga maualuluga atu ma paia atu faatasi ma fanau uma a le Atua. E tatau ona faatino lo tatou faatuatua! E tele ina faamanatu mai e lo’u tama faapea o le na o le nofo ai i se atunofoa i le Aso Sa, e le avea ai oe o se Kerisiano lelei e sili atu, nai lo le moe i se faletaavale e avea ai oe o se taavale.
E tatau ona tatou ola i o tatou olaga ina ia le vaai mai ai le lalolagi ia i tatou, ae iloa atu o Ia e ala ia i tatou. E le na o Aso Sa e tupu ai lenei mea. E tupu i le faleoloa, i le pamu kesi, i le fonotaga a le aoga, i potopotoga a le pitonuu—o nofoaga uma e galulue ma nonofo ai tagata ua papatisoina ma i latou e le’i papatisoina o o tatou aiga.
Ou te tapuai i le Aso Sa o se faamanatu tatou te manaomia e le tasi le isi ma tatou manaomia faatasi ai o Ia. O a tatou meaalofa tulagaese e eseese ai i tatou i se lalolagi salemausau, e soofaatasia i tatou i se avanoa paia. Ua valaauina i tatou e le Alii e fesoasoani le tasi i le isi, si’i a’e e le tasi le isi, ma fefaamalamalamaa’i le tasi ma le isi. O le mea lea sa Ia faia ina ua Ia faamaloloina le fafine na maua i le punatoto, faamamā le lepela sa ole atu mo Lona alofamutimutivale, fautuaina le aloalii taulealea na fesili po o le a se isi mea e mafai ona ia faia, sa alofa ia Nikotemo o le na iloaina ae na tautevateva i lona faatuatua, ma sa nonofo i lalo ma le fafine i le vaieli, o lē sa le fetaui ma agaifanua o na ona po ae na ia tautino i ai Lana misiona faalemesia. O lenei mea ia te a’u o le lotu—o se nofoaga o le faapotopotoina ma le toefaafoisia, lipea ma toefotuai. E pei ona sa aoao mai Peresitene Russell M. Nelson: “O le upega o le talalelei o le upega aupito sili lea ona telē i le lalolagi. Ua valaaulia e Ie Atua tagata uma e o mai ia te Ia. … O loo i ai se avanoa mo tagata uma.”
Atonu e i ai nisi ua i ai ni aafiaga e te lagona ai e le o oe o se tasi o i latou. O le savali a le Faaola mo oe ma a’u, e tutusa lava: “Ia outou o mai ia te au, o outou uma o e tigaina ma mafatia i avega, o a’u foi e malolo ai outou.” O le talalelei a Iesu Keriso o le nofoaga atoatoa lea mo i tatou. O le o mai i le lotu e maua ai le faamoemoe o aso sili atu, o le folafolaga e le tuua lava na o oe, ma o se aiga e manaomia i tatou e faapei foi ona tatou moomia ai i latou. Ua faamautinoa mai e Elder D. Todd Christofferson e faapea “o le tasi ai ma le Tama, le Alo, ma le Agaga Paia o le aunoa lea o se masalosalo i le avea ai ma ni ō a’ia’i.” I soo se tasi ua la’a ese ma o loo sailia se avanoa e toefoi mai ai, ou te ofoina atu se upumoni e faavavau ma se valaaulia: O oe o ni ō.O Foi mai. O le taimi lenei.
I se lalolagi fefinauai ma le fevataua’i, ou te molimau atu o le Faaola o Iesu Keriso o le tuufaatasia sili lea. Se’i ou valaaulia i tatou taitoatasi ina ia agavaa mo le valaaulia a le Faaola ina “ia tasi” ma ia toa e tautino atu e pei ona sa Ia faia, “O outou o a’u uo.” I le suafa paia o Iesu Keriso, amene.