Tala Fou o le Ekalesia

Ua Faamanatuina e Peresitene Nelson Lona Aso Soifua Lona 100

Sa auai faatasi taitai o Le Ekalesia a Iesu Keriso o le Au Paia o Aso e Gata Ai ma aiga ma uo i le aso 9 o Setema, 2024, e faamamaluina le perofeta ma le Peresitene o le Ekalesia o Russell M. Nelson i lona aso soifua lona 100.

Sa faia le taualumaga i le Aai o Sate Leki ma faasalalauina i le salafa o le lalolagi. Sa faaalia ai musika tuusao, saafiafiga faavitio mai taitai o faatuatuaga eseese, o saunoaga mai taitai o le Ekalesia ma tagata o le aiga o Peresitene Nelson, ma vitio mai tagata o le Ekalesia na faasoa mai ai le auala na latou auauna atu ai i le toatasi.

Sa faafetai Peresitene Nelson i aiga, uo, ma le Au Paia o Aso e Gata Ai mo lo latou agalelei ma le lagolago. Sa ia faasoa mai lona agaga talisapaia mo le anoanoai o savali o le aso fanau ma le tali mai a le lalolagi atoa i lana valaaulia “99+1”, lea na ia uunaia ai tagata “ia aapa atu i ‘le to’atasi’ i o tatou olaga atonu o loo lagonaina le leiloloa pe tuuatoatasi” (Facebook, 1 Iuni, 2024, facebook.com/russell.m.nelson).

Sa faamamafa mai e le perofeta le taua o le faatuatua, o se vaaiga e faavavau i le ola, ma le taulaga togiola a Iesu Keriso. “O’u uso e ma tuafafine pele, o le umi o lo outou olaga e le tutusa le taua ma le ituaiga olaga o loo outou ola ai,” o le tala lea a Peresitene Nelson. “Mo i tatou taitoatasi, e oo lava i se alii e 100 tausaga le matua, e vave lava ona mavae atu le olaga. O la’u tatalo ia e faatagaina le Atua e manumalo i lou olaga. Ia osifeagaiga ma Ia. Tumau i le ala o feagaiga. Saunia e toe foi atu e toe nonofo faatasi ma Ia.”

Na faasoa mai e Peresitene Dallin H. Oaks ma Henry B. Eyring, fesoasoani a Peresitene Nelson i le Au Peresitene Sili, a la’ua matauga mai le galulue faatasi ai ma le perofeta mo le ono ma le afa tausaga. Sa la faamamafaina le mafanafana, faaaloalo o Peresitene Nelson mo isi, ma uiga faaKeriso.

“O le i ai i totonu o se potu po o se fonotaga po o se talanoaga ma Peresitene Nelson e te maua ai le avanoa e iloa ai le tulaga o le a i ai pe a faatasi ma le Faaola,” o le tala lea a Peresitene Oaks. “O Ia o le sui o le Faaola. O Ia o lo tatou faaa’oa’o.”